زواج سوداناس

لسانو متبري منو



شارك الموضوع :

ما زلت أواصل في الشعراء القتلهم شعرهم.. وما عملو بالمثل: “لسان حصانك.. ان صنته صانك وان طلقتو خانك”.. والظاهر هم كلهم ديل طلقتو لسناتهم وجابت آخرهم.. أب لسان اليوم بشار بن برد.. والقتلو الخليفة العباسي المهدي.
بشار بن برد بن يرجوخ.. ويرجوخ دا كان عبد من عبيد المهلب بن ابي صفرة.. وابوه برد كان من عبيد مرة المهلب.. مرة المهلب هدتو لي مرا .. المرا عندها خادم عرستها لبرد.. قامت ولدت جابت بشار.. بشار ولدوهو عميان.. المرا أعتقت بشار وابوهو.. بشار بالاضافة لأنو عميان كان شين شنا مرة.. يخوفو بيهو الجهال.. لكن كان دمو خفيف.. وظريف ووناس.. وبرضو به شلاقة..
وعن خفة روحه تحكي كتب لتاريخ كتير من حكاويه.. ومنها قصيدة عملها في حمار ليهو مات.. وحلم انو الحمار جاهو وكتب القصيدة باسم الحمار.. وانو الحمار كان بحب حمارة وشكا لواعج الحب ونيرانه.. لكن القدر ما خلاهو يتهنا..!!!
بشار بن برد.. كان زول معايشو في لسانو.. أها قام أيّد ثورة قام بيها واحد اسمو ابراهيم بن عبد الله بن الحسن.. ضد الخليفة العباسي المنصور.. بشار كتب قصيدة يمدح فيها ابراهيم دا.. ورسلها ليهو.. قبال ما القصيدة تصل قوم يا ابراهيم موت.. وورط بشار في القصيدة.. رجعوها ليهو.. وقوام قوام غير في القصيدة وقعد يمدح بيها المنصور ويحرش فيهو علي ابو مسلم الخرساني.. ومرت بسلام والمنصور اتبسط وما قصر معاهو..
مات المنصور واتقرب بشار من الخليفة المهدي.. وبقى قاعد معاهو في مجالسو.. وبقى زولو تب.. ويكتب فيهو القصائد ويشكر فيهو.. يوم كتب قصيدة فيها غزل وكان المهدي جنو وجن الغزل في النسوان.. كلم بشار تاني ما يقول قصيدة في مرا.. لكن بشار مرة مرة بيتغزل في النسوان “المحيرني بشار دا بيتغزل كيفن؟ وهو مولود اعمى”.. كان المهدي ما يعاقبو هو براهو يعاقب معاهو الزول البيباريهو ويقعد يوصف لو دي سمحة ودي طويلة ودي قصيرة ومدغلبة.. مش دا براهو ويطلع منشور لكافة أهل بغداد مافي زول يوصف لبشار مرا.. الخبر وصل المهدي وجابو وذلاهو وهددو تاني..!!
كان للمهدي وزير اسمو يعقوب بن داود.. هو وبشار متكاجنين. وبشار قاعد يهجوهو.. يعقوب حرش المهدي عليهو المهدي بقى ما بيدي بشار وشي.. زعل بشار وكتب يهجو المهدي “غايتو قوة قلب”.. يعقوب اتناول الابيات وجري علي المهدي وقال لو: الليلة بشار نضم فيك نضم تسدد انضيك منو.. المهدي قال لو قولو.. قال لو لو قتلتني ما بقولو.. المهدي اصرّ يعقوب قال لو بكتبو ليك في ورقة كتب ليهو:
خليفة يزني بعماته
ويلعب بالدبوق والصولجان
أبدلنا الله خير منه
ودس موسى في حرّ الخيزران
.. يعني خليفة ما منو فايدة أخير عدمو.. وولي عهدو موسى يا ريت يرجع لبطن امو تاني.. المهدي زعل وجاب بشار وقال يكتفوهو يشيلوهو في مركب في نهر دجلة.. ويدقوهو بالسياط لحدي ما يموت.. وقد كان والمهدي يشوف.. وبعد مات جدعوهو في البحر.. إلا أهلو مرقو الجنازة ودفنوها..!!!!!!.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *