زواج سوداناس

مقولة.. احلق عند حبشي واتزوج اريتيرية وحج في مكة.. ما رأيك



شارك الموضوع :

ماهو ي الحلاق الحبشي دا عامل لي عمل.. ي انا عامل لنفسي عمل.. الليلة من صباح الرحمن مشيت براي كدا للحلاق الحبشي الجمب مدارس الشعب… اول حاجة فتشت عن الزول الحلق لي المرة الفاتت… لكي اتجنبه.. ثم سلمت راسي الى واحد تاني…

صراحة المرة دي حظي ضرب وحلق لي كويس… اها قام قال لي (صنفرة كيف؟) .ز في الاول رفضتا.. بس قلتا في نفسي ياعمك كدا جرب الحاجة دي.. انا صراحة ما عارف هي شنو بالضبط كدا… وعلمت حنك انو وقتي ضيق قمتا قلتا ليهو بتاخد زمن طويل؟ قال لي لا ربع ساعة بس.. المهم توكلت على حي لا يموت وسجن سجن غرامة غرامة..واهو الواحد يدلع نفسو شوية…

حفيد النجاشي الذي لا يظلم عنده احد.. جاب بدرة بيضاء كدا ولطخك لطخك ملاء لي وشي كلو بدرة… افو يا ابو زينب !! القصة دي شكلها ماشا على شئ ما كويس… واتذكرت صاحبنا الله يرحمو… الحاول يحلق شنبو براهو وكانت النتيجة انو حلق شنبو كلو واضطر للسفر اسبوعين الى مدني لحدي ما شنبو قام وبعداك جاي راجع… غايتو اقنعت نفسي لو القصة جابت ليها اي شخشخة انو عادي ممكن اسافر اي حتة لحدي ما القصة تظبط ووشي يرجع زي اول..
ثم ان الحلاق جاب تاني علبة كريم ابيض وبدا يلطخو في وشي…. زي خمسة دقائق كدا…ثم اخذ ليهو استراحة كدا.. قمتا انتهزت الفرصة وفتحتا عيوني… صراحة ما قدرت امسك الضحكة.. ياخ لقيتني ليك وشي بتاع واحد من محاربي قبيلة الزولو الكينية.. بس ناقصاني الحربة وجلد النمر..
ثم اني لعنت الحبشي وقلتا له تبا لك بتاعة الافلام” واردفتها بي”ايها الوغد” برضو بتاعة الافلام..

صراحة كنت خائف يجي واحد من حلتنا ماري بالشارع ويشوف المنظر دا.. خاصة انو الدكان بيفتح على شارع المعونة.. شارع مواصلاتنا…بس الله ستر … ثم ان حفيد ابرهة بدأ يغسل وجهي من الحاجات العملها دي.. ياخ يادوب عرفتا ناس بحري ديل ما بحبو الشتاء ليييه!! موية باااااااااااااااااردة تحسها جوة العضم…
بس حفيد النجاشي معلم كبير ياخ… بعد الحلاقة عمل مساج لفروة رأسي والرقبة… ولمن انتهى كنت زي رجعت عشرين سنة كدا.. واسع المعنويات فوق.. وقديم قيل.. احلق عند حبشي واتزوج اريتيرية وحج في مكة

الخرطوم: علي ميرغني

شارك الموضوع :

تعليقات الفيسبوك

تعليقات


4 التعليقات

إنتقل إلى نموذج التعليقات

      1. 1
        عمدة

        معلوم الحج إلى مكة، وعرفنا الحلاقة عند الحبشي،لكن فسروا لينا مسألة تزوج أريترية!!!

        الرد
        1. 1.1
          بتاع تنظــــير

          يا عمدة .. يفسروها ليك كيف !!

          يعنى واحد يقول ليك لو عايز تتعالج أمشي ألمانيا، لو عايز تشتري عربية اشتري برادو، و لو عايز تفطر .. أكل سمك .. تجي تقول ليهو فسر لي !!

          الرد
      2. 2
        واحد ، 2، 3

        دمك خفيف .. يا أبو علوة .. بس ما قلت لينا تعليقات المدام كانت كيف ؟ أم أنك لا تزال علي قيد الحياة !!

        بس حكاية الزوجة اريترية .. علي شرط تكون ملمة ب (مشهاد) التجميل بالطريقة البلدية بتاع السودانيات و تتعلم تقول بري .. بري و أجييييييييييييييييي !!

        الرد
      3. 3
        ايمن احمد

        علي ميرغني
        موضوع تافه جدا ومكرر ولايرقى لمستوى النشر

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *