زواج سوداناس

الواو ما بتجيبك معاهم يا كردنة



شارك الموضوع :

> ناقشت كتير من الاهله الشرفاء عن المشكله
> خرجت بانهم ماعارفين المشكله شنو
> كل الفاهمنوا عن القصه
> انو كردنه في خطابو قال الناس بتجتمع في بيت رئيس المريخ
> وياكلوا اللقيمات
> ويتآمروا علي الهلال
> شخصيا اجزم وبالعشره
> انو السيد اشرف سيد احمد الحسين مافاهم حاجه
> الزول ده بعد استمعت لي تسجيل خطابو
> اقسمت بانو لا يفقه شيئاً في الموضوع
> كلمة مفيده مافي
> القصه وما فيها يا سي اشرف
> قوانين
> واجراءات
> وانت سيد العارفين بالقوانين
> وبتحترمها شديد
> وما بتحب مخالفتها حسب علمنا
> لذا كان عليك اتباعها
> فأنت تحدثت عن الفساد في الاتحاد
> وحديثك عن الفساد ادهشنا
> تحدثت عنه حديث موضوعي
> ووريتنا انك تكره الفساد والمفسدين والفاسدين
> وده من حقك
> ونحن نعلم انك لست من الناس الذين يحتاجون للوح تلج في الحراسات
> من فرط السخانه
> ولكنك تحتاج لمجتمع نظيف يحارب الفساد والمفسدين
> ده كلو عارفنو
> لكن صدقني يا اشرف
> انت ما فاهم حاجه في الرصه
> ولا تدري لماذا يقاتل الهلال في الموضوع ده
> ومخاطبتك للجماهير ساكت كده
> فيها انقاص لمكانة الهلال
> حقوا يدوك خطاب مكتوب
> تقراهو قدام الناس
> بس الخوف تبقي عليك قصة الزول القرأ الخطاب بتاع المواطن علي حسن سلوكه
> قرأها علي «اسم» حسن «اسم » سلوكه «اسم»
> واتسلكي
> انا لو محل الاهله الشرفاء يا اشرف
> بشغلك صامت حفاظا على مكانة الهلال عبر الاجيال
> نعم ابو الهل لسه في الصفر
> ولكن ادبيا له احترامه ووقاره
> عرفنا ذلك من تصرفات رجال لهم باع في المواضيع دي
> الطيب عبد الله وصلاح ادريس وعبد المجيد منصور
> اذا ختينا الواو يا روشا
> في زول بقدر يقول وأشرف سيد احمد الحسين؟
> الواو ما بتجيبك يا كردنه مع الناس ديل
> والله حقو الاستاذه ميرفت تعمل لينا لقاء مع كردنه
> تقول ليهو يا اشرف في شنو؟
> عشان نفهم حاجه
> المهم
> اسلام شافت فيديو لكردنه في الواتس فيهو الخطاب
> علي الحلف
> قالت لي زي القذافي يوم قال زنقه زنقه
> قلت ليها قصدك بمرقوهو من ماسورة من مواسيرو الجابها دي يا بتي؟
> المهم
> نتوقع ان يسير مجلس التسيير في اتجاه سير مجلس جمال
> نحافظ على ناسنا المميزين وعلى المدرب
> نكمل النقص في الخانات
> ونواصل المسيره
> لا اعتقد ان جمال سيقف مكتوف الايدي من الدعم
> ولا اعتقد ان المجلس بقصر في توفير المال
> لكن شعب المريخ عليهو المسؤوليه العظمى في الدعم
> «2870» هو صوت الجماهير المالي
> وقالوا شيبوب في الإمارات لما سمع باستقالة جمال
> طلب حق اللجوء السياسي
> الغي الطلب يا شيبوب الموهوب وتعال
> ففي المريخ رجال مثل جمال
> مليون جمال عندنا من الرجال
> بالاضافه لجمال
> اذا انت بتطلب حق اللجوء السياسي
> مكسيم يسوي شنو؟
> المهم
> كردنه ما ورانا بتمرنوا ليه
> يا ربي يكون في مهرجان في دار الرياضه بام درمان؟
> ولا في تكريم في ميدان عقرب
> اسي الجاب سيرة العقرب شنو؟؟
> ايها الناس
> الانسحاب بيتم بي خطاب
> بطلوا جعجعه وقدموا الخطاب عشان تلقوا امبده والجريف في خشم الباب
> انسحاب الهلال زي انتحار الزول الخايف من الكهربا
> دخل ايدك ونفذ رغبتك
> جعجعه ساي
> وعلى لجنة الجوديه أن تأمر باتباع القانون
> والقانون صريح واضح
> وعلى امل عطبره ان يتحمل نتيجة الدقسه الدقسها
> ويتعاقب على عدم حضورة للمباراة المعلنه
> واذا كررها يخصم من رصيدو نقاط
> واذا خصم من رصيدو نقاط
> يبقي باي باي
> لحق الميرغني
> ايها الناس
> إذا جاملت المنفلت
> اكيد بتخسر الملتزم
> والدول الراقيه
> تحترم من يحترم القانون
> ولا تعطي مكانه لمن يخرق القانون
> حركات التمرد وحركات الشفع ليست من القانون في شىء
> قانونيه قانوينه لا للواسطه ولا للجوديه
> ايها الناس
> حسناً فعل مجلس التسيير بالابقاء على القطاعات السابقه ولجانها
> وده دليل على سيرهم في نفس طريق المجلس السابق
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الحظ طوالي بقي مجلينا
> نقول نمسح الدمعه الحزينه
> نطبز عينينا
> نقول نرسم البسمه فينا
> خشمنا يعضينا
> نقول نرسم البسمه فينا
> تجي الأقدار تخربها لينا
> تجوط الالوان يا والينا
> نقول ان كترت الهموم نتدمدم ننوم يا والينا
> الباعوض ما يخلينا
> رافع شعار ما ينوم يا والينا
> وكل الشعارات اتنست وراحت لينا
> رفع المعاناه ونأكل من انتجانا ونلبس علي اللاتنا
> لكل زول وظيفه ولكل وظيفه زول وكلام كتير اتقال لينا
> شعار ما ينوم ده دحين الباعوض ما بغيرو لينا
سلك كهربا
ننساك كيف والكلب الباعوض كرهوا البلد زاتها
والى لقاء
سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *