زواج سوداناس

نسيت صحابك وشُلتك..!!



شارك الموضوع :

حلفت قِدامنا اليمين..
لما الرِئاسة اختارتك..
ختيت يديك..
فوق الكتاب ..
تحمينا تحمى وزارتك..
شاهدين عليك..
هللت بالفرحِ الكبير..
كبّرت حمداً للقدير..
صليت وزِدت على نبيك..
أقسمت بالحقِ المبين..
تخشى الإله فى مهنتك..
ترعى الوطن..
ليهوا تبذِل خبرتك..
نسيت وصايا أبوكا ليك..
والوالدة أيضاً وصتك..
خليك أمين..
لا تتبع ابليس اللعين..
تصون أمانتك يا الخزين..
سووك وزير ..
أو كان مدير..
لا تُتهم فى ذِمتك..
مبسوطة ليك أنا يا جناى..
دايراك تحقق لى مناى..
يا ولدى شان تكسب رضاى..
تعيش سعيد..
مما دخلت بقيت بعيد..
نسيت صحابك وشُلتك..
خليت كلامنا القلنا ليك فى مِحِلتك..
هاتفك دوام مشغول كتير..
البيت مِحرِسوا لى غفير..
لا زول يجيك لا اتصال..
والحال تغير يا جنا..
غيرت شكلك ومشيتك..
همك بقيت تجمع فلوس..
كُل حين تغّير فى عروس..
رميتا بت عمك هنا..
كانت غُتاكا وسُترتك..
قاتليكا ما تأكل الحرام..
أوعاكا تغضِب ربنا تخسر صلاتك وحجتك..
سكنت فى عالى القصور..
أصابك التيه والغرور..
لا خُفت من ربِ العباد..
أو فجاءة تخفيك القبور..
خسرت دينك ودُنيتك..
بلا أقنعة..
صحيفة الجريدة ..

شارك الموضوع :

تعليقات الفيسبوك

تعليقات


1 التعليقات

      1. 1
        البطل النميري

        يا سلام أتمنى أن يقرأها كل متجبر ومتسلط على قوت الشعب ..
        دائماً أنت متألق، وقولك من قبلك هذا إحساسي تمنيت لو أي
        سوداني كده .. لكن هيهات .. الأصابع مختلفة في اليد الواحدة..

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *