بابكر سلك

هي وينا الشخصية؟!


> ايها الناس
> قلناها مرارا
> مجتمع المريخ يتعامل مع انتخابات الاتحادات ولجان الاتحادات باهمال كبير
> حتي ولو رشحنا شخصيه مريخيه خبيره لتلك المناصب
> لا لشيء سوى ان نضمن ان ياخد كل انسان حقه
> وان نوقف قصة يخطئ ولا يظلم دي بالذات
> وان نوقف حكاية الحكم اليوغندي نسي وشال التقرير معاهو يوغندا
> والاشياء المشابهه
> لي ده كلو نرشح زول يعتذر
> والبعتذر ده اول زول بهيج ويتنفض لما تحصل حاجه من داخل تلك الاتحادات
> المهم
> الاهمال استمر
> واستراتيجية الاهله التي وضعها الطيب عبد الله تؤتي اكلها سنويا
> الا ان اصبحت لجنة يخطئ ولا يظلم تخطئ وما وفي اتجاه واحد
> كل اخطائها في حق كل الناس الا ناس معينين
> وده سببو نوم مجتمع المريخ في العسل
> ايها الناس
> بالطريقه دي بنفقد شخصية المريخ
> بنبقي ناس ساي
> وبغشونا بي قصة انت الكبير
> ومعليش
> وما فيها شيء
> وتاني ما بنخليهو يعمل كده
> المهم
> حتي في تعيين مجلس التسير
> كانت شخصيتنا ضعيفه
> الامر الذي جعل الاخ اليسع ما يكترث كتير
> وحتى في الاضافه
> لا ادري لماذا اصر الوزير علي تعيين سوداكال عضو ساي
> في حين ان مدني الحارث كان مصراً حسب علمنا علي تولي سوداكال منصب نائب الرئيس
> واهل المريخ يقبلوا باي شيء
> وها هم اهل المريخ يفشلون في دعم لجنة التسيير
> قروش عطرون والوك ما قادرين يساهموا فيها
> في حين ان آدم كان سيغنيهم عن الجرسه دي
> ولكن اهل المريخ
> ولانهم دائماً يبدون بتلك الشخصيه الضعيفه
> كان القرار الوزاري على هواهو
> ايها الناس
> سمعنا عن تمنع بكري بشير
> قالوا رافع القزاز ومعلي سعرو
> دحين بكري ده موش كان لاعب يوم ادينا هلال الابيض خمسة؟
> يبقي لاعب عادي جداً
> الكبير كبير يا بكري
> انت ما الكبير
> المريخ الكبير
> والرأي عندي انو نحنا زاتنا نرفع القزاز
> اللاعبون في البلد دي مستوياتهم متقاربه جداً
> بس البجي القمه منهم بكون محظوظ
> ما عشان مستواهو افضل من غيرو
> لا ترفع قزاز يا بكري
> ولا تظلل بدون تصديق
> اربعميه زاتها كتيره
> المهم
> حقو نعمل علي اظهار شخصيتنا الحقيقيه القويه
> كفانا مسكنه يا ناس
> اها
> قال ليك واحد ود ميكي
> التلاته تسعات قابلتو تلاته صباحا
> داقي السيستم والتي شيرت
> كابي الجل
> يتراقش زي فستان السهره
> جماعة التلاته تسعات وقفوهو
> بطاقتك
> قال ليهم بطاقة شنو يا جنابو؟؟
> قالوا ليهو بطاقة شخصيه
> صنقع ونقر وقال ليهم
> هي وينا الشخصيه الدايره ليها بطاقه
> ايها الناس
> حقو نمرق الشخصيه القويه
> ونطلع البطاقه القوميه
> ونقدل حمرة عين كده
> خلاف كده بنبقي زي صاحبنا ابو سيستم داك
> ايها الناس
> اذا اتبع مجلس التسيير الفكر
> فإنه سينجح في وضع اسلوب حكم المريخ
> يختوا لبنة كيف نحكم المريخ
> وبعدها لن يهمنا من يحكم المريخ
> اذا عملوا دي يبقي سطروا اسماءهم باحرف من نور على ذاكرة التاريخ
> المهم
> خرج المنتخب من سيكافا
> وكسب اطهر وابراهومة
> وحقو بعد ده نهتم بالمنتخب من اعلى المستويات وانت نازل
> الخامات علي شاكلة ابراهومه واطهر كتيره
> محتاجين استقرار واجهزه فنيه خبيره
> واعداد ممتاز وتجارب وديه دوليه كتيره
> عشان نعلن عن ميلاد المنتخب البشرفنا
> المهم
> كان نرضي كان نابي
> رفع سقف اسعار اللاعبين كان سالبا على الكرة وعلى الانديه
> الواقع اعاد الامور نحو نصابها
> وسعر الدولار خلانا نفكر في السنيه والمواهب المحليه البلديه
> وفي اطعم من البلديه !!!!!
> منقة جنوب افريقيا كان طارت السما
> ما زي منقتنا المحليه
> قلب التور والسمكه والتيمور
> والهنديه مجازاً السودانية منشأً
> منقتنا
> بقليل من الاهتمام بتبقي عالمية وبنصدرها
> اسي ما شفتو المنقه السمكه في سوريا عزيزه كيف!!
> ايها الناس
> المنتديات والمجموعات والقروبات المريخيه منارات تضيء سماء التوهج دوما
> الشباب ديل قاموا بادوار كبيره
> ونفذوا مشروعات عظيمة
> حقوا ياخدوا نصيبهم الادبي
> حقو الناس تعرفهم وتعرف انجازاتهم
> شخصياً
> حاتناولها واحده واحده
> والبدايه حا تكون بي قروب الصفوة العالمي
> اصبروا لي
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> يوم واحد الجو فرض نفسو علينا
> الحله قامت كترابتها والدخان ارتفع لينا
> دخان الشيات والشعيريات والسكسوكانية حلالالاته تعاين لينا
> والبسمات اتوزعت علينا
> الشله لمت صحابتها والصواني اتطاقشت فينا
> تاني يوم يا والينا
> الحله كلها اتلطمت لينا
> نزلات شديده ما متعودين جو زي ده يجينا
> انتوا زاتكم كيف خليتوهو يجينا !!!!
سلك كهربا
ننساك كيف والكلب قال البخاف الله مفروض يعرف الله سبحانه وتعالي اول… خوف بدون معرفه ما بنفع
والى لقاء.
سلك


تعليق واحد

  1. معقول يا عولاق بهبالتك دي وركاكتك دي ، وسوء عباراتك وسماجة لغتك واضمحلالها وعاميتها البليدة ذي ونسة الضل،معقول انك انت وبشخصك الباهت الاهبل تتواجد في نقابة او اتحاد واحد مع كمال الجزولي.؟؟ اهو دي الاصلها ما معقولة ابدا ولا بتنبلع. عرفت مقامك يا عولاق يا دلاهه.