مزمل ابو القاسم

المقامة الصفرية.. موديل 2015


* استجابة لرغبة عدد من أنصار الزعيم نعيد نشر المقال الذي حمل اسم (المقامة الصفرية) مع بعض التنقيح والتحديث من باب المواكبة (الصفرية) للمستجدات التي تلت كتابة المقال قبل أربع سنوات من الآن.
* الصفر الما بنقدر، أقدم ثابت كروي في تاريخ السودان!
* الصفر العجيب.. الغلب الدوا والطبيب!
* عاصر الإنجليز، وواكب حريق المك، وزامل كتشنر وسلاطين، والمستر كلارك واللورد كرومر، وعايش لحظات رفع العلم وثورة أكتوبر واستشهاد القرشي والديمقراطيات الثلاث!
* الصفر العنيد، قاتل مع قوة دفاع السودان، وتطوع مع سلاح الهجانة، وحضر الأزهري وعبود والنميري والصادق وزروق.. وما راضي يروق!
* حضر استفتاء الوحدة أو الانفصال، وصوّت للوحدة.. مع الهلال!
* حتى الانقلابات ما فاتها، خالد الكد وهاشم العطا وحسن حسين ومحمد نور سعد!
* وفي زمن الإنقاذ.. رفض أي إنقاذ!
* الصفر أقدم من الكسرة، وقاعد من زمن (الزمام أب رشمة)!
* حضر زمن الكركار، ودق الشلوفة، والرحط.. وشهد زمن البوتكس والسيلكون والتاتو!
* الصفر متحكر من زمن البرش بي قرش.. والدقة بلاش!
* غنى مع زنقار.. وكمل حقيبة الفن مع كرومة وسرور وعوض شمبات.. والصفر ما فات!
* عاصر زمن أم بلينة السنوسي وعشة الفلاتية ومهلة العبادية، وغنى مع ريماز ونانسي وشموس!
* حضر العبادي وود الرضي وود البنا وود القرشي والسر قدور، وغنى في (أغاني وأغاني) مع فرفور!
* كرومة لعب وفتر.. وسرور غنى وما قصر.. والصفر لسه محكّر!
* حضر زمن الأنادي والدلوكة والرايات.. وعاصر زمن الشريعة والكشات!
* عايش من زمن الناس بتضبط ساعاتها بالقطر.. وتركب المفتخر!
* حضر زمن اللحمة بالوقّة، والعيش بالملوة، وجوز الحمام 3 فردات!
* الصفر العنيد.. قدل في الطريق الشاقي الترام، وباع واشترى بالمليم والفريني والشلن والريال والطرادة، وحضر زمن اليورو والدينار والدولار الحار!
* اتعالج بحبوب السلفة في الشفخانة، وحكمة الله لي هسة قاعد معانا!
* حلق الكاري والخنفس، وشق شعرو مع إبراهيم عوض، وحضر المارينز والراستا، وأكل المديدة والباسطة!
* كتب عنه كوركين أسكندريان وعمر علي حسن وأبو آمنة حامد، وحضر زمن دسوقي وشجرابي وخالد!
* الصفر حضر ولادة خالد عز الدين، وكان ما أخاف الكضب أقول قاعد معانا لي يوم الدين!
* في مصر.. الصفر عاصر الخديوي توفيق والملك فؤاد والملك فاروق ومحمد نجيب وعبد الناصر والسادات ومبارك وطنطاوي ومرسي وعدلي منصور.. وفي تتويج السيسي كان حضور!!
* في إفريقيا حضر زمن هيلاسيلاسي وتمبلباي وحسين هبري وجكوني عويدي وعيدي أمين وموسفيني وإدريس ديبي.. ولسه (يدبي)!
* عاش مع الملك الحسن وشهد خلافة ابنه في المغرب، وحضر زمن الملك حسين وابنه الملك عبد الله، وعاصر عهود الملك عبد العزيز، والملك سعود، والملك فيصل، والملك خالد، والملك عبد الله، والملك سلمان.. وقاعد معانا للآن!
* في السودان عاصر زمن الناس بتسمي خشم الموس، والكجم وتور القوز واللدر والدود وعشا البايتات!
* وحضر زمن مهند وهيثم ورامي والراستات!!
* الصفر شاف سعدية الداية، وتخرج في كلية غردون التذكارية.. وبعد الاستقلال درس في الأهلية والنيلين والأحفاد.. وحضر زمن مأمون حميدة والمشرق والرباط!
* الصفر الخطير حضر زمن فاطنية وعشوشة والسُرة وأم ضيفان، وعاصر زمن نانسي وسوسو وناريمان!
* عاصر بوكاسا.. ولعب (الرمة وحراسها)!
* الصفر عايش من زمن الدوم بالطبق، وقراصة النبق!
* أكل البيتزا واللازانيا والهوت دوغ والكرانشي بيرغر!
* اتطبب بالجردقة والمحريب والقرض والحرجل، ومشى لي بت بتي الحجل بالرجل!
* اتعالج بالبنسلين والتتراسيكيلين والإمبسلين، وحضر زمن العلاج بالليزر!
* صفر الجن.. حضر الضلام والدمبعلو والبعاتي وحجى الحبوبات!
* حضر زمن الحمام الزاجل والجواب والتلغراف، وقعد لي زمن زمن الموبايل والنت واللاب توب والياهوو والهوت ميل والفيس بوك والواتساب!
* الصفر حضر زمن الخوسة والسيف والسفروق!
* وحضر زمن الليزر والقنابل العنقودية والأسلحة النووية!
* عاصر الحربين العالميتين، وحضر تشييد وسقوط حائط برلين، وشارك في بناء سور الصين!
* الصفر قاعد من زمن كتلة عدم الانحياز والاتحاد السوفيتي وحلف وارسو والحرب الباردة!
* الصفر الصداح.. غنى مع كابلي لناصر وجومو وسوكارنو ونهرو وتيتو!
* وشارك في حرب فيتنام، وتابع أزمة خليج الخنازير، وشهد مقتل كيندي، ونضال جيفارا، وثورة كاسترو، وعاصر ثورة ماو في الصين!
* شهد زمن الكلبة لايكا، وتابع صعود الأمريكان للقمر، ووثق انفجار تشيرنوبل وهيروشيما وناجازاكي!
* عاصر زمن الهمباتة، وغنى مع خلف الله حمد (الكنداكة سيدي سيد الأراكة)!
* الصفر ركب مع طه الضرير وود ضحوية في جمل واحد، وحضر زمن (بكرة الهمر جاية)!
* قاعد من زمن القراية أم لوح، وما بعيد يكون ركب سفينة نوح!
* الصفر نده سيدي الحسن أب قبة لبنية، وزار الشيخ حسن ود حسونة طباب المجنونة، وعاش معانا عهود ريماز وندى القلعة وستونة!
* هز مع الدلوكة والشتم، ورقص التوتيستي، ولبس الشارلستون، والساعة الرومر، والنضارة البيرسول!
* حضر زمن توب الزراق الجابوهو النقادة، والقنجة، وأب قجيجة، ورسالة لندن، وجكسا في خط ستة، وتحرمني منك، وعاش لي زمن الكارينا والبودي والسيستم!
* 85 سنة.. والصفر الثقيل ما راضي يستقيل!
* الصفر الدولي أعرق من الطابية المقابلة النيل، وأقدم من بوابة عبد القيوم، وأشهر من دهليز صالح جبريل، وأقدم من سبيل خلف الله!
* جلدو أتخن من سور سجن أم درمان!
* حضر زمن السحارة والدواليب.. وعاصر الديب فريزر والمشلعيب!
* الصفر قاعد من زمن دار الضلمة، وقهوة جورج مشرقي، وسان جيمس، والسينما المتجولة والعيادة المحولة!
* دخل سينما برمبل وكلوزيوم والوطنية!
* يا زوووول، الصفر حضر افتتاح (عفراء مول)!
* الصفر مشى في سوق أم دفسو، وفرش في سوق أم سويقا، وباع في سوق خمسة دقايق، واشترى من (مليون صنف)!
* وعمرو طال لغاية ما شاف المول والأسواق الحرة والتجارة الإلكترونية!
* الصفر حضر زمن صفرجت وسكج مكج والسيجة وشليل وينو!
* ولعب بلاي ستيشن وأتاري، مع أولاد مكسيم وكيبي وديمبا باري!
* عاصر زمن الهيلمان والهينو والكندة والهنتر وكومر الكشة.. وركب الأمجاد والركشة!!
* الصفر الدولي الخطير.. ركب الترماي واتحكر في باصات أبو رجيلة، وحضر زمن بيع التمر بالكيلة!
* الصفر قاعد من زمن (الشّدة) و(تموت تخلي)، والهلال ما راضي يخلي!
* صفر معمر، لعب مع منزول وممي وقاقا والدحيش وجكسا وباكمبا، وزامل كاريكا وسيدا وسادومبا!
* الصفر لعب ورا وقدام.. مع هاليفا وصدام.. وحضر زمن أندريا وجوليام!
* المريخ فاز بكأس مانديلا.. والصفر العالمي ما اتدلى!
* الصفر شاف مانديلا ودبي وسيكافا، وقال النجمة قيافة!!
* الصفر شهد تهجير الفلاشا، وقعد من التركية لي نيفاشا!
* شهد مجاعة سنة ستة، وحضر زمن بيع الباسطة بالحتة!
* الصفر حضر حربي سوريا واليمن، وشارك في (عاصفة الحزم) وحضر مجزرة رابعة وسقوط الرافعة!
*الصفر عاصر بابكر قباني وآدم رجب والطيب عبد الله وإبراهيم محجوب وحسن هلال وعبد الرحمن سر الختم وطه علي البشير ويوسف محمد يوسف والحاج عطا المنان والأمين البرير والكاردينال وما راضي يفك الهلال!
* حضر زمن الأرباب وقرأ عمود (بدون حجاب)!
* الصفر والوصيف أصحاب أصحاب!
* الصفر حضر زمن المعبرة الغبراء، وشاف ملامح الجوهرة (الزرغاء)!
* الصفر عاصر قاقا وممي ومنزول وحبشي، وحضر زمن (الفول فولي)!
* الصفر المسيخ.. حضر شكلة السيخ، وأبى يشيخ!!!
* آخر خبر: مش من حقو يقول: صفر.. وأفتخر؟


‫6 تعليقات

  1. انك ناقص عقل ودين وخلق افضل منك النساء
    من ذكرتهن افضل منك على الاقل عفيفات لسان

  2. مزمل ابو القاسم رجل مستهزئ بالهلال وبكتب كلام عشان يبيع بيهو جرايدو
    الله يهدينا ويهديهو

  3. مزمل جميع كتاباتك بتأكد( الخواء الفكري ) وعدم الموضوعية في الطرح وسبب دمار الكرة السودانية واشتعال نار العصبية وكمان الخوض في أعراض الناس ياخ اتقي الله ما عندك أخوات وبنات حسبنا الله ونعم الوكيل

  4. اذا كان مزمل خاوي الفكر ومستهزئ كما تقولون كتاب الهلال يكونو شنو ,,,, مزمل شئتم ام ابيتم احسن كاتب رياضي في الساحة وصحيفته الصدي خرجت رؤساء تحرير وصحفين لا يشق لهم غبار ويكتب بالدارجة والفصحي وبالانجليزي والفرنسي لو حبيتم