زواج سوداناس

احمد في اقل من 4 دقائق لخص كل القصة التي شغلت العالم.. لو كان مسؤول في السودان كان ردح ساعتين



شارك الموضوع :

في حادثة الطفل الأمريكي الجنسية السوداني الأصل (أحمد محمد الحسن سعيد الصوفي) اعجبتني القدرة الهائلة للطفل (احمد) في التعاطي مع أجهزة الاعلام .. احمد في اقل من 4 دقائق لخص كل الشئ الحاصل الذي شغل العالم و أجاب على كل أسئلة الصحافة وأجهزة الاعلام ..هسع دا لو كان مسؤول عندنا في السودان كان ردح ساعتين ونص وما فهمنا منو اي شئ ! ودا ذاتو بورينا انو نوع التعليم والثقافة لها تاثير كبير جدا في تكوين الشخصية وتغيير نمط السلوك وطريقة التواصل مع الآخرين وتوصيل المعلومة بايجاز..

قبل شوية انا كتبت بوست عن نزول أمطار في مدينة (ربك)..وتعالوا شوفوا الفلسفة العمياء وشيل البطارية في القمرة : واحد علق قائلا: يا بت ما تقولي مطر قولي غيث.. واحد تاني بقول ياتهاني ما قالوا أمطار ما صاح حقو تكتبي غيث!!! تعليق تالت بيقول : بنو اسرائيل ربنا قال ليهم قولوا حطة ..وقالوا (حنطة) ! بمعنى قمح ! وغيروا الكلمة وربنا عذبهم !! مطر يعني عذاب!!
هسع عليكم الله (الدش) دا علاقتو شنو بأمطار نزلت في ربك؟! وعلاقتو ذاتو شنو باحمد السوداني الامريكاني؟
نحن ناس بنحب نستعرض ونتفلسف ونقشر ونلفت النظر ونظهر التدين المظهري والشكلي وإلا فما الداعي لكل هذا ؟
قال غيث قال ! اجي ! وكلمة أمطار حرام ولا مكروهة ؟!

تهاني عوض

شارك الموضوع :

تعليقات الفيسبوك

تعليقات


7 التعليقات

إنتقل إلى نموذج التعليقات

      1. 1
        ساخرون

        تعالو نتخيل لو كان أحمد في السودان في مدرسة حكومية

        سيقول له المدير :
        ما هو لو كان أهلك ربوك كويس ما كنت بتبقى طول وقتك قاعد تربط في سلوكك دي
        يربطوك إن شاءالله في التيجاني الماحي يا عمبلوق ويضبحوك في العيد ويعلقوك في باب بيتكم
        هسي جبت لينا البوليس لحدي باب المدرسة
        خليهم يودوك الإصلاحيةعشان دا مكانك الطبيعي يا مستهتر
        خلي البوليس يربيك ويعلموك الاختراعات كويس
        هسي ما كان وقكت عندك اختراعات تخترع لينا ريسيفر يفك لينا شفرة قناة الجزيرة عشان نشوف الكورة مجانا ، يفكوك في جهنم
        يا بعيد لو فيك صلاح وفلاح وأصلك تلولو في سلوك الكهربا كان تخترع ليك طريقة لسرقة الكهربا من الهيئة القومية من غير ما يعرفو ، ماهم ذاااتهم حرامية حرمت عيشتك
        جاتك الكتاحة في نضاراتك الكبار ديل ياعموش

        *********************
        عفوا أوباما هنا في السودان مليون أحمد وأحمد ورندا وربا ….فقط ارفع الحصار الجائر وحتشوف

        الطفل السوداني وظف البيئة واخترع لنفسه ما يلعب به من المواد البسيطة التي حوله

        الرد
      2. 2
        نوني

        صفي حساباتك بعيد مننا

        الرد
      3. 3
        كلس

        شوف بالله جنس دي …ردحي …بالله ده أسلوب ؟ وين نحن ؟ انتي مفروض تدخلي محو اميه في الفهم والأسلوب والذوق والاحترام ……ردحي ردحي ….الله يرحمك يا صحافة بلادي ..

        الرد
      4. 4
        ahmed

        انتى هسه خلاص يعنى عاملة فيها ابو المفاهيم ويادنيا مافيكى الا انا
        وكرهتينا بى صورتك دى هسه يكون متصورة الصورة دى قبل عشرين سنة

        الرد
      5. 5
        ابو يمنى

        الاخت تهانى بارك الله فيك … سيرى وعين الله ترعاك … وربنا اكفيك شر الحسد … اصلا نحن كده ما عندنا غير انتقاد الاخرين …

        الرد
      6. 6
        واحد

        وانتي كل يوم قاعدة تردحى برضو. ياريت تلخصي في سطر واحد.

        الرد
      7. 7
        سوداني وافتخر

        تهاني ولاّ بعاتي دي الظاهر عليك خاليه موضوع قومي كدا

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *