زواج سوداناس

السيستم (فاتح) والتلفون (قافل) !


هيثم كابو

شارك الموضوع :

* عندما صرف المريخ النظر عن مدافع هلال الأبيض بكري بشير؛ وفضّل الإحتفاظ بمهاجمه عنكبة وجد الهلال فرصة ليظفر بلاعب كان المريخ ينوي ضمه لكشوفاته .!

* يحسب لغرفة تسجيلات الهلال أنها أستفادت هذه المرة من درس النجم الأبنوسي ألوك أكينج، وأقنعت (اللاعب) وإدارة فريقه بإعارته ولم تركض في شوارع عروس الرمال والخرطوم بحثاً عن (كرت مزعوم) ..!

* لم يرفض هلال الرمال إعارة اللاعب بعد رفض المريخ له وأتفق مع الوصايفة الذين وعدوه بإعارة المهاجم صلاح الجزولي وأكتمل الأتفاق ورتبوا كافة التفاصيل غير أنهم تجاوزوا (نقطة صغيرة جداً) هي إقناع الجزولي باللعب في صفوف هلال الأبيض على سبيل الإعارة ..!

* يبدو أنهم أستفادوا من درس ألوك في الجزئية الخاصة باللاعب المراد كسب توقيعه، ولكنهم نسوا أن الإعارة لا تتم إلا بحضور اللاعب المراد إعاردته ليوقع في كشوفات الفريق المنتقل إليه ..!

* لم يقبل صلاح الجزولي بقرار إعارته، وأغلق هاتفه في الساعات الأخيرة من انتهاء زمن التسجيلات، تاركاً بكري بشير مرابطاً خارج مبنى الإتحاد العام بينما غرفة تسجيلات الهلال تهرول هنا وهناك بحثاً عن صلاح الذي غادر منزله وأغلق هاتفه ..!

* إذا كان مجلس الهلال لا يستطيع إقناع لاعب منضوي تحت كشوفاته بالإعارة فكيف يقنع لاعباً جديداً بالتعاقد معه ..؟

* نجحت غرفة تسحيلات الهلال في ألتقاط الصور مع بكري بشير وفشلت في الوصول لصلاح الجزولي ..!

* انتوا إذا كان (كرت اللاعب) بحل مشكلة ما كان تعيروا صلاح الجزولي لهلال الأبيض بالكرت ..!

* لم تنته فترة التسجيلات وحدها، ولكن أنتهت (غرفة تسجيلات الهلال) من قبلها ..!

* البشوف صورة فوزي المرضي مع بكري بشير يقول اللاعب تم اعتماده معاراً و(ماشي مع الهلال للمعسكر) ..!

* ناس (قوون) جابوا صورة مدافع هلال الأبيض مع فوزي المرضي وقالوا (بكري بشير في قبضة الأسد) ..!

* يا جماعة الأسد (قبض الريح) ..!

* انتوا ولدكم ما قدرتوا تقبضوه جارين لبكري بشير ..!

* ما قادرين تعيروا صلاح الجزولي وعايزين تسجلوا ألوك ..(يا جماعة في التسجيلات لازم الطموح يتساوى مع القدرات) ..!

* ليكم حق تتمسكوا بكرت ألوك لو صلاح الجزولي بقفل التلفون في وش مجلس الهلال ..!

* وش مجلس الوصايفة ما ياهو ..!

* الهلا ماسك الكرت وصلاح قافل التلفون ..و(انتوا يا محمد عبد الماجد بصراحة تلفون صلاح الجزولي القفلو في وش المجلس خط ولا “كرت”) ..!

* لو تلفون صلاح المقفول طلع (كرت) معناها بموية وكملت ..!

* الهلال في التسجيلات ما بنستر .. (صفر) الوادي المنحدر ..!

* إذا السيستم ما قفل في وش محترف جابو الهلال معناها في لاعب وطني وطني حيقفل تلفونو في وش مجلس الهلال ..!

* الوصايفة دائماً (قافلة) معاهم ..!

* هسه صلاح دا يا فاطمة فتح تلفونو ولا لسه مقفول ..؟

* يا جماعة ما تزعلوا من صلاح الجزولي الراجل ما قاصد حاجة بقفلة التلفون بس الظاهر (بطاريتو نزلت) ..!

* راجيك في التلفون وانت قافل التلفون .. لا مرة جرسو يرن والغرفة عايزة تجن ..!

* السنة الفاتت سجلتوا (صورة بكري المدينة) وخسرتوا اللاعب .. والمرة دي كسبتوا (صورة بكري بشير) على سبيل الإعارة ..!

* أي لاعب أسمو بكري الهلال بحسمو بالصور ..!

* إتصوري

نقوش متفرقة

* يا مزمل : وفد السلطان أكيج الجاي يحسم موضوع ألوك وصل وين ..؟

* يبدوا أن الهلال سيستعد للموسم الجديد باستقبال وفود السلاطين ..!

* لا تقل : هلال الملايين، ولكن قل (هلال السلاطين) .!

* طالما أن ألوك (ود سلطان) فهذا يعنى أن الظاهرة جاء يحمل لقبه معه ..!

* موعدكم مع (ود السلطان) في الميدان ..!

* يا جماعة موضوع صلاح الجزولي دا انسوهو ..(ما دايرين تهديد وعقوبات وأعتبروا الحصل مقالب تسجيلات) ..!

* أي زول أسمو صلاح اليومين دي مجهجه مجلس الهلال ..!

* صلاح إدريس مجهجه الإدارة، وصلاح الجزولي رافض الإعارة ..!

* اتصلحي

نقش أخير

* مسلسل (ود السلطان) يواصل عرض حلقات الغضب والغليان ..!

شارك الموضوع :

تعليقات الفيسبوك

تعليقات


3 التعليقات

      1. 1
        ابو خالد الدمام

        غبي

        الرد
      2. 2
        البطل

        والله يا هيثم كتاباتك ملح الصحافة الرياضية..
        عفاااااااااااااااارم عليك ..
        الوجعععععععععععععععععععععع ..!!!

        الرد
      3. 3
        العمدة

        !!!..The Zerooo, a chronicle of al-Hilal Sports Club

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *