زواج سوداناس

اذا كانت (لجنة الاستئنافات) في (15) دقيقة بتمنحكم (5) نقاط..غارزيتو لزومو شنو؟



شارك الموضوع :

تتخيلوا فريق المريخ آخر خمس مباريات لعبها في الممتاز حقق فيها (5) نقاط فقط..ولجنة الاستئنافات في ربع ساعة منحت ليك المريخ (5) نقاط
“””””””””””””””””””””””””””””””””””””
في التسجيلات القادمة – ح نسمع الجرايد تقول ليك الفريق جاب ليه لاعب خطير في (القوالات)
“””””””””””””””””””””””””
معقولة فريق بلعب في نصف النهائي والفارق بينو وبين بطل الدوري (6) نقاط
“”””””””””””””””””””””””””””
يا ناس الامل حارقين دمكم في الفاضي…لو اشتغلتوا هسع (قوالات) كان اتصدرتوا الدوري
“”””””””””””””””””””””””””””””””””””
• حاج (كلفتة) – زول كان بيبع اللبن….(21) سنة شغال في شغلتو دي.
• يتخيل لي بيع (اللبن) لغاية امس ما فيه حاجة.
• إلّا لجنة (ارحم يا سميري) تكون طلعت ليها قرار امس.
• قراراتهم كلها بتطلع (نص الليل).
• تقول فرانة.
• حاج كلفتة بيبع اللبن في الحلة.
• مثل كل الناس البيبعوا (اللبن) – بضربوا الباب بي قوة…وبكونوا دائما مستعجلين.
• بنتظروا (الماعون) وبشددوا على السرعة في احضاره.
• واول الشهر ما بتفاهموا.
• الساعة ستة ونص ..زي (عالم الرياضة) زمان اتنين ونص – بتلقاهو واقف في الباب.
• حاج كلفتة ذاتو بي عراقيه البيجي الواحد شايل لبنو وواقف برة.
• (21) سنة – ما سمّع ليه زول كلمة كعبة – ولا غلط ليه على زول.
• ما عندو قضية مع زول.
• يجيب (اللبن) ويفوت.
• حاج كلفتة اختفى من الحلة (9) شهور.
• قطع رأسنا.
• (9) شهور ما ظهر.
• غياب تام.
• سألنا منو؟..قلنا ليهم انتوا حاج كلفتة دا مشى وين؟.
• لا سما ولا ارض.
• قالوا لينا : حاج كلفتة مشى الدهب.
• قنعنا من (اللبن).
• الموضوع من يجيب ليه (دهب) – اقنع من (اللبن).
• بتسمعوا بي الشاي باللبن …حصل مرة سمعتوا بي الشاي بي الدهب.
• بعد سنة ونص ..حاج كلفتة عمل ليه (عمارة) في السوق العربي من (11) طابق.
• وبقى زول مرتاح.
• بتكلم في السياسة.
• ركب ليه (عربية) مرسيدس موديل 215م.
• وبقى كل اربع شهور بيمشي (عمرة).
• وبظهر مرة مرة كدا في نشرة الاخبار.
• قلنا الزول دا بقى (روسي).
• عمل ليه (نضارة).
• وركب ليه (مكيف) في الشارع.
• اتزوج اربعة نسوان.
• قلنا ليهم : حاج كلفتة الحاجات دي جابها من وين؟…معقولة (اللبن) بعمل الحاجات دي كلها.
• قالوا لينا الزول دا مشى (الدهب)…(لبن) شنو كمان؟.
• قلنا ليهم لو (الدهب) بعمل الحاجات دي كلها – الناس دي بتقرأ (طب) ليه؟.
• ولا في داعي للطب.
• الطب لزومو شنو؟…تعب ساكت.
• ولا في داعي للاغتراب.
• ولا في داعي للسلام.
• ولا في داعي للمدارس ..ورسوم المدرسة – والواجب – والامتحانات الشهرية.
• ناس المريخ هسع عملوا نفس الشيء.
• لكن ناس المريخ لا باعوا ليهم (لبن)…ولا مشوا (الدهب).
• ناس المريخ عندهم (لجنة الاستئنافات) …لجنة كوّنوها مخصوص للمريخ.
• لجنة (اسعافية) كدا.
• عاوزين يلحقوا الجماعة.
• يصلحوا الفارق…معقولة فريق بلعب في نصف النهائي والفارق بينو وبين بطل الدوري (6) نقاط.
• كتيرة.
• وشينة في حق جمال الوالي.
• ما حلوة.
• جابوا لجنة (ارحم يا سميري).
• لاحظوا اني لغاية الآن ما جبت سيرة سمير.
• دي اغنية ساكت كدا…صادفت ساكت – ووقعت براها في السطر.
• لجنة كوّنوها زي شيرنق الفطور.
• فجأة طلعت ليهم (5) نقاط.
• جابتها من وين ما عارف.
• من اللبن؟.
• من الدهب؟.
• لا تعب ..ولا عرق فيها.
• لا مستند …ولا قانون.
• (5) نقاط بالقوالات ساكت.
• والله انتوا يا ناس (هلال كادوقلي) تعبانين ساكت.
• قاعدين تلعبوا كورة لي غاية الآن – كورة شنو؟…الحركات دي الناس خلوها.
• يا ناس الامل حارقين دمكم في الفاضي…لو اشتغلتوا هسع (قوالات) كان اتصدرتوا الدوري.
• اللاعب يلبس (الكدارة) ويطلع من البيت ..يقولوا ليه ماشي وين؟.
• يقول ليهم عندنا تمرين (قوالات).
• بتاعين قوالات.
• وممكن الفريق يسافر كلو…يسألو الفريق سافر وين؟.
• يقولوا ليهم الفريق سافر معسكر للقوالات.
• المحترف ذاتو قبل ما يسجلوه مفروض يعملوا ليه اختبارات (قوالات).
• لا في داعي للاختبارات الفنية ولا في داعي للفحوصات الطبية.
• الفحوصات الطبية – عاوزين بيها شنو؟…وكورتكم بقت زي (الجبنة) كلها (قوالات).
• في التسجيلات القادمة – ح نسمع الجرايد تقول ليك الفريق جاب ليه لاعب خطير في (القوالات).
• والله الزول دا في (القوالات) ما بتلحق.
• اسرع من سادومبا.
• وممكن بعد المباراة – الجماهير تطلع من المباراة ..وهي محتجة على (القوالات).
• يقوم كدا (الخبير) فيصل سيحة يطلع يوم الجمعة ويقول الفريق دا عندو (اربع) قوالات.الاتحاد العام ذاتو مفروض لجنة الاستئنافات دي يسميها (لجنة القوالات).
• استئنافات شنو؟.
• في استئنافات بتوقف ليها لاعب سنة ونص.
• انتوا معاكم زول بتاع (مرور).
• لاعب الامل دا كتل ليه (حكم).
• الموضوع دا في زول مات فيه.
• قوالاتكم قوية لكن!!.
• الشيء الغريب ..والحاجة الما مفهومة..تتخيلوا بالورقة والقلم كدا.
• بالحساب.
• تتخيلوا فريق المريخ آخر خمس مباريات لعبها في الممتاز حقق فيها (5) نقاط فقط.
• ولجنة الاستئنافات في ربع ساعة منحت ليك المريخ (5) نقاط جاهزة كدا.
• لا فيها تعب.
• ولا عرق.
• زي الزول المشى (الدهب).
• وعمل ليه عمارة من (11) طابق.
• اللبن ما بعمل ليكم الحاجات دي.
• إلّا اللبن.
• لجنة الاستئنافات ممكن.
• لجنة الاستئنافات العملتو ليكم ..(العجب) ما عملوا.
• معقولة في ربع ساعة يمنحوكم (5) نقاط.
• دا اسرع تحويل في الدنيا.
• طيب كوفي لزومو شنو؟.
• بكري المدينة لزومو شنو؟…تعبان ساكت.
• امير كمال.
• اكرا.
• غارزيتو.
• ولا عاوزين ليكم جهاز فني مع (لجنة الاستئنافات).
• مفروض تقفلوا النادي ..وتفتحوا ليكم مكتب محاماة في السوق العربي.
• بتلقوا ليكم مكتب في عمارة الدهب.
• بطلوها الكورة ..مريخاب الجنوب ما بدوكم عوجة.
• خلوه الطابق التاني.
• مع سكرتير اتحاد القضارف دا ما عاوز ليكم اكتر من (تقرير).
• كورة شنو؟.
• الكورة انتهت في البلد.
• الكورة بقوا يلعبوها في حتات تاني.
• ولا عاوزين ليكم (نجيلة) خضراء.
• ولا عاوزين ليكم (شبكات).
• وعراضات.
• عراضات لي شنو؟.
• عندكم لجنة الاستئنافات ..ما قاعدة تقصر معاكم.
• غايتو في ناس (ضحيتهم) طلعت.
• شيتهم (ريحتها) جات.
• زي قلبة ناس (جلكسة).
• كمان ديل عندهم (شية) غريبة ..بدون ما تفتح خشمك ..بتلقى خشمك اتفتح.
• اتوماتكيا كدا.
• بحركة غير ارادية.
• اللحمة قبل ما بتصل النار بتكون وصلت حتة تانية.
• الغريبة بتتهضم في صحنها.
• قبل حتى ما تصل (الصاج).
• مسختوا لينا (الشية) قبل العيد.
• وفتحتوا لينا (شباك) ما في ليه اي داعي.
• زمان عندنا واحد ..عندو حكمة بعمل بيها (الشية).
• بقول ليك الشية ما تعمل ليها توم – ما تعمل ليها ليمون ..ما تعمل ليها اي بهارات.
• ملح ما تعملو ليها.
• تقول ليه : ليه يا حاج؟.
• بقول ليك لو عملت ليها الحاجات دي ..(شيتكم) بتنتهي وهي في طور (تشاهد غدا).
• الحاجات دي بعملوها في (الفول).
• العدس.
• القرع.
• لجنة الاستئنافات.
• اللحمة اصلو ما محتاجة للحاجات دي ..ما تقعدوا تشرعوا لينا ساكت.
• زمان برضو ..الكلام دا بدري ..قبل الاكتشافات الحديثة.
• زمان كان عندنا زول بعمل في الفول عمائل ..قرد ما بعملها.
• ح تقولوا بعمل شنو؟.
• الزول دا كان اخطر زول في (تصليح) الفول.
• مكانيكي بس في الفول.
• الزول دا كان قبل ما يصلح الفول ..بيأخد ليه نومة.
• بنقول ليه عليك الله انت هسع بتنوم مالك؟.
• بقول لينا الفول بنوم ..عشان كدا احسن يلقانا نائمين …احسن من الواحد ينوم في كوبري المك نمر.
• بكرة تلقى نفسك في (الدار).
• عشان كدا مفروض ناس الصحة او ناس (المرور) تحديدا يعملوا تحذير من الفول.
• ……..
• ملحوظة : الايامات دي ممكن ترفعوا (نخرتكم) في الفول.
هوامش
• الفول والعدس.
• لكن البتعمل فيه لجنة الاسئتنافات العدس ما بعملو.
• الزول ياكل ليه حلة عدس ..ويقول ليك (بطني) منفوخة – ما عارف من شنو؟.
• العدس بنكروه.
• الهلال تزيده الضغوط ..والحفر ولجان الاسئتنافات قوة.
• ح يلقط اي كاس.
• ويشيل اي بطولة.
• احرسوا لي لجنة الاسئتنافات.
• ديل حرمة الشهر ما راعوها.
• يا جماعة الدنيا (عيد).
• قالوا ليك هدايا العيد دورت في شكل (نقاط).
• نقطة – نقطة.
• بشه بيجي في موعده تماما.
• وكاريكا ولا بتلفت في (الصناعة).
• شغل بتاع (هندسة).
• الثعلب ..ثعلب ..ما في ذلك شك.
• كوناتيه ..زي تقول بيلعب كل يوم.
• الزول دا كان وين؟.
• …………..
• عاجل : انتوا اصابة بكري المدينة ما ح تفرق معاكم…كعبة عليكم اصابة لجنة الاستئنافات.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *