زواج سوداناس

حتى لو كان حرامي



شارك الموضوع :

كانت موضة في السبعينات.. والتمانينات.. العزابة لما يقبضوا حرامي في البيت.. يلملموا هدومهم الوسخانة كلها.. ويردموها ليهو.. ويخلوهو يغسلها.. ويحتفظوا بيهو وبعد تنشف يكويها.. وبعد كدا يشوفوا يسلموهو البوليس واللا لا..؟؟.. وكان معظمهم يخلي هدومو بلا غسيل على أمل يجي حرامي شقي حال ويقع تحت إيدهم ويغسلها ليهم.. كان فصل الشتاء.. يعتبر موسم الحرامية.. الناس بتكون راقدة جوا الأوض من البرد.. وممكن تكون في هدوم ناسنها مشرورة في حبل الغسيل.. يلقطها ويمشي.. كان بعضهم لما يقبضوا حرامي يضربوه ضربا مبرحا يخلوا دمو يشرشر.. حتى لو لم يكن حرامي بيوت حتى لو كان حرامي نشال.. في السوق.. وأخطأ.. خطأ تقني أدى إلى القبض عليه.. يشبعونه ضربا وركلا.. وعيال بوراهو تعمل حاجات وحشة يا قول عادل إمام.. حكوا أن أحد العتاولة راجل طول في عرض.. مرة قبض ليهو نشال حاول أن ينشلو.. قال للنشال.. أسلمك البوليس واللا أديك كف؟.. النشال حسبها واتبسط قال ليهو أديني كف.. أداهو الكف.. النشال وقع ويا الله قام وماسك جضمو قال ليهو “أريتك كان سلمتني البوليس”.. دي كانت تسوية بين المنشول والنشال زي تسوية مخالفات ناس المرور.. كف قصاد يخليهو يمشي.. لكن طلع الكف أشدّ إيلاما من البوليس والقانون حتى لو كان الحكم عليه سنة سجن.. وبرضو نفس الراجل الجهامة دا.. نشال دخل يدو في جيب جلابيتو.. دا مسك يد النشال جوا الجيب.. وطق طق طق كسر ليهو أصابعيهو الخمسة ومرق ليهو يدو وقال ليهو يلا امش أهلك.. استغرب في نشال يختار ضحيتو يكون زي جون سينا “مصارع يعتبر زي عنتر بن شداد في زمانو”.. يضع احتمال واحد في المية إنو يقبضو.. وتكون خسارتو فادحة قد لا تساوي المبلغ الذي جازف عشان ينشلو ويشيلو.. ما عارف موقف القانون شنو لو النشال مشى اشتكى إنو الزول دا كسر ليهو أصابعيهو واعترف النشال إنو فعلا كان عاوز ينشلو؟..
السرقة خطأ وعيب.. وهي انتهاك لممتلكات الآخرين.. ومحاولة الاستيلاء عليها.. لكن كمان أن ينصّب شخص نفسه قاضيا وجهة تنفيذية تصدر حكما وتنفيذ حكم على الحرامي دا خطأ افدح..!!!.. قبضت الحرامي امسكو سلمو البوليس.. من غير ما تعتدي عليه “متعمدا” اعتداء يؤدي إلى الأذى الجسيم.. وأحيانا إلى الموت.. لو واجهت مقاومة من الحرامي وكان هناك تهديد منه ليك قد يودي بحياتك يحق لك الدفاع عن نفسك.. لكن بعد تقبضو ويصبح تحت يدك وتسيطر عليه مافي داعي للدق والضرب.. كما حدث في فيديو كان متداول اليومين الفاتو لحرامي تم القبض عليه من مجموعة كبيرة.. وتم الاعتداء عليه وضربه ضربا شديدا.. وتعذيبه باستعمال الشطة وحشوها في أماكن حساسة من جسده.. وصورو هذا الذي حدث ونشروهو في النت.. !!!!!.. ما عارف القصد شنو من تصوير واقعة زي دي ونشرها؟.. النت دا بتشوفو أمم تانية غير السودانيين.. أمم متحضرة ترى في تصرف زي دا منتهى الوحشية.. والهمجية.. ويكون خصما علينا كمجتمع نطرح نفسنا أننا متحضرين وأولاد قلبا..!!!!.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *