محمد عبد الماجد

يا وليّه انتي جنيتي مازيمبي وخروف في اسبوع واحد


حاج كسبرة كان بركب حافلات الكدرو وبمنطق ليك (الكمساري) يرجع ليه (الباقى) بدون ما يكون اعطاه شي
الواحد فيهم من تجيب ليه سيرة (مازيمبي) في السخانة دي بقوم يجري على (البطانية)

نحن الما عندنا قضية بالمباراة وقت قالوا لينا مازيمبي وصل شعرنا ليك بي (لفة رأس)

هناك فارق كبير بين مستوى الاهلي شندي والخرطوم الوطني لصالح الاهلي شندي

· ناس مازيمبي ديل جنّوا وإلّا شنو؟…جايين قبل اسبوع للمباراة.

· جايننا قبل اسبوع …انتوا ماشيين الدهب؟.

· سماية هي.

· اسبوع عندكم شنو؟.

· الاستعجال ليه؟.

· ناس علي جعفر ديل لو جيتوهم من المطار للملعب بتغلبوهم.

· ما محتاجين للتعب دا.

· وكمان وصلوا بي (طيارة خاصة).

· دا شغل جهجهة ساكت.

· مركب ..بتجيب ليك خبرهم.

· طيارة خاصة لي شنو؟.

· الموضوع ما بيستاهل.

· انتوا يا ناس مازيمبي ما عارفين في ناس كدا قلوبهم كعبة – وما بيستحملوا (الصدمات) دي.

· الواحد فيهم من تجيب ليه سيرة (مازيمبي) في السخانة دي بقوم يجري على (البطانية).

· ويقول ليك في الحقيقة انا ..ومن هذا المنطلق ..وحيث ان.

· نحن الما عندنا قضية بالمباراة وقت قالوا لينا مازيمبي وصل شعرنا ليك بي (لفة رأس).

· لجنة الاستئنافات وين؟.

· مريخابي قالوا ليه مازيمبي وصل.

· قال ليهم : لا عليكم اللـه قولوا حاجة غير دي.

· مالكم انتوا عاوزين تمسخوا لينا (اللحمة).

· قبل شهر رمضان ..عادي جدا تلقى ليك زول شايل ليه (لوح تلج) ما تستغرب من الموضوع دا.

· التلج في رمضان منطقي.

· التلج لو ما جابوه في رمضان – يجيبوه متين يعني؟.

· ما في انسب لي رمضان من (التلج).

· ولا بنقدر نقول شيء.

· وطبيعي وما غريب في شهر رمضان تشوف ليك زول رابط ليه (مكيّف) في (السبت) بتاع تاكسي.

· حاجة مألوفة في رمضان.

· ما في احسن من (المكيفات) في رمضان.

· عندنا قريبنا ربط ليه (مكيّف) في الصالون في رمضان – بقى وقت يقوموه للسحور بقوم يشغل (المكيّف) ويرجع ينوم تاني ..بقول ليهم انا (المكيّف) دا كفاي..ما عاوز لي سحور اكتر منو.

· وفي عيد الضحية عادي وما غريب تشوف ليك زول بجر ليه في (خروف).

· سايق ليك (الخروف) – واي زول يلاقيه في الشارع يقول ليه : (عليك اللـه الخروف دا لقيتو بي كم؟).

· وفي ناس كمان بمشوا على (الضنب).

· تخابر شديد.

· وعادي برضو تشوف ليك زول شايل ليه (برسيم) او كيس (قش) ناشف…ودافر مع (المغربية) على البيت.

· طبعا موضوع (القش) دا عذاب عديل كدا.

· اصعب من الخروف.

· لكن الما طبيعي والغريب جدا تشوف ليك زول شايل ليه (قفة).

· قفة كبيرة كدا.

· تقول ليه يا زول الحاصل شنو؟..(القفة) شنو كمان؟ ..القفة ما عندها اي علاقة بالعيد…ما تقعدوا تشرعوا لينا ساكت.

· الزول بتاع (القفة) بقول ليك (مازيمبي) وصل.

· جمال سالم دا – جهزوا ليه (القفف).

· الموضوع دا يمكن يجر.

· ويمكن يدخل ليكم في جدول سبعة.

· في حلتنا في زول بتاع (منطق)…بمنطقك بمنطقك.

· لو بقيت (ابليس) بمنطقك.

· الزول دا اسمو (حاج كسبرة).

· صعب عديل كدا في المنطق.

· حاج كسبرة كان بركب حافلات الكدرو وبمنطق ليك (الكمساري) يرجع ليه (الباقى) بدون ما يكون اعطاه شيء.

· وما استنكاح منو؟…منطق بس.

· حاج كسبرة مرة جاب ليه (ربع كيلو) لحمة – كلو (عضام) – ربع كيلو زي (الامضاء) ما فيه شيء.

· حاج كسبرة جاء البيت لقى ليك (المرا) في الواتس اب ..قال ليها يا وليّه عليك اللـه اعملي لينا (ربع الكيلو) دا – واتقطعي لينا فيه …عشان السنة دي (الخروف) مجهجه.

· السنة دي مع (مازيمبي) يمكن ما نطلع بي شيء غير (ربع الكيلو) دا – عليك اللـه اخلصي لينا فيه ..وكتري ليه (البهارات).

· المرا قالت ليه : (سجمي) – كمان مازيمبي عاوز يدخل لينا في حلة الملاح.

· حاج كسبرة بتاع منطق – الحاجات دي ما بوصوه عليها.

· ولا بتلفت.

· منطق ليك (ربع الكيلو) زي الما حصل حاجة.

· حاج كسبرة يوم جاء راجع البيت بدري شوية – ما زي العادة.

· الوليّه قالت احسن احسم معاه حاجات العيد.

· الوليّه دخلت عليه شمال ..وقالت ليه : يا حاج كسبرة عملت لينا شنو في (الستائر)؟..واللـه ستائرنا دي من شرف الدين بانقا وزير التخطيط والشئون الهندسية ما غيرناها.

· الراجل قال ليها شرف الدين بانقا الدخلو شنو في الموضوع؟..يا وليّه اوعك تلخبطي لينا في الحاجات …العيد دا ما عيد (ستائر).

· ستائر شنو؟.

· الوليّه ما قالت حاجة …حاج كسبرة برضو بتاع منطق ..والعيد دا بي صراحة ما عيد (ستائر).

· الوليّه قالت تجاوز حتة (الستائر) دي وتقلب الصفحة.

· سكتت شوية كدا وقالت ليه : يا حاج كسبرة (الملايات)!!.

· حاج كسبرة ولا اتلفت ..قال ليها : الملايات مالها يا وليّه؟.

· المرا قالت ليه : واللـه (ملاياتنا) دي من زمن صبري الحاج بلعب في الهلال ما غيرناها…الملايات لمن قلبناها (اكياس مخدة) ..وانت يا حاج ما عاوز تجيب لينا ملايات.

· حاج كسبرة ما كضب وقال ليها : يا وليّه العيد دا ما عيد (ملايات).

· ملايات شنو كمان ؟..دا وقت يجيبوا فيه (ملايات).

· الوليّه دخلت في البند الثالث ..وقالت ليه : طيب الشفع ديل ..عملت ليهم شنو في (هدوم) العيد – واللـه ولدك (تميتري) لمن ينوم دموعو في عينو.

· حاج كسبرة قال ليها يا (مرا) بقول ليك العيد دا ما عيد (ملايات) – تقولوا لي هدوم الشفع..(تميتري) خليه ينوم بي دموعو ..انا اجيب ليه من وين؟..اكوي ليه (جلابيتو) وخلاص.

· الوليّه قالت ليه : واللـه تميتري بيلبس في الجلابية دا لمن بقى زي (المأذون).

· الوليّه صبرت شوية ..ودخلت في البند الرابع وقالت لي حاج كسبرة : (والحلاوة).

· حاج كسبرة قال ليها : (الحلاوة) مالها؟.

· الوليّه قالت ليه : عاوزين لينا حلاوة ..الناس بيجونا.

· حاج كسبرة قال ليها يا وليّه انتي جنيتي …العيد دا ما عيد (حلاوة) – حلاوة شنو كمان؟ ..انتي عاوزة تعملي للناس تسمم.

· اوعك تجيب لي سيرة (الحلاوة) دي تاني هنا – العيد دا ما عيد حلاوة.

· الوليّه قالت ليه : طيب والشربوت.

· حاج كسبرة قال ليها (شربوت) شنو كمان؟..انتي ما شفتي (المشروع الحضاري)..انا بيتي دا ما بدخل فيه (شربوت).

· الوليّه قالت ليه : يا راجل انت (الشربوت) بتطلبو براك ..السنة دي عاوز تعمل لي (المشروع الحضاري)…اها ابقى علي مشروعك الحضاري ..اوعك تاني يوم في العيد تسأل منو؟.

· الوليّه قالت تتجاوز (ملفات) الحرب ..وتدخل في البند العاشر طوالي.

· الوليّه اتلفتت كدا ..ودخلت في الموضوع..وقالت لي حاج كسبرة : اها يا حاج الخروف عملت لينا فيه شنو؟.

· حاج كسبرة عمل فيها اول حاجة ما سامع.

· لكن الوليّه تاني كررت كلامها وقالت : يا حاج الخرووووووووف عملت فيه شنو؟.

· حاج كسبرة قال ليها : خروف شنو؟.

· الوليّه قالت ليه : خروف العيد…يعني ح يكون (خروف اسمك).

· حاج كسبرة ما قال حاجة.

· الوليّه ..قالت ليه : كمان عاوز تقول لي دا ما عيد (الخروف)..شوف نحن ممكن نقبل اي حاجة …إلّا الخروف.

· حاج كسبرة اتعدل في قعدتو كدا وقال ليها : انتي عاوزني اجيب لي خروف مع (مازيمبي) دا…انتي جنيتي يا وليّه …البياكل ليك الخروف منو مع (مازيمبي)..يا وليّه انتي ما سمعتي كمال رزق قال شنو؟.

· عاوز يمنطقها.

· قالت ليه : كمال رزق قال شنو؟..كمان عاوز تدخل لينا (كمال رزق) في مازيمبي.

· قالها : يا وليّه ..كمال رزق قال الما عندو قدرة ما عليه ضحية …وانا واللـه مع (مازيمبي) قدرة لي (ربع كيلو لحمة) ما عندي.

· الوليّه اتمنطقت ..قالت ليه ان بقى كدا ..شوف لينا (عدس) من بدري ..يوم العيد ما بتلقى ليك (دكان) فاتح.

· ………..

· ملحوظة : المنطق دا كيف؟.

هوامش

· لجنة الاستئنافات ..ولجنة الحكام.

· تاني شنو؟.

· اصلو ما قاعدين يقصروا مع المريخ.

· لولا هذه اللجان – الجماعة ديل كانوا (العطش) كتلهم.

· البتشربهم موية ما كان بلقوها.

· ضربة جزاء في كل مباراة.

· صرفة ثابتة.

· ضربات جزاء المريخ من مازيمبي من هسع طلعت.

· هناك فارق كبير بين مستوى الاهلي شندي والخرطوم الوطني لصالح الاهلي شندي.

· رغم ان الخرطوم الوطني امس قدم مستوىً كبيرا.

· لكن يظل مستوى الاهلي شندي افضل.

· اتحاد العاصمة الجزائري امس انتصر 2 / صفر في الدوري الجزائري.

· اتحاد العاصمة الجزائري يمتلك هجوما خطيرا جدا.

· لكن الهلال عليه ان يركز على ضعف دفاعه.

· لا بد من الانتصار بعدد كبير من الاهداف في ام درمان – عشان هجوم الاتحاد على الهلال في الجزائر سوف يكون خطيرا.

· احسموه بي تلاتة اهداف على الاقل ..لو عاوزين تصلوا النهائي.

· مع الحفاظ على شباك الهلال نظيفة.

· الحمدلله الاتحاد بيصل بعد العيد.

· الكلام الناس الوصلو من الآن.

· ………..

· عاجل : طلب رسمي عاوزين نشوف (علي جعفر) امام مازيمبي…عشان نهضم اللحمة!!..احسن لينا من (الشربوت).


‫2 تعليقات

  1. ارتاح وشوف شربوتك من بدري .. علي جعفر مافي .. علاء .. بالعدم ضفر .. بالعدم شيبون ، يعنى (ضفر) شديد ..أهضم سمح !

  2. الجية بتاعت مازيمبي أحسن الكانت من بدري … جوك ولا عوك عوك , الكلام في ناس عوك عوك وناس حاج كسبرة ديل ما ناس جوك … ديل ناس عوك عوك … لكن على كتاب الهلال أن لا يدللوا على عدم شمول وطنيتهم من هسع , نحن المريخاب عايزين الهلال يغلب الاتحاد طبعا لكن ما بالكوراك والصياح والحاج كسبرة !!