زواج سوداناس

(7) مليار في أول يوم للتسجيلات..عذراً الكاردينال البطولات لا تحقق بهذه الطريقة



شارك الموضوع :

يا أمير كمال إذا كان جمال الوالي من مايو الماضي ما وصل معاك لي حاجة ..تفتكر (لجنة التسيير) دي بتصل معاك لي شيء في نوفمبر
لا بد من القول إن الكاردينال أعاد للاعب الوطني قيمته..صلاح إدريس وجمال الوالي انفتحوا على اللاعب الأجنبي
سبعة مليار جنيه ..دفعها الكاردينال في لاعبين وطنيين ..(طيب الزول دا في الأجانب ح يعمل شنو؟)
ناس سمير فضل ديل لو جابوا ليهم الفرق بين الهلال والمريخ (57) نقطة …ممكن يشيلوا من الهلال (56) نقطة
في قوون أمس : (حصلت قوون من مصادرها داخل لجنة تسجيلات الهلال بأن تكلفة تسجيلات اللاعبين الستة الذين قام الهلال بتسجيلهم بالفريق الأول والرديف قد بلغت سبعة مليارات تكفل بها رئيس نادي الهلال أشرف سيد أحمد الكاردينال ..وشمل المبلغ الأموال التى دفعت للاعب ولاء الدين ونادي الأهلي مدني واللاعب عمار الدمازين ونادي الأمل واللاعب أبو عاقلة ونادي أم بدة بالإضافة لثلاثي الرديف أحمد ميسي وعبداللـه بابو وطارق لوكا ..وتسليم جميع اللاعبين بالإضافة لأنديتهم المبالغ المتفق عليها نقداً وبلغت في جملتها سبعة مليارات جنيه).
سبعة مليار جنيه دقة واحدة.
دي (جمال الوالي) وقت كان فاتحين ليه (بئر) بتاعة (نفط) ما كان بقدر يدفع القروش دي.
هذا الرقم يمكن أن يكون ميزانية أندية الممتاز كلها بما في ذلك نادي المريخ.
تتخيلوا بعد هذا (الرقم) والتعب والاجتهاد من فوزي المرضي وخالد النقر والياس عبد الكبير ..ممكن (لجنة الاستئنافات) بخرف كدا ..تجي وتمنح المريخ البطولة.
ناس المريخ بقوا ولا بيشتغلوا بالتسجيلات.
ما شغالين بالموضوع.
أمير كمال وراجي عبد العاطي ما قادرين يعيدوا قيدهم.
يعملوا بيهم شنو في وجود أسامة عطا المنان و( لجنة الاستئنافات)؟.
المريخاب بسجلوا حاجات تانية.
ونحن عشان عاوزنها بشرف بنتعب ..ونجتهد وبندفع (7) مليار جنيه.
سبعة مليار جنيه ..دفعها الكاردينال في لاعبين وطنيين ..(طيب الزول دا في الأجانب ح يعمل شنو؟).
الجماعة قلبهم طار.
الرقم دا ممكن يموت فيه (مريخابي).
يا أمير مالك ومال (التلتلة).
وتحويل الرصيد.
ووعود جمال الوالي.
اللجنة دي ما قاعدة ليكم ..أوعك تصدقها.
ناس المريخ أمير كمال بفاوضوا فيه من شهر مايو الماضي – إلى الآن ما وصل معاهم لاتفاق.
يا أمير – أنت عاوز الجد – الجماعة ديل أنت صبرت عليهم كتير.
أصلك ما قصرت معاهم.
(عليكم اللـه يا جماعة أي واحد فيكم كدا يوصل العمود دا لي أمير كمال).
أحسن أمير يشوف مصلحتو.
رمضان عجب أمّن موقفه.
بعدين يا أمير كمال إذا كان جمال الوالي من مايو الماضي ما وصل معاك لي حاجة ..تفتكر (لجنة التسيير) دي بتصل معاك لي شيء في نوفمبر.
أنت بتحلم.
أكيد بتحلم.
ولو جينا للحق ..لجنة التسيير قاعدة ليها (3) شهور – ما معقول تدفع ليها (3) مليار في لاعب.
هم ذاتهم ما قاعدين ليكم.
الحاجة العاوز أقولها هو إن الكاردينال ما قصر في حاجة – دخل التسجيلات من أول يوم ولقط المواهب كلها.
رديف الهلال ذاتو ..بقى أخطر من المريخ الفريق الأول.
الكاردينال شغال الفريق الأول والرديف والشباب.
وفي أول يوم من التسجيلات دفع (7) مليار جنيه.
والشغل في (الجوهرة الزرقاء) ماشي زي الطلقة.
والانسحاب ما اتزحزحنا منو (شبر).
ولا ملمتر.
عليكم اللـه دي في زول بعملها.
زول (منسحب) وبدفع (7) مليار جنيه من أول يوم في التسجيلات.
إذا كان في أول يوم بعمل كدا.
في آخر يوم بعمل شنو؟.
ولو ما انسحب – كان حصل شنو؟.
واللـه يا ناس المريخ – أحسن ليكم لموا عليكم (أمير كمال) دا.
الكاردينال دا لو لبس ليه (الكسكتة) بجيب خبرو.
لا بد من القول إن الكاردينال أعاد للاعب الوطني قيمته.
صلاح إدريس وجمال الوالي انفتحوا على اللاعب الأجنبي.
الأجنبي ذاتو بقوا يجيبوه ليك بي كم خيار.
مرة يقولوا ليك محترف أجنبي.
ومرة يقولوا ليك محترف مجنس.
تحايل ساكت.
والمتضرر الأول والأخير اللاعب الوطني والكورة السودانية.
في ظل هذا الانفتاح نحو الأجانب – الوطنيون سعرهم نزل الواطة ..والمواهب أهملت.
إلى أن جاء الكاردينال وأعاد للاعب الوطني (قيمته).
يعني لاعب وطني مثل الموهوب ولاء الدين سعره قارب من 2 مليار جنيه.
وكذلك لاعب أم بدة والمنتخب الأولمبي أبو عاقلة.
وهما يستحقان ذلك.
هذا أمر يحسب للاعب الوطني – نحن نريد أن يعود للاعب الوطني قيمته.
أمير كمال بسبب الكاردينال الآن سعره واقف في (3) مليار جنيه.
وما معروف يمكن يصل للخمسة.
أي حاجة (جايزة).
وكل الاحتمالات مفتوحة.
ونحن نوثق للأشياء لا بد من القول في أن الفضل في ذلك يعود إلى رئيس نادي الهلال.
رئيس نادي الهلال انتبه حتى للاعبين الصغار في السن ..ونقب وبحث في الدرجات الصغرى.
أي موهبة الكاردينال جابها للهلال وأن كانت في رديف المريخ.
يعني ما عندو قشة مرة.
بعد الكلام دا ..والقروش التى وصلت لسبعة مليار جنيه دفعت للاعبي الهلال الجدد ..خلوني أقول ليكم حاجة.
أقول ليكم الحقيقة.
معليش يا الكاردينال.
نقول ليك الكلام الجد.
معليش.
أنت بتدفع ساكت.
(7) مليار جنيه ..ما كتيرة على الهلال.
لكن البطولات والانتصارات في البلد دي بقت تحقق بطرق تانية.
أنت يا الكاردينال بتجيب في المواهب ..وبتبحث عن تحقيق الانتصارات في الملاعب.
لكن كورة البلد دي انتصاراتها في (المكاتب).
والمروحة شغالة.
والتلفونات بتضرب.
والموية الباردة مدورة.
العرق والاجتهاد ..بقى ما بجيب ليه حاجة.
الاتحاد العام ممكن بي عملية (مكتبية) خالصة يمنح المريخ كأس السودان.
وممكن بـ (لجنة الاستئنافات) يمنح المريخ (5) نقاط.
ممكن 3 أندية من الممتاز تنسحب.
والاتحاد قاعد.
والسلطة قاعدة.
ولجنة الاستئنافات سبب هذه (الكوارث) ..قاعدين يضربوا في (السمك).
يا الكاردينال الـ (7) مليار جنيه بتكون زي كأنك رميتها في (البحر) في وجود هذا الاتحاد.
عادي تغلب في الملعب تلاتة ..يقولوا ليك (ولاء الدين) عندو (عمو) ما عندو (رقم وطني).
يسحبوا النقاط.
عادي.
المريخ يتغلب قدام عيونا دي ..في ملعبه وإستاده ..يطلعوا يقولوا ليك (عمر عثمان) ضرب ليه حكم بونية قبل سنة ونص.
يا جماعة.
يا الكاردينال – البلد دي ما فيها (كورة).
أقصد ما فيها (قانون).
لجنة الاستئنافات يرقعوها.
ما مشكلة.
مرة تقول النصاب ما اكتمل.
ومرة الكهربة قطعت.
عادي.
ومرة يجيبوا ليها تقرير مزوّر (عديل كدا)..يعملوا بيه.
عليكم اللـه لو ما ساي ..أنتوا راجيين ليكم شيء من لجنة الاستئنافات وهي في نفسها ما قانونية.
عادي جداً ..تنظر وتعمل بي تقرير مزوّر.
فاقد الشيء لا يعطيه.
لجنة غير قانونية ..ما عندها قدرة تقول التقرير دا مزوّر.
عشان كدا يا الكاردينال الـ (7) مليار دي …ما عاوزين نقول ليك لو عملتها (بصل) كان أحسن.
رغم أن ولاء الدين الموهبة الكبيرة ..أفرحنا كثيراً.
وأسعدنا دخول أبو عاقلة لكشف الهلال.
وفرحنا كتير لعمار الدمازين.
وارتحنا لي أحمد ميسي.
لكن للأسف الشديد …الموضوع ما موضوع (كورة).
الموضوع بقى لا يحسم بهذه العناصر.
يمكن أن يشارك الهلال في منافسات الموسم القادم.
ويمكن أن يكون الفارق بين الهلال والمريخ (21) نقطة.
ممكن لجنة الاستئنافات تأتي وتجتمع قبل (21) من انتهاء المنافسة وتقلص الفارق بين الهلال والمريخ إلى (نقطة) واحدة.
ممكن.
ناس سمير فضل ديل لو جابوا ليهم الفرق بين الهلال والمريخ (57) نقطة …ممكن يشيلوا من الهلال (56) نقطة.
أو يمنحوا المريخ (56).
عشان الفرق يبقى نقطة واحدة.
ممكن.
يا الكاردينال الكورة بقت ما كورة القدم.
الكورة بقت كورة المكتب.
كورة لجنة الاستئنافات.
والتقارير المزورة.
واللعب على العقول.
بقت تمثيلية ساكت.
ونحن الهلالاب – إلى الآن صادقين مع الناس.
إلى الآن فريقنا بيسجل.
وبدفع في المليارات.
والمباريات بحددوا نتائجها ناس أسامة عطا المنان.
يا الكاردينال ..أحسن نسكت.
الموضوع لو بقى على (اللقيمات)…كان ما مشكلة.
الموضوع أكبر من (اللقيمات).
أكبر من كدا.
…………
ملحوظة : لكن اللـه غالب.
هوامش

في النهاية لا بد أن ينتصر الخير.
ولا بد أن تظهر الحقيقة.
دفاع الهلال مازال يحتاج لإضافات.
وأمير كمال يا جماعة ما كعب.
الهلال لو عاوز يجيب ليه مدافع أجنبي ممتاز على الأقل عاوز ليه 500 ألف دولار.
أي 5 مليار جنيه.
ويمكن ينجح ويمكن ما ينجح.
أحسن الخمسة مليار تمنحوها أمير كمال.
لا ننتظر وكيل.
لا كرت وصل.
ولا عاوز ليه حتى فحص طبي.
يا الكاردينال ..(ميسي) براهو ما كفاية.
ميسي جيب ليه أمير كمال.
بعدين أمير كمال دا قال أنا مع (الانسحاب).
تاني يقول ليكم شنو؟.
الزول دا يجرجر ليكم في المريخاب من نوفمبر الماضي.
يعمل شنو أكتر من كدا ؟.
يا الكاردينال قول كلمتك.
الهلال بحتاج لعناصر خبرة.
الموسم القادم …ما عاوزين نشوف لينا أي (لخبطة).
سوق أمير كمال الاتحاد ..وأطلب أورنيك تسجيل ..شوف أسامة عطا المنان ح يقول ليكم شنو؟.
ح يقول ليكم دقيقة نضرب للوالي.
اللقيمات انتهت.
قطعت.
………
عاجل: أسامة عطا المنان (تحلل) من قرارات لجنة الاستئنافات ..قولوا واحد – باقى مزمل أبو القاسم.

شارك الموضوع :

تعليقات الفيسبوك

تعليقات


2 التعليقات

      1. 1
        شقلوب

        ونحن عشان عاوزنها بشرف بنتعب ..ونجتهد وبندفع (7) مليار جنيه.
        سبعة مليار جنيه ..دفعها الكاردينال في لاعبين وطنيين ..(طيب الزول دا في الأجانب ح يعمل شنو؟).

        7 مليارات شنو يعنى دى كلها 5 دفارات من انتاج مصنع كردنة …(لعن الله الخمر وصانعها وساقيها وبائعها ومبتاعها وحاملها
        والمحمولة اليه.)..حديث صحيح رواه احمد…….

        الرد
      2. 2
        عثمان

        اتعظ بالمريخ دفع فلوس زي الرز والنتاج لا شيئ

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *