زواج سوداناس

أقرع الواقفات يا طارق سيد



شارك الموضوع :

* أيها الناس
* مجلس إدارتنا مع إحترامنا لأعضائه فرداً فرداً
* إلا انهم جميعاً ياها قدرتهم
* الريس بيعمل اى شئ
* لدرجة إنو سمعت الريس بدفع كهربة المكتب التنفيذى وقهوته
* معقولة الريس جاب العقرب وإنتو جيوبكم فيها العقرب؟
* حتى إدارياً لايقدمون المساعده المطلوبة منهم
* وما قصة حجوزات العلمه ببعيدة
* فتكفل الريس كعادته بتحمل إخفاق وأخطاء أعضاء المجلس
* وسدد أجرة طائرة خاصه
* إنجعص فيها بعض أعضاء المجلس
* كما إنجعصوا قبلها وبعدها
* حتى السفر ده يدفع الوالى
* طيب إنتو بروفات (جمع بروف) فى علم الإدارة يعنى؟
* أيها الناس
* ما يدفع جمال للإستقاله بين الحين والحين ما شوية
* عمايل زى دى بتخلى أجعص زول يستقيل
* موش كفاية على الريس تحمل التعبات الماليه منفرداً؟!!!
* وكمان الشفوت فى الناحيه دى مقصرين
* أين دعمكم لناديكم يا شفوت؟
* اى واحد فيكم عندو موبايل
* يبقى مشروع الدعم الجماهيرى كان بخفف على الريس شويه
* وبيقنعوا انو وراهو رجال
* وأن للمريخ عشاق لايبخلون عليه
* لكن بالطريقة دى
* الريس ليهو حق يستقيل
* يا ناس
* ستة آلاف مشترك فى مشروع 2870
* هل ده عدد جمهور المريخ؟؟
* وين الناس الكانت فالقانا؟
* ورونا ندعم كيف وزحوا لينا؟
* وريناكم ووريتونا
* أيها الشفوت
* الدعم الجماهيرى ممكن يخفف على جمال مصاريف التسيير الشهرية العادية
* وده فى حد ذاتو ما مبلغ مؤثر على ميزانية الفرد منا
* حول خمسه جنيهات
* حق القهوة ما كتير على المريخ فى شهر
* حول عشره لو بتقدر
* حول خمسين لو ربنا فتح عليك
* حول ميه لو إنت قدمت النيه
* خلينا نبقى سته مليون مشترك بدل سته الف
* عشان نصبح سطاشر مليون مشترك
* فسته وعشرين مليون مشترك
* ووقتها القروش ما بنعرف نوديها وين
* أيها الناس
* القروبات فى الفيس وفى الواتس
* دوركم كان كبير
* والراجيكم لسه كتير
* لو ألزمتو أعضائكم بنيل العضوية
* وألزمتموهم بالإشتراك الشهرى بتاع العضوية
* بالنسبة للفرد القصه ما صعبه
* وبالنسبة للقروب القصه ساهلة جداً
* أما بالنسبة للنادى القصه كبيره وعظيمه
* أيها الناس
* جمال عمل أى شئ فى النادىالمجلس ماقدم مع جمال ولاحق شاى الإجتماعات
* وجمال ماقعد فى المدرجات يشجع
* لأنو الشفوت ما قصروا
* لو قصروا كان قعد على المدرجات عشان يشجع براهو
* زى ما بيعمل أى شى إدارى براهو
* يبقى فى الدعم لازم وجودنا يكون قدر تواجدنا فى المدرجات
* وشعبك أقوى وأكبر يا مريخ
* وغارزيتو مدربى
* مرتبو خمسطاشر الف دولار
* ضربوها شوفوا شهرياً بى كم
* على أقل تقدير مفروض إشتراكنا الشهرى يغطى راتب الجهاز الفنى والأجانب
* شدوا حيلكم يا شفوت
* المهم
* يا طارق سيدالمعتصم
* نثق فى قرار توليك لمؤسسة المراحل السنيه بالمريخ
* ونمد لك أيادينا بكل رحابة صدر
* حتى تحقق برنامجك الطموح بكل دقة
* يا طارق يا أخوى
* من الأشبال والرديف عندنا المشى
* واحدين مشوا الهلال(الطرف الشمال)
* وواحدين مشوا الشرطة القضارف (حسين الطرف اليمين)
* وواحدين الخرطوم الوطنى وغيره من الأندية
* ديك كانت حقبة
* خلينا منها وخلينا من التباكى على اللبن المسكوب
* الجفلن خلهن
* أقرع الواقفات يا طارق
* بكشوفات الأشبال والرديف من تنتهى مدتو فى ديسمبر المقبل
* وفيهم مواهب خرافية لاقت الأهمال بالمريخ
* أمسك قوى
* أقعد معاهم قبل الفترة تتم
* الإتصالات بيهم بدت
* وتحفيزهم كان بعبارة
* فى المريخ ما بلعبوكم
* نحنا بنديكم فرصة المشاركه مع الفريق الكبير
* وقصص زى دى
* أقرع ديل يا طارق
* صدقنى بتحقق هدفك فى تقديم مواهب ناضجه للفريق الكبير
* سا معنى يا طارق يا اخوى؟؟؟
* ولا أضانك تقلت لحقت إضنين أعضاء مجلسنا الهمام
* المهم
* فى الواتس حايم كلام قالو كاتبو صحفى تونسى
* بيتحسر على مستوى بطولة الأندية الأفريقية
* وإتريق علينا وعليها بقوله ان للسودان فريقين فيها
* عشان كده مشاهدتها قلت
* يا صحفى يا تونسى يا أخوى
* فى زول منعكم ياناس شمال أفريقيا من المشاركة؟؟؟
* موش الترجى شارك والنجم شارك وسطيف شارك والأهلى القاهرى والزمالك شاركا والتطوانى شارك وسموحه شارك
* يعنى يا تمشوا إنتو لى قدام
* يا البطولة كعبه؟؟؟
* إنتوا توانسه هلالاب ولا شنو؟؟؟
* الكاس البغلبكم طوالى تبخسوهوا؟؟؟
* والله منطق الصحفى ده زى منطق ناس رمضان حول سيكافا
* غالباهم عشرة سنين
* وأخيراً قالوا كعبه
* زى منطق ناس روشا فى مانديلا
* ما جابوا زيوا
* ويقولوا ليك كاس كعب
* زى منطق البت البايرة
* قاعده بايرة وتشنف فى عرسان صاحباتها
* وتقول:
* لو دايرين نعرس زى ده كان عرست زمااااااااااان
* وهى البوره كاتلاها
* وتجلط فى الخلطات بالليل والصباح
* وما نفع
* وتفرد فى الشعر
* وما نفع
* وتبرم فى الشعر
* وما نفع
* تمسك الشعره وتدهنا وتبرما وتبرما وتبرما
* وبرضو ما نفع
* يبقى مانديلا إنجازاً وحيداً فى سجلات التاريخ
* والبورة تضرب الباقين
* أيها الأهلة الشرفاء
* تسعه وتمانين سنه فاتت سن الولادة
* بعد ده حقوا تتبنوا ليكم كاس وتربوهوا
* برضوا يتوبكم ثواب
* فالأسرة البديلهه أسرة تقدم الخير وتلقاهو قدام
* تعالوا نديكم سيكافا من سيكافاتنا الكتار ديل
* وإتبنوهوا
* أدوهوا أسمكم
* سموهو الكاس الهلال الجوى الأول
* يملا عليكم البيت مسره
* بدل ما إنتو صانين كده
* أيها الناس
* إن تنصروا الله ينصركم
* أها
* نجى لى شمارات والى الخرتوم
* البلد كلها مع القلع تغنى وترقص لينا
* غنيه ما بدلوها أصلو يا والينا
* كلو ما تكمل يعيدوها لينا
* إن شاء الله القيامة تقوم يا والينا
ﺳﻠﻚ ﻛﻬﺮﺑﺎ
** ﻧﻨﺴﺎﻙ ﻛﻴﻒ وﺍﻟﻜﻠﺐ بعاين لينا بى طرف عينو ويقول فى سرو..إن شاء الله القيامه تقوم تريحكم؟!!
ﻭﺍﻟﻲ ﻟﻘﺎﺀ
ﺳللللللك

شارك الموضوع :

تعليقات الفيسبوك

تعليقات


2 التعليقات

      1. 1
        Adil

        يعما اساتذة اللغة سنين لازالة الجهل والارتقاء باسلوب الكتابة لطلاب المدارس ويأتي الحمار ده ويخرب مجهود هؤلاء الاساتذة

        الرد
      2. 2
        ريفا

        يا اخى وكت هو حمار لماذا تاعب نفسك للقراءة له ؟ اتركه وشوف موضوع اخر ولا ترتكب إثم بسب الرجل

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *