زواج سوداناس

السنــــة دي (ابوالقنفد) ما تعشموا فيـــــه



شارك الموضوع :

الكاردينال خرب سوق اللاعبين ..يدفع في (المليارات) زي (الكوتشينة)…الخرب سوق (القنافد) منو؟
التسجيلات باقى ليها (25) يوم ..ما تقعدوا تتلفتوا لينا ساكت ..وقت التسجيلات تنتهي تقولوا لي اسامة عطا المنان مدد لينا اسبوع
قالوا ليك ناس المريخ الى الآن عقدوا (21) اجتماع مع اميركمال نصيب لجنة التسيير براها من هذه الاجتماعات (7) اجتماعات
رئيس الهلال الايامات دي في الامارات شغال بـ (الكسكتة) – وانتوا عارفين الزول دا وقت يلبس الكسكتة
قبل فترة (المكوة ام ديك) فجأة بقت بالشيء الفلاني.
مكوة الفحم بعد ان فقدت قيمتها وبقت من (الاثار) – تاني طلعت واتصدرت البورصة.
مكوة الفحم رجعت ليها مكانتها – بعد ان كان (القميص) وقت تجيب عليه (مكوة فحم) بقول ليك عليك اللـه ما تبالغ …خلينا على (كرفستي) من مكوتك دي.
الكرفسة ولا المكوة ام فحم.
حليل مكوة زمان …البخة والنفخة والهبة.
وبداية الاسبوع وقت نضايق بكتفي بوضع (القميص) تحت اللحاف.
العسكرية تصرف.
مكوة الفحم زي الموس …الما لبس جلابية (مكوة فحم) ما لبس.
انتوا قايلين مكوة الكهربة دي مكوة.
دا لعب ساكت.
اشاعة طلعت في (نحاس) المكوة ..رفعت ليك سعر المكوة السما.
الزول وقت يغترب ويرجع للعرس يقولوا ليك عندو (برادو 2015م) وقطعة ارض في المنشية ومكوة ام ديك.
ما عارف (الديك) علاقتو شنو بالمكوة؟.
الناس كانت قد وقفت قصد كدا في (الديك) ..يقولوا ليك (المكوة) لو ما فيها (ديك) ما بتجيب ليك حاجة.
ديك شنو يا جماعة؟ – عاوزين يشيلوا (الديك) من (المكوة) ويركبوها في (رأسنا) دا.
وكانوا بقولوا ليك عريس (مرطب)…شيلتو 12 – 12 ..والدهب 12 غويشة ..والشيلة فيها اربع مكوات فحم.
ثقافة زمان.
ثقافة سادت ثم بادت.
زمان بتذكر ان (مروحة التربيزة) كانت من علامات الراحة.
يقولوا ليك عندهم (مروحة تربيزة).
الحديث ينتهي.
هسع لا المروحة نافعة – ولا التربيزة.
وعندهم (خلاطة).
يقولوا ليك شربنا لينا (جوافة) مخلوطة.
الخرطوم كانت تتميز بـ (الخلاطات).
وكشك الليمون.
الايامات دي ومع التسجيلات – (ابوالقفند) طار السماء.
يا جماعة الحاصل شنو؟.
قالوا (ابوالقفند) بشيل (السرطانات).
يعني نضع (د) قدام ابوالقفند.
وهم.
عدم الموضوع.
مواقع التواصل الاجتماعي.
غايتو السودانيين ديل (الاشاعات) بتمشي فيهم سريع.
تلقوا في واحد عندو (14) قفند قال يرتاح منهم ..قام طلع دعاية قال ابوالقنفد بشيل (السرطان).
سرطان شنو البشيلو (ابوالقنفد)؟.
اتخيلوا.
العلاج بـ (ابوالقنفد).
ابوالقنفد سمع الكلام دا طار السماء.
ابوالقنفد الواحد بقى (200) مليون جنيه.
اتخيلوا ابوالقنفد ..اغلى من السيارة الكرت.
200 مليون جنيه سعر (ابوالقنفد).
سماسرة اللاعبين بنعرفهم – كمان سماسرة ابوالقنفد شنو؟.
ابوالقنفد دا إلّا يكون دخل غرفة تسجيلات ريال مدريد ..عشان كدا طار السماء ووصل للسعر دا.
شوفوا الزمن دا بقى غريب كيف؟..لو عندك اربعة ابوالقنفد بتصبح (مليادير).
ابوالقنفد – اريتو (قنفد) الهنا والسرور.
الواحد بقى يكون ماشي في الشارع – يقول : (يا اللـه ابوالقنفد).
واللـه انا اول مرة اتوقف عند (ابوالقنفد)…شكله جميل وفيه براءة ..بيستاهل الـ (200) مليون جنيه.
قالوا ليك جماعتنا ديك …بتعرفوهم كلهم…(بس اسكتوا).
اعملوا فيها ما عارفين.
جماعتنا ديل قالوا جابوا ليهم لاعب من بحري ..قالوا ليه عاوزين نسجلك.
اللاعب قال ليهم انا ما عندي مشكلة ..انتوا بتدفعوا كم؟.
جماعتكم قالوا ليه واللـه نحن ظروفنا صعبة ..وعندنا لعيبة مفكوكين ..ويا دوب (جداد) في الشغل ..وفريقنا شغال بي لجنة تسيير ساكت ، ما بنقدر ندفع اكتر من (150) مليون جنيه.
اللاعب عاين ليهم سمح – وقال ليهم : عليكم اللـه انتوا هسع ما بتخجلوا ..قروشكم دي هسع (ابوالقنفد) بتجيبو.
ابوالقنفد بـ (200) مليون جنيه …انتوا عاوزين تسجلوا ليكم لاعب هداف الدوري التأهيلي بـ (150) مليون.
واللـه انتوا بتبالغوا عديل كدا.
الكاردينال خرب سوق اللاعبين ..بدفع في (المليارات) زي (الكوتشينة)…الخرب سوق القنافد منو؟.
اقول ليكم حاجة تانية – بس ما تطلع برة العمود دا.
ادفنوها قبلها.
قالوا ليك ناس المريخ الى الآن عقدوا (21) اجتماع مع اميركمال نصيب لجنة التسيير براها من هذه الاجتماعات (7) اجتماعات.
جمال الوالي (14) اجتماع ما طلع بي شيء من امير كمال.
والكاردينال متابع.
متابع الملف – خطوة – خطوة.
آخر اجتماع بين لجنة التسيير وامير كمال قالوا ناس اللجنة قالوا لي امير نحن بندفع ليك اتنين مليار و200 مليون جنيه ..وبنسلمك مليار و200 مليون الآن والباقى شيكات.
امير كمال قعد يضرب في المبلغ في رأسو.
بعد شوية قال ليهم قروشكم دي يعني بتجيب ليها كم (ابوالقنفد)؟.
وكيل امير كمال قال ليه حاولي (11) ابوالقنفد.
امير كمال طوالي قام.
قال ليهم وصلوا المبلغ لـ (20) ابوالقنفد ..عشان نبارك ليكم الخطوة.
عضو من لجنة التسيير قال ليه يا امير (20) ابوالقنفد نجيبها ليك من وين؟..واللـه الكاردينال ما خلى ليه (ابوالقنفد) حايم.
الزول ابوكسكتة دا وقت يلبس الكسكتة ما في ابوالقنفد بقيف قدامو.
المريخ حالتو صعبة شديد.
امير كمال من مايو ما قادرين يصلوا معاهو لي حاجة.
خالد النعسان خطفوه من الامير ..وما عندهم ليه قروش.
عاوزين خالد النعسان يتسجل ليهم دعما للمجهود الحربي.
انتوا ولدكم امير كمال ما (دعمكم) يدعمكم خالد النعسان.
خالد النعسان ذنبو شنو؟.
عجبنا (الفلس) الفيكم دا.
قروش الحكومة ظهرت.
التسجيلات باقى ليها (25) يوم ..ما تقعدوا تتلفتوا لينا ساكت ..وقت التسجيلات تنتهي تقولوا لي اسامة عطا المنان مدد لينا اسبوع.
واسامة عطا المنان جاهز للخدمات دي.
اصلو ما قاعد يقصر معاكم.
السنة دي المريخاب ..لا اجانب.
لا امير كمال.
لا بلة جابر.
ولا خالد النعسان ذاتو.
السنة دي (ابوالقنفد) ما بتقدرو تسجلوه مع الكاردينال دا.
زول دافع ليه (7) مليارات جنيه في اول طقة.
يعني غالبو يدفع ليه اربع مليارات في امير كمال.
لا تجنيس.
ولا اختبارات فنية.
ولا طبية.
ولا نقعد ننتظر لينا (كرت).
ولا سيستم فتح – لا سيستم قفل.
احسن ليك يا الكاردينال سجل الزول دا – ما بتندم عليه ..مهما دفعت فيه من قروش.
المريخاب ديل خليهم يصعدوا (نمر).
يرجعوا (عنكبة).
يقدموا علي جعفر.
على كيفهم.
امير كمال اصلو ما تخليه ليهم.
ما عاوزنهم السنة دي (ابوالقنفد) يشموه.
خلوا لجنة الاستئنافات تنفعكم.
خلوها تبقى ليكم (تسجيلات).
الكاردينال الايامات دي في الامارات شغال بـ (الكسكتة) – وانتوا عارفين الزول دا وقت يلبس الكسكتة.
الكاردينال في الامارات على نار هادية شغال في موضوع (اليكس اورتومال)..الزول دا كسر الرقم القياسي في نيجيريا في الاهداف.
قالوا ليك اليكس دا قونو الحكم بحسبو ليه بي اربعة.
قون (شرط) عديل كدا.
ناس الزهور والورد ولا بنتظروه.
اشطبوهم من بدري.
نوع دا مع كاريكا افضل لاعب في الدوريات الافريقية …ح يكتلوا ليهم (كشافة).
يمين لو وقفوا ناس علي جعفر والريح علي (الزهور والورد)..كشافاتكم ما بتقيف لي (اليكس اورتومال).
ان شاءاللـه الصفقة تكتمل ..وتكلل خطوات الكاردينال بالنجاح.
الكاردينال بـ (الكسكتة) ذاتها شغال ليك في موضوع (لورانس لارتي)..دي بيفكتها ليك زي (الحدية).
مدافع ما في زول بحوم بي جنبو.
بتحاشو طريقو.
انتوا يا ناس المريخ خليكم مع (القنافد) ديل..يمكن سعرهم ينزلوا في الايام القادمة.
لمن يجيبكم الكاردينال بالخبر الاكيد.
براكم شفتوا سر الكسكتة في ولاءالدين وابوعاقلة وعمار الدمازين وأحمد ميسي.
بعد التسجيلات دي كلها والى الآن ما اقتنعتوا.
يا الكاردينال الجماعة ديل اقنعهم بـ (امير كمال).
عشان يشربوا ما يروا.
جيب ليهم امير كمال.
اقنعهم.
الكسكتة لسه تحتها كلام.
………..
ملحوظة : في (ابوالقنفد) ظهر في مزرعة الكاردينال امس.
هوامش

العملية القادمة تحت عنوان ابوالقنفد 107.
عدم حل ازمة الموسم حتى الآن يزيدها تعقيد.
الكاردينال مثلما انجز ملف التسجيلات المحلية بنجاح كبير ..يرتب لنجاح آخر في ملف الاجانب.
وامير كمال.
وصل البلغاري روزن لتدريب رديف المريخ.
روزن دا ح يدرب منو في الرديف.
ناس مسي مشوا الهلال.
وناس امير كمال عندهم كلام تاني.
غايتو بتعملوا ليكم في جنس حاجات.
روزن دا إلّا تمسكوه لجنة الاستئنافات.
ما عندكم رديف.
شوفوا ناس سمير فضل والفاتح خضر.
التسجيلات مشت.
والايام جرت.
احسموا ملفاتكم سريع.
ناس ما عندهم قروش (خالد النعسان) طبيعي ما يكون عندهم قروش لامير كمال.
شيلوا الصبر.
سوف نعود ان شاءاللـه لنكتب عن عطبرة والقضارف ودنقلا – هذه المدن كلها قدمت دروسا بليغة.
شكرا لعطبرة.
وشكرا القضارف.
وشكرا دنقلا.
وليت السلطة والاتحاد العام تتعلم.
لا بد من مهرجان رياضي كبير لتكريم مدثر كاريكا.
الاكيد ان المهرجان سوف يكون كبيرا وبتدافع جماهيري كبير في وجود ولاءالدين وابوعاقلة وعمار وميسي.
اضف الى هؤلاء ..المحترفين الجدد الذين ينتظر ان يضمهم الهلال.
جماهير الهلال تريد ان تحتفل بفريقه.
تريد ان تكرم لاعبها المحبوب مدثر كاريكا.
…………..
عاجل : ابوالقنفد قال ليهم اشاور ابوي.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *