محمد عبد الماجد

عمـــــود (واتـــساب)


يا حداثة ..نحن بكري المدينة فكيناهو ..لا لمينا في (موهبته) ..ولا لمينا في (عضمو)
مشاركة (ضفر) في الهجوم – متل العريس البكون في ليلة الزفاف لابس ليه (جلابية وطاقية)
مريخابي بعد مباراة مازيمبي قالوا ليه المباراة انتهت كم؟..قال ليهم تلاتة ضفر
(إعادة) قيد امير كمال…اصعب من (إعادة) مباراة المريخ والامل

غارزيتو غلط في التبديل الاول.
اخراج (ديديه) – قرار صحيح…ما في اصلو زول بقول كلمة.
لكن بدل ادخال عمر بخيت – غارزيتو كان مفروض يدخل واحد من (البودي قاردات).
ما كان انتهت تلاتة.
لكن هذا ليس ذنب غارزيتو ..عشان المدرب الفرنسي عندما إلتفت نحو (الكنبة) لادخال واحد من (البودي قاردات) – لقى ليك الكنبة فاضية.
البودي قاردات كانوا (محبوسين) في غرفة.
اول مرة اشوف لي بودي قاردات بحبسوهم.
………………..
مشاركة (ضفر) في الهجوم – متل العريس البكون في ليلة الزفاف لابس ليه (جلابية وطاقية).
وشايل (بستلة) الفول كمان.
……………
زمان كانوا بزيدوا لينا (اللبن) موية.
هسع (الموية) ذاتها بقت مشكلة.
بقوا يزيدوا اللبن في (السعر).
بيزدوه قروش.
……………
المدير الفني السابق للهلال غارزيتو جابوه في صورة في استاد المريخ وهو بدردق ليه في (درداقة) هو ولدو.
الشغل بالدرداقة.
البيع بالدرداقات.
الزول وقت يكون غلطان ..وعامل ليه حاجة ما صحيحة ..بقوم من الصباح يردم الحوش.
ودا الشيء البعمل فيه غارزيتو الآن.
…………….
هلالابي (قاطع).
او ما قاطع.
انا حر.
المهم الهلالابي دا قال لي اندرزينهو ما كبير في السن.
واندرزنيهو الموسم القادم بفتح بصورة اكبر.
واحتمال السنة القادمة يصغر شوية مع (جو السودان السخن دا).
…………..
(اعادة) قيد امير كمال.
اصعب من (اعادة) مباراة المريخ والامل.
مالها زي العاوز تجيب ليها (مطرة)؟.
………..
حداثة في تصريحات صحفية قال اخشى على ضياع موهبة (ولاءالدين) لأنه شهرين ما قاعد يتمرن وهو في غرفة تسجيلات الهلال.
لو في شهرين بتضيع ليها موهبة لاعب …ميسي بعد اصابته وتوقفه شهرين من ممارسة كورة القدم مفروض يمشي يعمل ليه (طبلية) في سوق الكلاكلة.
او يركب ليه قدرة فول في سوق صابرين.
او يسوق ليه حافلة في خط الحاج يوسف.
بعدين يا حداثة ..نحن بكري المدينة فكيناهو ..لا لمينا في (موهبته) ..ولا لمينا في (عضمو).
عشان كدا كلامك دا تاني ما تقولو.
………………….
الكاردينال دفع في الجوهرة الزرقاء (60) مليار جنيه.
باقى الطوب والسيخ ساكت بيسجل ليه اربعة لاعبين من المريخ.
شوفوا (لوري الطوب) عمل كم؟.
…………
اول مرة شافها – اعجب بيها.
قال ليها : اسمعي دمك (حفيف).
قالت ليه : طيب لو شفت (ايدي) تقول شنو؟.
……………
روسي قالوا ليه مشكلة الكورة السودانية شنو؟.
قال ليهم : الملاعب والاتحاد العام وضفر وصلاح ادريس.
………………
مريخابي بعد مباراة مازيمبي قالوا ليه المباراة انتهت كم؟.
قال ليهم تلاتة ضفر.
…………..
المريخاب الذين شاهدوا (مصعب عمر) في مباراة المريخ ومازيمبي في الخرطوم وفي ليموباشي ..كلهم قالوا يا حليل (موسي الزومة).
حليل موسي يا حليل موسي …حليل موسى للرجال خوسة.
………..
محسن سيد ما بعرف يرص العلامات.
لكن احسن زول يصلح ليك (الفول).
……….
بابكر سلك يوم داك جاء عابر بي شارع (المطار).
قفل قزاز العربية.
السواق قال ليه مالك؟.
قال ليه (الريحة) دي بقت تجيب لي (معصب عمر).
…………..
هذه الروائح.
ريحة الحلو مر.
ريحة الطين.
ريحة الحنة.
ريحة الضريرة.
ريحة البصل.
لاحظوا اني لغاية الآن ما جبت ليكم سيرة (ريحة المطار).
ريحة الطعمية.
ريحة الخبيز.
ريحة رغيف حار.
ريحة جوافة.
لاحظوا اني لغاية الآن ما حبت ليكم سيرة لي (ريحة المطار).
ريحة بصل.
ريحة سمك.
بعد كدا واللـه لا بقدر امسك نفسي ولا حاجة – بعد كدا ح اقول ليكم (ريحة المطار) والعاوز يحصل اليحصل.
………..
بلاتر وقفوه (6) شهور.
دا كمان ضرب ليه ياتو حكم؟.
بلاتر ما ضرب حكم.
بلاتر ضرب (الفيفا).
……..
الدكان لمن يكون ما فيه (طحنية) ظاهر.
سيد الدكان بتلقاهو بدون مناسبة كدا يقول ليك عندنا (شعيرية) خطيرة.
في زول سألك من (الشعيرية).
………..
مغترب مشى السعودية …17 سنة قاعد برة البلد.
صاحبكم اول ما رجع من السعودية …قال عاوز اعرس.
ابوه قال ليه تعرس بنت عمك.
المغترب قال ليه انا وقت اعرس بنت عمي …مسافر السعودية ليه …كان امشي (الدهب).
البخليني امرقها للسعودية شنو؟.
…………….
مغترب تاني.
المريخ كل ما يتغلب – ابوه برسل ليه بقول ليه رسل لينا (مصاريف) عاوزين نصلح البيت.
صاحبو معاه في الامارات ..شاف هزايم المريخ كترت …قام قال لي صاحبو ..ابوك دا لو امين وما بضرب القروش …بيتكم دا مفروض يبقى زي (برج خليفة).
…………….
سألوه قالوا ليه رأيك شنو في (العدس)؟.
قال ليهم من حيث شنو؟.
قالوا ليه من حيث المبدأ.
قال ليهم من حيث المبدأ …..(كوفي) ما مفروض يطلع.
عليكم اللـه في علاقة بين العدس وكوفي.
حقيقة ما في علاقة.
لكن يمكن (المبدأ) يلخبط الحكاية.
……………..
مصعب عمر (بتقدم) وما برجع.
وايمن سعيد (بتقدم) في السن.
……………
اغرب حاجة ابوجريشة قال الحكم ظلمنا امام مازيمبي.
انا ما عارف ظلمهم في شنو؟.
احتمال ابوجريشة يكون قدم ليه لي (كشك) ليمون في ليمومباشي …والحكم ما صدقو ليه.
………….
كل ما اشوف (العلامات)..بتذكر محسن سيد.
انت يا محسن سيد ..غارزيتو دا بقول ليك رص العلامات بالفرنسي.
………..
زول اسمو (عمر ) جاب ليه (ولد).
قال يا ربي اسميه الطيب وإلّا عثمان وإلّا سليمان؟.
قالوا ليه : ليه الاسماء التلاتة دي بالتحديد.
قال ليهم بس عشان ما اسميه (مصعب).
………………
اغرب (مروحة) في الدنيا.
تشغلها في تلاتة – تشتغل ليك في (اربعة).
…………
الكاردينال قال الفول فولي وحدى.
قالوا ليك كمان (السيخ) دا لو لقى ليه (بصلة) ..طاعم جنس طعم.
…………
بحضروا في مباراة مازيمبي والمريخ.
الشوط الاول انتهي تعادل …فرحانين متل (البطيخة) بعد الغداء.
الكهربة (قطعت).
الكهربة رجعت ..لقوا المباراة 3 / صفر.
واحد فيهم اتلفت للتاني وقال ليه القطع منو؟…الكهربة وإلّا مصعب عمر.
تلخبطوا الزول.
…………………
وراء كل رجل عظيم امرأة.
دا كان زمان.
هسع النسوان بقن يمشن قدام.
ولا بقيفن ليهن لي زول.
……………
همد.
خليك جاهز.
بعد مباراة دنقلا ..بنحتاج ليك تهاجم غارزيتو.
…………..
طه سليمان مطرب.
طه سليمان..كاتب صحفي.
طه سليمان ممثل.
طه سليمان مقدم برامج.
الشهر القادم لو شفتوه شايل ليه (راية) في مباراة كوبر والكدرو ما تستغربو.
ما عاوز اقول ليكم (حارس مرمي) .
احسن ليه حكم رايه.
……………………
ملحوظة : عمود واتساب بنفس العنوان والطريقة ..ح نتواصل بيه معاكم من فترة لي فترة لو ما من جمعة لي جمعة.

هوامش

مباراة صعبة للهلال امس.
الحمدلله ان الهلال تجاوزها بسهولة.
الكوكي في الشوط التاني ما بتقابل.
بحسم ليكم اي شيء.
عندما يسجل كاريكا…اي حاجة بتبقى تمام.
وعافية الهلال في عافية نزار حامد.
وفي انتظار عودة بشه.
تبقى المباراة الكبيرة للهلال في كوستي.
مباراة كوستي هي مباراة البطولة.
مباراة الممتاز كلها.
مريخ كوستي يقوده فاروق جبرة واحمد السيد وقد سبق لهما النجاح في التعادل مع الهلال في ملعبه.
الجهاز الفني لمريخ كوستي جهاز مقتدر ..وامكانياته كبيرة.
عشان كدا الحذر – الحذر من مباراة الاحد.
جمهور كوستي ح يكون في الموعد.
صهيب الثعلب موهبة حقيقية.
ربنا يحفظه.
كلام الجرايد الكتير ..خطر عليه.
وصهيب الثعلب ووليد الشعلة ..كلهم عندهم كلام في القمة.
في ام درمان وفي دنقلا.
………..
عاجل : جمال سالم لو وقف في ام درمان ..في دنقلا ما بقيف.


‫2 تعليقات

  1. اللي بشوف تريقتك دي يقول فزت بكأس الأبطال ..

    انتو ما طلعتوا قبلينا و بهزيمة مرررررة في ملعبكم ..

    دي أحرّ هزيمة للهلال في القرن الواحد وعشرين ..

    اليوم داك قال العاصمة نامت هادئة ..

    والفول (نام) في القدرة نوما هادئا، برضو ..

    هاك الشطة الحارة دي !!!

    عشان تظبط بيها بوش بالفول البايت دا !!