زواج سوداناس

طعم السعادة



شارك الموضوع :

المكان الفيهو إنت.. أحلى من طعم السعادة
والحضور الفي عيونك.. يسلب الروح الإرادة
يدي لي ذات البشوفك.. أرقى إحساس بالسيادة
ما بوصف كل صفاتك.. وتبقى مجروحة الشهادة
إنت معروف زول فضيلة.. والكرم بقى ليكا عادة
الله يفتح نور بصيرتك.. وديمة خيرك بالزيادة
ويكرمك بي جاه حبيبك.. وتلقى روحك كل مرادها
لا تضوق طعم التعاسة.. لا تزور يوم العيادة
وبينا تفضل أحلى عشرة.. يا سنا الروح يا ودادها
إنت سيدي وياني ستك.. والمحنة أكيد زوادة
نحن عايشين جوة جنة.. والعزول ماااااات بالحسادة…
*****
السنين العشنا فيها.. أحلى لحظات من عمرنا
كنت إنت ربيع فصولها.. وفى ظلام الليل قمرنا
ياما نحنا كتير غلطنا.. وإنت تتقبل عذرنا
وقلبك الحاني المسامح.. لا تبدل.. لا هجرنا
إحتوانا بكل محبة.. وبي ندى التحنان غمرنا
ضلل الروح بالأمانى.. وكان سحايب لي مطرنا
نحمد الله اللينا جابك.. والجعل ريدك قدرنا
****
الأماني البشتهيها.. إنت محور إهتمامها
والوعود اللي عيونك.. فينا حتما إلتزامها
ليك من القلب المحبة.. وليك من الروح احترامها
ومن عذاب لوعة غرامك.. نسأل الله السلامة
أصلو نار الشوق فى بعدك.. كل يوم زايد ضراما
يا رفيق دربي وحياتي.. وتوأم الروح في وئامها
فيك محطتنا الأخيرة.. وفرصة واجب إغتنامها
ليك على حق المودة.. ولي عليك حق القوامة
مستحيل أنساك.. حتفضل.. زولي لي يوم القيامة
تلويح:
سعادة الدنيا الحقيقية.. أن تجد إنسانا يدعو لك بظهر الغيب.

شارك الموضوع :

تعليقات الفيسبوك

تعليقات


1 التعليقات

      1. 1
        زايد الخير

        قمة الإبداع استاذة داليا ،،، وانت احد عوامل السعادة في هذا الكون بابداعك المتجدد .

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *