زواج سوداناس

مسار ومشار


شارك الموضوع :

> أمس اتعملت قرعة منافسات الاندية الافريقية للموسم الجديد
> مسارنا مسار السرور
> وربنا يقدرنا نمشي في مسارنا لي آخر المحطات
> نكمل كل المسار ونصل المطار
> اخوتنا الاهلة امرهم متصعب شوية
> وقعوا في مشار عديل كده
> قايلنها كلو سنة حلاوة
> المرة دي مشار يا حبيب
> تبقى عليكم مغصة الوك ووعورة مشار وطاقية سلفا كير
> الله يستركم من وقعة طيارة قرنق
> بالمناسبة
> الكاوبوي او راعي البقر
> من يقولوا ليك كاوبوي بتبادر لي عقلك الكسكتة والمسدس والحصان
> كان ممكن كاوبوي يكون بالكسكتة والمسدس والحمار؟
> لكن الخواجات حميرهم شوية
> لو ما شوية ما كانوا وصلوا القمة بالفهم الكتير بتاعهم ده
> نحنا نحمد الله حميرنا كتااااااار
> اردأ واحد في حميرنا
> بل في جميع فصائل الحمير في العالم
> هو الحمار الدبلولاوي
> ده لايوجد الا في السودان
> ومابعيش الا في السودان
> ياخ ده تدقو يحرن
> تحرن معاهو يحرن
> تجر اللجام يمشي
> تفك اللجام يقيف
> ايها الناس
> شفتوا الحمار لما يجوا يدخلوهو في البنطون؟؟؟
> ياخ بعذب الناس جنس عذاب
> ينفخ ليك نخرينو الكبار ديل لمن يبقن قدر كرعين الردا
> ويوقف ليك اضنينو الطوال ديل عدييييييييييييل
> وقفة انابيب الغاز في الصف
> والبنطون كلو يدفر
> وحاتك الحمار شبر ما بتحرك
> بخاف من البنطون شديد
> الغريبة كل الحمير بتخاف من البنطون ما الدبولاوي براهو
> والمثل قال
> لو رفسك حمار ماترفسوا
> شوف مشارك وين
> المهم
> يا ناس
> ليه شوارعنا وسخانة ؟؟؟؟
> ليه حلتنا وفرقاننا وسخانات
> ليه شوارع زلطنا محفرة ومعفنة ؟؟؟
> ليه ضبابيننا تقول يا ليل يا نيل يا ليل
> ليه باعوضتنا بقت ما بحترمنا؟
> ليه أزقتنا بؤر للامراض والاوبئة ؟؟؟؟
> ليه مطاعمنا مقرفة ؟؟؟؟
> ليه أسواقنا تقرف الزول البجيها ؟؟؟؟
> ليه قمصانا نضيفة وملابسنا الداخلية كرتونية اللون والملمس؟؟؟؟
> ليه في الشتاء ده تركب الحافلة تندم انك ركبتها؟؟؟؟
> ليه بلاليعنا قرفت حتي القعونج مننا؟؟؟
> ليه جزاراتنا ما تشبه شعاراتنا؟؟؟
> ليه ريحة المستشفى عندنا تجبر المريض يقفل نخرينو؟؟؟
> ليه حمامات المدارس لا يدخلها الا المجبر؟؟
> المجبر شديد
> ليه الحمامات العامة اذا اجبرتك الظروف بالقروش تخشها تمرق تطرش سنة ونص وتفقد سوائل؟؟؟؟
> ماتقولوا لي الحكومة
> ده سلوك فردي وجماعي
> سلوكنا بطال شديد
> ننضف البيت ونوسخ الشارع بوسخ البيت
> نستحمي لتفيض البلاعة في الشارع
> نفتح مطعم ونكشح موية الغسيل في الزلط
> نستعمل الحمامات العامة بدون وعي وبدون اكتراث وبدون احساس بمشاعر من يستعملها بعدنا
> ونتُف في السلم
> وده شيء مقرف ومؤلم
> نفرش الخضار في الارض
> ورجلينا تحوم حوله بكثافة
> وصاحب الخضار قاعد مشتح رجلينو والخضار بيناتن ونحنا نشتري
> كمان نقول ليهو جيب الطماطمايةاللي ورا ديييييييك
> نهتم بالمظهر الخارجي وملابسنا الداخلية تكسف
> الداخلية هي التي تعبر عن الواقع وعن حالنا
> تعالوا نعترف
> سلوكنا شين شديد
> عدم احساسنا بالآخرين مشكلة
> عدم احساسنا بالآخرين يقودنا لنبركن غلط
> لنملي الطريق اذى
> لنضايق بعضنا البعض
> الواحد يصلح بيتو
> يكب الانقاض والدراب في الشارع
> يؤذي عربات الناس
> كرور يعتر لي زول عجوز ممكن يكسر مخروقتو
> وكسرة المخروقة للزول الكبير عندنا
> هي تمهيدي الموت
> وماحتصدقوني لو قلت ليكم
> في ناس بيشفطوا السبتنك تانك بتاعهم بالليل في الشارع
>لا بخافوا الله
> لابخافوا محلية
> لابخافوا مرض
> ولا بخافوا ناس الحلة
> في الدنيا دي كلها لاقاكم زول بكب السايفون في الشارع بين بيوت الناس ؟؟؟
> ديل نحنا
> محتاجين تغيير سلوك
> محتاجين شماعة الحكومة دي نخليها شوية بالنسبة لي نضافتنا وقيافتنا واختيار مكان تفنا لي سفتنا
> فالحكومة ما عندها دخل في سفتنا
> الحكومة بي سفتها براها
> بتعرف تسف متين ومن وين
> بتسف بالدس
> والغريبة نحنا عارفنها بتسف لكن عاملين رايحين
> وبتعرف تتف سفتها وين
> لكن نحنا سفتنا حقو مانتفها في سلمنا وفي مكتبنا وفي حافلتنا
> معقولة زول يكتب تذكار جوة الطيارة!!!
> تذكار من صديق قسم السيد من أبناء الـ…. ؟
> ياخ معقولة !!!!
> تعالوا نعترف بي قصورنا عشان نغير سلوكنا
> سلوكنا همجي
> حتي المثقف فينا
> سلوكو همجي
> دكتور فلان استاذ في الجامعة
> وهو في عربيتو ممكن يجدع ليك كرستالة الببسي بعد يشفطها في الشارع عادي
> وينها الثقافة يا دكتور؟؟؟
> القلم مابزيل بلم
> نحنا كعبين شديد
> والغريبة لما زول في كافتريا يضايقو الزكام
> فيييييييييييييييييييط
> بديك ليها جوه الساندوتش
> ولا بهمو شيء
> والاغرب إنك تاكل عادي
> والغريبة النوع البديك باع في حنانك
> تمشي وين ماتعرف
> هو شبع وانبسط
> مابهمو باع دي تعمل فيك شنو
> محتاجين كورسات سلوك مكثفة
> عشان نمشي مع الزمن
> عشان مانبقى محن نمحن الزمن ذاتو
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> يا والينا
> قصور البيئة والصحة واضح علينا
> لكن بصراحه يا والينا
> برضك عندنا يد في البحصل فينا
> النفايات نفاياتنا
> والبلاليع حقاتنا
> والحفرن الزلط مويات كافتيرياتنا
سلك كهربا
ننساك كيف ولما الزول يختها فييييييييييييييييييييط الكلب بجري مرددا الله يقرفك جيتونا من وين انتوا ؟؟؟؟؟
والي لقاء
سلك

شارك الموضوع :

تعليقات الفيسبوك

تعليقات


3 التعليقات

      1. 1
        ريفا

        والله العظيم كلامك كله صاح يا سلك عدم ثقافه وكل الذكرته شفته بآم عينى ناس ناقصه توعيه وثقافه تعامل

        الرد
      2. 2
        Adil

        الوسخ هذا لانك انت الاوسخ بلد قيها انت بتكتب لازم تكون معفنة

        الرد
      3. 3
        AbuMuiz

        الردع الردع واجب والذي يبدأ من البيت وينتهي بالحكومة وإن كانت الطامة الكبري في حكومة عرفت نفسها بالإنقاذ عمرها قارب الثلاثين وأبجديات الحياة لم تستطع توفيرها من مجاري للصرف الصحي وليس خيران و توفير الماء وهو ٩٠% من صحة الانسان وعلاج وتعليم. في العالم يقاس مدى رفاهية الشعوب بمعدل فائض الدخل للانفاق في رحلات الاستجمام . الحكومات تدعم محدودي الدخل وليس هناك شخص لا يجد ما يأكل الا القليل الذي يذهب لما يعرف با ” Food Pantry ” حيث تجد ما يسد الرمق ومعها كسوه كمان “أبجديات الحياه مسئولية الدولة ” . مشكلة البلد بأن من يحكم بعيد كل البعد ولا يهمه بمعاناة المواطن. نحتاج حكومة جديدة بدأآ من الرئيس تأتي من الشعب ومن أجل الشعب وليس المهم من أية قطاع ولو حتى من قواعد المؤتمر الوطني الذين لايخافون في الله لومة لائم وإن ندر ذلك٠سلوكيات المجتمع مسئولية عامة يبدأ علاجها من داخل البيت “الأم مدرسة إذا أعدتها أعدت شعبا طيب الاعراق” والحي والمدرسة. الرئيس أوباما رفض جر إمريكا في أية حرب تكلف دولة أكبر إقتصاد وجيش عالمي المزيد من الإستنزاف وجعل معركته الاساسية في إصلاح إقتصاد البلد لينعم المواطن بالإستقرار وحكومة البشير وليس السودان تنفق أموال الشعب فيما يزيد من معاناته وليس هناك ما يلوح في الأفق بأن العثره ستصلح المشيه والله يكون في عون هذا الشعب ونسأله بتقبل دعواتهم بتغيير الحال٠الشيخ زايد رحمة الله عليه قال قولة مشهوره “بنينا دولة حديثة سبقت المواطن ومهمتنا الان بناء المواطن ليواكب التطور”. شوف ناس تزرع لتجني الأجيال مستقبل واعدا وأخرون يورثون الخراب والدمار. أسف يا سلك لو طلعت بره المجرى ولكنها رؤيتي في أن صلاح الشعوب في صلاح الحكومه والحاكم.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *