زواج سوداناس

طيارة خاصة وبودي قاردات وطولة لسان وتلاتة اقوان



شارك الموضوع :

قلنا ليه – يا سلك …كدا ركز شوية – يمكن الريحة دي ريحة (محطة سكة حديد)

نحن طولة اللسان شفناها – لكن ما للدرجة البتخلي مزمل ابوالقاسم يتكلم عن (النهائيات)

الغريبة (القرع) دا في اي حتة بيجبوه ليك مسيخ وبصلتو (مطفحة) زي الساعة المأخرة

تلاتة – تلاتة يا مفترين – انتوا قايلين نفسكم في (سيكافا)…دي شنو الروح السكافية الشغالين بيها دي

*//*/*//*//*/*/***//**///**///***///****/////*****/////*******////*****//////////*********/////////

· اخوي (بابكر سلك) ..طلع عندو مشكلة في حاسة (الشم).

· انت يا سلك (نخرتك) دي الظاهر عليها (صينية)…ما (اصلية).

· ما اظن!!.

· غايتو يا صينية !! يا عندك (حول) شمي في النخرة – نحن الموضوع دا ما سمعنا بيه قبل كدا.

· لكن قالوا ليك – (الحول) النخري في المريخ عادي زي (القرع) في صينية البكاء…حاجة ثابتة كدا.

· والغريبة (القرع) دا في اي حتة بيجبوه ليك مسيخ وبصلتو (مطفحة) زي الساعة المأخرة.

· او زي (المروحة) عند ناس (التويكل ود حمد) ..عندهم (مروحة) السنة كلها شغالة.

· تتخيلوا ..(والكلام دا ما يطلع برة العمود)…سلك بيلخبط بين ريحة (المطار) – وريحة (البصل).

· قلنا ليه – يا سلك …كدا ركز شوية – يمكن الريحة دي ريحة (محطة سكة حديد).

· ما في علاقة بين ريحة البصل وريحة المطار.

· يمكن ريحة الميناء البري!!.

· يمكن دي ريحة مشرع توتي!!.

· سلك قال لينا – لا لا لا ابدا..دي (ريحة المطار).

· كمان انا ما بعرف ريحة المطار!!.

· قلنا ليه طيب (ريحة المطار) دي بتشمها وانت (نائم).

· قال لينا ابدا : انا صاحي ومفتح!!.

· بتشمها بي نخرة (اسلام)؟.

· حلف – قال دي نخرتو براهو.

· قلنا ليه طيب عندك مشكلة في الطيارات – يعني ممكن تشوف (الطيارة) ..(ركشة).

· بتتخيل ليك حاجات زي دي.

· سلك قال لا لا ..بس دي ريحة المطار!!.

· امس حضرنا مباراة مازيمبي والمريخ …اكتشفنا بعد الكشف على (المنشطات) ، اقصد بعد فحص الروائح – ان ريحة المطار القاصدها سلك (ريحة بصل) ساكت.

· وريحة طاقة كمان.

· في ناس كدا – بيلخبطوا بين ريحة البصل وريحة المطار.

· عليكم الله هو نحن مطار.

· مطارنا زي المركز الصحي.

· غرفة وحوش ..ومزيرة برة.

· عليكم الله الملفات دي ما تخلونا نفتحها ساكت.

· عندما واجه الهلال فريق مازيمبي ..ناس مزمل ابوالقاسم (زولكم المصدق داك) ..قعدوا يتكلموا لينا عن (الاستحواذ).

· بنظروا لينا عن الهلال – وفريقهم مُقسم بي (بكري المدينة) – قابلتكم في حياتكم (فصاحة) زي دي.

· نحن طولة اللسان شفناها – لكن ما للدرجة البتخلي مزمل ابوالقاسم يتكلم عن (النهائيات).

· انت النهائيات بتعرف ليها شنو؟.

· قايلها (شكوى).

· قال سمعتو بي (اضاني) دي.

· اضانك – اضان الفيفا عاد.

· الكلام دا تاني ما تتكلم عنو.

· اتكلم عن (سيكافا) – ممكن.

· اتكلم عن (مريخاب الجنوب) – ممكن.

· طلع ليك (تقرير) صناعي كدا ..وساق الجماعة فيه – برضو ممكن.

· والجماعة قاعدين ساكت – بمشوا اي حتة.

· التطوال وصل بيهم الى ان يتحدثوا عن (النهائيات) – لا دي كتيرة شديد.

· ولا بتتبلع.

· نحن لو بلعناها ليكم…بكري المدينة ما بيبلعها.

· تلاتة – تلاتة يا مفترين – انتوا قايلين نفسكم في (سيكافا)…دي شنو الروح السكافية الشغالين بيها دي؟.

· الهلال غلب مازيمبي في الخرطوم بي هدف سجلو لاعب عمرو (19) سنة …ناس مزمل ابوالقاسم قالوا استحواذ مازيمبي كان 64 %.

· دا البعرفو ليه!!.

· ويا ريت لو بقت على (الاستحواذ) – دي مشت ابعد من كدا.

· الموضوع كبر اوي!!.

· تتخيلوا قعدوا يتكلموا لينا عن (النقالة).

· قبل ذلك – كان الهلال قد خرج بتعادل غالي امام مازيمبي والهلال يلعب اول مباراة افتتاحية في مرحلة المجموعات في ارض مازيمبي وفي حضور جماهيره.

· المريخاب ما عجبهم تعادل الهلال – قالوا مازيمبي ضعيف ..وقالوا ليهم كلمة كدا بكرروها كل ما الحالة ما تعجبهم.

· زي الفنان العندو اغنية واحدة.

· يجيبوه حفلة ..يجيبوه التلفزيون ..يجيبوه الاذاعة …يعملوا ليه (مهرجان) برضو ..برضو بيغني اغنيتو الواحدة دي.

· قال كاس مانديلا قال.

· كاس مانديلا دا وقت جبتوه (الكهربة) ما دخلت البلد.

· البلد ما كان فيها (تلج).

· والحارس بيمسك (التقريشة).

· والبصلة في ام درمان دي كانت قدر (البطيخة).

· حليل (بطيخ) زمان.

· البطيخة لمن تأكلها وتهضمها ما بدفعوك قروشها.

· هسع لو قلت عاوز افتح البطيخة عشان اشوفها – يقولوا ليك : لا ..ما في كلام زي دا – تدفع القروش اول.

· الزمن اتغيّر …زمان كان المحبين .. الواحد فيهم لمن يبقى (جد) ما بقول لي زوجتو (بحبك).

· عيب.

· تعال شوف هسع دي – لو مشيت (حدايق السلام) – تقول (مهند ونور) الجابهم هنا شنو كمان؟.

· اي واحد عامل ليك فيها (مهند) – واول ما يعرس ..يرجع ليك لي حالة (عبدالجبار).

· عبدالجبار اخوي.

· عبدالجبار ما يعرفش العيبة ..وما يعرفش الحب ابدا.

· لكن هسع والله بي (ملافحتكم) دي ..طيرتو لي مباراة مازيمبي من رأسي.

· نسيت الموضوع.

· نحن كنا بنكلم عن شنو يا (عبدالماجد)؟.

· عن مازيمبي فريق ما عندو حاجة.

· اتذكرت.

· المريخاب قالوا شنو؟.

· قالوا مازيمبي (حمام ميت).

· تتخيلوا بعد العمر دا ..(الحمام الميت) ضرب ليك المريخ بي تلاتة اقوان زي (اغاني واغاني).

· المباراة كلها انا قاعد افتش في (عاصم البنا).

· وبكري المدينة – مرات كدا يترواح لي زي (عصام محمد نور).

· ويا روعة ..ترن ..ترن ..ترررررررررن.

· غايتو يا بكري المدينة (كورتك) الشفناها ليك امس ..(السر أحمد قدور) ممكن يلعبها.

· المريخاب دخلوا ليهم في (وهمة) جديدة.

· الناس بتفحص (المنشطات) – هم قالوا لا نحن بنفحص (المكيفات).

· جمال الوالي عامل فيها (تفتيحة).

· يعني في الجهاز الفني للمريخ شغلوا ليهم (فني مكيفات).

· عشان يفحص.

· تلقى الجماعة ضربوا ليك جمال الوالي في الموضوع دا ..قالوا ليه نحن لازم نفحص (المكيفات) عشان يطلعو حقهم.

· ديل بيسمسروا في (المكيفات).

· هي وصلت المكيفات كمان؟؟.

· لكن بالمناسبة دي ..انت يا ابوجريشة المكيف الفريون (نص عمر) عمل كم؟.

· عملتوها تشكيك في (المكيفات) تقول نحن في الحرب العالمية التانية.

· اها ان شاءالله فحص المكيفات جاب ليكم فايدة.

· طيب ..لو ما فحصتوا (المكيفات) كان بتاخدوا كم؟.

· كدا احسبها لي في الآلة الحاسبة يا عبدالماجد.

· الشيء شنو؟.

· انت دخلت لي في خانة العشرات.

· مالكم عاوزين ترجعونا بعد العمر دا لي رياضيات سنة رابعة.

· والله نحن عشان فصحاتكم دي وطولة لسانكم …(مريم الشجاعة) ذاتها ممكن نرجع ليها.

· اصلو ما عندنا مشكلة!!.

· المكيفات خلوها!!!.

· تتخيلوا ديل جابوا ليهم (طيارة خاصة).

· طيارة خاصة لي شنو؟.

· لي ناس همد ومتوكل أحمد علي.

· يا همد البلد غرقانة – وانت بتفتش في الطيارات الخاصة.

· المسخرة دي شنو؟.

· همد جابوه ليك قاعد في المقصورة بعد التلاتة تقول ضاربه (مطرة).

· ويا ريت لو وقفت على (الطيارة الخاصة).

· ديل شحنوا ليك مجموعة من (البودي قاردات).

· عشرة بودي قاردات.

· جابوهم ليك في المطار بي عضلاتهم …انا شفتهم قلت (القدس) ح ترجع.

· البشوف (العضلات) ما بيفتكر الموضوع يصل للتلاتة.

· تتخيلوا كل ما قاموا به هؤلاء البودي قاردات ..انهم منعوا عاملات الفندق من الدخول لغرف اللاعبين.

· الموضوع دا عاوز ليه بودي قاردات.

· متوكل أحمد علي ممكن يقوم بيه.

· تشوف البودي قاردات ..تتخيل نفسك في (هوليوود).

· ديل لي شنو؟.

· عمرو دياب؟.

· تامر حسني؟.

· معقول جايبين ليكم بودي قاردات لي ناس (ضفر).

· وقت (ضفر) بحرسوه ..(ايمن سعيد) يعمل شنو؟.

· بي صراحة كدا.

· ايمن سعيد دا بقى زي (كرتونة الخبيز) الفاضية..اثار (الزيت) واضحة فيها – لكن (خبزاية) واحدة ما فيها.

· ولا خررررراية.

· ايمن سعيد (الكبر) ظاهر فيه ..دا لا محترف ولا حاجة ..امس كان بمسحو فيه زي (البشاورة).

· بُشاورة السبورة ..كمان عاوزين تنكروها لي.

· جماعتكم الروش ديل عملوا شنو؟ – آخر تقليعات جمال الوالي ..(بودي قاردات) لحراسة اللاعبين.

· ناس المريخ الروش ديل بدل ما يحرسوا (مبوانا ساماتا)….حرسوا (ضفر).

· دي قابلتكم قبال كدا.

· اذا كنتوا عاوزين تحرسوا بكري المدينة وضفر وعلاءالدين يوسف وامير كمال البيحرس ليكم (روجير أسالي).

· غايتو يا جمال الوالي بتعمل ليك في (تقليعات) ..من الله خلقنا نحن ما سمعنا بيها.

· الكلام البتعملوا فيه دا في (طيور الجنة) ما قاعدين نشوفه.

· فحص مكيفات.

· طيارة خاصة.

· بودي قاردات.

· طولة لسان.

· وتلاتة اقوان.

· جمال سالم مباراة امس مفروض كان يدخل ليها (محنن).

· لو فكوا فيه عنقريب ضريرة بدخل فيه.

· الزول دا قاعد يعمل شنو؟.

· لو ما عاوزين تسحبوا منو (الجنسية السودانية) – اسحبوا منو جنسيتو اليوغندية.

· هسع دي كورة يلعبها حارس عندو تلاتة جنسيات.

· دا غير الاغذية وموية الصحة الشالوها معاهم بالطيارة الخاصة.

· الظاهر كدا ناس الكنغو ديل …يا دوب ضبحو.

· في زول بيضبح يا جماعة بعد عاشرة العيد.

· ناس مازيمبي بضبحو.

· المريخ بدأ بخسارة 2 / صفر من (عزام).

· وانتهى بثلاثية من مازيمبي.

· وبقولوا ليك المريخ كويس.

· كويس باللبن!!.

· ………

· ملحوظة : المشكلة ما منكم ..المشكلة طلعت في (المكيفات).

· هوامش

· الهلال في ظل ظروف صعبة – وصل لمرحلة متقدمة في البطولة الافريقية وخرج بشرف.

· وبدون طيارة خاصة.

· ومن غير منشطات ..او ضربات جزاء.

· قناة النيل الازرق اصبحت تخصصت برمجتها للمريخ.

· يمشوا سيكافا ..يعملوا ليهم سهرة.

· يلعبوا امام مازيمبي يقطعوا ليهم مساء جديد.

· وقت التلاتة وقعت …بقوا سيرة ما بجيبوها للمباراة.

· قناة النيل الازرق دي بقت زي (الدكان) السيدو مريخابي.

· ودكان كمان ما فيه (طحنية).

· غارزيتو امس ارتكب (جلطات) ..محسن سيد ما بعملها.

· طلع ديدي ..وطلع كوفي.

· وادخل (ضفر)…وعمر بخيت.

· كان لي عمر كان تتموها ناقصين احسن ليكم.

· اسوأ لاعب في مباراة الامس كان ايمن سعيد.. يا جماعة (الكبر) ليه احكام.

· الزول دا لو مصّرين عليه ..شغلوه في مكان (محسن سيد).

· ………..

· عاجل : اي زول يمد (لسانو) قدر مكيفو.

شارك الموضوع :

تعليقات الفيسبوك

تعليقات


4 التعليقات

إنتقل إلى نموذج التعليقات

      1. 1
        هلالابى

        يا محمد الحكاية ما عايزه اكثر من سطرين
        اغلبوا الامل اولا مش مازيمبى طوالى

        الرد
      2. 2
        WEEEW

        يا عبد الماجد الجماعه برضوا ما اكلوا البوفيه بتاع مازيمبى قالوا فيهو مخدر تخيل البوفيه فاتم …
        و قالوا الغاز المخدر يعنى (لا غاز لا مويه و لا كهرباء ) برضوا اخدوا 3 مع الرافه …
        كمان قالوا عرزه متواطى مع مازيمبى آخر تقليعه للصفوة ……

        الرد
      3. 3
        مريخابي

        ما في حاجة جابت النحس للمريخ والهلال غير كلاكم الخارم بارم دا .. ممكن تشوفوا ليكم شغلة تانية السنة دي .. لعل وعسى حظنا يتصلح شوية !!!!!!!!!!

        أقل حاجة المريخ ما اتغلب في استاده … متعودة .. دايما !!!

        الرد
      4. 4
        البطل النميري

        الحمد لله المريخ ما فاز … كان ثلث الناس ماتوا .. إلى هذه الدرجة كنتم مكتوميييين….. حابسيييييين أنفاسكم البركة في أكسجييييين .. مازيمبي الذي أنقذ جماهير الهلال ………

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *