محمد عبد الماجد

الحصول على توقيع (كريم الحسن) أسهل من الحصول على (أنبوبة غاز)


سولي شريف حايم حوامة شديدة..الزول دا ما فضل ليه في الدوري الممتاز إلّا يشتغل تبديل الملابس بالعدة ..عمل أي حاجة
قالوا ليك أمس الجماعة منتظرين تحويل الرصيد للساعة 6 عشان يتموا
لـ (كريم الحسن) قروشه…. لاعب ممكن بـ نوت 4 يتسجل …ما عندو أي مشكلة
كلتشي دا بتوقعو لي سنة 2040 يكون بلعب كورة في البلد..وبعد كدا ممكن يعمل ليه (قدرة) فول في مربع 9 في شندي
ممكن قبل السيستم ما يقفل ..يشوف ليكم أسامة عطا المنان (سيستم) جانبي كدا يخارجكم بيه
وأنا بتابع في أخبار التسجيلات أمس….الولد كل مرة يجيك طالع من جوه – يقول ليك : (الغاز قطع).
بقينا نلخبط بين الغاز والمحترفين الأجانب.
المريخاب المحترف الأجنبي بقى عندهم زي (أنبوبة الغاز)…ندرة شديدة..وأزمة مبالغ فيها.
أزمة جد.
قالوا ليك أمس عادل أبو جريشة قرب يدخل الاتحاد العام شايل ليه (أنبوبة غاز) قبل السيستم يقفل وقت فشلوا في ملف الأجانب.
لو جبت ليك أنبوبة غاز يا أبو جريشة ..جمهور المريخ دا بهتف ليك الموسم كله.
بنسوا حاجة اسمها جمال الوالي.
هسع كريم الحسن دا لو جبتوا ليكم بدله (أنبوبة غاز) ما كان أفضل ليكم من الموضوع دا.
لا إبداء رغبة.
ولا انتظار الكرت.
ولا سيستم.
لكن الأيامات دي (أنبوبة الغاز) ذاتها عاوزه ليها (إبداء رغبة).
ولو ما عندكم (وكيل) قوي ما بتحصل عليها.
بشوف في الأندية التى بدأت تتحرك في اللحظات الأخيرة….بيسابقوا في الزمن.
التسجيلات ليها شهر …أنتوا يا دوب بتتحركوا.
كنت بتخيل ناس المريخ يلحقوا (السيستم) بـ (صحن زلابية).
يعني ممكن الواحد فيهم قبل (السيستم) ما يقفل يجي شايل ليه (صحن زلابية) – عشان يلحق السوق.
وممكن قبل السيستم ما يقفل ..يشوف ليكم أسامة عطا المنان (سيستم) جانبي كدا يخارجكم بيه.
ما تقولوا لي السيستم مربوط بالفيفا.
يعني (الفيفا) من صلاحها.
الفيفا ذاتها بتاعة (زلابية).
الاتحاد الدولي طلع اتحاد (لقيمات).
عودة عادل أبو جريشة وظهوره في التسجيلات بتعيد لينا أيام المريخ كان بيحضر مجموعة من لاعبي روندا يسجلهم بالكوم.
أي لاعب عندو أربع صور بدخلوه غرفة التسجيلات.
التسجيل في المريخ زي (اللوتري).
تجيب ليك صورة واضحة بس…وتنتظر النتيجة.
العشرة ينجح فيهم واحد.
أبو جريشة دا لو دخلتوه في المريخ من الزمن داك – البلد دي الجالية الرواندية فيها كانت ح تكون أكبر من الجالية الأثيوبية.
هسع المريخ عاد إلى نفس الطريقة التى كانت متبعة في المريخ قبل أكثر من (15) سنة.
أبو جريشة رجع تاني يسجل في المريخ.
ويظهر في الجرايد.
ويصرح.
ويتصور كمان.
أمس المريخ لحق (السيستم) وشاف ليه لاعب تتوفر فيه مواصفات (اليوم الأخير).
لاعب ما يكون محتاج لمفاوضات.
ولا عاوز ليه قروش كتيرة.
وما عندو نادي.
وكورتو (قديمة).
وإنجليزيه واقع في الواطة – عشان ناس أبو جريشة ياخدوا راحتهم معاه في الكلام.
المواصفات دي كلها أتوفرت في (كريم الحسن).
دا اللاعب الذي يحتاجه المريخ في هذا الوقت.
أول حاجة لاعب متقدم في السن ..ما عاوز ليه قروش كتيرة.
أمس عند إبداء الرغبة قالوا ليك بلكزو فيه.
ما شايف الأورنيك.
تاني حاجة ما عندو نادي.
قاعد ساكت.
مطلق السراح.
واللاعب من يقولوا ليك لاعب مطلق السراح ..أقنع من خير فيه.
أعرف ما فيه فائدة.
ولا منو رجاء.
ثالث حاجة بي 5 آلاف دولار ممكن يتسجل.
ناس عبد التام وأبو جريشة الـ (5) آلاف دولار عشان يلموها عاوزين ليهم سنة.
نفسهم بتقطع.
قالوا ليك أمس الجماعة منتظرين تحويل الرصيد للساعة 6 عشان يتموا لـ (كريم الحسن) قروشه.
وكريم الحسن لاعب ممكن بـ نوت 4 يتسجل …ما عندو أي مشكلة.
لو لقى ليه (سكن) ساكت بوقع – ما عندو مشكلة.
أنتوا ما شفتوا (كلتشي) قعد في البلد دي وعمّر فيها أكتر من أولادنا.
لعب في الهلال في مجده.
لمن كبر شوية مشى المريخ.
لمن فكت منو مشى أهلي شندي.
الزول دا مرقها للصين وجاء راجع.
مشى مصر.
وما لقى ناس يستحملوه غيرنا.
كلتشي دا بتوقعو لي سنة 2040 يكون بلعب كورة في البلد.
وبعد كدا ممكن يعمل ليه (قدرة) فول في مربع 9 في شندي.
ما عندو أي مشكلة.
البلد دي ما بفوت منها تاني.
موسى عليو برضو عايش في نفس الدور.
الزول دا بلعب كورة قبل صلاح إدريس ما يظهر في الساحة.
وفي كل فترة تسجيلات بمسع لي خبر عن موسى عليو.
أصلو ما في فترة تسجيلات بطلع منها ساكت.
مره يسجلوه.
ومره يعيروه.
كذلك من الناس الولفو في البلد دي – وبقوا يمشوا المحاكم يشتكوا ويطالبه بحقهم..اللاعب سولي شريف.
سولي شريف دا لعب في أي فريق.
ما خلى ليه فريق في الممتاز.
من الهلال للأهلي شندي للأمل عطبرة للخرطوم الوطني.
للأهلي الخرطوم.
التوحيد بس.
حدباي.
حايم البلد كلها.
ما خلى فريق في الممتاز.
الزول دا وصل لغاية (الأمير).
يعني بقى يبدأ ليك مع الفريق من (التأهيلي).
حايم حوامة شديدة.
الزول دا ما فضل ليه في الدوري الممتاز إلّا يشتغل تبديل الملابس بالعدة ..عمل أي حاجة.
كريم الحسن الغاني يتخيل لي عايش في نفس الدور.
زول بسابقوا بيه قفلة السيستم.
الزول دا بيطلع رزقو بالطريقة دي.
يدخل على رهان اللحظات الأخيرة.
بنتظر السيستم يقرب يقفل ويظهر ليك في الزقاق.
في وكلاء اتخصصوا في اللحظات دي.
كريم الحسن لاعب دخل كشف المريخ على طريقة ألحق السوق.
لاعب حايم ساكت في المنطقة العربية.
لم يحقق أي نجاح مع أي فريق لعب فيه.
من هذا المنطلق ..بتوقع الموسم القادم الريح علي يكون أساسي في المريخ.
يكون النجم الأول في المريخ.
لاعب عاطل ومتقدم في السن.
وما عندو أي مشكلة في السيستم.
هسع عليكم اللـه كريم الحسن دا عاوز ليه إبداء رغبة.
رغبة شنو؟.
الزول دا فقد رغبته في اللعب زمان.
جايبنو في السن دا تعملوا بيه شنو؟.
كريم الحسن دا لو جابوا الهلال كنا قلنا عاوز يقفل بيه (الجوهرة الزرقاء).
لكن أنتوا يا المريخاب عاوزين بيه شنو؟.
زول لا عملوا ليه كشف طبي.
لا اختبارات.
لا حددوا ليه مرتب.
لا فاوضوه.
سجلوه طوالي كدا.
زي ما قلت ليكم الواحد لو عاوز ليه (أنبوبة غاز) بتعب أكتر من التعب الذي تعبتوه لكريم الحسن.
دا زول ح يتكسر ليكم في الاستراحة ساكت.
يمين كريم الحسن دا تمشوا بيه عطبرة من (المحمية) تاخدوا خمسة.
نوع دا قالوا ليك تصريجتو قون.
وقالوا ليك الزول دا تحت أضواء الكشافات ما بقدر يلعب.
شوفو كعب.
زي البونسي نجاد.
كريم الحسن دا لو قعدتوا معاهو ..واقنعتوه يمسك ليكم مكانة غارزيتو بكون أحسن ليكم.
نوع ديل (ولاء الدين) بحسموهم في التسخينة.
مالكم ومال التلاتل دي.
جايبين ليكم محترف ….بدرجة (خبير).
…………
ملحوظة : ناس شداد اعتزلوا بدري ساكت.
هوامش
الأسبوع الأخير في التسجيلات الاتحاد عمله عشان المريخ.
مفروض أي نادي ما يسجل ليه لاعب.
الأسبوع دا مخصص للمريخ.
عشان يحسموا موضوع عطرون.
معقولة موضوع عطرون دا من أكتوبر ما قادرين تحسموه.
هسع خالد النعسان دا عاوز يلعب ليكم كورة وإلّا عاوز يمسك ليكم التلفون.
لجنة الاستئنافات انتهت من كورة المريخ.
بقى الاعتماد على عطرون والنعسان وكريم الحسن.
أحسن ليكم ركزوا مع لجنة الاستئنافات.
تاني كورة في الملعب ما بتحسموها.
تسجيلاتكم دي تسجيلات (مكاتب) ساكت.
أصلو ما كورة ميدان.
ولا نغشكم.
كريم الحسن ممكن يمسك ليكم (الدفتر).
وعطرون الحضور.
محترف يجيبوا عادل أبو جريشة بتفتكروا فيه فايدة.
ناس المريخ طبعاً ممكن يقولوا ليك اللاعب جابوه من نادي ليبرتي إعارة.
إعارة شنو؟.
الإعارة في (البطيخ) خلوها.
أنتوا بتخدعوا في منو؟.
بتغشوا مين؟.
………..
عاجل : غارزيتو عرفها ..اتخارج من بدري.


‫2 تعليقات

  1. عمود كامل لهبنقه ولم يفتح الله عليه بكلمه عن الهلال هذا هو هبنقة الشعير بمحمد عبدالماجد