بابكر سلك

كسكتة وكاتومبي واللمبي


> الكسكتة معروفة في مجتمعنا ده من بدري
> وفي ناس بقولوا عليها برنيطة
> دخلت البلد دي مع الخواجات
> ناس مستر كلارك
> كلارك المستعمر القاد الحركة الوطنية عندنا زي ما بنسمع
> ودخلت الكسكتة في أغنياتنا
> اجيك الساعة ستة ولابس الكسكتة
> يعني ما جديدة على هذا الشعب
> ومن اشهر كسكتات البلد دي
> كسكتة الكتيابي ضابط المجلس في سوق ام درمان
> وكسكتة ديجانقو اشهر كاوبوي في مؤسسة الدولة للسينما
> وكسكتة سلفا كير رئيس دولة جنوب السودان
> وكسكتة عرفة زعيم شماسة سوق ام درمان برضك شهيرة جداً برغم ظهورها الكان متقطع وغير راتب
> ومن اشهر كسكتات العالم
> كسكتة جي آر في المسلسل الامريكي الشهير دالاس
> وكسكتة اللمبي في فيلم كتكوت
> اللمبي بالكسكتة ما بخلص
> يخلوها ليهو
> ويا حلاتو لما تلقاهو لابس الكسكتة وفرحان
> يقرب يقول ليك دش ناووووووو
> تيشنق تيشنق تشينق
> وينفخ أصابعو العاملها في شكل مسدس
> ويخت المسدس في الجيب الخلفي
> لمبي يا عمك
> ومن اشهر الكسكتات العالمية
> كسكتة كاتومبي رئيس مازيمبي
> وظهرت الايام دي كسكتة جديدة
> ولكن هل كل الكسكتات كسكتات؟؟؟
> واتكسكتي
> ايها الناس
> المنطق البعيد مباراة المريخ ضد الامل لاشراك بكري حسب زعم الاتحاد بخطأ من الاتحاد
> موش ياهو ذاتو المنطق البعيد مباراة المريخ والامل لاشراك الامل للاعب عمر عثمان بخطأ من اتحاد القضارف ؟؟؟؟
> طيب المشكلة وين ؟؟؟؟
> اللاعب البلعب في فريق تحت ولاية اتحاد دولة اخرى
> موش تسجيلو بكون خطأ كبير بفقد فريقو نقاط المباراة البشركو فيها ؟؟
> طيب المشكلة وين ؟؟؟؟
> والفريق الحقاني
> فريق العدل والمساواة
> موش يفترض فيهو قبل ما ينادي بابعاد الظلم عن الآخرين ان ينأى عن ظلمه للآخرين ؟؟؟
> الفريق البتكلم عن شرف المنافسة والتنافس
> موش مفروض يستصحب معاهو قرار الاتحاد حول سيدي بيه لما انطرد
> موش مفروض يتذكر صدور جنسية سيدي بيه وتسجيلو كلاعب وطني قبل صدور الجنسية ؟؟؟
> موش مفروض يخجل من التحكيم الذي يخطئ لصالحه دوماً ؟؟؟
> موش مفروض لما يتكلم عن شرف التنافس أن يستصحب معه حالة المنشطات التي ثبتت على لاعبه؟؟؟
> موش مفروض يذكر تحويل اتنين الى اطناشر وتغيير تقرير الحكم في منافسة دولية ؟؟؟
> الناس ما بتتكلم عن الشرف ساكت
> لازم تشوف شرف المعطيات والثوابت قبل ما تتناول موضوع الشرف
> واتشرفي
> ايها الناس
> ابيي دي جننتنا جن
> سكانها دينكا نوق او نوك
> يوم جمعة من ابنائها
> وتاني يوم أجنبي ويجي إعارة من كوبر
> إعارة بشرف
> ولا استبعد يوم لو نادي الشرف الافريقي اراد تسجيل صديقي الشايقي محمدعثمان علي شبو
> أن يخرج علينا بان شبو من ابيي
> والله ياها ذاتها
> ييي بليدنا وكلنا اخوان
> ولو نادي الشرف الافريقي عندو مصلحة في اوباما
> لخرج علينا بان اوباما من ابيي
> ومن المواقف الشريفة التي تحسب لصالح نادي الشرف الافريقي
> تبرئة رئيسه من تهمة ضرب الحكم الحيمودي
> دي براءة بشرف كبير زادت ذلك النادي شرفاً على الشرف الذي عرف به
> وتاني هيييييييييييي
> كسكتة والمسدس حتة
> ايها الناس
> كل القصة ومافيها
> انتهى التنافس الافريقي
> والناس اتجهت للاخفاقات التي صاحبت مسيرة ابو كسكتة
> موضوع مواسير الكنبة
> والحظ بتاع القرعة والمسار
> وشيلة السيخ
> وهروب المدرب
> وتصريحات المدرب الهارب المشينة
> تصريحاته تفتقر الى الشرف
> شرف العشرة والايام الطيبة
> الاهلة الشرفاء اتفرغوا للحساب
> فما كان من اب كسكتة إلا وأن يبحث عن مخرج يلهي الناس
> لبس الكسكتة واتحكر وسط الحتة
> ايها الناس
> من ينادي بتطبيق القانون عليه اتباع القانون
> الاضرابات والانسحابات ليست هي السبل القانونية للتغيير
> ولكنها تصرفات رعناء هوجاء بربرية
> ومن يختار البربرية ببقى قدرها
> ما بنط منها تاني يوم
> ايها الناس
> جرح بكري لسه بنزف زي ما قال روشا
> والهروب ما بوقف النزف يا حريف
> واتهربي
> المهم
> الامل ضمن البقاء بالممتاز
> وممكن حمشنة كده ما يجي يلعب مباراة المريخ
> لو طبق الاتحاد القانون عليه على اساس انه منسحب
> الامل حايقول ما انسحبت
> بس ماقدرنا نجي الكورة
> ولو خصم منه الاتحاد نقاط المباراة وغرمو مابطالة معاهو
> قاعد في الممتاز
> ولكن إن كانت في العقوبة خصم من الرصيد
> صدقوني لو نقصوا مولانا جمال ذاتو بلعب معاهم
> ايها الاتحاد
> بالقانون
> ايتها القوانين
> بالنص يجب أن يكون التطبيق
> ولعلها فرصة لنطبق قوانينا بحرفية عالية
> لا جودية ولا أجاويد
> والاقتنع بإنو مكانو الدرجة الادنى يمشي ليها طوالي
> يقعد فيها لما الاحساس بالدونية المتملكو ده يذهب عنه
> بعد داك يجينا فوق
> مان تو مان
> ايها الناس
> في دولة تحترم القوانين
> الجوديات لا وجود لها
> والتحنيس تبخيس لاصحاب القرار
> القانون بحذافيرو يطبق على كل متطاول ومنفلت
> الناس وصلت القمر ياخ
> ونحنا لسه في الفوضى البدائية دي ؟؟؟؟
> المهم
> اب كسكتة
> القطر الشالك انت
> بتكسر حتة حتة
> وتفضل لي الكسكتة
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> الفوضى ما بتعمل خير لينا
> وحقو يا والينا
> نهتم بالقانون اللينا
> نطبق باقي القانون الفضل لينا
> كان لينا كان علينا
> يمكن شوية نعدل خطوتنا ويستعدل مشينا
سلك كهربا
ننساك كيف والكلب يدق يداً بيد ويمطر لؤلؤاً من قدومو الطويل ده ويعضي اي زول يجي جمبو
والي لقاء
سلك


‫3 تعليقات

  1. اتق الله يا سلك الهلال ماعندو علاقة بالعدل والمساواة ،، والعدل والمساواة لما انطلقت لا كان عنده مشكلة مع الهلال ولا المريخ ، اما مريخ المؤتمر الوطني فهذة حقيقة لا ينكرها احد ، اما ابيي دي مشكلة دولة السودان مع دولة جنوب السودان ولحد الأن سودانية ،، واخيرا والله لا كورة ولا فهم يا سلك وحلنا في السودان فضيحة والله كل عام وانتم ترزلون قبل كدا اتحاد وفريق قومي لعبتوا لاعب موقوف وخسر السودان المبارة ،، ولم نستفيدوا من الخطا ونفس في العا 2050 جنكررنفس الإسطوانة وحنشرك لاعب موقوف ان كان في نادي او منتخب قومي وبابكر سلك علي محمد عبد الماجد يشكروا لينا في الراكوبة في الخريف ،، قال هلال مريخ يا اخي اختشوا فرق تشارك لاول مرة في ابطال افريقيا وتصل النهائي بل تظفر بالكاس ونحن زعيم علي سيد البلد كل عام نؤدي دور الكمبارس ،، وكتاب هلال علي مريخ يشطحوا فينا بالفارقة والمقدودة والمريخ برشلونة افريقيا والهلال مان افريقيا ،،، ومال مازمبي حيكون منو ةلا الإهلي المصري ولا دا ما سمعتوا به ،، عليكم الله اختسوا علي الحال المايل ،، واكتبوا وحفزوا في شيء يرفع اسم السودان وينمي كرة في السودان ……

  2. كنا بنقول عليك من ناس القلم ما بزيل بلم لكن طلعت فاقد تربوي يا سلك

  3. انت راجل تفتيحة يا سلك و مفروض تنقشها طايرة … الكسكتة عشان ما في زول يجي يغالط الكاردينال أنو من جلابة أبيي !!!