رأي ومقالات

توب الحوار !!!


جلس محمد احمد في دكان حاج عبدالصمد ود طه ومعه عدد من سكان الحي القدامي وكعادتهم يتناولون اخبار الزراعه والاسعار والمجتمع
وعندما تدق ساعه الأخبار في راديو الدكان يصمت الجميع ولكن في هذه اللحظه قاطع ود حاج حمد الجميع واسكت الراديو وقال الأخبار شن فيها غير المشاكل وإطلاق النيران والمنابيز وكمان جابت لها حاجات جديدة في الواستاب والفيس بلوك فضحك الجميع وقالو ليهو يا ود الحاج الواتساب الواتساب

وعندما هم يتبادلون الكلام جاء ولد حاج عبدالصمد يردد الحوار الحوار وقال لي ابوه أمي قالتلك دايرة يجيب ليها توب الحوار من ود الخرتوم فصمت الجميع لهذا الطلب العجيب فقام ود ابكر من مكانه واتنفض من التراب وقال كمان دكان حاج عبدالصمد جاب ليهو مجانين شنو يا ولد شابكنا توب حوار وأمك كمان بقت مجنونه زي ابوك وسمعت التوم بت الضو ولفحت توبها وجات وقالت يا ود ابكر خبارك تقول ان مجنونه انا صحي رسلت ولدي قلت ليهو دايرة توب الحوار وماني مجنونه فرد عليها الجميع يا وليه في توب اسمه الحوار فردت اي نعم شفت في التلفزيون هسي ود البشير بقول الحوار الحوار والمذيع الحوار الحوار والقاعدين في القاعه الكبيرة المدورة الحوار الحوار والفنانين الحوار الحوار قلت يا بنات أمي انا زاتي دايرة توب اسمه الحوار عشان يغطيني من الشمس دايرة توب الحوار يسترني
دايرة توب الحوار يحميني من البرد
دايرة توب الحوار اطلع بيهو من البيت
دايرة توب الحوار صلحه وسترة
دايرة توب الحوار عشان الزمان الزين
دايرة توب الحوار عشان أغطي بيهو وليداتي من الحرب
دايرة توب الحوار اشرو في الرقراق
دايرة توب الحوار عشان وطنا يشيلنا كلنا

فردد الجميع. الحوار الحوار

فقام ود ابكر ان زاتي داير جلابيه الحوار وعمت الحوار

بقلم: النيل الفاضل محمود


‫4 تعليقات

  1. في عام 1784 عقد موتمر الحوار في امريكا ووضعو الدستور الدائم.ونجحو في وضع دستور دائم ليومنا هذا ونتمني من هذا الحوار ان يجمعنا نحن السودانين تحت قانون واحد ونعيش بسلام في وطننا الحبيب الي الامام يا وطني

    1. الدستور القاعد ده أحسن من الدستور الأمريكي , لكن أنت عايز الدولة تطبقوا و رأسها هو أول من خالف هذا الدستور بترشيحه و فوزه بالرئاسة ؟؟

      لو كانت المشكلة في ورق يتكتب ما كان ده حالنا .

  2. دي شنو الهرطقة دي؟؟؟!!!!
    الزول دا كوز كبيييير بعرفو كويس