سلاحنا فى الحتانه صاروخ وجبخانه
* أيها الناس
* البعض منا لسه بدور فى فلك التباكى على فترة جمال
* والقصة دى بتذكرنى يوم وفاة جدتى لأبى عليها رحمة الله
* كان عندها أخت واحدة بس فضلت
* كلهن شتتن قبالها إلا واحدة
* قابلن ربهن راضيات مرضيات
* أها
* يوم إتوفت ونحنا شايلين الجنازة من جوه البيت ومارقين على الشارع
* أخت حبوبتنا دى(أسى عليها رحمة الله برضو)إتدردقت فى الواطه
* وبكت ولطمت الخدود ولعنت ابو اليوم الشق الإخدود
* وبقت تردد:
* ماشه وين يا فاطنه خالانى براى
* أخواتى كلهن فاتن خالاتنى لى منو؟
* وهى أهى أهى
* جدى لوالدى
* الرجل الساخر جداً وحازم جداً وفاهم جداً
* نادانى وأنا شايل الجنازه مع الناس
* قلت ليهو شايل يا حاج
* قال لى قلت ليك تعال
* واحد شال عنى كتر خير
* وجيتو
* كان واقف جمب حبوبتنا البتنوح
* قال لى سوق معاك دى
* أحفروا ليها جمب فاطمه طوالى
* وأدفنوهن سوا
* عشان ما تقعد براها
* أخت حبوبتنا قامت وإتنفضت
* تانى ما شفناها مارقة من البيت إلا جنازه بعد عشرين سنه من الحدث داك
* أها
* البلطموا فى الخدود
* ما قادرين تقعدوا؟
* ماشين برضك؟
* يا حليلك يا جدى
* أيها الناس
* الوفاء لجمال وشكره
* لايعنى البكاء عليه بعد أن ترجل
* بقدر ما يعنى مواصلة المشوار
* مع تجنب سلبيات الماضى وإلتزام إيجابياته
* وأثمن ما يكرم به جمال
* هو مواصلة المشوار وتقديم الأميرة السمراء هدية له فى الموسم القادم إن شاء الله
* فعهد جمال شهد الكثير من الإبداع حتى أضحى المريخ عالماً للجمال
* لافى زول ودانا الفيفا داير مننا تعريفه
* ولا إشتهرنا فى سوق اللاعبين بإننا بنزوغ بى حق زول
* ولا بنتم الموضوع تسويات بعقلية تلتو ولا كتلتو
* كاش داون
* إنه جيمى
* تلطاشر سنه من العطاء بدون إنقطاع
* فى زمن كان قصاده فى المعسكر الآخر تلطاشر رئيس
* وميه وتلطاشر شكوى للفيفا بتاعت متأخرات ومؤخر صداق
* بل لن ننسى موز ريكاردو وفول هيثم سيدا
* ولكن كل ذلك لا يعنى أن تتوقف المسيرة لتتفرغ للطم الخدود
* أيها الناس
* مانشيت غريب بصحيفة قوون أول أمس
* جيم براها بره القوس
* ومال جوه القوس
* وأياً كان المعنى
* ما مهم
* المهم أنو الناس عرفت ليه قوون أصبحت للمغربيه راقده فى المكتبات فى عهد هؤلاء
* قوون التى كانت تكن إحتراماً للمريخ ذلك الإحترام بقدر ماتقدم قوون
* أضحت تجاهر بالعداء
* وتلك المجاهرة خلقت منها صحيفة غفير
* يعنى بتبيت فى المكتبات حراسه يا عمك
* وبالطريقه دى
* بجى اليوم البتبيت فيهو فى مطبعتها
* من هناك مافى زول يستلمها
* براها جابتو لى نفسها
* وكثير جداً من المريخاب
* قابلتهم بالنادى أمس
* أعلنوا مقاطعتها ومقاطعة من لايقاطعها
* ولا أظن ان الحكيم طه على البشير بفطنته وخبراته الإدارية يقبل بهذا السقوط فى عالم التوزيع
* ولا أظنه يقبل بتلك المقاطعة الحمراء للصحيفة العريقة التى ضلت طريقها للقلوب مؤخراً
* ولا أظن ان طه يقبل ان تتوارى صحيفته خلف الحيادية والمهنية وهى تعادى أكبر فرق القارة
* بل والفريق الوحيد بالبلد العندو سجل فى لوح الشرف الأفريقى
* نكن كل الإحترام للسيد طه على البشير
* ولكن بالطبع يصبح الإنسان غير محترم لدينا
* إذا سكت على ما يمسنا بدواعى التجاهل او إظهار عدم المعرفه بالتفاصيل
* الجريدة الغفيرة مبيته فى الأكشاك فى الشتا الجاى ده برقدها الدايمه
* بلحقها امات طه
* الحق يا سيد طه
* المهم
* الرجل الذى يكذب ويتحرى الكذب سيكتب عند الله كذابا
* ووقتها سجمو
* وإسلام قالت لى يكذب يعنى شنو يا بابا؟
* قلت ليها يعنى يشتل
* أيها الناس
* مافى شى راح
* لدينا السلاح الذى نقاتل به داخلياً وأفريقياً
* ففى الحتانة تكمن القصة والسر
* لدينا فى الحتانه الجبخانه والطيارة والصاروخ
* لله دركم يا باشمهندس فياض ورفاقه
* وأول أعمال لجنة التسيير هى توقيع عقد جبخانة الحتانه
* وبعدها عينكم ماتشوف إلا النور
* رجال عملوا حتى أكملوا العمل
* فى صمت وسرية تامه
* حان أوان الكشف عن الإعجاز
* المريخ غنى بأبنائه هؤلاء
* إقتنعتوا ولا أحفر ليكم جمب حبوبتى الله يرحمها؟
* المهم
* أجل الإتحاد القرار
* القرار ده بجيب أجل ناس كتار
* وعجبنى الإتحاد لأنو هو الوضع نفسو فى الحته دى
* إتحادنا بقى زى الجقر الدخل الشرك
* لا أكل الطعم
* ولا مرق إتخارج
* أتجقرى
* أيها الناس
* 2870 يحلنا من كتير من المشكلات
* ويرفع كثير من الرايات
* ويثبت انو حواء المريخ لسه ولود وكلو يوم فى الدايات
* أيها الناس
* الصديق والأخ والتؤام الشفت المهذب الراقى
* الأستاذ عباس خوجلى المحامى والمريخابى الغيور
* هو الآن طريح الفراش بإنعاش مستشفى آسيا
* الأمر جلل
* ولكن رحمة الجليل أجل وأكبر وأقرب
* وهو أقرب الينا من حبل الوريد
* تعالوا ندعوهوا من اجل شفاء أخونا عباس
* تعالوا ندعو القريب عله بل عساه يستجيب
* نتضرع اليك ربنا
* وكلنا ثقة فى انك لن تردنا
* أنعم علينا ربنا
* وأِفى عباس صرة ودنا
* آميييييييين
* أيها الشفوت
* إن تنصروا الله ينصركم
* أها
* نجى لى شمارات والى الخرتوم
* أكان شفت يا والينا
* عباس مننا وفينا
* كل المقل حزينه
* كل البنادر والقرى
* كل الضهارى والورى جات إتلمت فى فد مدينه
* مبتهلة لى ربى رافعه ايدينا
* يا ربى
* عباس تردوا لينا
ﺳﻠﻚ ﻛﻬﺮﺑﺎ
** ﻧﻨﺴﺎﻙ ﻛﻴﻒ وحتى ﺍﻟﻜﻠﺐ حزن..وهل أوفى من الكلب مخلوق؟!!
ﻭﺍﻟﻲ ﻟﻘﺎﺀ
ﺳللللللك
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
مره حببوبتي ومرة بتي ومرة كلب جيرانا
ارحم نفسك