زواج سوداناس

دناقلة يا رسول الله



شارك الموضوع :

> المقوله الشهيره
> دناقله يا رسول الله
> القالوا فيها انو الدناقله محبين الرسول الكريم
> في الروضه الشريفه
> شافوا الناس بدوا الرسول الكريم السلام
> ولما جا دورهم
> وبعد القوا التحيه
> سمعوا الحارس يسأل
> مين هناك
> قالوا ليهو دناقله يا رسول الله ولكن الرأي عندي
> انهم عرفوا انفسهم بالعباره الشهيره
> دناقله يا رسول الله
> تقرباً للرسول الكريم وحباً فيه
> وكلنا دناقله يا رسول الله
> لنا الفخر بها وبالانتماء لها
> يا ربي امل دنقل مننا؟؟
> المهم
> الجماعه كالعادة زايغين
> زي ما زاغوا من الدمازين
> الليله زايغين
> الروب الروب قايلين
> وما خجلانين
> المهم
> ماشين دنقلا الحبيبه نشيل كاسنا ونجي
> ومريخاب دنقلا يغطوا عين الشمس
> كيف لا يكونوا مريخاب وهم ملوك النيل من زمنا بدري
> أول مسجد بالسودان كان في دنقلا
> بوابة السلام والإسلام والاحترام
> دنقلا مدينه جميله وعريقه بي نيلها ونخيلها وناسها العزاز
> اليوم موعوده بعرس الختام
> موعوده بتشريف الزعيم لارضها
> ويتشرف الزعيم بحمل الكأس من دنقلا
> ومن غيرنا جاب كأس من جوبا
> وكأس من الدمازين
> وكأس من دبي
> وكأس من الشارقه
> وكأس من دار السلام
> وكأس من نيجيريا
> وكأس من كيجالي
> تاني نخت الاطلس
> ونشوف المدن
> المدينه الماجبنا منها كأس
> نعمل فيها نهائي ونمشي نجيب كأسنا ونعود
> المهم
> الجوديه لن تصل لشيء
> والجماعه الزايغين القالوا ما دايرين ما دايرن بي طريقتهم
> والبباري الكاردينال بوديهو الاولى
> ارجوعوا ورا شدييييييد
> وتعالوا جارين شديييييييييييييد
> يمكن تقدروا تنطوا صفركم الدولي المعتر ليكم تمنين سنه ده
> المهم
> الزول ممكن يقول الحق كل الحق ولا شيء غير الحق
> ده الزول الواثق من نفسو ومن شهادتو
> ومقتنع بانو الشهاده لله
> وانو ربنا الزمنا بها ولو على انفسنا
> وفي ناس بقولوا الحق
> لكن ما كل الحق
> قد يسقط منهم باقي الحق سهواً
> وقد يسقطونه عمداً
> والله يعلم ما بالصدور
> عشان كده زوغه من رب العباد مافي
> نشكر لرئيس اتحاد القضارف انو قال الحق كل الحق ولا شيء غير الحق
> واتحققي
> اتحققي قبل ما تفتحي موضوع
> ما تختفوا الكلام من نصو وتجوا جاريين بيهو
> ايها الناس
> هي سفريه
> يا للفاشر يا للأولى
> كل راكب يختار وجهتو
> والعفش داخل البص على مسؤولية صاحبه
> ايها الناس
> على اولاد المريخ ان يمتعوا دنقلا ونخيلها
> فالدناقله يعشقون الكرة
> ويهتمون بفنونها
> ويشجعون اللعبه الحلوه
> عشان كده نكرمهم بعرض يحير العالم
> يستاهلوا
> المهم
> الحبيب الصادق ود ام در
> رزق ببنوته حلوه
> ونحنا في الدايات
> لاحظنا انو ابهات المواليد كلهم مريخاب
> وده جيل مريخي جديد شرف
> بالذات لما يكبروا شويه ويلقوا الهلال في دار الرياضه ام درمان
> مكتوب في السبوره
> الهلال ضد الحرية
> بدركوا النعمه الهم فيها بسبب مريخيتهم
> شكرا كردنه
> ايها الناس
> استقبال المريخ في طريقه لدنقلا يثبت مريخية اهل الشمال
> استقبال من امو
> استقبال فيهو عظمة الانتماء
> لفريق لا يعرف الخرخره والانسحاب
> فكان الناس في مقاصر وكرمة البلد وكودي ورومي البكري وناس الترعه وناس ام عقال
> استقبال ضم ناس كورتي وناس ارتي وهمبكول وناس اشكان
اما ناس السكوت
> فكانوا حضوراً ناس دويشات وناس صرصر وناس عبري
> وغيرهم كثر
> كل الحضاره النوبيه خرجت في استقبال المريخ
> ما فضل الا بعانخي وتهراقا
> لكن اولادهم كانوا حضوراً مميزاً ومشرفاً
> عرب نحن حملناها ونوبه
> انه المجد
> المجد الذي حققناه ولم نشتريهو
> فالمجد يتحقق ولا يشتري
> انه الكأس الأول في عهد ونسي
> قول واحد يا ونسي
> المهم
> امس ليفربول ضرب اللون
> انسحبوا يا ناس شيلسي
> ولبسوا ابراهيموفيتش الكسكته
> ويا ملكتنا تعالي لمي عيالك
> ناس الاتحاد الانجليزي ديل ما بتفاهموا
> بتكلموا انجليزي يا مرسي
> وقالوا الملكه شلساويه
> من ناس شلسي المدينه
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> النسوان ديل عاملاتنها فينا
> المستشفيات كلها نسوان يا والينا
> يسمعن بي دكتور في الواغ الواغ يقولن ودينا
> يسمعن بي دكتور جا من بلغاريا يساهرن بينا
> راجل راقد مستشفى ما فينا
> والغريبه يا والينا
> الموت كلو رجال وحولينا
> مافي واحده دفناها ورجعنا عليها بكينا
> وهن زاتهن يا والينا
> يشوفن خيمة عرس
> عرس مني يقولن لينا !!!
> يشوفن صيوان بكا
> المات منو يقولنها لينا
> عارفات روحن بودننا وما بنوديهم يا والينا
سلك كهربا
ننساك كيف والكلب كلما يشوف جنازه يقول ليها الوداك تعرس شنو؟؟!!
وإلى لقاء.
سلك

شارك الموضوع :

تعليقات الفيسبوك

تعليقات


5 التعليقات

إنتقل إلى نموذج التعليقات

      1. 1
        فارس عبدالرحمن

        المريخ هو ملك الكاسات المحمولة جوا
        ناس قريعتى راحت ديل ما بيقدرو عليها واول ما عرفو النهائى ملعوب فى ديارنا قالو احسن نفتش لينا سبب ننسحب

        الرد
      2. 2
        Adil

        خلاقة وعولاق

        الرد
      3. 3
        زول نصيحة بس

        قصدك شنو ومنو يا عادل؟

        الرد
      4. 4
        عثمان

        الكلب الأكل الفطيسة

        الرد
      5. 5
        أمير الشمال

        سلك طلع دنقلاوي و بيستهزا بينا كمان ,,,,,, إري سايدري ؟؟ ,,,,,,, ماعندنا ناس بهكذا أقلام

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *