زواج سوداناس

حكايــــة التـــــوم ود شيــــــخ القطـر



شارك الموضوع :

الخروف ما فاضل ليه إلّا يقول عاوز : (يقرأ)..ناقص بس يشغل لينا (نمط الطيران)
الخرفان اختفت فجأة…في واحد قال لينا (آخر ظهور) للخرفان دي كان يوم الوقفة العصر
ونحن واقفين قصاد (الحمل) ما فاضل لينا إلّا نغني ليه (يا جميل يا جميل يا سادة حبك جنني زيادة)
تلاتة اقوان في سبع دقائق ..انتوا دور الاربعة دا وصلتوه بي (لوري)
يوم العيد ..انا والتوم ود شيخ القطر واخوي عبدالجبار ..قلبنا ليكم الخرطوم دي قلب عشان نلقى لينا (خروف) نضحي بيه ما لقينا.
الخرفان اختفت فجأة…في واحد قال لينا (آخر ظهور) للخرفان دي – كان يوم الوقفة العصر.
في زول (باع) القضية.
في زول (باع) المباراة.
تلاتة اقوان في سبع دقائق ..انتوا دور الاربعة دا وصلتوه بي (لوري).
دا شنو دا؟.
الظاهر عليّ لفيت (الطبق) غلط.
خلونا في (خرفانا) دي.
مشينا بحري ..عدينا الكوبري لقينا لينا سبعة اشخاص بتشاكلوا ليهم في (حمل).
حمل تقول جايبنو من كتاب المطالعة.
مرسوم رسم بس.
حركة ما فيه.
نبض ما عندو.
حمل لو جابوه ليك في (معمل)…ما بتقبلو.
تقول شايلنو في (فتيل).
هسع الخروف دا لو فكوه بيقوم جاري.
دا شغال بي (برسيم)..وإلّا ممكن بي شاحن موبايل عادي يشتغل؟.
الشيء دا بياكل؟.
وإلّا (تحصيل الكتروني)؟.
معقولة ناس التحصيل الالكتروني ديل …وصلوا (الخرفان).
خروف (وصل) ساكت.
تتخيلوا مع ذلك (الحمل) كان عامل فيها مشارك في(The Voice).
ابرم.
ابرم يا كاظم الساهر.
الحمل كان عايش الدور.
كلو كدا ما يعمل ليه (ربع كيلو) مع الجلد والرأس…مع ذلك (الحمل) كان شايف نفسو.
هسع الواحد لو اشترى الخروف دا (يضبحو) …وإلّا يدخل (سلخ) طوالي.
الحمل دا لو ضبحوه ما بفضل فيه شيء.
دمو بروح ساكت.
ما محتاج ليه (سكين).
ممكن يتقشر طوالي.
لو ضبحناهو ..ما عاوز ليه (نار).
نار شنو؟..الموضوع ما بيستاهل.
مع ذلك التنافس والتسابق نحو (الحمل) كان كبيرا للحصول عليه.
الناس بتشاكل عليه.
الخروف ما فاضل ليه إلّا يقول عاوز : (يقرأ).
ناقص بس يشغل لينا (نمط الطيران).
صاحب الخروف – يشيل ويرفع في التمن.
لاقى الاقبال كبير على خروفو.
بدأ بـ (800) الف جنيه.
هسع قال عاوز فيه مليون و600 الف جنيه.
ليه؟.
التوم ود شيخ القطر – الموضوع ما عجبو ..اعتبر ذلك الامر فيه (استغلال) بشع للناس.
واستغلال للظروف – ليه نحن بقينا كدا.
خروفكم دا اصلو شهادة (عربية)…(باع) ذاتها بقولها ليك بي طريقة (حنينة) خلاص.
لو سمعو (كبش) بقطع ليه رقبتو…حنكشة الناس عرفناها ..كمان جاتنا (حنكشة) الخرفان.
غايتو السودان دا الواحد لو سك ليه (طلب فول)…الفول يطير السماء.
اصلو ما تحتاج ليك حاجة.
وقفنا قصاد الحمل (مان تومان) – قلنا نشوف السوق.
زمان عندنا حبوبة قديمة ..بتسف وتشيل عنقريب الجنازة.
بتقرع الموية.
وتفتح الدرو.
وبتمشي السوق تجيب خضارها.
بتعمل اي حاجة.
الحبوبة القديمة دي كانت بتقول لينا ما تشتروا ساكت ..شوفوا السوق.
ادردحوا في الدنيا دي.
كانت اللـه يرحمها بتقبل اي شيء – إلّا يغشوك.
وكانت بتقول لو عاوز ليك (فجل) – لو ما لفيتوا السوق ما تشتروه.
لو جيت شايل ليك (بطيخة) هدية ..بتقول ليك : (غشوك).
اسهل حاجة عندها تقول ليك : (غشوك).
العالم كلو عندها (مغشوش) – هي المفتحة الوحيدة.
ونحن واقفين قصاد (الحمل) ما فاضل لينا إلّا نغني ليه (يا جميل يا جميل يا سادة حبك جنني زيادة).
واحد من الجماعة قال بيشتري بي 1550 جنيه.
صاحب الحمل قال ابدا.
واحد من السماسرة كان واقف بعيد ..الظاهر عليه كدا (وكيل لاعبين).
اقصد وكيل خرفان …قال للمشتري ..صلح كلامك.
نحن ادخلنا – قلنا ليه يصلح كلامو كيف اكتر من كدا.
كدا انتوا صلحوا (الخروف) اول.
معقولة عاوزين فيه اكتر من 1550 جنيه.
ليه؟.
صاحب الخروف – قال لينا الخروف دا تربية بيت.
يا زول تربية بيت ..وإلّا هندسة حاسوب …1550 جنيه ليه؟.
كتيرة واللـه.
واحد تاني قال بدفع الـ 1600 جنيه.
لكن صاحب الخروف شاف (الطلبية) كبيرة ..طمع في الاتنين.
التوم ود شيخ القطر ..شايف (الحوار) دا …الكلام ما عاجبو.
بقى يعاين ليك للخروف عشرة – عشرة.
ما فاضل ليه شيء ..إلّا يشيل الخروف دا ويضرب بيه الواطة.
التوم ود شيخ القطر – غضب ..غضب شديد.
التوم ود شيخ القطر اتلفت على عبدالجبار.
عبدالجبار اخوي.
وقال ليه تعرف يا عبدالجبار لو كنا عاوزين لينا (طرف شمال) كنا لقيناهو.
معقولة بس.
واللـه لو عاوزين لينا (مدير فني) في الخرطوم دي تلقاهو…يلا يلا يا اخوي..الكلام دا بعيد.
مشينا ام درمان.
تعال شوف.
الخرفان زي (الزهور)..الشارع بتلقى فيه اربعة خرفان بس.
مجدعات كدا بالاسم.
والناس ملمومة.
وقفنا لينا قدام خروف …لا اقول ليكم خروف ..لا اقول ليكم ما خروف.
بين – بين.
عيونو عيون خروف.
وحجمو حجم (ديك).
التوم ود شيخ القطر قال ليهم انتوا الخرفان دي بتجيبوها من وين؟.
خرفانكم زي (ربع الكيلو) السفري.
عدس فاكيها في نفسو!!.
المهم عشان ما نكتر الكلام شلنا لينا (خروف) مع دباجة كبيرة.
لافتة واضحة مكتوب فيها (خروف).
يقوم يلاقينا زول من ناس الحلة يغالطنا ساكت.
ناس حلتنا جنهم غلاط.
الواحد فيهم يغالطك في (خروفك).
اشترينا (الخروف).
التوم ود شيخ القطر – قال هسع الخروف دا نشيلو في (ركشة) – وإلّا نحولو (رصيد) ساكت.
الفول لو بضحي ..اصلو ما بنبدلو.
نحن ما بنحب اللحمة عشان الحركات دي.
لقينا لينا عربية ماشه كدا – جدعنا ليك فيها الخروف.
وصلنا البيت.
لقينا لينا (ضباح) – قال بضبح لينا.
قلنا ليه تضبح شنو؟…الموضوع ما محتاج.
لكن عشان كلام الناس قلنا وقت ما لقينا لينا خروف قاطع …احسن نشوف لينا (ضباح) كارب.
الضباح قال لينا بضبح ليكم ..وبشيل الجلد والرأس.
قلنا ليه وقت تشيل الجلد والرأس خليت شنو؟.
شيل الحاجات التانية ..وخلي لينا الجلد والراس.
على الاقل يكون عندنا (اثبات).
الضباح كان زول واضح وصريح.
ما بحب اللف والدوران وكسير التلج.
في ضباحين وقت تجيبهم يضبحو يقعدو (الضبيحة) كلها يشكروا ليك في (الخروف).
سمح.
وسمين.
وبلدي.
وما فيه كلام.
ورخيص.
وما غشوك.
وهم بكونوا شغالين ليهم في (عتود).
الضباح كان واضح…قال لينا ضحيتكم دي إلّا تتموها بي (عدس).
فطور ساكت ما بتفطركم.
المفاجأة كانت وين؟.
المفاجأة الخروف طلع ما فيه (كمونية).
ونحن اهم حاجة عندنا في الخروف (الكمونية).
قالوا شالوها (المحلية).
كمان المحلية لحقتنا في (الكمونية).
ما نضبح يعني.
الضباح دخل للغريق شوية في الخروف ..قال لينا خرفوكم دا الظاهر كان عندو فشل كلوي.
قلنا ليه كيف؟.
قال لينا ما فيه (كُلي).
قلنا ليه دي كمان الشالها منو؟.
الضباح اتقدم شوية…قال لينا سبحان اللـه.
قلنا ليه في شنو كمان؟.
قال لينا خرفوكم دا كان عايش كيف؟.
قلنا ليه في شنو؟.
قال لينا خروفكم دا ما فيه (قلب).
دي سبق.
دا اعجاز دا.
يكونو شالوه ناس الولاية!!.
في النهاية كدا – طلعنا ليك من الخروف بـ (سليقة) طاعمة كدا.
لكن دفعنا ليكم في (السيلقة) دي دم قلبنا.
مرتب سبع شهور.
وتمينا ليك الفطور (كوتشينة).
نعمل شنو؟.
…………
ملحوظة : لو الضباح ما حريف – سليقة ما كان طلعنا بيها.
هوامش
نهائي كاس السودان يوم 1 / نوفمبر.
يعني عندنا ضحية تاني.
ما مشكلة.
دنقلا دي جهزوا ليها الشعلة والثعلب وبشه الصغير.
الموضوع ما عاوز اكتر من كدا.
خلوا بالكم انتوا بس في الممتاز.
مباراة الهلال اليوم امام الاهلي الخرطوم مباراة صعبة.
الاهلي يبحث عن بصيص امل.
وما في تفريط.
ما في لعب.
والجمهور مطلوب الحضور.
على الاقل عشان يقولوا شكرا للاعبين.
ما قصروا.
اما المباراة الاصعب فهي مواجهة الهلال لمريخ كوستي في كوتسي.
مريخ كوستي سبق له التعادل مع الهلال في المقبرة.
مباراة كوستي مباراة البطولة كلها.
مباراة بالممتاز.
واظن بقى ما في مشاركات خارجية.
يعني ما في عذر.
مجلس الهلال قال ما عاوز لجان فنية احسن.
جميل ان يترك الامر كله للكوكي.
….
عاجل : الكهربة الايامات دي الحاصل فيها شنو؟..مالها بقت زي معصب عمر تقطع من اول ربع ساعة.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *