زواج سوداناس

خميس الناس القيافة



شارك الموضوع :

قعيّد نضم:
وأي زول في نظر نفسو ونظر ناسو قيافة.. والقرد في عين أمو قرد.. انتو قايلين القرود ساعلين في الغزلان؟.. بيفتخرن بي نوعن في الأسد عندهن رأي.. وخايف والله يكونن فينا نحن البني آدمين ديل عندهن رأي ورأي كبير.. واظن لو سمعن المثل دا يحتجن.. وربما يتوجهن صوب حقوق الحيوان.. وتجيكم لجنة تقصي حقائق.. ونقعد في الجرس..
خميس الناس القيافة الجميلين الدواخل.. والزول لما يكون جميل دواخل “ينضح” الجمال ويغطي وشويهو.. أضحك الضحك نعمة خص بها الله الإنسان دونا عن بقية خلقو.. ممكن المخلوقات التانية تتبسط لكن ما بتقدر تضحك.. النكد ما حبابو.. النكد ينكد عليك وعلي المعاك.. أضحك تضحك الدنيا معاك.. ابكي تبكي براك إلا يجاملك زول يكون خايفك تلومو..!!!!
أقاصيص غير متجانسة:
(1)
أرض الأحلام:
يحاول من سنة 95 اللوتري..
جاهو..
استعد للسفر..
ركب الطيارة.. طااااااارت.. وهو يجتر ذكريات بيتو.. وحوشو وماسورة الحوش الديمة مكسورة ومالية الحوش موية.. يعاين للمضيفة ظريفة حليوة.. لابسة طقم برتقالي جميل.. كلما تمر بي عندو تبتسم افتكر انها معجبة بيهو في سرو: “معجبة؟.. انتي شفتي شي؟ اصبري.. خليني الننزل في الواطا دي بس” ما بعرفو ناوي علي شنو؟ لون الطقم اللابساهو ذكرو قميص مرتو الهزاز.. رسم علي شفتيه بسمة وهو يناجي خيالها: “زينوبة بس تستحمي وترقدي شعيراتك الواقفات ديك تبقي مضيفة”.. فجأة صوت مضيفة: أربطو الاحزمة.. الطيارة بدت تتراجف عاين بالشباك السما فوق وتحت موية المحيط.. فجأة الطيارة وقعت.. طار منها ووقع في الموية. مسك في جناح.. اترفع يا الله.. قام يعاين لعراقيهو من ورا لقاهو مليان طين وموية” “لا إله إلا الله محمدا رسول الله.. أريت أمريكا طايرة في القبل الاربعة.. بركة البقى ما صح”!!!!
(2)
كسر خاتر:
النصيحة هي عندها شوية عوارة.. قاعدة تتاورها مرة مرة.. علا طيبة..
جا المغرب وشيهو ينعل قفاهو.. ختت لو الغدا من ملاح الخدرة حق امبارح
عاين لو وقالها: “الملاح دا بايت؟””
ضحكت وهي تحاول أن تنكت الله يهديها قالت ليهو وهي تضحك: “لا.. ماشي أهلو”
رجال ما عندهم أخلاق ولا عندهم عشرة..
!!!!!! مشت أهلها هي..
(3)
الاسكراتش سوهو قرقريبة.. والفلهمة في الزريبة:
جات الخرتوم للقراية اخدت سنة
فتحنكشت..
رجعت البلد..
واقفة في الزريبة مع ابوها الزهجان واخلاقو في طرف نخرتو قال لها: “حوشي معاي النعجة الغبشا ديك”
وقفت قالت ليهو: “أوكي.. لكن يا دادي دي مش غبشة.. دي لونها حرجلي”..
أخدت تلاتة علقات..!
واحدة لي “يا دادي”
التانية لي “مش”
التالتة لي “حرجلي”
علما بأنه قد جاملها في “أوكي”!!!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *