زواج سوداناس

فلا بد أن يستجيب القدر


شارك الموضوع :

الناس في البلد دي بتعشوا بي (قون) بشه ..وبفطروا تاني يوم بي (لو بهمسة)

يا اسامة عطا المنان عليك اللـه – وامانة فيك تاني لو قابلتك حكاية زي دي اقيف فيها

يا سمير فضل ..(قراراتكم) دي لو عملتوها في (طابونة)…رغيفكم كان بيحرق

الجوهرة الزرقاء دي ..(طوبة) ساهمت بيها فيها ..عشان تطلعوا توقفوا لينا الكاردينال (سنتين)

وانا ذاتي متلفح مضرب عيونك (شوق)…
سكتنا ما دربك ..
اسمعنا …ارحل روق…
اضرب جداولنا …احرق حشا المحروق…
يوم الهلال يرجع ..فرحتنا ما بتحوق…
زعلان وما راضي…
افراحنا ما في السوق…
سكرنا في الفنجان…قون (والي) ما مسروق…
قعدتنا في الحلة …يصبح (هلالك) فوق…
داك الوليد الحر …في عيونا يبدأ الذوق..
يعرض مع (تنقا) ..يقفز يفك (الطوق)…
………..
قصتنا ما كانت (نقاط) …ولا بطولة…(لو شفتوا قون بشه في رمزي صالح ما بتقولوا كلامكم دا).
لو شفتوا مهند الطاهر من اي حتة جاب ليه قون في الحضري …(الحضري بقى زي صحن السلطة).
اي ملاح بتمشي عليه ..بتغشى (السلطة) تشيل ليك منها حاجة.
لو شفتوا نزار حامد يوم طلع (رحلة صيد) وجاب ليه قون في (سموحة)…المريخاب (تلفوناتهم) كلها طلعت من (الشبكة).
نزار حامد (نفس الزول) – عمل ليه عملية في علاءالدين يوسف …علاءالدين كل ما يتذكر الموقف دا بيشكي من الركب.
وبيجري صوف على (المزيرة).
الحاجات دي كلها ما قصتنا.
ما موضوعنا.
ولا عندنا معاها شغلة.
نحن بنلعب دائما على (المواقف).
القون عندنا هو (الموقف الصاح).
بعد داك ..اي حاجة عاوزة تبقى التبقي.
بنسجل في التاريخ (مواقفنا) ..وما بنلعب من اجل نفسنا فقط ..بنلعب من اجل (عدالة المنافسة).
ممتاز بدون (لوائح)…بقى زي الفول بالكسرة.
زي عصير الليمون البدون ليمون.
يا متعصم جعفر ..طريقتك دي ممكن تنفع مع ادارة مستشفى خاص.
ممكن تنفع في (صيدلية).
عنبر جراحة.
باطنية.
اصلو ما بنقول فيك كلمة.
لكن نفس الشيء..البانلسين والمسكن والمخدر ما بتنفع تعملها لينا في (الكورة).
يا مجدي شمس الدين…ممكن طريقتك دي …تنفع في استرداد (قطعة ارض).
في (جمعية عمومية).
لوحة.
شعار مرفوع.
كباية شاي.
صحن فول.
ممكن.
كلها بنقبلها منك ..لكن نفس الشيء تجي تعملها لينا في (الكورة) بيطلعوا ليكم ناس الهلال.
بقولوا ليكم : لا.
ما في كلام زي دا.
الشفوت ديل ..شغل زي دا ما بنفعو معاهو.
ما بقبلوه ليكم.
العفاريت ديل بقبلوا اي حاجة ..إلّا الظلم.
الظلم والحقارة.
والشاي البارد.
يا اسامة عطا المنان …الموضوع ما موضوع لو الزمن رجع بينا تاني للوراء بعمل نفس الشيء العملتو دا.
اوعك تاني تعمل كدا.
انت نسفت (الموسم).
انتهيت لنا من حاجة اسمها (الممتاز).
لا لجنة الاجاويد.
ولا المفوضية.
لا البرلمان.
ولا رأب الصدع بيعرفوا يحلوها.
يا اسامة عطا المنان عليك اللـه – وامانة فيك تاني لو قابلتك حكاية زي دي اقيف فيها.
بكري المدينة دا تانى لو قابلك في (المدينة) المنورة ما تمشي عليه.
غلطة صغيرة.
قرار عابر كدا …بتفتكرو ما بعمل اي حاجة…بدخل في بند (المجاملات).
انت بتفتكرو بصلح ليكم العلاقات.
وبخدم المريخ.
لكن (القرار) دا يمكن الايام تلف وتدور ويجي ينسف (المنافسة) كلها.
اوعك تاني تعمل كدا.
يا محمد سيد احمد …الموضوع ما موضوع (تصريحات).
ولا صوت عالي.
ولا هو ظهور في التلفزيون او في الاذاعات.
الموضوع اكبر من كدا.
ناس الهلال (لحمهم) مر.
حاجات زي دي ما بفوتوها.
تاني (لقيمتكم) دي قبل ما تعملوها …شوفوا ليها (مخرج).
قال شنو؟.
قال اجتمعت اللجنة المنظمة وقررت ايقاف اشرف الكاردينال سنتين.
سنتين !!…انتوا الكاردينال دا جبتوه انتوا..عشان توقفوه.
الجوهرة الزرقاء دي ..(طوبة) ساهمت بيها فيها ..عشان تطلعوا توقفوا لينا الكاردينال (سنتين).
الكاردينال ما جبتوه انتوا.
ولا جابتوا السلطة.
الكاردنيال جابتو (الجمعية العمومية للهلال).
الجمعية العمومية وحدها البتقدر تشيل الكاردينال.
بعدين القال ليكم الهلال دا فريق كورة قدم بس منو؟..عشان توقفوه لينا في (زلابية).
يعني على قول (نزيه) لو عملها ليكم (باسطة) كان وقفتوه مدى الحياة.
زول بيني في (الجوهرة الزرقاء) من حر ماله.
وشغال في التسجيلات.
الرديف ما قصر معاهو.
تجوا توقفوه لينا يا مجدي شمس الدين.
عاوزين توقفو (الجوهرة الزرقاء).
وبعد دا كلو …بعد ايقاف الكاردينال عاوزين يشيلوا كاس السودان ويمنحوه المريخ.
ويا ريت لو وقفوا على كدا.
بعد كاس السودان ..عاوزين يشيلوا (الممتاز) ويمنحوه المريخ.
فريق بتأخر عن المتصدر بـ (6) نقاط – عاوزين يمنحوه البطولة.
فريق خسر (5) مرات في بطولة الممتاز ..عاوز يشيل الكاس.
والفريق الذي لم يخسر…ينزلوه دوري الدرجة الاولى.
دا يبقى كلام.
دا كلام بدخل ليه في رأس زول.
يا سمير فضل ..(قراراتكم) دي لو عملتوها في (طابونة)…رغيفكم كان بيحرق.
يا سمير فضل البلد دي فيها رجال بقولوا لا.
فيها ناس ما برضوا (الحقارة).
معقولة بس تنزلوا الامل من الممتاز عشان غلب المريخ 2 / صفر.
يعني تاني ما في فريق يغلب المريخ.
قلبتوا قانون المنافسة.
الفريق الذي يخسر هو الذي يفوز بالبطولة.
والفريق الذي يفوز هو الذي ينزل من الممتاز.
يا سمير فضل …البلد ما ناقصة (ازمات).
البلد ما ناقصة (مشاكل)..عشان تأزومها بالشكل دا.
هو نحن ناقصين.
الناس في البلد دي بتعشوا بي (قون) بشه ..وبفطروا تاني يوم بي (لو بهمسة).
الناس في البلد دي ما عاوزين اكتر من (عمليات) التشريح التى يقوم بها في ركب علاءالدين يوسف.
عاوزين تحرمونا من الحاجات دي.
ليه؟.
وعشان شنو؟.
نقول لاولاد المدارس شنو؟.
نقول ليهم دا اسامة عطا المنان.
سمير فضل.
الفاتح خضر.
نودي وشنا وين من (الامل).
النيل دا بيجري منذ قديم السنوات.
الالف السنين.
ما حصل طنطن.
ولا قال حاجة.
ما اتململ يوم.
مالكم عليه؟.
عاوزين تجيبوا لينا مع (ارتفاع) فيضانه (هبوط).
مالكم معانا انتوا؟.
لو القصة كانت قصة (بطولة)..كنا قلنا ليكم البطولة مبروكة للمريخ.
اصلو ما فيها مشكلة.
لو القصة بقت على الـ (6) نقاط ..كنا قلنا ليكم ما بيناتنا.
لكن الموضوع اكبر من كدا.
الموضوع فيه تعدي واضح.
وظلم.
واستغفال.
انتوا عاوزين تضيعوا (الممتاز) كلو.
عاوزين تنتهوا من المنافسة.
عشان كدا اعترضنا.
عشان كدا قلنا لا.
البطولة يشيلها المريخ.
او الخرطوم الوطني.
او النسور …ما مشكلة.
المشكلة في البتعملوا فيه دا.
تستفزوا الناس وتظلموا الهلالاب ..وتتعدوا على حقوق الامل.
الموضوع هنا ببقى مرفوض.
نحن كنا واثقين من انها سوف تصبح.
وان الحق سوف يبين.
وان امة الهلال اذا اجتمعت على امر سوف تحقق مرادها.
الناس ديل ما قاعدين يبيعوا كلام.
الناس ديل ما قاعدين يتراجعوا.
ولا بغشوا في زول.
قرار الانحساب قبل ما يكون قرار الكاردينال ..كان قرار اي مشجع هلالي.
ديل ما بخوفهم بالدرجة الاولى.
جمهور الهلال كان مستعد مع الكاردينال ينزل للدرجة الخامسة.
اصلو ما عندو مشكلة.
لو بطلنا الكورة.
وقفلنا النادي ما عندنا مشكلة.
هي الكورة شن طعمها لو نتائج مبارياته بحددها سمير فضل؟.
شن طعمها لو بقى البطولة بحسمها اسامة عطا المنان.
الموضوع ما كدا.
الحقارة ما حلوة.
ما بتبتلع لينا.
ولا بنقبل بيها.
ولا بنعود بيها (شفعنا).
يقوموا يتنفطوا منها زي (النمل).
ديل ناس الهلال.
اللـه نصرهم.
اللـه خلاهم.
وانعم علينا بـ (الهلال).
…………
ملحوظة : واستجاب القدر.
هوامش

الليلة اعضاء الاتحاد في اجتماعهم الساعة اتناشر وخمسة دقائق ح يقولوا شنو؟.
اجتماعهم هم اتناشر ..الخمسة دقائق دي زيادة مني ساكت.
وينها فيفتكم.
عالم ما بتجي إلّا بالطريقة دي.
الهلال انتصر لأن موقفه (قانوني).
لأنه موقفه صاح.
فرحنا للميرغني.
يستاهل ان يبقى الميرغني في الممتاز بموقفه.
يا ناس الرابطة يا ناس هلال كادوقلي لو بارتوا لي ناس المريخ بتلعبوا في التانية.
المواقف تكسب.
عاوزين نشوف تصريحات مجدي.
صفحة اسامة عطا المنان.
شوفوا لي محمد سيد أحمد وين؟.
الهلال نزل التانية.
اعيدوا ليه تصريحاته.
رجعوا ليه صوره.
السلطة اتخذت القرار الصاح.
رغم ان الهلال فقد بطولته.
لكن المهم ان ينتصر الهلال لموقفه.
هذا هو الاهم.
منتظرين القرار من الاتحاد العام.
اعلنوه بي اسمكم.
عاوزين نسمع صوتكم.
عاوزين نشوف صوركم.
بتقولوا شنو؟.
يا الكاردينال بعد هذه الانتصارات ..افتكر ممكن تشوف (راجي).
مصعب عمر.
اي زول.
خلي الجماعة يدفعوا ليهم (5) مليار جنيه تاني.
شوف لينا (كوفي).
لاعب مريخ كوستي الوك نتمنى ان يكمل الهلال الاتفاق معه.
اللاعب جيد وموهوب وسوف ينفع الهلال.
اللاعب الوطني اهم من المحترف.
يا كاردينال احسم موضوع الوك.
خلى الافراح تستمر.
وفي انتظار المفاجأة.
بعد كدا المفاجأة سوف يكون عندها طعم تاني.
………….
عاجل : يا مجدي سمعنا صوتك!!!!!!!.

شارك الموضوع :

تعليقات الفيسبوك

تعليقات


1 التعليقات

      1. 1
        بله

        نجح إتحاد كرة القدم السوداني، وبذكاء شديد، في تجنيب مجلس إدارته ولجانه المسساعددة حالة الصدام المباشر والمساءلة من قبل مؤسسات الدولة السودانية وحمى نفسه برمي الكرة في ملعب الجمعية “برلمان كرة القدم”.

        وذلك فيما يتعلق بجزئية محدودة في أزمة الموسم الكروي بالسودان والمتمثلة بإنسحاب الهلال والأمل من بطولة الدووري الممتاز ومنافسات رسمية أخرى ينظمها إتحادد الكرة السوداني.

        ولم يستغرق إجتماع مجلس إدارة إتحاد الكرة السوداني الذي إنعقد نهار الأربعاء بمقر الإتحاد سوي أقل من ساعة، خرج بقرارات يفهم منها ثقته بنفسه في مواجهة الأزمة، حيث قرر مجلس الإدارة أولا قيام جمعية عمومية طارئة للنظر في بند واحد فقط هو “طلب المفوضية الرياضية للإتحاد بعقد جمعية عمومية طارئة للنظر في قانونية وصحة تكوين لجنة الإستئنافات”.

        ثانيا إستمرار النشاط الكروي بمعنى إكمال ما تبقى من مباريات الموسم والتي تتضمن مباراة الملحق بين الأمل النيل شندي، ومباراة ختام الممتاز بين المريخ والهلال”المنسحب مقدما” يوم 20 نوفمبر الحالي.

        تمسك إتحاد الكرة بالقرارات التي صدرت من قبل عن طريق للجانه المتحصصة بإعتبارها لجان تملك السلطة واللوائح التي تمنحها حق إصدار القرار ورفض مجلس إتحاد الكرة السوداني بالتالي المساس بقرارات لجانه، كما أشاد مجلس وبدهاء شديد بتدخل جهات حكومية في الأزمة مثل وزارة الشباب الرياضة والبرلمان السوداني وإعتبر تدخلها إهتماما، لأن كرة اقم لعبة إجتماعية في المقام الأول.

        وكشفت قرارات مجلس إتحاد الكرة السوداني عن خسارة الهلال لمعركته مبدئيا وكذلك الأمل لأن إتحاد الكرة يسيطر على الجمعية العمومية وسينجح في حسم الأمر لمصلحته في دقائق معدودة خاصة فيما يتعلق بنوعية التداول والنقاش.
        ومزيد من البيرة يا كرداكير.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *