الصحة والعافية والهلال والموية الباردة

الفول (السادة) بناكله زي (شية الجمر) البنشوفها من العيد للعيد – بقينا لمن نشم ريحتها نشك في (نخرتنا)

أولاد الحلة بدل ما يقولوا ليك ماشيين (الدهب) – بقوا يقولوا ليك ماشيين (البصل)

لكن تعاقبوا (الهلال) – واللـه بعد كدا (فولكم) دا لو قلبتوا فيه (عقد الجلاد) ما في زول بمشي عليه

اهبشوا (البصل) – إن شاء اللـه (البصل) يبقى زي (التفاح) …أربع بصالات بـ 40) جنيه)

· الهلالي الإعلامي صلاح مليشيا ..عنده حدوده الفاصلة التى يقول فيها : (إلّا الهلال).
· أعلن ذلك منذ أن كان الجنيه فيه (3) دولارات ..قبل ما تنعكس الحكاية وينزل الجنيه (خانة) مع كل تصريح ينشر في الجرايد.
· لمن (الجنيه) بقى قدام (الدولار) تخجل ليه وأنت بتسمّع في جدول (عشرة) عشان توازي الحكاية.
· جدول عشرة ذاتو اتعقد ودخل في ضفوره.
· الجنيه قدام الدولار بقى يرجف زي (موسى الزومة) قدام (ميسي).
· يفكر يدخل عليه ..يقول أحسن أرجع.
· يرجع ..الجمهور يكورك.
· يدخل على (ميسي)…موسى الزومة يتفرتك (ضرس – ضرس).
· مسختوها.
· وعملتوها ظاهرة.
· قلنا ليكم مية مرة …من زمن (أحمد غائب في الركائب) ..وفاطمة السمحة ..وجانا كلب عيونه حمر.
· وأحمد وراء التيران يخب!!.
· من الزمن داك قلنا ليكم.
· إلّا الهلال.
· زمن جنينة أبو جلابية (مراوحها) بتشتغل بدون (كهربة).
· وكهربتها بدون (عداد).
· فولها (ضلع).
· وعدسها بي (شوكها).
· قلنا ليكم …وحدثناكم.
· قعدنا معاكم في الواطة – شرحنا ليكم الحكاية.
· اهبشوا (البصل) – إن شاء اللـه (البصل) يبقى زي (التفاح) …أربع بصالات بـ 40) جنيه).
· أنتوا (بصلكم) دا زارعنو في حديقة (البيت الأبيض).
· بنخليه (البصل).
· بقت على (البصل).
· إن شاء اللـه ما (اتبصلت).
· بس أبعدوا لينا من (هلالنا) دا …هلال صديق منزول …كورتو وأغنيات محمد وردي واحد.
· أغنيات وردي …وتمريرات الأمير صديق منزول واحد.
· أبعدوا لينا من هلال طارق أحمد آدم.
· أول وزير دفاع ما يستعمل ليه طلقة واحدة.
· ولا يطلع ليه (بيان).
· إن شاء اللـه (البصل) يطير السماء.
· أولاد الحلة بدل ما يقولوا ليك ماشيين (الدهب) – بقوا يقولوا ليك ماشيين (البصل).
· ونحن نقعد نتلخبط.
· الشارع الأول من الشارع التاني ما بنعرفو.
· بيتنا من صينية الحركة ما بنعرفها.
· هلالنا دا ما تقربوا عليه.
· أعدموا الغاز.
· قبلوا على (الغاز) – شرعوا فيه زي ما عاوزين.
· زي ما دايرين.
· ما في زول بيسألكم – الناس دمها بقى ميت.
· زي أفلام الكرتون ..بتحركوا بدون إحساس.
· أنبوبة الغاز تبقى بي (100) جنيه …أنتوا الغاز دا بتوزعوه في رويال كير؟.
· غازكم دا بتكفل بي (الحلة) البصلة واللحمة والزيت.
· حافظ نشيد العلم.
· معاهو (فرخة).
· خبارو كدا؟.
· على كيفكم فيه.
· إن شاء اللـه (الغاز) تصرفوه بالرشوتات….أنبوبة الغاز لو ما كتبها ليك اختصاصي (باطنية) ما يصرفوها ليك لو طقيت السماء.
· بي طريقتكم.
· على كيفكم.
· بنرجع على (حطبنا).
· تاني بمشى على الوقود ..نفزع وندل البحر.
· هلالنا دا ما في زول يهبشوا لينا.
· غازكم أنتوا أحرار فيه.
· هلال تنقا ووالي الدين …هلال جكسا وفوزي المرضي.
· شوقي عبد العزيز والمر.
· هلال الطيب عبداللـه …لمن تكون ماشي في شارع النيل وتذكر الطيب عبداللـه لمن (تنبسط).
· وتجر ليك نفس عميق.
· ومشيتك في الشارع تتغير.
· هلال العز.
· الشموخ والكبرياء والأنفة.
· اقفلوا الكوبري.
· قولوا عندكم (صيانة) – ولا ما عندكم صيانة….(ما في زول بيسألكم).
· شلعوه وقولوا دي (الجقور).
· جقوركم بتعملها.
· على كيفكم.
· بس أبعدوا لينا من (هلالنا) دا.
· الواحد فينا لمن الهلال ينتصر (ينقز) زي علامات التعجب في آخر السطر.
· ينطط براهو …ويتكيف في الدنيا دي بدون (قهوة).
· الموضوع ما بحتاج.
· بس خلوا لينا هلالنا دا.
· أبسطونا بيه.
· فرحونا.
· اقفلوا (الشارع) – اعملوه اتجاه واحد.
· ارجعوا تاني اعملوه اتجاهين.
· اقلبوه.
· غيروا الاسم.
· شيلوا من الشارع متر بي جاي ومتر بي جاي.
· ما في زول بيسألكم.
· اقلبوا (الشارع) مول تجاري.
· اغلقوا جنينة الحيوانات..اعملوها (فندق).
· شردوا (الزراف).
· والغزلان.
· وشاركوا الثعالب في فكرتها.
· بي طريقتكم.
· بس ما تقربوا على أبو الهل.
· خلوها لينا كدا.
· سكرنا ..وكهربتنا ..ومواصلاتنا الفاضية.
· صحتنا وعافيتنا..ومويتنا الباردة.
· هو عليكم اللـه فيها شنو الدنيا دي غير الصحة والعافية والهلال والموية الباردة.
· عاوزين تلحقونا في (عافيتنا).
· المخالفات المرورية طبقوها على أي زول بمشي (كداري) وما عندو عربية.
· لابس نضارة ..حرروا عليه مخالفة ..(تظليل).
· ما لابس نضارة ..حرروا عليه مخالفة …(ما عندو قزاز).
· اعملوا أي شيء.
· قفلوا جرش.
· رجعوها تاني.
· بس خلوا لينا الهلال.
· كلمناكم.
· شرحنا ليكم..القصة ما قصة (بيانات).
· الفول (السادة) بناكله زي (شية الجمر) البنشوفها من العيد للعيد – بقينا لمن نشم ريحتها نشك في (نخرتنا).
· بقينا كدا.
· وإلّا عدم إحساس.
· عدم إحساس وإلّا (الكبريتة) رايحة.
· الفول السادة عندنا زي (العسل).
· بدون (زيت).
· ما عندنا مشكلة.
· ملحة ما فيه.
· بنقبل بيه ..وبنمشي نغسل يدنا في (الماسورة) – نقيف ساعة في الحوض ..تقول ماكلين (سمك).
· قبلنا بيه.
· رغيفة زيادة ما في.
· نلوك الصبر.
· ونسكت.
· اعملوها ..ضيقوها …وكل يوم والتاني زيدوا المواصلات.
· ارفعوا التذاكر.
· خلوا المطر تغرقنا.
· بدون مطرة بنغرق.
· ما مشكلة.
· اتعودنا على كدا.
· لكن تعاقبوا (الهلال) – واللـه بعد كدا (فولكم) دا لو قلبتوا فيه (عقد الجلاد) ما في زول بمشي عليه.
· ضلنا وقف.
· قعدنا فيه ..بنتحول من ضل لي ضل.
· كل مرة الضل ماشي يبقى (قصيّر).
· والموية قاطعة.
· والكهربة مافي.
· وموظفة (النفايات) تقيف كل شهر في الباب ..عشان تشيل رسوم (النفايات).
· يشيلوا (الرسوم) وما بنشوف لينا (عربية).
· ساكتين.
· وما قاعدين نقول حاجة.
· لكن كمان تصل أنكم تدخلوا لينا في (كورتنا).
· الحكاية بتبقى ما مقبولة.
· اللبن تزيدوه (موية).
· ما مشكلة.
· الموية في (عضمها) ما نشوفها.
· ما مشكلة.
· شاي اللبن يبقى بدون (لبن).
· والقهوة تبقى بدون (بن).
· والعيشه بدون عيشه.
· ما مشكلة.
· لكن تحصل تصلوا (الهلال) – يبقى بينا وبيناتكم ..نحن عندنا شنو غير (الفرحة) دي يا ناس الاتحاد؟.
· يا عالم..
· يا أنتوا.
· زلابيتكم تبقى (قانون).
· طبيعي.
· لقيماتكم (لائحة).
· عادي عندكم.
· باسطتكم للصباح.
· بي طريقتكم.
· لكن تهبشوا لينا الهلال دا لا بينا لا بيناتكم – كل واحد يمشي ليه في طريق.
· ولا بنعرفكم.
· خليناها ليكم الكورة.
· الكورة البقت تلعب بـ (اللجان) دي لا كورة ولا حاجة.
· كورة هي ولّا ورثة أراضي.
· عليكم اللـه من اللـه خلقكم متين (اللجان) دي دخلت ليها في حاجة ما لجنتها.
· متين؟.
· وروني.
· احكوا لي الحصل.
· نحن من لجنة الاستئنافات.
· إلى لجنة رأب الصدع.
· من المفوضية إلى البرلمان.
· البرلمان وقت عمل ليه حاجة كوّن ليه (لجنة).
· تاني رجعونا للجان.
· نحن ناقصين (لجان).
· لجانكم دي ما شفنا منها غير (يبقى لحين السداد).
· وحرّاق الروح.
· وقومة النفس.
· هوامش

· قضية الهلال الآن وصلت (البرلمان).
· والبرلمان بقى هو( البأجل) المباريات.
· وهو البحدد العقوبات.
· وهو الذي يجتمع مع أشرف الكاردينال.
· يعني تاني ما في زول يقول لينا الرياضة ما عندها علاقة بـ (السياسة).
· كورتنا بقت كلها (سياسة).
· الجدعة بقت (ندوة سياسية).
· ضربة المرمى (تصريح سياسي).
· ضربة الجزاء (تعليق سياسي).
· كلها سياسة في سياسة في سياسة.
· ولسه.
· ما عارفين الحكاية ح تمشي وين؟.
· الليلة يوم آخر.
· نشوف البحصل.
· ويقرر الهلال.
· الهلال في الفوضى دي لا بلعب ولا حاجة.
· لو بقت بالصورة دي قفلوها أحسن.
· ولا تغشوا الناس.
· ما تتنازلوا.
· ما تلعبوا.
· ولا تتهاونوا في حق الهلال.
· ما تتراجعوا.
· وابقوا قدر الكلمة.
· وقدر الهلال.
· عمرو الهلال ما قاعد تجيه عوجة.
· كلموا مشواركم.
· وابقوا عشرة على هلالكم.
· وما تتراجعوا (شبر).
· وقت الجد جا.
· جمهور الهلال ساند الكاردينال ووقف معه.
· وهو معه في كل قراراته.
· والكاردينال لن يخذل هذه الأمة التى اجتمعت حوله.
· لو نزلنا (الرابعة) أحسن لينا.
· هي وينها الكورة في (الممتاز).
· مباريات الممتاز تحدد نتائجها لجنة الاستئنافات والمفوضية والبرلمان.
· أحسن لينا نلعب في الرابعة.
· أو جمدوا نشاط الهلال الرياضي.
· ضباط الاتحاد كلهم (نواب في البرلمان) بما في ذلك رئيس المفوضية أزهري وداعة اللـه ..راجيكم ليكم (أنصاف).
· عملتوا شنو يعني؟.
· الظلم الذي تعرض له الهلال من لجنة الاسئتنافات كمله البرلمان.
· ولسه.
· ما معروف الحكاية ح تودينا لي وين؟.
· أصبحنا على قناعة تامة أن كورة القدم في ظل هذه الأوضاع – غير ممكنة.
· مع ذلك ..مطلوب من الكاردينال أن يواصل في كل الملفات.
· في التسجيلات.
· وفي الجوهرة الزرقاء.
· وجزاء الكاردينال عند جمهور الهلال كبيراً.
· وإن شاء اللـه ما في عوجة.
· مية المية.
· المريخ منحوه كأس السودان.
· والمريخ منحوه الممتاز (لكن عندنا كلام).
· والمريخ ما عندو (جوهرة زرقاء).
· مع ذلك جمال الوالي فات.
· والمريخ لم يسجل غير النعسان.
· أنتوا الفريق دا بتشجعوه كيف؟.
· لماذا تم إبعاد الفريق عبد الرحمن سر الختم من مفاوضات البرلمان.
· عاوزين تخلونا على أزهري وداعة اللـه ومحمد الشيخ مدني.
· معقولة قضية رياضية تحلها (روضة الحاج).
· هو قالوا ليكم (شعر).
· يا جماعة.
· يا عالم.
· كدا ما بتبقى.
· لكن إن شاء اللـه نصر الهلال قريب.
· والصبح قرّب.
· ……….
· عاجل : قرعة الممتاز القادمة اعملوها في البرلمان.