زواج سوداناس

(17) طريقة للتخلص من غارزيتو



شارك الموضوع :

• عندما كان غارزيتو مديرا فنيا للهلال وصفه وقتها كابتن الهلال وقائده هيثم مصطفى وشبهه بـ (انبوبة الغاز).
• غارزيتو.
• غاززيتو.
• اول مرة اشوف لي (غاز) و(زيت) في نفس الوقت.
• دي حريقة جاهزة.
• هيثم مصطفى قال ان غارزيتو زي (انبوبة الغاز) عندما يتشحن لا بد له من ان يحرق كل الذين حوله.
• مقولة هيثم مصطفى كانت (صائبة) في ناحية و(خاطئة) في ناحية تانية.
• غارزيتو اثبت فعلا انه (انبوبة غاز) – لكن ليس كما قال هيثم مصطفى عندما اشار الى ان غارزيتو (يشحن).
• ما في زول بيشحن غارزيتو.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• غارزيتو منو وليه كدا هو (انبوبة غاز) – لا يحتاج لأن يشحنه احد .. الآن ليس هناك اشخاص حول غارزيتو مع ذلك يتصرف غارزيتو بطريقة (عدائية) مع عناصر عديدة في فريقه.
• الفرنسي دا رأسو قوي.
• انا ما عارف لو بقرأ جرايدنا دي كان ح يعمل شنو؟.
• اظن ان خالد بخيت والامين البرير كانوا ابرياء – هما لم يحرضا غارزيتو على هيثم مصطفى.
• يثبت ذلك ما يقوم به غارزيتو الآن في المريخ.
• يفعل ذلك الآن غارزيتو بدون خالد بخيت وبدون الامين البرير.
• الزول دا اصلو كدا.
• طبعو كدا – (اعمل ليكم شنو انا؟).
• قبل ذلك ظهرت حرب غارزيتو الشعواء التى كان يواجه بها لاعب مازيمبي السابق موبوتو.
• لا بد ان نضع في الاعتبار ان طبع غارزيتو بهذه (الحدة) – يبدو واضحا ان غارزيتو لا يستطيع يعمل إلّا في الاجواء العكرة.
• فهو اينما عمل ..صنع لنفسه تلك الاجواء.
• ربما يبدع غارزيتو وتظهر قدراته في مثل هذه الاجواء.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• على العموم ما كان يفعله غارزيتو من (فترته) في الهلال – نقلها بالكامل للمريخ.
• الآن نحن نعيش في عهد (التصدعات) الكبيرة التي يعيش فيها المريخ.
• ومثلما فقد المريخ فرصة التأهل للنهائي في البطولة الافريقية سوف يفقد المريخ في وجود غارزيتو الكاس والدوري.
• الممتاز طبيعي ان يفقده المريخ ..لا نريد ان نحمل غارزيتو وزر ذلك ..لكن الاكيد ان المريخ سوف يفقد هذا العام كاس السودان.
• وهذا امر يمكن ان نراهن عليه منذ الآن – في حال استمرار غارزيتو.
• لا نقول ذلك من اجل الاطاحة بالفرنسي غارزيتو ..لكن نأكد ان المريخ في وجود غارزيتو لن يحقق بطولة.
• كما نأكد ان المريخ لن يستحمل (غارزيتو) كثيرا – واضح الآن ان غارزيتو يعمل في ظروف صعبة.
• وواضح ايضا ان الظروف التى يعمل فيها غارزيتو لن تساعده على تحقيق اي بطولة في المريخ.
• لا قارية ولا محلية.
• لذلك حق علينا نحن الهلالاب ان نشكر غارزيتو على تلك الاجواء التى صنعها في المريخ.
• نحن بذلك لا نقلل من غارزيتو ..نعرف ان غارزيتو مدرب كبير …لكن الذي نقصده ونأكده ان الاجواء الآن في المريخ لن تساعد غارزيتو حتى لتحقيق (الوصافة).
• في ظل هذه الاجواء – افضل للمريخ ان ينهي تعاقده مع مديره الفني.
• لا اللافتات ولا قروبات الواتساب هي التى سوف تحدد بقاء المدير الفني للمريخ الفرنسي غارزيتو.
• لا يعقل ان تصبح قروبات الواتساب هي التى تحدد (المصائر) في المريخ.
• يعني المريخ اصبح يدار بالقروبات.
• ومثلما تولت الصحف امر (الشكاوي) وحررها للاستئنافات مزمل ابوالقاسم ..اصبحت (القروبات) هي التى تحدد مصير الجهاز الفني في المريخ.
• اين مجلس المريخ؟.
• او بصورة اكثر وضوحا اين جمال الوالي؟.
• المريخ اصبح مدور بـ (القروبات).
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• لكن دعوني اعود بكم الى (17) طريقة يتم بها التخلص من (غاززيتو).
• هذه الطرق شاهدنا بعضها.
• وبعضها الاخر قادم في الطريق.
• 1- تعيين 10 بودي قاردات لمرافقة المريخ الى الكنغو.
• وجود بودي قاردات ضمن بعثة المريخ يعني ان مجلس الادارة لا يثق في الجهاز الفني للمريخ.
• في وجود 10 بودي قاردات يبيعوا المباراة!!.
• 2 – الاطاحة بمحسن سيد.
• والاعلان رسميا ان محسن سيد ما بعرف يرص العلامات.
• وقت ما بعرف يرص العلامات ..جايبنو انتوا لي شنو؟.
• للحوار للوطني؟.
• يا زول هسع في زول جاب سيرة الحوار الوطني وإلّا امير كمال؟.
• براكم قاعدين تتخيلوا ليكم في حاجات من رأسكم.
• 3 – الاعلان (صحفيا) ان انسحاب المريخ من الدوري والكاس.
• عاوزين يعملوا الحيلة في لجنة الاستئنافات.
• الجماعة قنعوا.
• طاروا من البطولة الافريقية – وعاوزين ينسحبوا من البطولات المحلية.
• 4 – الاجتماع بالجهاز الفني.
• شفتوا من يقولوا ليك المجلس يجدد الثقة في الجهاز الفني ..اعرفوا طوالي ان المجلس راقد ليه فوق رأي.
• ثقة شنو؟.
• انتوا قلتوا (باع) المباراة – تقولوا لي (تجديد ثقة).
• طيب بالمرة كدا جددوا الثقة في (ايمن سعيد).
• 5 – الاشاعة في الصحف والمواقع الاسفيرية عن عروض مقدمة للفرنسي غارزيتو.
• حركات قديمة.
• وحاجات بيمتصوا بيها غضب الجماهير.
• عروض شنو البقدومها لي غارزيتو بعد ان وصل السبعين؟.
• ومن الترجي كمان.
• الترجي انتهى.
• 6 – الاعلان عن مقدم كبير سوف يطالب به غارزيتو.
• 7 – الاصرار من جانب غارزيتو على المساعد الوطني.
• شفتوا مجلس المريخ ح يقول غارزيتو رفض المساعد الوطني – والمجلس اصر.
• المجلس لا يسامح في مثل هذه الامور.
• 8 – الترويج لنية المجلس على التقاعد مع جهاز فني كبير.
• 9 – كالعادة وزي ما انتوا عارفين – جمال الوالي ح يلوح بي الاستقالة.
• كل هذه الاشياء …(مقدمات) لعدم التجديد مع غارزيتو.
• او للاطاحة به.
• 11 – بداية حملة صحفية تقلل من قدرات غارزيتو وتكشف عورات غارزيتو.
• ح يقولوا ليكم غارزيتو ابعد اكرا.
• وغارزيتو ابعد الباشا وبلة جابر ومجدي عبداللطيف وايهاب زغبير.
• وغارزيتو بعتمد على (12) لاعب فقط.
• 12 – تعيين مازدا مشرفا على نهائي الكاس.
• الكلام دا اذكروه – كلو ح يحصل بعد قمة الممتاز.
• 13 – احتجاب عمود مزمل ابوالقاسم.
• اسمعوا كلامي دا – انا بجيب ليكم السنياريو البحصل.
• اتذكروا الكلام دا.
• 14 – همد يهاجم غارزيتو.
• 15 – بي اي حال من الاحوال ..لا المجلس ولا الاعلام سوف يسمح لغارزيتو بالاشراف على التسجيلات القادمة.
• التسجيلات عندها ناسها.
• الحمدلله – مجلس الهلال اوكل امر التسجيلات للكوكي وفوزي المرضي وخالد بخيت.
• نعم القرار.
• 16 – اكرا يتألق.
• 17- مجلس المريخ يصدر بيان شافي وكافي يحدد فيه اخطاء غارزيتو ..والكيفية التى كان يتعامل بها مع المجلس واللاعبين.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• يلا شوفوا نحن في ياتو مرحلة ..عشان اوريكم غارزيتو باقي ليه كم يوم في المريخ؟.
• ……..
و
• انتوا يا ناس المريخ (امير كمال) دا عاوز يبقى ليكم مدرب.
• يا ناس الهلال ..عشان تبقوا عارفين ..نحن ح نمسك في موضوع (امير كمال) دا بي فهم.
• القمة في الممتاز.
• والقمة في دنقلا.
• وما ح يكون عندنا موضوع غير (امير كمال).
• يا احسموا لينا امرو يا جمال الوالي ..يا ما تدخلوا بيه مباراة القمة القادمة.
• احسن نقول ليكم كدا بالواضح.
• كوفي مع غارزيتو ما بقعد.
• واكرا مع غارزيتو ما بيلعب.
• وراجي ما في زول جايب خبرو.
• والباشا ..قاعد ليه فوق رأي.
• حالتكم تشفق.
• الهلال يلعب امام مريخ كوستي مباراة مهمة ومصيرية.
• مباراة الحسم.
• مباراة البطولة.
• جضموا الكفر.
• وألعبوا كورتكم – الله ينصركم.
• النيل شندي اضاع فرصة الترقي المباشر للممتاز.
• والسنترليق صعب على النيل.
• فرصة زي دي ما بتلقوها بالساهل.
• و
• (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
• ………..
• السيدة (ل) – (البطيخ) لمن يزعل بيبقى زي (القرع).
• وقرّض على كدا.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *