اغتراب العجائز!!
واحد عمرو اكتر من 58 سنة ..سمين وشعرو ابيض..والرطوبة متعباهو..وشغال موظف حكومة وممشي حالو..من جاي لي جاي اموره ماشة وماكل وشارب واولادو في المدارس في امان الله..يقوم فجأة كدا تهف ليهو في راسو انو يخلي شغلوا ويغترب..!! ويقوم يتلح اولاد اهلو المغتربين يقول عايز ليهو اقامة باي طريقة..ومن جاي لجاي اولاد اهلوا يتشاركوا ويشتروا ليهو فيزا (عامل) ويسافر..ويقعدوا يفتشوا ليهو في الشغل وما يلقوا ليهو أي حاجة تناسبو..موظف خريج ثانوي عام ..ما بعرف انجليزي زي الناس ولا بعرف كمبيوتر ولا بعرف أي حاجة ..ومستحيل يشتغل راعي او سواق عام او سواق عائلة ! يقوموا اولاد اهلو يلقوا ليهو وظيفة في مكتب عقار ب2000 ريال يقول ليهو الفين ريال اعمل بيها شنو؟ اكل واشرب بي كم؟ والايجار بي كم؟ و اوفر كم؟ واحول لاولادي كم؟ يا اما 5000 ولا ما عاوز..وتاني يلقوا ليهو شغالانة متحصل..يجمع قروش محطات وقود والراتب 2800 ريال ومعاها سكن مجاني..بشرط ايكون بعرف يسوق ومعاهو رخصة سواقة ..يقول ليهم انا في البلد دي والله ما اسوق..الشوارع خطرة وشفع البلد مستهترين..يطقشوني ويهربوا..شغالانة فيها سواقة ما بتنفع معاي!! وتمر الايام والشهور والسنوات ..6 سنوات ..والعافية تنقص والعمر يزيد ويصبح عمره 64 سنة ..وتكتر الشكاوي من الامراض..رطوبة بسبب نوم المكيفات والتبريد العالي.. ازمة ..قحة .. طنين في الاذنين ..الاقامة انتهت ..الاقامة عايزة قروش التجديد..!! واولاد اهلوا شيرنغ يجمعوا حق التجديد ..كل مرة قريب 4850 ريال تجديد..يعني خلال سنوات حوالي 30 الف ريال تجديدات دا طبعا غير قروش الاقامة 13 الف يعني 43 الف ريال..يعني ما تعادل 100 مليون جنيه !! خسارة ساااي غير الاكل والشراب والعلاج وحق المواصلات ورصيد الموبايل ..وزول عاقل وجرئ يقدر ينصحو مافي..كلهم خجلانين منو!! ياخي ارجع بلدك وخلي جنب عيالك! المقعدك شنو؟ انت زول ما عاقل ولا شنو؟ منتظر تموت ويشحنوك في صندوق !! وبعد دا كلو يقول ليك: ياخ اهلي في الغربة خزلوني وما وقفوا معاي!! ياخ انت ما وقفت مع روحك منتظر منو اليقيف معاك اكتر منك !!! وبعدين ياخي الفي عمرك دا المغترب ليها شنو؟ ما تقعد مع عيالك تربيهم قدام عينك والبكبر فيهم داك تسفروا يسندك ويساعدك في المعيشة !!افكار المراهقة المتأخرة دي شنو كمان ! اغتراب شنو لزول عجوز ومنتهي وبيمشي يا الله ويا امين !!!
—
نصيحة: لو عمرك اكتر من 45 سنة وانت ود مدن (عاصمة) وما عندك اي مؤهلات او مهارات عملية وشهادات جامعية تؤهلك للعمل بالخارج حقو تقعد في بلدك وبلاش شحططة وتضييع زمن وتعذب الناس ساااي.
بقلم: تهاني عوض
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
تسلمى استاذة تهانى …… والله كلمة حق ونصبحة غالبة
أنت تنظرين إليها من زاوية فردية
لكنها قد تعكس الانقلاب الذي قلقل مجتمعا بأكمله
طبعا العمر مامقياس وانسان عايز يربي اولاده بلقمه عرقو ويرتقي بيهم و بشوف ليهم الوضع الأحسن وهو يضحي بنفسه شيء عادي وطبيعي جدا والرجل لو بلغ 100 سنه و بعافيتو مافيش شيء انسان قادر و مقتدر للغربه لماذا هذا الكلام بلغ ال 58 وشعروا شيب – يعنى الحل انو يستسلم و يجلس ويقوم و يسرق ولا كيف رأي الأخت كاتبه المقال والفين في الغربه بتعادل 6 مليون
سودانى بيعيشهم بالزياده – نرجع لكلام للسيده الشابه كاتبه المقال هل شفت له الحل في حاله انو يبطل الغربه في هذا العمر !!!
عيب كدا يا بت.. انتي مالك ومالو .. ان شاء الله يمشي رحلة المريخ اتجاه واحد. حقو تشدي حيلك شوية تشوفى ليك عريس بدل البورة . بعدين اتحشمى شوية … صراحة تدخلتي في خصوصيات الراجل بي صورة مقرفة جدا
الكاتبة طرحت موضوع فيه الكثير جدا من الموضوعية ….. ناقش انت الموضوع المطروح ولا تتحدث مع الكاتبة بشكل شخصي
( شوفي ليك عريس ) ايه السذاجة والعبط دا
يا أبو خالد
انت طوالى ضربت الألفين ب6 مليون
وين اكلو وشرابو وسكنو وحق الإقامة والتامين ومواصلاتو واتصالاتو وتجديد الجواز
والخلاهم وراهو ديل اكيد فى اعمار حرجة محتاجين رعاية لو انحرفو فى غيابو خلى الغربة تنفعو
يا اخي عثمان هي ما مسأله الفين أو عشرون ألف طالما كلها غربه سوا بالقليل او بالكثير هي غربه للكبير و الصغير – واذا نظرت لكلام السيده اعلاه تقول في عنوان مقالها اغتراب العجائز – فهل تدري الأخت ان العجائز المغتربين انجبو الدكاتره و المهندسين
فلذا يجب عليها توجيه قلمها الجميل المنمق على الحلول الجميله التى تراها هي في شتى مجالات الحياه المتعثره كي تحفظ لها ماء وجهها – ولا الأخت مالاقيه موضوع تتحدث فيه !!!!!!!
والله انا بستغرب في مثل المفعوصه دي علي العموم انا عمري 35 ومغترب لي 10سنين بس معي شياب اعمارهم فوق ال70 وشغالين مشاء الله واخر تنطط بقالات مغاسل ملابس حسابات في سوق الجولات في اماكن كثير وبعدين اي راتب في الغربه بيغطي مع جنيهنا البقي زي وجه الصحفيه ده كل واحد له رزق يدور عليه شوفي الحكومه دي السبب في سفر عمك الحاج ده وتكلمي فيها وخليك من جراءة اولاد اهل عمك ورينا انتي الجراءة في الحكومه