فكيها نجيض نجاضاً نجض أخوهن نجاض
عطفا على ما كتبته بالأمس.. عن التحرش بالنساء من قبل بعض” الفكيا” جمع فكي.. أو المدعين.. أو الدجالين.. والذي ورد الاعتراف به من أحد العاملين في نفس المجال.. وهو قارئ رُقية..!!!.. ما في شك أن القرآن الكريم شفاء للناس.. والرقية الشرعية من السنة.. لكن أن يمتطي الدجالون صهوتها محاولين العيش عليها والتكسب منها.. وممارسة أشياء شينة وغير مقبولة لا دينا ولا عرفا.. هو المرفوض.. عشان كدا السلطات مطالبة بحماية المجتمع.. وتنظيم عمل العاملين في الرقية.. والتأكد منهم.. يعني ما أي زول لبس ليهو عراقي وحكر ليهو طاقية في نص راسو وربى دقينة ولف ليهو اربعة سبح في رقبتو نعتبرو شيخ.. وبعالج والناس تجارا عليهو العميان شايل المكسر.. لاحظت في حوار الشيخ الكان في قناة البحر الأحمر والذكرتو في المقال الفات إنو كل ما يضرب مثل يقول “جاتني.. مشت.. عالجتها.. رجعت”.. كل أمثلتو من النسوان.. ما ذكر أي مثل لي ضكر جا ووقف قدامو.. يعني حوالي تسعين في المية من المترددين عليهم من النساء.. مما يجعل التجاوزات ورودها كبير.. وخصوصا التحرش بالنساء من بعض الشيوخ أو من يدعون أنهم شيوخ.. ومن أخطر ما ذكر أنه من ضمن عمل الشيطان ومن شروطو عشان يشتغل صاح ارتكاب المعصية وتحديدا الزنا.. يعني واحدة عشان راجلها ما يلعب بي ضنبو وتحافظ علي أسرتها من التشتت من شروط الشيطان عليها أن تزني!!!! نضم يحير.. ويعرض عليها الشيخ خدماتو..!!!!.. في هذه الحالة أمام المرأة إما الرضوخ.. أو الهرب.. لكن ما بتقدر تشتكي.. لأي جهة.. تجري ويمرقنها كرعيها.. وتاكل نارها وتموت بالنضم دا.. لو اشتكت خايفة راجلها يعتبر أنها شغالة معاهو بالرتينزات والكواديك.. وأهلو يعرفو وأخواتو أمات لسنات يعرفن.. وتبقى ونسة. وساكت إن جات واحدة منهن لقتها تتونس وتضحك مع راجلها تعتبر إنو الكادوك شغال صاح وفكيها نجيض نجاضاً نجض أخوهن نجاض!!!!. عشان كدي أحسن لها تاخدها من قصيرا وما تحوم علي أي فكي.. * كنت أنتظر ردا من شركة النيل للأعشاب سواء في الصحف أو في أجهزة الإعلام الأخرى عما أثير حولها من تجاوزات.. شاهدت حلقة من حلقات الشركة في قناة قون.. وكل القالو مقدم البرنامج إنهم ما ح يشتغلو بالنضم الاتقال دا وإنو نضم ما بيستحق يردوا عليهو.. ومعناهو إنو يدخل الأضان دي ويمرق بالأضان التانية.. لكن أنا كمواطن ويمكن مرة مرة نفسي تحدثني أخطف كراعي لي عندهم عشان أتعالج النضم بيهمني.. كنت أتوقع رد واضح وما يدخلنا في احتمالات.. والواضح ما فاضح!!!!! الحكومة تراهن على نجاح الحوار الوطني.. المعارضة تراهن على فشلو، بهذا أصبح الشعب السوداني مقسوم نصين نص زعلان عشان الهلال مرق من بطولة أندية أبطال افريقيا ونص زعلان عشان المريخ مرق من نفس البطولة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة