بابكر سلك

شيل الجراح والابتسامة وكل حرمان «الحمامة»


> كالعاده اكتب قبل لقاء الاخوه الاهله بالاخوه الاتحاديين العرب
> اكتب وانا كلي اماني وتمنيات وامنيات
> ولو الاماني بايدي يا روشا
> كنت اهديك بكري عشان تقابلني في النهائي
> ومابغلي عليكم يا اخوتنا الاهله
> لكن تقول شنو
> ما باليد حيله
> اكتب متمنياً ان يدافع ابو الهل عن سمعة السودان الكرويه بشراسه
> وألا يدخر جهداً في سبيل الدفاع عن سمعة الوطن الكرويه
> حتي ولو استشهدوا في بلد المليون شهيد
> فإن التاريخ يحفظ لهم استشهادهم
> بقدر ما يحفظ للناس اخفاقاتهم
> الاخوه الاهله ابوها مملحه كاسوها ناشفه
> اضاعوا الارض والجمهور وقعدوا ساي
> لا ارض ولا جمهور
> ولكن ليست خساره
> لو استفاد الاهله الشرفاء من هذا الاخفاق ليست خسارة
> فاي تجربه تعتبر ناجحه حتي ولو كانت خاسره
> بشرط ان يستفيد الخاسر منها
> تلك الاستفاده تجعله مستفيداً لا خاسراً
> اتمني ان يستفيد الاهله الشرفاء من الدرس في المحاوله رقم تسعين
> فالسعي خلف الاميره السمراء كلف الاهله تسعه وتمنين سنه
> وانا احترم واكبر فيهم عدم اليأس
> بل وتمسكهم بالحب
> فهي يسمونها البطوله المحببة
> وبالرغم من انها لم تبادلهم الشعور
> الا انهم يحبونها بدون تردد وبدون انقطاع وبدون ان ينالوها
> كلما تقدموا اليها
> قالت لهم دايره اقرأ
> والقصه دي ذكرتني صديقي خالد كنب
> زمان بحب ليهو واحده حب شديد
> حب نضيف
> قرر يصارحها
> اتقشط ليهو في قميص محزق
> والبنطلون حدو القلب
> والحزام زي بتاع الحصان
> وجزمه هريدي كعب عالي
> وكابي العطر ثري هورسس داك
> وقابلها
> انكشح ليها وشرح ليها احساسو
> قالت ليهو والله يا خالد انت زول كويس ومافيك عيب
> حاليا انت فاجأتني
> وانا ما عندي الاحساس ده
> لكن صدقني اليوم الحسيت بيهو تجاهك بكلمك
> خالد صنقع ودنقر وقال ليها
> ما مشكله
> ما ضروري يكون عندك احساس تجاهي
> العندي بكفينا الاتنين
> ده ياهو حال الاهله مع الاميره السمراء
> حب من طرف واحد تسعين سنه
> المهم
> روشا ضامن تأهل المريخ
> قام اتكلم عن موت الرياضه
> واخلاق الرياضه
> وفي الآخر جاب آخرو
> قال ماممكن اصحي الصباح القي مسيرات الفرح الحمراء في المطار
> ما بستحمل
> كلمناكم يا روشا
> قلنا ليكم شامين لينا ريحة مطار
> وقلنا ليكم شهر حداشر البلد دي ما بتتقعد ليكم
> وقلنا ليكم طلعوا ليكم جوازات ممغنطه من بدري لزوم المخارجه
> اسي السفر الا ليبيا وبي تحت يا روشا
> البوكس يروح في الصحراء ديك
> ريقهم براهو ناشف
> يا حليلك يا روشا
> حاتوحشنا
> ايها الناس
> الليله يوم الرجال
> الليله يوم النضال
> مازيمبي يوصل بفضل الله آخر محطة ليهو
> ينزل ويدينا عجاج كرعينو
> لنبقي نحن على القاطره
> فجماهير المريخ المبدعه تستحق الكاس
> ومجلس المريخ الخلاق يستحق الكاس
> والجهاز الفني يستحق الكاس
> اما اولادنا فيستحقون كلو واحد فيهم كاس
> وبكري تاني كاس
> بختك يا بكور
> ايها الناس
> دعواتكم هي التي تساند الزعيم في أرض الكنغو
> بالقرآن مريخنا مصان
> وصديقي عراقي يؤكد لكم بعد تقديم المشيئه
> اننا اليوم متأهلون
> للنهائي
> للبطوله المحببه لاخوتنا الاهله
> حانشيلها
> بقت زي قصة الرمتالي في الحله الحابي ليهو بت من بنات الحله
> ويترمتل ويتونس ويطق الحنك
> يومي يحنك ومترمتل ساي
> مغترب يشوفها في شريط فيديو
> الشيله تجي والعرس يتحدد
> والرمتالي يجي يغني في سرو يوم العرس
> في الليله ديك لاهان عليا ارضي واسامحك ولا هان عليا اعتب عليك
> شيل الجراح يا روشا والابتسامه وكل حرمان «الحمامه»
> وعازمنكم السمايه
> المهم
> ابداعات جماهير المريخ ادهشت افريقيا كلها
> ولن ننسى اولتراس الاسود
> الناس الكانت بصمتهم واضحه في الاستاد وهم يعملون في صمت
> فاجادوا رقصة النار
> وهم من اوائل الناس اللبسوا شعار موحد ومنظم
> وهم يقومون بجهود كبيره بعيده عن الاضواء
> ينظفون الاستاد في الحر وفي صمت
> يجلبون معينات التشجيع من اشتراكاتهم
> يقطنون الجزء الجنوبي الشرقي من الاستاد
> زقاق العجب سابقاً
> الآن يلحنون اناشيد الفرحه الكبرى
> اناشيد ريحة المطار
> ولن ننسى عضو الأسود وقائدهم الملهم
> الشفت العريق العم صلاح حمد زعيم الحلفايه
> فعندما تشاهد عم صلاح يرقص رقصة النار على المدرجات
> تحلف تقول ابن خمسطاشر سنه
> في حب يا ناس اكتر من كده ؟؟
> حفظك الله يا عم صلاح
> ومتعك بالصحه والعافيه والاميره السمراء «خطيبة الرمتالي»
> ايها الناس
> ان تنصروا الله ينصركم
> ايها الناس
> وما النصر الا من عند الله
> اها
> نجي لي شمارات والي الخرتوم
> كان شفت يا والينا
> في محافظة كرري الثوره يا والينا
> الشارع الرابط بين النص والوادي يا اخينا
> الشارع الفاصل بين الخامسه والتامنه يا والينا
> مضلم لينا
> قدر ما اشتكينا
> مضلم لينا
> برغم انو خطر علينا
> برضك مضلمنو لينا
> واسعافات مستشفي النو بتجي طايره يا والينا
> خطر على المريض وعلى النصيح الساكن لدينا
> فيها شنو لو اتنور لينا؟
> وكت اصلو محافظنا ما قادر ينورو لينا
> غيرو لينا يا والينا
> ما الشارع
> غير لينا محافظنا الفي الحته دي ما شغال بينا
سلك كهربا
ننساك كيف والكلب راقد في الضلمه وبطل اللخمه قنع خلاص
والى لقاء
سلك


‫13 تعليقات

  1. اه العب النهائي ياطويل اللسان ،، برشلونة افريقيا اليوم اكلها بالتلاتة ، قال الفاينل يا اخي اقعدوا في الوطاة بلا برشلونة بلا مسي ،، والله براك انتم يا اعلامي الغفلة مافي شيء دمر الكرة في السودان ،ن بالله قولوا كلام معقول واعرفوا قدركم وقدر لعيبتكم بلا بجاحة ،، واللله لا خير في الهلال ولا خير في المريخ كل الدنيا وكل افريقيا كرتها مشت ل قدام عدا انت يا سودان ؟؟؟

  2. ننساك كيف ومازمبى لاحقنا امات طه ننساك كيف ومازمبى من عصرآ بدرى ختانا فى علبنا والله ياسلك مافى زول كجه المريخ والهلال غيرك ومزمل فلسفه وكمال الهدى ابوراسآ فاضى

  3. حقيقه ديل اجهل اعلاميين رياضييين …نفخو لاعبى المريخ خلوهم قربه لما جا مازيمبى المنظم الذى تلاعب بالمريخ كالبالون .. وخرم مازمبيى القربه بثلاثه دبابيس ,غرزيتو الجاهل طويل اللسان مطرود الهلال جالس يتفرج واتبلم … معقوووول مدير فنى عامل نفسه اشطر مدرب فى افريقيا .. يخرج ديديه وكوفى ويدخل ضفر وعمر بخيت !!!! والله لو كنت رئيس نادى المريخ ما كنت اخليه ارجع الخرطوم …ولهذه الاسباب كان الهلال يخرج من دور الاربعه ايام غازيتو ……
    يلا اتفرغوا لشكاوى الامل وهلال كادقلى … واتفجخوا فى الواطه دى ….غارزيتو قال انا حافظ مازيمبى وسافوز عليه …. وضخك عليه كاتيرون وضربه بالضربة القاضية فى اللوحه التى رفعها جمهور مازيمبى …. وافرح يا كديابا … ويا اندية الممتاز الجهة الشمال فى المريخ خلا وعمل فيها القصير المكير عمايل …. انتم يا اعلام المريخ سبب هزيمة المريخ خيلتو للاعبين ان مازيمبى فريق سهل فكشر انيابو ووراكم النجوم عز الضهر بشهادة الخبراء مازيمبى قدم اجمل 45 دقيقه فى بطولة ابطال افريقيا فى لوممباشى اليوم
    مهارات عاليه وتمرير دقيق كبرشلونه تماما
    الكره السودانيه حدها دور ال 8 والقادمه جاين فيها الفطاحله

  4. والله مافي اغبي من كتاب المريخ والهلال نفخ وتشفي وحقد كل الصحف العربيه متابعه لا اجد ما اجده في الصحف السودانيه حتي التونسيه الي جبتو منها بعض الالفاظ في المباريات الخارجيه صف واحد لا ينصلح حال الكرة مادام دول كتاب رياضه

  5. كلام مسيخ وممجوج وما عنده أي طعم قال ريحة مطار ياخي إتلهي والله كنت أتمناها خماسية عشان تشوف ليك بلد تمشي عليه مالك ومال الهلال خليك مع عواستكم دي .. إنشاء الله المرة الجاية تلعب في الكونفدرالية وبرضو تطلع من التمهيدي

  6. و الله يا سلك انت و فرقة حسب الله بتاعتكم دي كاس مريسة ما تجيبوه و بعدين ناس مازمبي ديل متعودين يشربوا حتى الثمالة يعني ما خلوا ليكم و لا بقة خليه الكاس. و دور بينا على المحلي و بدل المطار خليكم مع مريخ الفاشر و أهلي سنار و نصيحة لوجه الله خلوا الوالي بالقروش الفضلت من حق البودي قاردز دي يشوف ليكم حتة سيكافا قبل ما فرقة حسب الله يقولوا البودي قاردز عايزنهم للأمل عطبرة.

  7. ننساك كيف والكلب راقد في الضلمه وبياكل في اللحم .

    والى لقاء

    سلك جديد