محمد عبد الماجد

مالها جابت ليها (رجفة)؟


لو لقى ليه مريخابي شايل ليه (باسطة) – بقول ليه انتوا (الباسطة) ليكم شنو كمان؟..انتوا (موية الجبنة) كتيرة عليكم

آخر حاجة بقول ليك انتوا ما شلتوا الكورة وجريتو – كمان بعد عملية (زيكو) عندكم عين تتفاصحوا

بكري المدينة بتشتموا فيه ست سنوات منذ ان كان في الاهلي مدني..وقت جبتوه عملتوه لينا ميسي إلّا ربع

يا زول بس الله يأهلنا…عاوزين نتأهل…المباراة ظروفها ما معروفة..والكورة في (الغربة) زي (العدس) الديلفري

· ود الوجيه ..صاحب اطول (لسان) في الحلة..لمن الهلال يكون غالب ما في زول في الحلة بقدر يقيف معاهو.

· الطحنية بتكمل من سبعة صباحا.

· ما في زول معاهو بقدر يشيل ليه (باسطة).

· لو لقى ليه مريخابي شايل ليه (باسطة) – بقول ليه انتوا الباسطة ليكم شنو كمان؟.

· انتوا (موية الجبنة) كتيرة عليكم.

· المريخاب عارفنو بخلوا ليه الشارع…ولا بقدروا يقولوا ليه حاجة.

· بوقف ليك الحلة دي كلها على فد كراع.

· تلقاه في الدكان فاتح الموضوع.

· في الفرن.

· في الصيدلية.

· قدام المدرسة.

· في الجزارة.

· في المكتب.

· في الشارع.

· في اي حتة تلقاهو فاتح ليك موضوع (الهلال).

· لو عاوزو يدور ما يسكت ليك لي تاني يوم – قول ليه قون بشه (تسلل).

· ما بنوم الليل.

· بحددها معاك – لمن تفهم شيء.

· او قول ليه في (ضربة جزاء) ما احتسبوها ضد الهلال – اعمل ليه فيها (مامون ابوشيبة).

· بيستدل ليك بي حاجات من سنة 1966م.

· لا بخلي (قنديل) ولا بخلي (عباس جميل).

· برجع ليك لي جدعة تماس سنة 1973م..

· وآخر حاجة بقول ليك انتوا ما شلتوا الكورة وجريتو – كمان بعد عملية (زيكو) عندكم عين تتفاصحوا.

· انتوا ما بتخجلوا.

· بعد عماليكم دي قاعدين تتفاصحوا.

· بكري المدينة بتشتموا فيه ست سنوات منذ ان كان في الاهلي مدني..وقت جبتوه علمتوه لينا ميسي إلّا ربع.

· ود الوجيه – زول صعب ما بقبل ليك (هبشه) في الهلال.

· لمن الهلال يتغلب كمان لا قدر اللـه (تفوا من خشمكم) – ود الوجيه (21) يوم تاني ما بتشوفو.

· واول ما تلاقيه بعد غياب ..تقول ليه يا ود الوجيه وين انت؟..الغيبة شنو؟…ان شاءاللـه خير.

· بقول ليك واللـه (الملاريا) ما خلت فينا حاجة.

· انتهت مننا فد مرة.

· واللـه قادر تجيب ليه في الحالة دي سيرة (الهلال).

· بندمك.

· ببلعك لسانك.

· ود الوجيه …غالب ما بريح ليه زول.

· مغلوب لا قدر اللـه …ما في زول بقدر يناقشو.

· زول صعب قلت ليكم – كمان الهلالاب بيلعبوا – الحمدلله الهلالاب رأسهم مرفوع في كل الاحوال.

· ما بتصاقعوا.

· ود الوجيه دا – قبل مباراة الهلال بـ (21) يوم ..اي زول بلاقى في الحلة بقول ليه …الهلال بغلب سبعة.

· المباراة محسومة.

· ونحن ما عندنا اي مشكلة.

· ناس بشه ديل في ربع ساعة بحسموها.

· كمان نحن بنلعب.

· بفصل ليك السبعة قون – قون – بنتقل ليك الى تلفزة خارجية قبل (21) يوم.

· بجدع ليك في الاقوان دي زي كراريس الانشاء.

· لسانو طويل.

· بسمع ليك ناس الحلة كلها.

· وبقيف ليهم في بداية الشارع.

· المباراة وقت يكون باقى ليها (15) يوم – ود الوجيه بتراجع من السبعة وبقول ليك الهلال بغلب خمسة.

· خمسة كفاية.

· لكن خمسة اكيدة…ما فيها اي كلام.

· لا فيها شق ولا طق ولا ضربة جزاء.

· خمسة اقوان عديل كدا ..بي عرق الجبين.

· ناس نزار حامد الخمسة في نص ساعة بجيبوا ليك خبرها.

· ناس صعبين.

· وما بتفاهموا.

· لمن المباراة يكون باقى ليها عشرة ايام …ود الوجيه بقول ليك الهلال غالب تلاتة.

· تقول ليه يا ود الوجيه انت في نفس الحتة دي قبل خمسة يوم ما قلت الهلال بغلب خمسة …مالك اتراجعت؟.

· يقول ليك خمسة – نحن لاعبين ضد النسور ..برضو الزول يعطي الفريق المنافس حقو.

· الاحترام واجب.

· اهم شيء احترام المنافس.

· بعدين التلاتة مالها؟ – واللـه ناس كاريكا ديل يحسموا ليك المباراة من قبل ما تمغرب.

· الناس واقفة في الصف – الهلال بحسمها.

· لمن المباراة يكون باقى ليها اسبوع – ود الوجيه بقول ليك الهلال بغلب اتنين.

· حبتين زي السمسم.

· نحن ذاتو ما عاوزين اكتر من الحبتين ديل.

· واحد نزار والتاني بشه.

· الموضوع منتهي.

· تقوم تلاقى ود الوجيه والمباراة باقى ليها (72) ساعة ..بتلقاهو اتراجع من الاتنين.

· تقول ليه يا ود الوجيه اها الكورة كيف؟.

· يقول ليك واحد صفر.

· مسمار واحد بس كفاية.

· يجيبوا ليك (بشه)..ويخلي ليك الجماعة يتلفتوا.

· يمين القون الواحد كمان حار بي شكل.

· سخن.

· مولع نار.

· تقول ليه يا ود الوجيه انت قبل (21) يوم ما قلت سبعة.

· ود الوجيه يقول ليك سبعة وين مع (الحكام) الحمر ديل؟.

· هم ديل بريحونا.

· هم ديل بخلوا ليهم شيء.

· ديل عذبونا عذاب.

· بقيفوا لينا في رقبتنا.

· بعدين سبعة – وواحد كلو واحد.

· المهم ينتصر الهلال.

· واللـه بي فد قون نقلب ليك البلد دي فوق وتحت.

· ما بنخلي لينا مريخابي.

· يوم المباراة الصباح ..تلاقى ود الوجيه ..حالتو ما بتعجبك ..عيونو حمر ..وبشرب موية كتير.

· تقول ليه يا ود الوجيه : اها الليلة الكور كيف؟.

· يقول ليك تعادل كفاية.

· نقطة بتأهلنا.

· المهم نتأهل.

· نحن لو اتأهلنا صعبين.

· تاني إلّا الكاس.

· بس نتأهل كيف؟.

· تقول ليه تعادل يا ود الوجيه….تعادل بعد لسانك الطويل دا.

· تتفاصح ليك شهر ..وعاوز تجي تقول لينا تعادل.

· يقول ليك ايوا تعادل …نحن عاوزين شنو من المباراة اكتر من (النقطة).

· بعدين الاتحاد احسن لينا من المريخ.

· ناس المريخ ديل بدخلوا المباراة بي حكامهم.

· ديل ناس صعبين.

· ويا ريت لو بكتفوا بالحكام.

· ديل ناس ما مضمونين.

· احسن لينا ناس الاتحاد ديل.

· الغريب. احسن لينا من جيرانا ديل.

· مباريات هلال مريخ اصلو ما معروفة – ما مضمونة و (الهوا) فيها كتير.

· لكن (النقطة) مضمونة.

· ما تخافوا – ما تشيلوا هم.

· تقوم تلاقى ود الوجيه العصر ..الكلام البقول ليكم فيه فوق داك …كان بالصباح.

· العصر ود الوجيه حالتو بتكون صعبة.

· تقول ليه يا ود الوجيه مالك – الحاصل شنو؟.

· يسوقك ويطرف بيك كدا – ويقول ليك واللـه جابت ليها (رجفة)..يا زول الكورة دي اصلو ما مضمونة.

· الكورة دي (مجنونة).

· المصريين ديل ما مضمونين.

· ديل لاعبين بدون ضغوط.

· وما عندهم اي ضغط.

· ولا عندهم هم.

· الكلام ولادنا ديل – بلعبوا تحت ضغط رهيب.

· يا زول بس اللـه يأهلنا.

· عاوزين نتأهل.

· المباراة ظروفها ما معروفة.

· والكورة في (الغربة) زي (العدس) الديلفري.

· ……..

· ملحوظة : واللـه يا ود الوجيه اتاريك كنت بتتفاصح ساكت.

هوامش

· هو ود الوجيه براهو.

· الهلال دا وقت يكون لاعب – زول في الشارع ساكت ما بتلقاهو واقف.

· الاخ مامون ابوشيبة عاد وبرر حكاية (التواطؤ) الذي دعا له تحت حجة (اتفاق حلال).

· ابوشيبة اتجه في تبريره الى ان مباراة المريخ والاتحاد اذا حصل فيها اتفاق ليس هناك فريق متضرر من هذا.

· القال ليك منو يا ابوشيبة؟.

· انت بتدعوا لهذا الاتفاق خوفا من ان يتعرض لاعبي الفريق الى الكروت الملونة.

· وفي تعرض لاعبي الفريقين للكروت الملونة فائدة كبيرة للصاعدين من المجموعة الاولى.

· يهم الصاعدين من المجموعة الاولى ان يقابلوا الصاعدين من المجموعة التانية وهما يفقدان اكثر من عنصر بسبب الايقاف.

· يبقى اي (اتفاق) – هو تواطؤ لأن هناك اطراف اخرى متضررة منه.

· الهلال وسموحة – والتطواني ومازيمبي سوف يفقدوا بعض عناصرهم في مباريات اليوم.

· من العدل والانصاف ان يلعب المريخ والاتحاد بنفس مخاطر الايقاف.

· الهلال قادر اليوم ان شاءاللـه على التأهل.

· مطلوب من الهلال ان يقفل بصورة جيدة ..(نقطة) في اليد ولا تلاتة في الشجرة.

· قفلوا على (النقطة) واحرصوا عليها.

· اللعب الدفاعي اسهل من اللعب الهجومي.

· الكوكي يقود الهلال في ظروف صعبة ووالدته مريضة.

· اللـه يكفي الهلال شر العوارض.

· الضغوط التى يلعب تحتها الهلال قد تعرضها للاصابات والكروت الملونة.

· عكس سموحة التى تلعب محررة من الضغوط.

· لذلك الحذر واجب.

· هذا ما يجعل (النقطة) اسهل للمحافظة عليها.

· انتصار الهلال سوف يجعله يبذل جهدا كبيرا..وضغط المباريات القادمة لا يقبل ان يفقد الهلال لاعب للاصابة او الايقاف لا قدر اللـه.

· نسأل اللـه ان يعود الهلال متأهل.

· التأهل هو الاهم.

· واللـه غالب.

· ………..

· عاجل : فرحتنا اليوم قبل ما تمغرب ان شاءاللـه.


تعليق واحد