زواج سوداناس

المكشّن بلا بصل



شارك الموضوع :

من الأمس:
نهار صيف قائظ.. بائع البصل راكب حمارو.. ويكورك في الشارع: “بصل.. بصل.. بصل”.. زهجان وخلقو ضايقة وما لاقي اليشتري!!!
مجدي “يا قول امي”.. كان شافع شليق.. لقب بــــ”يا قول امي” لأنو أي حاجة يضرب بها مثل يقول: “يا قول أمي”.. وكانت السيدة والدته مرجعيته في كل أمور الحياة.. في المدرسة لو سألوه عن كروية الأرض يغالط الأستاذ ويقول لو: “لا كروية لا شيتين.. لو كروية ومدردمة زي ما بتقولو ونحن راكبين فيها يا قول امي كان اتكشحنا زماااااانكتية”.. ويُجلد ولا يحيد قيد أنملة عن رأي الوالدة.. كان صاحب مبادئ…!!!!!
سيد البصل يكورك: “بصل ..بصل.. بصل”.. ومجدي يا قول امي.. ماشي وراهو ويكد في دومة ويقول ليهو: “ما تصل ما لنا ومالك؟”.. زهج سيد البصل وترجل عن حمارو ودقّ مجدي.. ووراهو المكشن بلا بصل ..
*التحية الخالصة للسيد البصل.. حيث أصبح ينافس الدولار في الارتفاع!!!!
بصلة إطناشر صفحة = الجوز واحد جنيه
بصلة أربعة وعشرين صفحة = اتنين جنيه
بصلتين ستطاشر صفحة مقرونات مع بعض = واحد جنيه ونص!!!!!
* (المكشن بلا بصل) جملة تطلق حين زلة ودقة وكسر.. أوريك المكشن بلا بصل… يعني يا ويلك وسواد ليلك.. تداولنا هذه الجملة التهديدية حتى أصبحنا غاب قوسين أو أدنى من أن نكشن حللنا وملحاتنا بلا بصل!!
كل عام نفس الأزمة.. بصل مافي.. سعرو طار السما.. ما بتهبش.. البصل بقى أغلى من التفاح العواليق.. شوية يطمننونا خلاص بصل الجزيرة قرب يمرق.. بصل الشمالية مرق.. بصل كسلا ماشي عليكم فوق الدرب.. شيلو الصبر.. مشو أموركم بأي حاجة.. حتى اصبح البصل ينافس علي مرتبة نجم الموسم بعد السيد أبو القنفد.. والذي كان له القدح المعلى “ابو القنفد” هذا العام 2015 واشتهر شهرة يحلم بها مطرب مغمور يعافر ويباصر ليهو سنين من أجل الشهرة والمال ويملا أصابعيهو ختم ورقبتو سلاسل.. ويقابلنا في القنوات يضحّك ويتكشم بلا سبب.. اشتهر أبو القنفد حتى اصبح يغير منه مطربونا.. وكل واحد يتمنى أن يصبح عليهو صباح ويلقى نفسو اتقلب أبو القنفد!!!!.. ويشتهر ويغير اسمو الي المطرب (قنفد الخامسة).. ويتغا ويتفلهم ويسلم عليك بي ضنبو..
نفس الأزمات تتكرر كل سنة.. من الاستقلال لي يوم الليلة.. الازمات السياسية.. الأزمات الاقتصادية.. أزمات في أزمات.. يعني البصل دا السنة الفاتت برضو اتفلهم وادسا.. وعمل فينا عمليتو الجبانة دي.. ما فكر زول واحد انو الحكاية دي ما تتكرر تاني ويخت البصل في علبو!!! ما عارف نحن مالنا يا جماعة؟ ان قلنا نحن ناس بلدا؟ ما بلدا.. ان قلنا ناس زاهدين في الدنيا دي وناس آخرة.. تمرق الشارع تلقى الناس تتجارى وتكابس في الدنيا وكل زول داير يغنا.. وكل زول يلم في التاني يغشو ويجهجهو ويخلي خشمو ملح ملح.. وهو رافع راية من أجل الدنيا قد عملنا!!!!!
خايف الدنيا تقبل علينا جت غني علي فقير وتورينا المكشن بلا بصل!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *