زواج سوداناس

سعادتنا


شارك الموضوع :

كنت مفتكرة السعادة.. بتبقى في المال الوفير
أو نجاح باهر تحقق.. أو سفر أصبح مصير
بس لقيت إنو السعادة.. لو تعيش في حب كبير
وتلقى زول يصبح ملاذك ويبقى في الحوبات نصير
تبقى إنت شريك حياتو.. ويبقى على قلبك أمير
وفي دجى الهم المستف.. يبقى هو البدر المنير
همسو زي صوت الكمنجة.. وريقو زي طعم العصير
طيفو حاضر في الزوايا.. وفي الليالي يكون سمير
ولو يغيب يوم عن حياتنا.. يبقى جد موضوع خطير
السعادة الصادقة فعلاً.. بتبقى بي إنسان جدير
تعترينا عليهو لهفة.. ونذرف الدمع الغزير
أصلو ما الحب الخرافي.. بيبدا بالوجع الصغير
*****
ويا متيم أعرف انو.. ما في ريدة بلا عذاب
وبين مشاعرك والسعادة.. ألف حيطة وألف باب
وغالبا تلقى الخيانة.. واردة من أقرب قراب
الحبايب ما بدومو.. وبرضو ما بدومو الصحاب
وأوعَ تتغرا بجلالك.. مهما تكبر في المودة.. برضو آخرك كوم تراب
***
السعيد فى الدنيا فعلا.. يلقى زول يحفظ غيابو
ولو حقيقة الحظ تبسم.. يبقى من إخلاص صحابو
وخلي بالك من قليبك.. وأوعا تجري ورا سرابو
المحبة كتير بتوجع.. وأحلى ما في الحب عذابو
ولو عرفتَ الشوق ونارو.. تاني أصلا ما بتهابو
وتلقى أعذار للبريدك.. وتحتمل جورو وعتابو
ألغرام في أصلو حاوي.. وحظ قليبك في جرابو
****
ونحن هسه خلاص عرفنا.. قصة الحب الحقيقي
إيدي في إيدك مصيرها.. وسكتك صبحت طريقي
والجميل في ريدنا إنك.. كنت في الأول صديقي
وفاهم أفكاري وظروفي.. ونوع برودي ولون حريقي
التعايش فينا مبدأ.. وانت في الأحلام رفيقي
الله يحفظ لينا ريدنا.. وبيك يدوم زهري ورحيقي.
تلويح:
أنا بيك سعادتي مؤكدة.

شارك الموضوع :

تعليقات الفيسبوك

تعليقات


1 التعليقات

      1. 1
        haidarabturkab

        يامن محاسنك بي قلوب العاشقين مستفردة
        خليتني أشكو من الغرام وأقول حقائق مفردة

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *