بابكر سلك

لينينوفا آخر محطة


> آخر محطة هي اشهر محطات الزمن
> في اي حته في
> اي مكان فيهو آخر محطة
> وفي حتات فيها آخر محطة القديمه وآخر محطة الجديده
> حتي في اوروبا في آخر محطة
> اتذكر وانا في براغ في تشيكوسلوفاكيا
> كنت بركب المترو وانا راجع على البيت
> المضيفه مسجلين ليها صوت بشتغل اتوماتيك مع المحطه
> المترو يكون داخل على المحطة
> قبل ما يصلها بي ثواني تسمع صوت المضيفه يوريك دي ياتو محطه
> المهم
> آخر محطات المترو في الخط ده اسمها لينينوفا
> اول من البت تقول لينينوفا
> كلنا نقوم عشان نتخارج
> وامبده برضك فيها آخر محطة
> يعني براغ احسن من امبده بي شنو
> امبده الردميه كمان فيها آخر محطة اتنييييييييين
> آخر محطة القديمه وآخر محطة الجديده
> يعني اتنين لينينوفا
> اي شيء وليهو آخر
> الدنيا زاتها عندها آخر محطة
> ونحنا لأننا ناس بدع وابداع
> في حتات فيها آخر محطة بصات وآخر محطة حافلات
> علي كيفنا
> في شفعنا عندنا آخر العنقود
> المهم
> لما سمعت انو ابو الهل مقابل اتحاد الجزائر
> كأني اسمع البت قالت لينينوفا
> لينينوفا يا روشا
> لينينوفا القديمه
> آخر محطة القديمه
> اصلكم ما غيرتوها
> ناس كلاسيك شديد
> برغم انكم السنه دي مفروض كان تنزلوا في اول محطة
> لكن مترو القدر جابكم لينينوفا
> طوالي نازلين لينينوفا
> اصلكم ما بتغيروها
> المهم
> كردنه يفلق ويداوي
> قال اتحاد شنو البغلبنا نحنا
> الموضوع كلو حظ ساكت
> حتى البرازيلي الشات البلنت بالواطه
> عمرو ما لعب كورة بالواطه
> بس القدر
> وقال ماشي يجيب التأهل من الجزائر ويجي
> جيب لي معاك بنطلون يا كردنه
> وعقلاء الاهله كانوا بقولوا كلام عاقل
> وكردنه يفلق
> قام حاول يداوي
> مشى الجزائر وقال ليهم كلام كتير
> هضربة من النوع ابو كديس
> بس الخوف يكون قال ليهم
> نحنا وقفنا معاكم ضد مصر في الفاصله
> كان قال كده بكون
> وتر علاقتنا بالمصريين
> قال ليهم كده وهو قبل اسبوعين عامل توأمه مع سموحه
> سموحه ده جيكي يا كردنه ؟؟؟
> حيرتنا
> كان تقول ليهم نحنا من طرف بكري المدينه
> كان احترموكم وحافظنا على التوأمه مع سموحه وابقينا على العلائق طيبه مع المصريين
> اسي كده خسرت الكورة وخسرت سموحه وخسرنا المصريين
> ايها الناس
> مفروض ابو الهل لما يرجع من ارض الجزائر والطنابير الترن
> ما يقول حليل ارض الجزائر
> يرتاحوا شويه ويعملوا ندوه
> يشوفوا مشكلتهم مع لينينوفا شنو
> ويغنوا
> وقف لساتكك يا قطار.. في السكه زولك داك وصل بعد النضااااال
> وقف لساتكك يا قطار .. لينينوفا بقت حد النضااااال
> ايها الناس
> المترو عندو راسين
> لما يصل آخر محطة بي راس
> بدور الراس التاني ويرجع بيهو
> يعني آخر محطة بي الراس ده
> هي نفسها اول محطة بالراس داك
> ابو الهل مشغل راس وااااحد بس
> يودي آخر محطة طوالي
> آخر محطات الزمن
> المهم
> تمنياتنا ان يخرج ابو الهل بنتيجة ما تجيب الكلام لينا
> يلعبوا تمنيه ورا
> يلعبوا تسعه دفنس
> المهم
> النتيجه تكون مشرفه
> ما مشكله الخروج
> بس لازم يكون بي شرف
> لا للانهيار
> لا للاندفاع
> الدور الفات عمك البرازيلي اندفع ووقع ودفع التمن الهلال
> واقترح يلعب الهلال بتشكيله تضم
> مكسيم وجمعه في حراسة المرمى
> بوي وفداسي في الطرف الشمال
> سيسيه واطهر في الطرف اليمين
> مساوي ومالك في قلب الدفاع
> كانوتيه والصيني في خانة المساك
> عشان يستفيدوا من اتير في صناعة اللعب
> الشغيل ونزار ودنيلسون ومعتصم في المحور البميل يمين
> اتير والبرازيلي في صناعة اللعب
> ما تنسوا انهم صنعوا القونين بتاعت اتحاد الجزائر هنا
> كاريكا وصلاح الجزولي ومحمد عبد الرحمن في الهجوم
> بس ما يقطعوا دائرة السنتر لي قدام الا يتأكدوا ان اتير والبرازيلي قدامهم
> ما يخلوهم وراهم اصلو
> صهيب الثعلب ووليد علاء يلفوا ساي
> ده ماتش كبير ما لعب عيال
> فيصل الجوهره يلعب بين الدفاع والمحاور
> عشان لما يقع يقع وسط اهلو
> كده اتنين وعشرين والباقين يقعدوا كنبه مع الكوكي
> بي كده نضمن اداء متماسك ومشاركة لجميع اللاعبين
> المهم
> لينينوفا اسم لا يمكن تجاهله
> لينينوفا آخر محطات المترو الشهيره
> منها طوالي الزول بمشي بيتو
> شخصياً كنت منها علي البيت عدل
> المهم
> في تصنيف الكاف امس
> قرنيا لي رقم خمسه ما شفنا ناس روشا
> وينكم يا ناس
> الاول مازيمبي
> التاني نحنا
> الفرق بسيط
> نتخاطو بكره ان شاء الله
> نبقى الاول نحنا
> التاني مازيمبي
> التالت والرابع والخامس
> بعد داك بجوا ناس لينينوفا
> آخر محطات الزمن
> ايها الناس
> يوم الغد يوم مشهود في تاريخ الكرة السودانيه
> يوم تتناوله جميع وكالات الانباء في العالم
> يوم ان يتخطى المريخ مازيمبي بفضل الله
> يوم اعلان ان نهائي الكاف تحتضنه القلعه الحمراء
> يوم يعلن فيه عن تحرك الاميره السمراء الى امدرمان لتبقى فيها
> ايتها الاميره السمراء
> القلعه الحمراء لينينوفا بالنسبه ليك
> حاتكوني ساكنه عندنا ان شاء الله
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> تاني السخانه رجعت لينا
> تكندشوها لينا
> ولا نتخارج حيث الكندشه يا والينا ؟؟؟
سلك كهربا
ننساك كيف والكلب يعاين لينا مستغرب ذكرنا المثل البقول معاينة الكلب للشحموطه «للنمله»
لا قادر يعضيها لا قادر ينساها ويفتح ليها
والى لقاء.
سلك


‫3 تعليقات

  1. يا سلك الحمد لله الموسم دا وصلتوا محطة لم تشوفها من قبل ، ولحد هنا هده كتيرة من الله ، وان شاء الله العام القادم تصلوا المحطة الأخيرة …