زواج سوداناس

حيرة !!!


شارك الموضوع :

مشكلتي إنك قاسي حبّة….!!!
وما فهمت دروس هوانا ولا قوانين المحبّة..!

الحياة جنبك جميلو.. بس طبيعتك برضو صعبة..

بيك متيم إلا خايف…وفيني جمر الحيره شبَّ

أصلي حبيت نور عيونك.. وقلبي فاض بالريد تعبَّ

وريدي ظاهر في عيوني.. لا تراجع.. لا تخبّى

وكم سهرت وراك ليالي.. وياما دمع الغيرة كبَّ
###

وما بتأثر فيك دموعي ولا الأغاني ولا المشاعر..!
عملي جدا في عواطفك ومستحيل يوم تبقى (شاعر) !
ترسم الشوق بي حروفك وتستكين جوة الخواطر..
إنت معروف جد محنّك وفي الحسابات ياخي شاطر..
بتحسب الإحساس بدقة.. ويبقى أرقام في الدفاتر..
لا بترضاها الهزيمة.. ولا بتقبل بالخسائر..
ضد مشاعرك زول مصفح.. ومن حنينك ديمة نافر..
عادي تظلم حتى نفسك.. وتبقى في تقديرنا جائر..
وتنسى عشرتنا وجمالها.. وفي دقيقة تغيب تغادر..
لي تلوّح بي (جوازك).. ومستعد دايماً تسافر..
مستحيل زول بس يفكر.. إنو مرة عليك يسيطر…
يبقى موهوم في اعتقادو.. وما حسب حجم المخاطر…
إنت مخلوق من عنادك.. وما بطيق نيران بعادك.. أصلي ممكون فيك وصابر..
بينّا عايش ضد قناعتك.. ورغبتك ترحل تهاجر..
وعندك أحلام جد كبيرة.. وما بتحب خطب المنابر..
نفسك إنو الدنيا تصحى.. وتمشى زي ما إنت داير..
تبقى كل الناس نزيهة.. والبلد بي خيرو زاخر..
وأي حتة تكون نضيفة.. وفيها مشتولة الأزاهر..
أولوياتك طموحك.. وما بتحب علم (المظاهر)..
فينا محسوب قامة صفوة…وظاهرة من ضمن الظواهر..
ما بتشبه مني حاجة.. واختلاف اطيافنا ظاهر..
إلا قلبي طلب ودادك.. وصدفة عاد بالريدة ظافر..
إنت حبيتني بطريقتك.. وقلبي فيك من يومو سادر..
جوة قلبك (كالكوليتر) بيهو تحسب حلم باكر..
منضبط في لون غرامك وواقع إحساسك مغاير..
كاتم الشوق في الحنايا.. و حتى لو يوم جيتنا زائر..
لا بتعبر عن هيامك لا بتهمس.. لا بتجاهر..
ورغم إنك يا حبيبي .. شيخنا في علم الضمائر..
بس ضميرك في غرامنا.. نام.. وطرف أشواقي ساهر…
ويااا محير كل حواسي.. هل بتفهم معنى: (حائر)؟؟!!

تلويح:
ما بين الحب والحيرة والغيرة…تنمو الشاعرية.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *