الفاتح جبرا

عرس صناعي


كثر الإحتيال في الآونة الأخيرة وتنوعت أساليبه ولعل ضيق المعايش له القسط الوافر في ذلك ، كنا جماعة نحكي لبعضنا البعض آخر ما توصلت إليه عقليات الإحتيال من إبتكارات غير ان صديقنا (خالد) قال لنا إنتو شفتو إحتيال خلوني أحكي ليكم الإحتيال العلى أصولو .. قال (خالد) بينما كنت أصالي قبل كم شهر في أحد (المساجد) بالعاصمة .. وبعد إنتهاء الصلاة تقدم شخص (خمسيني) نظيف الثياب تبدو عليه علامات التقوي والوقار وطلب من الإمام التحدث ثم أمسك بالمايكرفون قائلاً :
– يا جماعو لو سمحتو دقيقة واحدة ..

– فأنصت المصلون .. إلا بعض الهمهمات هنا وهنالك
– قال صاحبنا : يا جماعة الخير .. الحمدلله ربنا رزقني بعدد من البنات كولهم زوجتا ليهم والحمدلله على سنة الله ورسوله وفضلت ليا بت واحده عاوز أزوج ليها على سنة الله ورسوله .. يا جماعة أنا عاوز ليها عريس وما عايز منو أي حاجه بس يكون زول متدين وعلى خلق يخاف الله فيها .. والرسول صلي الله عليه وسلم قال (إذا جاءكم من ترضون دينه وخلقه فزوجوه) ..
صمت المصلون لبرهة إلا بعض الهمهمات هنا وهناك .. و(فجأتن) خرج من أحد الصفوف شاب فارع الطول بسيط الثياب ما أن إقترب حتي قال :
– أنا قبلان بيها يا شيخنا
– ويرد الشيخ فرحا : وأنا كمان زوجتك ليها .. وكمان نخلي الشيخ الإمام يعقد ليكم هسه !
وفجأتن يرتفع صوت .. يلتفت الجميع ليشاهدوا شخصا تبدو عليه علامات التقوي و (الترطيب) .. جلابية سكروتة .. وشال (بيج) مطرز وساعة دهبية (غاتسة في المعصم) وعمة (توتال سويسري) :
– بارك الله في أمثال هذه الزيجة .. والله لو الناس كولها عملت كده كان حلينا مشكلة العنوسة دي وأكيد العرسان ديل عندهم مستلزمات ضرورية محتاجين ليها فحقو نجمع ليهم حاجة (يدخل يده في جيبه الفضفاض) فيخرج (ربطة) من (العملة الورقية) فئة العشرين جنيها ويقذف بها عاليا صوب العريس .. ثم تتوالي التبرعات (والدعم السريع) ..
يواصل صديقي خالد الحكاية قائلا :
غايتو أنا كنتا آخر زول طلعتا من المسجد .. وخليت (أبو العروس) و(العريس) قاعدين يلمو في القروش (ويربطو) في الرزم !
– قلنا له (مستغرشين) وبصوت واحد : طيب وين الإحتيال هنا ؟
– يا جماعة طولو بالكم شويه .. بعد القصة دي بي شهرين تلاته جاتني مامورية لي واحدة من المدن في واحدة من الولايات .. يوم الجمعة مشيت المسجد .. بعد ما صلينا .. تقدم شخص (خمسيني) نظيف الثياب تبدو عليه علامات التقوي والوقار وطلب من الإمام التحدث ثم أمسك بالمايكرفون قائلاً : يا جماعو لو سمحتو دقيقة واحدة ..
– فأنصت المصلون .. إلا بعض الهمهمات هنا وهنالك
– قال صاحبنا : يا جماعة الخير .. الحمدلله ربنا رزقني بعدد من البنات كولهم زوجتا ليهم والحمدلله على سنة الله ورسوله وفضلت ليا بت واحده عاوز أزوج ليها على سنة الله ورسوله .. يا جماعة أنا عاوز ليها عريس وما عايز منو أي حاجه بس يكون زول متدين وعلى خلق يخاف الله فيها .. والرسول صلي الله عليه وسلم قال (إذا جاءكم من ترضون دينه وخلقه فزوجوه) ..
قال خالد مواصلا .. تعرفوا يا جماعة أنا لمن سمعتا الكلام ده طوااالي قعدتا أتذكر .. سمعتو وين؟ سمعتو وين .. قمتا إتذكرتا القصة الحصلت في مسجدنا هنا .. قمتا (جريت في الراجل نور طويل) عرفتو ليك طوااالي .. وفي اللحظة و(فجأتن) خرج من أحد الصفوف شاب فارع الطول بسيط الثياب ما أن إقترب حتي قال :
– أنا قبلان بيها يا شيخنا
– ويرد الشيخ فرحا : وأنا كمان زوجتك ليها .. وكمان نخلي الشيخ الإمام يعقد ليكم هسه !
وفجأتن يرتفع صوت .. يلتفت الجميع ليشاهدوا شخصا تبدو عليه علامات التقوي و (الترطيب) .. جلابية سكروتة .. وشال (بيج) مطرز وساعة دهبية (غاتسة في المعصم) وعمة (توتال سويسري) ..
– بارك الله في أمثال هذه الزيجة .. والله لو الناس كولها عملت كده كان حلينا مشكلة العنوسة دي وأكيد العرسان ديل عندهم مستلزمات ضرورية محتاجين ليها فحقو نجمع ليهم حاجة (يدخل يده في جيبه الفضفاض) فيخرج (ربطة) من (العملة الورقية) فئة العشرين جنيها ويقذف بها عاليا صوب العريس !
– قمتا عاينتا ليهو ألاقيهو ليك (زولنا داك) ذاااتو :
– (كلنا بصوت واحد) : أها وعملتا شنووو يا خالد إنتا؟
– أعمل شنو يعني .. كوركتا بأعلى صوت … ديل محتالين .. ديل نصابين !!
– أها والحصل شنو؟
– لحدت ما حكيت للناس القصة و(إقتنعوا) … كان الجماعة (إتخارجوا)!

كسرة :
من (العرس الجماعي) وصلنا مرحلة (العرس الصناعي) …. الله يجازي اللي كان السبب !!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)


‫3 تعليقات

  1. واحد بصلي في الجامع ولابس مركوب نمر اصلي ، وبعدين في حرامي منمر فيهو ومباري صاحبنا دا لما دخل الجامع يصلي، وسيد المركوب كان خايف علي مركوبو،، خواهم قداااامو وبصلي وبعاين ليهو،،، الحرامي فجاة كدا نط وبَقى يتكلم بصوت عالي،، عقرب عقرب،،، شال فردة من المركوب وبَقى يضرب في الواطة وقال الحمد لله ، خلاص مات، لكن كدي النطلعو برة، شال الفردة التانية وعمل روحو إنّو شال العقرب بي الفردتين وطلع،،، وسيد المركوب بصلي وراجي الزول يرجع،،، وصاحبنا. عييييييك

  2. اصبح الاحتيال والنصب على الناس على قفا من يشيل ولهذا ياجماعة إحذروا من الصنف الذى يسألك ويشحدك بطريقة راقية او بإسلوب عاطفى ويطلب مساعدة او مال بطريقة منمقة وأسلوب يثير فيك الهاشمية ويجعلك تندفع لمساعدته ، تريثوا وتبينوا من هؤلاء وخاصة الذى تجده مهندم ونظيف ويقول لك يا بن العم نقصت ليك قروش الدواء ممكن تتم لى ، الفى جيبى كملت ، او يقول ليك عندى المرة فى ولادة ومحتاجة لعملية عاجلة وناقصى لى مبلغ كذا ممكن تساعدنى بيهو او يأتيك واحد ويقول ليك انا إتسرقت قروشى هسى فى المواصلات وحق الرجعة للبيت ماعندى وانا ساكن بعيد عشرة جنيه بتوصلنى (مثلاُ) .
    اذكر قصة نصب عجيبة حدثت لاحد قريبات صديقى لى كانت ترقد فى مستشفى بالخرطوم فى إنتظار عملية قلب وتحتاج إلى كذا مليون حتى تجرى العملية فعثر عليها صحفى وساعدها بإنزال إعلان لذوى القلوب الرحيمة سجل فيه مكانها فى المستشفى ووضع رقم تلفونها للتبرع لها بالرصيد ، الامور مشت تمام وكل دقيقة يجيها رصيد فى تلفونها ، جاءهم زول شكله محترم جدا عرف نفسه بأنه مرسل من رجل اعمال كبير وداير يدفع كل مبلغ العملية ، الجماعة ما صدقوا طوالى إندفعوا نحوه وهو شغال يغرى فيهم بالكلام المعسول والوعود الكبيرة بأنه سيقنع صاحبه بان يتحمل مصاريف كل العلاج والادوية وليس العملية فقط ، وشوية يقول ليهم خلونى اتصل عليهو ويهبش جيوبو ويقول ياالله نسيت الموبايل تحت فى العربية وبسرعة يشيل تلفون المريضة ويقول ليهم انا حافظ رقمه ممكن اتصل بيهو من تلفونكم دا فرحب الجميع وقالوا ليهو خد راحتك ويتصل على رقم ويبتعد عنهم شوية شوية لحدى ما زاغ ومعاهو تلفون التبرعات برصيده كله .