زواج سوداناس

شباب قطريين “العبرة” تسد حلوقهم بسبب تصرف رجل سوداني.. حكايات عجيبة



شارك الموضوع :

(لو رجع الزمن بختار أكون سوداني)
لو ما سوداني بالجـد لا تقراها ….

قصة حكاها سوار الدهب المعلق الرياضي بقناة بين سبورت بقطر زادتني حبا وفخرا بشعبنا ، قال : قاعدين شلة قطريين بيهظروا مع سوداني صاحبهم بأنو السودانيين بخيلين ، في واحد أكبر منهم إعلامي ومطوع وبحترموهو جدا قال ليهم والله ياشباب السودانيين أكرم الشعوب نحنا سافرنا دول كثيرة بس مامر بينا موقف زي اللي صار من السوداني
😊
!!
اها قال في التسعينات جينا رحلة صيد في شرق السودان حوالي 18 شاب في تلاته لاندكروزرات والدنيا شتاء وموادنا الغذائية كملت فقرروا يرجعو واتجهوا على زلط كسلا الرئيسي والساعة كانت 1 صباحا وبرد عجيب وهم جعانين جدا دخلوا كافتيريا كبيرة وقعدوا ودخل عليهم زول بسيط لابس جلابية وخاتي طاقية في راسو لي ورا كدا وسلم (السلام عليكم حباب الضيوف شرفتو البلد) قال ردينا عليهو بي حذر اتخيلو البعض مننا إنو مصلحجي وداير فلوس ،المهم ما اشتغلو بيهو وكانوا طلبوا خروفين شية وبعد اتعشوا شربوا شاي وقهوة ، أها قال لمن جيت سألتا صاحب المطعم من الحساب قال لي الحساب مدفوع ، سألت الشباب منو الدفع ؟ كلهم قالو مادفعنا رجعتا لصاحب الكافتيريا سألتو منو الدفع قال لي الراجل صاحب البوكسي القديم اللي سلم عليكم ، طيب وينو ؟ والله مشى ، مشى وين ؟ والله مابعرفو دا عابر في الطريق اول مرة اشوفو بس حبا يضيفكم ، قال رجعت كلمت الشباب والعبرة سدت حلوقهم وقعدوا يومين حايمين في كسلا خلوا السفر مالقوهو ، قال كنا نتمنى نديهو كروتنا يزورنا في قطر
مسؤول شرطة إستعنا به عشان نلقى الراجل دا سألنا عن شكلو فقلنا ليهو والله هو سلم علينا من بعيد بس هو دفع مبلغ كبير ، عمك قال ليهم لو قعدتو 100 سنة مابتلقوهو لانو السودانيين كلهم ممكن يعملو كدا
😊
ورجعوا بلدهم وفي القلب حسرة على ضياع زول يكرمك بدون ماتعرف اسمو حتى. اها الزول دا لو لاقيتو قسما أبوس راسو ويدو لي صفاتنا السودانية دي كرم

عثمان حمور إسم ضخم لشخص نموذجي في سودانيتو وعزتو وكرامتو وشجاعتو ، كان مسؤول الشرطة في دولة خليجية في نهاية السبعينيات،جاهو بلاغ انو في متهم من الاسرة الحاكمة وود عم الأمير احتمى بي فخذ من فخوذهم عندهم منطقة كدا براهم ومسلحين ،الشرطة مابتخشها ، البطل دا دخل المنطقة دي كسائق تاكسي واتحرى لمن وصل بأنو المتهم في حمايتهم فقام سلح القوة المعاهو وكلهم سودانيين اهل البلد خافوا عشان ديل شيوخ وحاصر المنطقة وطالبهم بي تسليم المتهم ولو طلعت رصاصة واحدة حانرد ليكم وكتي
😠
جماعتك لاوزو وسلموهو فقام جدعو في السجن رهن التحري ، قام اتصل عليهو شيخهم وحاول ينبزو ياسوداني إنت تتجرأ تدخل منطقتنا وتقبض شيخ والله ماتفكو لينا نعمل ليك ونعمل ليك انت ماعارف انحنا شيوخ …. لو ماجبت الزول بنجي نفكو بقوة السلاح ، عثمان حمور قال ليهو خلاص كملتا كلامك ؟(شوف انعل ابوك لا ابو فلان لابو فلان الفلاني ، انا جابوني اسيادك (الشيخ الكبير) عشان اعلمكم الشغل والقانون والنظام ماجيت محتاج ليكم والمتهم معانا وانا معاي قوة من السودانيين بسلحهم وبستقبلك بالذخيرة وابقى راجل تعال ، وقفل الخط في وشو ،
😂
اتخيلو انو الشيخ هرش واتصل بالشيخ الكبير ، عمك الامير زااااتو اتصل بعثمان حمور واعتذر ليهو وطلبهم كلهم في المجلس وجا الشيخ بتاع المنطقة فقام الامير هزأو وقال ليهو تعتذر للرجال واعتذر ، في اللحظة ديك عثمان حمور قال ليهو أنا أهلي بس أكتر من شعبك دا ونحنا السودانيين مابنرضى الحقارة انا شغال هنا برغبتي تحترمني احترمك غير كدا لا ، في النهاية طبق القانون في الشيخ الجاني
😊
، لك المجد يا عثمان حمور

الترابي في بداية التسعينات باظت عربيتو في خلاء كردفان وكانو عربيتين فالحرس قالو يلقو ليهو حته يرتاح فيها وكان درس قاسي ليهو ، خلو الترابي ومعاهو الحرس واتنين مرافقين ومشو أقرب حته يفتشو ميكانيكي فلقو في الخلا أوضة جالوص كبيرة ومعاها راكوبة من القش فيها عناقريب وأزيار موية فسلمو جاتهم شافعة عمرها حوالي 13 سنة واخوها حوالي 11 سنة فسألوهم في منو ؟ قالو في أمنا ، وجاتهم المرأة البسيطة دي وسلمت وضيفوهم بي شاي لبن ، بالليل كدا جابو ليهم صينية العشا لحمة وفول مشدود وفطير معمول بالصاج ، ادوهم اﻷغطية وناموا والصباح الجماعة وصلو فجابو ليهم شاي لكنو سادة ، حرس الترابي إستغرب نادى الشافعة قال ليها انتو مابتشربو شاي لبن الصباح ؟ قالت ليهو أمي ضبحت ليكم الغنماية بالليل وماعندنا غيرا ، فكلم الترابي وقال لأول مرة يشوف الترابي تدمع عيناه ، زولة في خلاء وحيدة ولاتعرف إنو ضيفا دا هو النضااام والمفكر. المشهور داك تكرمهم بآخر مصدر للغذاء !! طلبها الترابي وناداها وهم مارقين ، زوجك وين ؟ قالت زوجي بيسافر أم درمان يشتغل ويلقط لينا شوية حاجات يجي ، الموقف دا خلى الترابي يرسل ليهم بوكس هدية مليان مواد تموينية قال ليها شان تكرموا ضيوفكم وليتني إلتقيت هذه المرأة السودانية الفارسة
😊

شعب ابدع في كل الفنون غناء وشعر ومسرح ورسم ونحت برغم ضعف الإمكانيات دا شعب غريب ، شفع بتلقاهم عاملين عربية من كعوب السفنجات وعلب الصلصة لوري ، بوكسي ، باص
😂
ابداااع ياخ
شعب شجاع وماعندو الغدر وزمان جدودنا النوبيين كاناو في الحرب مع الغزاة بقيفو ساعات وبيرسلو للعدو الغازي الطعام بإعتبارهم ضيوف وتاني يوم يدورو معارك والمامصدق يسأل البروف يوسف فضل خبير التاريخ
😂

شعب فكر في الكمونية وطحن الويكة وعمل القراصة والكسرة والكوارع ياخ الحلومر دا اكتشاف مدهش والله بي مراحل انتاجو الكتيرة ديك ، وللبيقول السودانيين وسخانين بقول ليهو والله أنضف شعوب الأرض ، منو الفكر في إستخدام دخان الطلح للنظافة والدلكة والخمرة (بضم الخاء)ياخ دي فكرت فيها المرأة السودانية براها في العالم دا كلو مافي شوف النضافة دي كيف عشان الزولة تكون ريحتا طيبة والشعوب بدت تاخد مننا الحاجة دي بقينا نصدر ثقافة النضافة الشخصية
😂

اعراقنا كتيرة ولهجاتنا متعددة لكننا بنتشابه في طيبتنا ، منظر عربية تتعطل في الشارع وأقرب ناس مارين تلقاهم يلزو العربية لمن تدور وممكن يقيفو معاك ويحاولو يصلحوها معاك والله في اوروبا ولا الخليج لو وقعت انت ذاتك مش عربيتك ماف زول بيهبب ليك
😂
، في كل بقعة في السودان تلقى الناس في رمضان صوانيها في الشارع ويتشاكلو في الضيف
😊

في نفس الوكت الزول لو حقرت بيهو بيبقى مجنون يكاتل ضلو ولو صفى معاك بقلع ليك قميصو ويمشي عريان
😂

شعب مدرسة في النضال من التحرر من الإنجليز والاتراك والمصريين قبل دول كتيرة وشعب قدر يقتلع أقوى ديكتاتوريتين في إفريقيا بإنتفاضتين معروفات
😊

إسماعيل الأزهري والوفد الاشاوس المعاهو عليهم رحمة الله في مؤتمر باندونغ المصريين حاولو يستفزوهو وختو العلم المصري قدامو بإعتبارو علم السودان فزحاهو بإتجاههم وشال منديل من جيبو وطلع قلم وخت المنديل فوق القلم وختاهو قدامو بإعتبارو علم للسودان
😊
فقالوا المناضل نيلسون مانديلا قال دا أشرف علم في التاريخ .شوفو العزة والوطنية دي كيف فمن أنتم أيها السودانيون !!
شباب معارضين للحكومة من دارفور وجبال النوبة والشمالية في مصر حاول عميل إسرائيلي يستقطبهم بي دعم وقروش كتيرة جدا برامج فحسوا فيها ريحة تشجيع على تقسيم السودان فأنسحبوا منو ورسلو ليهو إيميل مختصر
( We are not against our country , we are against the N. Gon. ، keep your money)
نحنا ما مؤتمر وطني لكن لسنا ضد الوطن ، إحتفظ بأموالك
😊
لكم المجد أيها الشباب..

شعب لمن تدخل المطعم أي زول بيقول ليك إتفضل معانا وبيكون مبسوط لو أكلت معاهو .بعرف زول فترة كان ماشغال وقعد مع عزابة قال لي والله كنت بطلع جيبي فاضي اركب مواصلات ملح وامش للشباب يفطروني وارجع بي حق مواصلات عارفنو ماشغال وكدا
😂

اتذكرت السوداني الاعلامي الشاب القعد مع شباب مصريين ولمن ظروفو اتعسرت ومادفع الايجار طردوهو ، اها سافر الامارات وربنا فتحها عليهو واشتغل كويس فمرة نزل مصر وقابل الشباب صدفة وسلم عليهم وعرف ظروفهم كعبة ومهددين بالطرد من الشقة فمشى بعد فارقهم بدون مايكلمهم لي صاحب الشقة ودفع ليهم مقدم سنة ، لماعرفوا انو هو الدفع اتصلو بيهو وشكروهو وقالو ليهو تساعدنا كدا بعد العملناهو معاك ؟😕 فقال ليهم والله انا عانيت بعد طردتوني من رقاد الشارع قبل ربنا يكرمني وما متمني الحصل لي يحصل لأي إنسان
😢
، من وين الزول دا جاب التسامح دا كلو ومن أنت أيها السوداني !!!
😊

حكي لي واحد قال معاي صديق لبناني في السودان فمرة مشينا مول وشفت شلة لبنانيين قلت ليهو ديل لبنانيين قال لي ايوا قلت ليهو سلم عليهم رفض وقال لي مابدي يمكن يحرجوني 😕، قلت ليهو نحنا السودانيين لو اتقابلنا في غربة بنعانق بعض حتى نتعارف.

في السودان فقط بتلقى الجارة بي فوق الحيطة ترفع ماعونا لي جارتا يافلانة والله جوني ضيوف والتلاجة فاااضية أقسمي لي من ملاحك وتديها لو عندها وبالزيادة
😊
ياخ كلمة الشدة دي ثقافة عندنا يعني زول ماشي حفلة يستلف بنطلون من صاحبو ولا قميص ، البنات بشيلو من بعض البلوزات والطرح والفساتين شدة شوف الناس دي كلها بتحس انهم أهل بيت واحد ، بتذكر زمان في الثانوي كان في الحلة صاحبنا عندو قميص شديد كدا وكنت قافل أشيلو منو لي حفلة عقد الجلاد جيتو العصر لقيت زول سبقني ولقيتو لابسو في الحفلة واللذيذ الناس كلها بتكون عارفة دا قميص فلان ، شعب بيتشارك كدا في العالم كلو ماف فمن أنتم أيها السودانيون
😊

شرطي عماني بيحكي لي سوداني انو شغال في المطار جاء سوداني بالليل واداهو ظرف فيهو دولارات قال ليهو بالله عليك أي سوداني مسافر لو لاقيتو في الرحلة للخرطوم أديهو الظرف دا فلوس للأولاد وأرقام التلفون مسجلة هنا قول ليهو أخوك فلان ، فقال ليهو اندهشت وقلت الرجال مجنون
😲
اديتو رقمي عشان يأكد لي انو فلوسو وصلت الاولاد ، سلمت الفلوس لرجال شيبة بعد يومين اتصل السوداني وشكرني انو الفلوس وصلت والله انكم شعب عجيب
😂
😂

للمعنويات شوية..فينا حاجات سمحة ماتخلو الزمن يغيرها

بقلم
يسري احمــد عمر

شارك الموضوع :

تعليقات الفيسبوك

تعليقات


43 التعليقات

إنتقل إلى نموذج التعليقات

      1. 1
        ن / ح م

        لا ينبغي أن نستغرق في مدح أنفسنا , صحيح أننا بهذه الصفات أو بعضها أو أكثر لكن يجب أن نحتفظ بها ونتوارثها ونترك الآخرين ليتحدثوا عنها إذا كنا نريد أن تكون العاقبة في الدنيا !! ولكن هل نحن نتكلم عن هذه الأشياء لأنها نادرة ؟ فإذا كانت فاشية وعادية فلا حاجة بنا للتحدث عنها فإن الكريم , كما قالوا , لا يتحدث بكرمه وقيل أيضا في الشعر : ( وإن امرؤ أهدى إليّ صنيعة *** ثم ذكرنيها مرة للئيم . ول رايكم شنووووووو ؟

        الرد
        1. 1.1
          غريب الدارين

          عتبي عليكم يا إدارة

          أرسلت لكم أيتها الإدارة الموقرة موضوعا يشابه هذا الموضوع تماما
          وضمنته بعض حقائق ليست موضع جدال

          فلا أنتم نشرتموه
          ولا أنتم رددتم علي بأن مقالي يشوبه شيئ

          جزاكم الله خيرا

          الرد
      2. 2
        ابو كريم

        ينصر دينك،،،،، مقال يفتح النفس ويرد الروح ،،،،، في زمن الاحباط المزمن و كاردشيان و بتاعة سكاي نيوز،،،، بوركت و بورك لك في قلملك

        الرد
      3. 3
        الخال

        الله يديك العافية يا يسرى وييسر امرك

        الرد
      4. 4
        زول سوداني

        ااااااي ياخ…. دي الحاجات البتفتح النفس…
        شابكننا جدية لابسه جنز وندي راكبة حمارة وانصاف اشترت كارو موية…
        بجد محتاجين حاجات زي دي… وبالزات في الغربة….
        تسلم يا رائع

        الرد
      5. 5
        Sudanese prisedent

        لا اوافقك الرأي ن ح م فاعتقد ذكر هذه الاشياء يشجع الزول علي التمسك بهذه الخصال في هذا الزمن الصعب والقصة ما قصة تمجيد لانفسنا ولكن تواصل اجيال كل جيل يحكي للجيل البعدو عشان ما تنتهي الخصال دي

        الرد
      6. 6
        ابو القنفد

        تشكير النفس وبهذه الطريقة خصوصا يدل على مشكلة نفسية كبيرة جدا تؤدي لمثل هذه الكتابة المخجلة وغيرها من السلوكيات التعويضة
        حتى القصة المفبركة والركيكة لرجل كسلا المجهول يكرم خليجيين اغنياء لا يحتاجون بينما ملايين من السودانيين جوعى
        لانه وان صحت القصة يراد ان يذكر السودانيين في الخليج بانهم كرماء ولكن لو كانت قطر دولة فقيرة او كانوا احباش او مصريين فقراء لما اكرمهم بثلاث خرفان
        ورحم الله الشيخ فرح ود تكتوك حين قال كل يا كمي قبل فمي
        نحن في السودان اذا زار بيوتنا اكابر القوم وميسوري الحال نكرمهم بالولائم والذبائح بينما نقدم الفضلات والسليقة في احسن الفروض للمساكين اذا طرقوا ابوابنا مستطعمين
        عن سهل بن سعد الساعدي أن عدي بن حاتم أتى رسول الله صلى الله عليه وسلم فقال : ” يا رسول الله إن أبي كان يصل القرابة ويحمل الكلَّ ويطعم الطعام ، قال : هل أدرك الإسلام ؟ قال : لا ، قال : إن أباك كان يُحبُّ أن يُذكر “

        الرد
        1. 6.1
          بلدى سودان العزة

          ابو القنفد صباح الخير.. لسه ما اصطادوك؟؟
          احكى ليك قصة بخصوص الكرم , اقسم بالله حصلت لينا ونحن كنا مجموعةقرابة الخمسة وستون(65) شخصا , ماشين مناسبة ووقفنا بين القطينة والدويم فى مطاعم , اكلنا كلنا وشربن البارد , ولما جينا نحاسب بتاع الكاشير قال لينا حسابكم مدفوع , دفعوا الرجل داك اقسم بالله لابنعرفوا ولا جا قال لينا عايزين طلبات شنو . ولما اصرينا ندفع حلف طلاق بالثلاثة قروشوا الدفعا للكاشير ماترجع .

          الرد
      7. 7
        ابو القنفد

        اما اهل كردفان ودارفور الا من رحم ربي فيكرمون الضيف الذي تبدو عليه القوة ومعه حاشية او جنود اتقاء لشره فعندنا المسمى حميدتي اذا دخل قرية واكرموه تركهم اذا لم يذبحوا له الذبائح اغتصب جنوده مالهم وعرضهم وهكذا هو الحال في غرب السودان منذ مئات السنين
        يجب تغيير هذه المسالك

        الرد
        1. 7.1
          ود بلد

          سامحك الله …
          والله لم تقل حقا

          انا من كردفان .. وياليت ولا اعرف عن اهل دارفور شيئا غير انهم لا يقلون كرما عن اهل كردفان.

          انت لا تعرف اهل كردفان ولا اهل دارفور

          والله بننزل من عرباتنا بنركم حمير وبنلبس عراقي وغير عصا ما شايلين حاجة .. نشق الحلال دي حله حله والله يستقبللوك بره ويحلفو عليك تجي

          انت لا تعرف ان في كردفان لو جات إمراءه شاقة المراح اصغر راعي من طرف لازم يضبح ليها

          تزوجت من الجزيره .. زوجتي لأول مره تمشي كردفان لزواج اخي قالت في الشارع سواقهم تعب واخي ايضا تعب وهو عريس والدنيا ليل اقرب زول لاقاهم زول حلف عليهم طلاق وضبح ليهم واكرمهم كرم مابعدو كرم وهو فقير معدم والصباح الحلة كلها جات اي زول بي براد الشاي وضبحو ليهم تاني وفطروهم حتي خلوهم يمشو جائتني متأثره جدا تطلب مني ان اكرم هذا الرجل .. واهل الجزيره لا يقلون كرما عن كردفان ورأيت منهم العجب

          اخي السودانيين كرماء اينما هم .. والله اخي طبيب مشى المناصير قال الناس بيختو البطيخ في الشارع تشيل البطيخة وتخت المبلغ الذي يرضيك تحت حجر ولو ماعندك شيل امشي !

          عديلي من الشمالية والله اعرف ان هناك عائلة تسمي “اولاد العباس” والله ما شفتهم لاكن من الحكو لي عنهم ادعي ليهم ربنا يفتح عليهم ويزيدهم ويبارك فيهم ويحفظهم وانا والله ماشفتهم .. ديل يا اخي الكريم كل عيد بيطرقو الأبواب الراجل ميه والمراءة ميتين وهذا الكلام سمعته قبل عشر سنوات لا أعلم المبالغ كم اليوم !

          تعال امشي اهلنا الشباشة عشان يعيدو ليك مفهومك عن الكرم

          امشي اهلنا في شندي شوف ماذا يعني ان تكرم الضيف

          زرت مدينه اسمها النايم اعتقد تتبع لدارفور وقاطنيها من دارفور والله ما بقدر اوصف ليك الكرم مهما اجزلت الوصف .. ووالله سكين ماعندنا ماشين بي حميرنا واي زول شايل ليهو مطرق يعدي بيهو الحمار !!

          مشيت الفاشر 2010 والله العظيم لم أرى في حياتي ارقى من اهل الفاشر ! ياخي تجي قاطع الشارع بي رجلينك العربات يمين الشارع وشمال الشارع يشغلو الهازرد ويقيفو لامن تعدي الظلط !

          والله مشيت اقعد 4 يوم قعدت 54 يوم عشان ارضي على الناس والعزايم ووالله شفت ولاقيت وعاشرت ناس والله كأنهم الصحابة في اخلاقهم وكرمهم ولعنت الاعلام الذي اساء سمعة الدارفوريين والحرب التي شردتهم ناس زي الملايكة علما بأني مواطن سوداني عادي من عوام الشعب ليس لدي اي منصب او سلطة او ثروه

          يا اخي السودنيين اغلبهم شهام كرام .. فيهم البخيل زي كل شعب .. لاكين السواد الغالب كرماء شهماء فارجوا ان لا نسيء لاهلنا ولا نسمح للشواذ او بعض المظاهر السالبة في الخرطوم او الغربة ان تعمم على كل السودانيين

          الرد
      8. 8
        ابو القنفد

        وعدي في الحديث هو إبن حاتم الطائي

        الرد
      9. 9
        ابو القنفد

        قبل فترة دخل جنود مستجدين من قوات الدعم السريع في مواجهة مع البطاحين شمال شرق الخرطوم لانهم لم يلقوا منهم ما يقدم لهم في دارفور وكردفان إتقاء لشرهم وقد تم تأديبهم واقتحام معسكرهم وقتل عدد منهم لان الوقاحة بلغت بهم طلب اكرامهم جنسيا بعد ان غض الاهالي الطرف عن ممارستهم للسلب والنهب

        الرد
      10. 10
        ابو القنفد

        لسنا احسن من الاخرين والاخرين ليسوا باحسن منا
        ولا ارجل من الاخرين والاخرين ليسوا بارجل منا
        اقبلوا بهذا يا هؤلاء فانه الحقيقة

        الرد
      11. 11
        ابو القنفد

        عاوزين تطلعونا شعب الله المختار
        مثل هذه الافكار نهايتها كارثية
        مثل اليهود والنازيين الالمان والبعثيين العراقيين
        هذه الفرق الثلاثة تم التنكيل بها شر تنكيل بسبب مثل هذه الافكار
        التعصب القومي والعرقي يجلب غضب الله والملائكة والناس اجمعين

        الرد
        1. 11.1
          جميل بثينة

          السودانيين نحمل الكثير من الخلق الحميده والحمدلله وبشاهدة الكثيرين من الاخوان فى الخليج
          موت بغيظك

          الرد
        2. 11.2
          بلدى سودان العزة

          ربنا قال فاما بنعمة ربك فحدث

          الرد
      12. 12
        زول سوداني

        غايتو الفهمتو من ابو القنفذ دا انو حميدتي دا عامل فيهو عمله سودا…
        ياخي فكنا ياخ وما تبقي محبط.. طلعت من الموضوع نهائي وبقيت في حميدتي…
        الزول قالوا ليك اكلهم وعمل رايح يعني ما انتظر يتعرف عليهم عشان تقول كل ياكمي قبل فمي..

        موت بغيظك ياخوي… وياهو دا السودان… عجبك واللا ما عجبك… وفرق بين (الشعب السوداني ..والحكومه )… الحديث عن شيم وقيم شعب.. مش عن نافع.

        الرد
      13. 13
        دار حامد

        اولا الي ابوقنفد ياسيدي العزيز لو انتي فيك مرض نفسي اذهب لطبيب لان حالتك بدت محرجة وكونك تتهم ابريا وعفيفات بالاسم هذا تهكم علي شرف ناس ارجل منك ومن حاشيتك كلها وانا اسمي يوسف بن محمد بن حسن آل الجهني من قبيلة دار حامد قرية البحير ريفي ام سيالة واتشرف. وعليك اللة انت وحمدتي بتاعك دا واهلك الانتا شايفهم اعز قوما فتفضل الي ديارنا وتعرف من هي كردفان وكردفات خشم بيوت ياخوي وانت البتتكلم بكل بجاحة عن بنات سودانيات بدون حتي مراعتك لتجرح مشاعر الاخرين بكل هدة الطريبة الغذرة يبقي انك انسان جاهل ومغرور وبس اعرف من هي كر،دفان حتي تتبجح بحديثك النتن دا اولا كان علبك عدم الشمل يا سيد قنفد قنفد يطعنك بشوكو انشااللة.
        ويا ناس النيلين رجاءا نشر ردي علي ابوقنفد الذي رمي اخواتي في كردفان بكلام غير لائقا واتهمهن بالباطل واللة و واللة اشك في سودانيتك وفي حالتك الصحية

        الرد
      14. 14
        علي

        الاخ المكرم ابو القنفذ حدثت فصدقت

        الشهامة والكرم والشجاعة ده كلها صفات مطلوبة لكن في الحق وبالصدق

        حدث مالك عن صفوان بن سليم انه قال قيل لرسول الله صلى الله عليه وسلم “أيكون المؤمن جبانا فقال نعم فقيل له أيكون المؤمن بخيلا فقال نعم فقيل له أيكون المؤمن كذابا فقال لا”

        يعني بمعيار الدين الصدق اهم صفة في المسلم. والكذب بقى كتير خالص في السودانيين واي واحد يسال نفسو هو بيكذب في اليوم كم مرة!

        نسال الله السلامة

        الرد
      15. 15
        دار حامد

        قبل فترة دخل جنود مستجدين من قوات الدعم السريع في مواجهة مع البطاحين شمال شرق الخرطوم لانهم لم يلقوا منهم ما يقدم لهم في دارفور وكردفان إتقاء لشرهم وقد تم تأديبهم واقتحام معسكرهم وقتل عدد منهم لان الوقاحة بلغت بهم طلب اكرامهم جنسيا بعد ان غض الاهالي الطرف عن ممارستهم للسلب والنهب
        يا راجل اتقي اللة بتتهم بناتنا وامهاتنا في وضح النهار بالاسم كمان واللة يا حسرة علي السودان ينط واحد زي ابوقنفد ويقول ليك كردفان واللة واللة يا ابو قنفد ولو جا حمدتي وانتي وكل عزيز عندك لا تحرك شعرة في كردفان البعرفا انا امانة جاتك بتتهم فيها كبابيش وحمر ودارحامد ومجانين وهواوير ديل كلهم ما بيملو عينك يا جبان. تقول شنو بس العنصرية بقت لا تفرق بين الاخ وبن عمة وكل واحد شايف نفسة عزيز ومن قوما اعزاء ذو بئسا شديد ما علينا

        الرد
      16. 16
        ابو القنفد

        يا دار حامد هل انت غبي ام تتصنع الغباء
        كلامي واضح انه لا يوجد انسان خير من انسان الا بالتقوى ولا احد اعز من احد
        وما ذكرته انا من انما يأتي من وسائل الاعلام وحوادث موثقة
        ولحمدتي وجنوده اعتداءات موثقة في كردفان ولم تقدر على ردعه لا جهينة ولا عاد ولا ثمود وقد قام والي كردفان بطرده شر طردة وهذا امر موثق بالفيديو في اليوتوب
        كونك انت وعشيرتك في مأمن منه اليوم بسبب وضعك الاجتماعي او انتمائك المزعوم لجهينة او عاد او ثمود
        فهناك ضعفاء لا قبل لهم به والايام تنقلب يا صاحبي وقد تصبح انت من الفئة الضعيفة غدا لذلك اقول هناك الكثيريجب تغييره
        مناطقكم تنتشر فيها القبلية والجهل ويظن ابيضكم انه خير من اسودكم ويظن من يحمل السلاح منكم انه ارجل ممن لا سلاح له حتى انكم تنسبون انفسكم لقبائل بادت وذابت وظهر من سلالاتهم الاف القبائل
        وانا لم اتهم نسائكم بشي ولكن عندما يأتي ابنائكم ويسألوا عن بيت العزباء بكل اريحية فانا استنتج ان الامر عادي بالنسبة لهم في مناطقهم

        الرد
      17. 17
        ابو القنفد

        سمعت ابناء الذين يقولون نحن جهينة ينعتون ابناء قبيلة اخرى بالعبيد ثم سمعت ابناء قبيلتي ينعتون ابناء “جهية” هؤلاء بالعبيد وسافرت الى بلدان العربان واوربا وتم نعتي انا بالعبد
        من هو العبد ومن هو السيد يا جماعة

        الرد
      18. 18
        ابو القنفد

        وانا يا دار حامد لم اقل انكم قدمتم نسائكم لاحد ولكن قلت انكم ربما تقومون مجبرين باكرام الضيف المسلح وكثير العدد او الضيف ذو المكانة الاجتماعية بالذبائح والطعام اتقاءا لشره او كسلوك تعويضي حتى يتم وصفكم بالكرم وتضيفون دليلا تحتجون به عند الناس بانكم من جهينة
        ولو كنت صحيح من نسل جهينة كنت فهمت ما ارمي اليه لانه كلام عربي
        تعال راجع قولي انت من الفايكنج

        الرد
      19. 19
        عزالدين

        يا ابو القنفد حقيقة انت ابوالقنفد ويمكن ابوالقنفد احسن منك ما لاحظت انك كتبت اكثر من نصف التعليقات التى كُتبت من غيرك وليه انت شايل كل الامور خيرها وشرها على رأسك اتق الله ما استطعت لأن كثرة الكلام لاخير فيها ولا تنسى انك تمس انس في اهلهم كما رد عليك ابناء كردفان وسيرد عليك ابناء دارفور كمان لأنك لم ترع فيهم الاً ولا ذمة كما لم ترع في غيرهم ممن اوردتهم في ردودك فاتق الله واستغفر الله لي ولك .

        الرد
      20. 20
        ابو القنفد

        ينطبق عليكم المثل الذي يقول التركي ولا المتورك
        لذلك بعض القبائل التي اختلط نسبها بالدم الافريقي اكثر تعصبا وعنفا وينتهج افرادها السلوك التعويضي بدرجة اكبر
        هناك حالة مشابهة لحالتكم في دول اوربا الغربية حيث نجد ابناء واحفاد المهاجرين الروس اكثر المنتمين للحزب النازي والجماعات العنصرية خصوصا التي تنتهج العنف
        مع ان اجدادهم وابائهم وهم في صغرهم تعرضوا لنفس العنصرية من قبل الالمان والفرنسيين وغيرهم لذلك كان جنوحهم للعنف سلوك تعويضي نابع من شخصياتهم المريضة التي تشعر بالنقص وانهم ضحايا في اعماقهم بينما خارجيا ينتهجون السلوك التعويضي بغرض الاندماج والحصول على القبول من بقية افراد القطيع

        الرد
      21. 21
        ابو القنفد

        يا عزالدين لو اراد ابناء دارفور وكردفان الرد فاليردوا على البشير والترابي عن كلام الغرباوية الشهير على لسان الترابي عن البشير والذي اقحم فيه الجعليين من باب الخباثة والفتنة لان البشير والترابي ينتميان لقبيلة البديرية الدهمشية وهي قبيلة افريقية اخرى تركت امجادها وحروبها مع الفراعنة لتجري وراء وهم العروبة
        الملاحظ ان البشير والترابي حريصون كل الحرص على رمي عيوبهم على الجعليين مع ان كلا الرجلين ليس جعلي وانما فلاتي بديري دهمشي

        الرد
      22. 22
        سوداني

        كنتي في بريطانيا تحديدا في محطة البصات في مدينة نوتينهام وكان معاي واحد وكل الكراسي مليانه،جاء اثنين انجليز اخوان في عمر السبعينات قمنا انا صحباي فضلناهم بالجلوس قام سالني من وين انتوا من السودان قال لي انا اشتغلتي في ١٥ دولة احسن شعب هم السودانين واغني دول في العالم استرالية والسودان

        الرد
      23. 23
        جميل بثينة

        ابو القنفذ رجل حاقد على الشعب السودانى واطن هو ما سودانى والله اعلم

        الرد
      24. 24
        ود العشارى

        أبو القنفد اتقى الله قل خير او اصمت

        الرد
      25. 25
        هريسه وهردبيسه

        لازم الصفات السودانية الجميلة دي تورث للاجيال .

        الرد
      26. 26
        سودانية موجوعه

        ونحنا فى الغربة مازالت أخلاق السودانيين تعطرنا بأروع العطور من راعى يتمسك بأمانته ومن ينقذ طفل من الغرق ومن تجد مليون درهم فتسلمه السلطات ومن ومن ومن؟ و لو ما كنت سوداني واسفاى واسفاه واسفاه فنحيا رافعى الرأس ابدا

        الرد
      27. 27
        دار حامد

        قنفد يا قتفد ( يا ابو القنفد) كتاباتك ذي الشوك الفي ضهرك دا وإن دلت علي شئ انما تدل علي تربيتك والاسرة التي جاءت منها وبعد مراجعتي لردك عرفت مكانك الاجتماعي بيننا وعرفت الي اي نوع من الاسر لقد جئت. ومجارات السفاء لاتجدي نفعا والدليل بين كتاباتك اضف الي ذالك الحالة النفسية التي انت فيها. وجاءت هذة التصنيفات التي استنتجتها من الموضوع الذي يتخدث عن صفات السودانين الحميدة وعن خروجك من الموضوع 90 درجة بالتعاليق التي كتبتها واتضح لي جليا من سياق الكلمات التي تقوم بسردها
        اما الشباب الذين سالوك عن بيوت العزبات كنت ابسط شئ تاخذهم معاك الي بيتكم وتحل المسألة من جزورهاوشكرا. وشكرا

        الرد
        1. 27.1
          وجع الوطن

          أ وفيت و كفيت يا دار حامد ….. و اختمها بمنطق اذا نطق السفيه فلا تجبه فخير من اجابته السكوت . فابناء الوطن سواسيه لا فرق بينهم و السودان بلد الجميع و من حق الجميع و الما عاجبه يغرق في النيل .

          الرد
      28. 28
        ابو القنفد

        يا دار حامد
        تريدني ان اخرج عن طوري واسب امك واخواتك
        طيب افهم ان الامر عادي بالنسبة عند اهلك
        طيب لماذا عامل فيها زعلان وكتبت تعليقك الاول
        يالك من علج بليد

        الرد
      29. 29
        ابو روان

        يا قنفود زعلان من كلام الراجل مالك ،، تقديم (العزبات) للضىيوف من قبل اهلك وقبيلتك هو ايضا نوع من الكرم الفياض تجدون على الناس بالطعام والانفس ،،جزاكم الله خيرا

        الرد
      30. 30
        هريسه وهردبيسه

        الشاعر قال … عرب ممزوجه بي دم الزنوج الحارة ديل اهلي … السوداني شال اجمل الصفات من العنصر العربي وترك القبيح منها وشال اجمل الصفات من العنصر الزنجي الافريقي وترك القبيح منها … عشان كده خلطة السوداني اعطت اجمل الصفات عالميا …. وكفى .

        والسادة البتجادلوا …. ما عايزين تاني منكم اي كلمه في الموضوع …. وبس خلاص .

        الرد
      31. 31
        ابو روان

        طيب يا هريسة انت تامر ،، الايام دى (المولد) وانت طلباتك مجابة

        الرد
        1. 31.1
          ساخرون

          أبو روان …………….عسل
          باين عليك سريع البديهة
          أنت ؟ ……………من الجماعة الإجابتهم حاضرة ؟

          ما دايرين نجيب الاسم ونفتح باب كمان

          يكفينا عصبية وعنصرية ……………..كلنا لآدم وآدم من تراب
          و” جعلناكم شعوبا وقبائل لتعارفوا ” ……………لا لتنابزوا ويتهم بعضكم بعضا …………..”
          ” إن أكرمكم عند الله أتقاكم ” ………….فمقياس التفاضل هو التقوى ….وليس القبيلة ولا الشعب
          ولم يمدح الله إلا الأمة إذا تمسكت بوسطيتها التي ارتضاها لها الله ….ولم يمدح قبيلة أو شعب
          لقد صرنا على شفا حفرة من النار ………نسأل الله أن ينقذنا منها

          الرد
        2. 31.2
          هريسه وهردبيسه

          شكرا ابو روان … وما تنسا تجيب لروان واخوانها حلاوة هريسه وسمسية وفوليه

          الرد
          1. هريسه وهردبيسه

            حلاوة سمسمية وحلاوة عروسه

            الرد
      32. 32
        ابوبكر

        الحمد لله هريسة وصل . حلال المشاكل . عافي منك ابشنب .

        الرد
      33. 33
        السنجاوي

        أيها الإخوة الأفاضل اذكروا الله
        ما يلفظ من قول إلا لديه رقيب عتيد
        ومن كان يؤمن بالله واليوم الآخر فليقل خيراً أو ليصمت
        اتركوا هذه العصبية والتنابز بالألقاب فالناس سواسية كأسنان المشط لا فضل لعربي على عجمي إلا بالتقوى
        فاتقوا الله يرحمكم الله
        نعمتان مغبون فيهما كثير من الناس الصحة والفراغ:
        الحمدلله أنتم في صحة وفراغ يحسدكم فيها كثير من الناس فأحسنوا القول واستغلال الوقت أحسن إليكم
        ودمتم إخوة في العقيدة والوطن متآلفين متحابين

        الرد
      34. 34
        ود بلد

        السلوك التعويضي !!
        السلوك التعويضي !!
        السلوك التعويضي !!
        السلوك التعويضي !!
        السلوك التعويضي !!
        السلوك التعويضي !!
        السلوك التعويضي !!
        السلوك التعويضي !!
        السلوك التعويضي !!
        السلوك التعويضي !!

        عزبتونا بالكلمة دي .. ياخي دي كلمة ماعندها اي اساس من الصحة .. والذي اخترعها مواطن خليجي مغمور يريد ان يتخلى الناس عن الكرم وعن الصفات الجميله عشان يعوض نقص فيه هو لانه لا يستطيع ان يرقى الى هذه الصفات عشان كده فكاها فينا !!

        فعليكم الله ياخي من غير زعل دي فلسفه ساكت ياخي الكرم من صفات الله ويحب ان يتصف به عبيده فما تحاولو تدمرو قيمنا بنشر هذه الترهات

        وعذرا ماتزعلو مني انا قصدي الكلمات وليس الأشخاص

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *