يا عم ديديه

> غايتو باص ديديه لي كوفي في كورة الخرطوم حدث
> باص أجمل من بصات الإنجليز الطابقين ديك
> باص فيهو الفارق في المهاره والسرعه والقرار والتنفيذ
> باص كعبي بي ورا
> يا عم ديديه ارجع وارجع وارجع ومررها مررها مرهها
> باصين زي ده يوم كورة مازيمبي
> ونحلق في المباراة النهائيه على منصات التتويج ان شاء الله
> ايها الناس
> مطلوب من الجماهير ان تتفرغ للتشجيع
> تبتكر وتبدع وتنافس نفسها
> في كل مباراة افريقيه تبهرنا الجماهير بما ترسمه من لوحات رائعه
> ولبنت خلاص
> وعشان ما نديها الطير بعد لبنت
> حقو نتفرغ للتشجيع
> التشجيع بقوه
> لا تصرفنا اشياء هامشيه عن التشجيع
> ويوم عزام تعلمنا ان الصبر مفتاح الفرج
> صبرنا حتى الدقيقه اربعه واربعين من الشوط التاني
> فكان فرج التأهل على حساب عزام
> وفي مباراة العلمه تعلمنا
> اننا يمكن ان نعود للمباره حتي ولو تأخرنا بهدفين
> وبره الارض كمان
> يبقي الشفقه مافي ليها داعي
> واستعجال النصر ما حبابو
> وكت ما يجي يجي
> بس هو يجي
> يجي متأخراً خير من ما يجي
> وصدقوني بجي
> لو انصرفنا للتشجيع بجي
> لو تعاملنا بحضارية وتأدب بجي
> لو اشتغلنا شغلنا كمشجعين غير متوترين ولا موترين للاعبين بجي
> ولما يجي
> الكاس بجي
> المطار يا عمك
> يا عم ديديه
> ارجع ارجع ارجع
> ارجع مطمئن
> فوجود العقرب وكوفي يوم عزام
> بخليك ترجع مطمئن
> بالكعب يا عمك
> ارجع ارجع ارجع
> ايها الناس
> زول بلعب بالكعب اكيد بفرق عن زول بلعب كعب
> عندنا اللعب بالكعب نحمد الله
> شوفوا البلعب كعب بلعب وين
> ايها الناس
> لوح الشرف الافريقي اعتراف بالانجازات
> وهو في حد زاتو اثبات للتفوق
> الآن في اربعه فرق في دور الاربعه
> يا ربي كم منها مسجله باحرف من نور علي لوح الشرف الافريقي ؟؟
> كم يا محمد الامين يا اخوي؟؟؟
> كم يا محمد عبد الماجد ؟؟؟
> طيب منو المسجل ومنو الما مسجل منها علي لوح الشرف ؟؟
> غايتو انا بحلف
> المريخ مسجل
> مازيمبي مسجل
> الاتحاد ما عارفو
> لكن كاس الكنغو بحلف ما مسجل
> مرقنبو قرمبو سااااااي
> نهي تسجيل بالكل كهيه
> غايتو يا خالد عز الدين
> تقعدوا ما مسجلين كده عشوائيين كتير
> لما يجوكم ناس المسح الاجتماعي
> يسجلوكم
> ويديوكم ديباجات تقابلوا بيها اللجنه
> لجنة المنح
> وحلك لما اللجنه تجيكم
> انا عندي صاحبي
> ابوهو ادوهو الديباجه عشان يقابل لجنه المنح
> اللجنه سنين ما جات
> شايل ديباجتو لمن مات
> وبرضو اللجنه ما جات
> لمن جات اللجنه
> ود ولد المرحوم كان شنبو قام
> شال الديباجه ومشى ليهم
> قالوا ليهو جيب اعلام شرعي
> واللجنة مشت
> صاحبنا شايل الديباجه والاعلام الشرعي وراجي الري
> ارجوا الري يا اخوي
> ويا عم ديديه
> ارجع ارجع ارجع
> ايها الناس
> المريخ في كل الميادين قوي
> وبكسب بحمد الله
> شفتوا الشكوتين كيف ؟؟
> ميدان العمل الاداري برضو متفوقين فيهو
> المهم
> اذا طبق الاتحاد القوانين واللوائح
> بدون خيار او فقوس
> اذا قلت عبارة يخطئ ولا يظلم وكلو زول شال حقو في الملعب
> بنضمن زوال التوتر الجماهيري
> بنضمن تطور الكرة عندنا
> بنضمن اجبار الاتحاد على العمل للتطور
> بنضمن اهتمام الدوله بالرياضه
> بنضمن إحساس اتحادات المناشط المختلفه بالتقصير
> ونضمن بدايات لمواسم تنافس رياضي لبقية المناشط مستقر ودائم
> فالرياضة عندنا من فرط اهمالها اضحت كرة قدم
> وجريه جريتين من ناس الماراثون
> وتنافس موسمي للطائره
> بفضل اهل القضارف
> وبس
> وين السله ووين السباحه والتنس والريشه الطائره وغيرها؟؟؟
> ارجو ان لا يكون التنافس لدخول مجالس ادارات تلك الاتحادات من اجل الولوج للجنه الاولمبيه فقط
> حسوا بينا يا ناااااس
> يا عم ديديه
> ارجع ارجع قشة ما بتعتر ليك
> ايها الناس
> شفوت الولايات مصممين يجوا يوم مازيمبي
> ليشاركوا في معركة التأهل للنهائي
> للتنسيق
> مريخاب الدويم والقرى المجاوره
> الاتصال على محمد لعوته على رقم التلفون 0904605094 أو 0126919696
> ولاية الجزيره محلية ام القرى الاتصال على الرقم 012567580 او 0122309443 عبد المنعم الصديق
> ايها الناس
> كل القوة القلعه جوه
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> العيد جايينا
> خايفين من السماسره للسعر يرفعوا لينا
> دايرين نضحي يا والينا
> برغم اننا العمر كلو تلقانا ضحينا
> لكن لو عملتو في كل مدينه مركز لينا
> باسعار معقوله يبيع لينا
> تكونوا خدمتونا يا والينا
> ان شاء الله خروف فطور ما يكفينا
> ان شاء الله خروف في شنطة اللاب توب ينشال لينا
> ان شاء الله خروف لو قال باع يفقد سائل ويدخل الحيره فينا
> بس نقول ضحينا
سلك كهربا
ننساك كيف والكلب لو شاف الخروف يقول بقيتوا تضحوا بي كدايس .. يا حليلكم
والى لقاء
سلك