زواج سوداناس

يا الكاردينال لو اتصورت مع (بله جابر) بترجعو المريخ تاني يوم



شارك الموضوع :

واللـه غير سيوترات (السقط) التي ظهر بها عادل أبو جريشة ومحي الدين عبد التام في مطار الخرطوم زي (المغامرون الخمسة)..ما شايف ليكم حاجة
تجوا أنتوا يا ناس المريخ بعد دا كلو شيبوب يمسح بي كرامتكم الأرض…وتعملوا ليه (مهرجان)
في ناس كدا بحاولوا يظهروا أمام الكاميرا أو بتعمدوا الظهور في صورة العرس..ديل ناس أبو جريشة وعبد التام
ولدكم اتخطف منكم أقصد (شرد) .. وطلع عديل كدا وقال ما عاوزكم ورجع تاني – الانجاز في ذلك في شنو؟

في حياة الأسرة العادية لو في (ولد) كان مفقود …وغاب كم يوم من البيت أو (شرد) عديل كدا ..لمن يرجع ما بعملوا ليه (مهرجان).
ولا احتفالات.
احتفالات على شنو؟.
خاصة إذا كان اللاعب (شارد) باختياره.
وطلع عن رغبة أكيدة كدا.
وقال عاوز يكوّن مستقبله.
نحن عندنا الولد أول حاجة بعلقوه ليك علقة كاربة كدا.
علقة ليها ضل.
بعداك بشوفو الحاصل شنو؟.
في أولياء الأمور الولد لو طلع من البيت تاني ما برجعو.
ولا يعتب عليه.
خلاص يمشي محل ما فات.
الهلال كدا.
ولدكم اتخطف منكم أقصد (شرد) .. وطلع عديل كدا وقال ما عاوزكم ورجع تاني – الانجاز في ذلك في شنو؟.
العبقرية وين؟.
بعدين مهرجانكم دا حق (التلج) ما عندكم ليه.
مهرجان شنو؟..وفارق جبرة ذاتو طار منكم.
دا مهرجان أم فراش.
زول قال عاوز الهلال ..ومشى بي كرعينو واتصور مع الكاردينال باختياره واستلم مقدم عقده وسافر لي جوبا.
قاردن سيتي ما بمشي ليها زول إلّا بي رغبة.
السفر لجوبا ما بتم ساكت.
ونزل في الفندق.
ووافق على التوقيع في كشوفات الملكية.
الحاجات دي كلها ما بتتم إلّا باختيار الزول وبي رغبتو.
أنتوا بعد الحاجات البعمل فيها شيبوب دا ..فرحانين بيه ..ومعتبرين عودته انجاز.
هسع عليكم اللـه بعد الحاجات دي كلها عندكم ثقة تاني في شيبوب.
زول باعكم.
وأجبركم تدفعوا فيه دم قلبكم.
دفعكم (5) مليار جنيه وهو في (الرديف).
واللـه دي ما كانت (صورة).
الحركات دي لو عملها لاعب في الهلال – تاني في موقف إستاد الهلال ما عاوزين نشوفو.
ولا بمر.
مجرد (مرور) ساكت ما بنقبل بيه.
معتصم عبد القادر ..قالوا ليك فكر ساكت يقعد مع ناس المريخ.
ناس الهلال قالوا ليه علي شنو؟.
طوالي تمشي محل ما فكرت.
أصلو ما في مشكلة.
تاني يوم شالوه ليك من الكشف وأبعدوه من البعثة.
كمان نحن بننتظر (الصور).
والملكية جوبا.
ومفاوضات مع الأسرة.
الحاجات دي نحن ما عندنا.
ولا بنسمح بيها.
عندك رغبة تلعب في المريخ – مبروك عليك – قشة ما تعتر ليك.
اللاعب في الهلال بختلف عن اللاعب في المريخ أنه بيلعب في الهلال عن رغبة وبروح وحماس.
عشان كدا أي لاعب في الهلال عندو (شخصية).
تجوا أنتوا يا ناس المريخ بعد دا كلو شيبوب يمسح بي كرامتكم الأرض…وتعملوا ليه (مهرجان).
يعمل فيكم الحاجات دي كلها.
وفرحانين عشان رجع ليكم.
زول طلع من مطار الخرطوم بي جواز سفره ..وجاء راجع بدون جواز سفره – دا يقولوا عليه شنو؟.
دي شردة عديل كدا.
معقولة زول يرجع ناديه بصورة غير رسمية.
أبو جريشة الذي قال إن اللاعب لا يستحق هذا المبلغ وطلع وصرح وقال ما في لاعب بيلوي ضراع المريخ ..طلع بي نفسو وسافر عشان يجيب اللاعب.
ولابس ليه سيوتر برد كمان.
سيوتر البسو من شيبوب دا.
الزول دا ما مضمون.
أنتوا اللاعب دا وقت كان في الخرطوم ما قلتوا قرش ما بتزيدوه ليه.
تجوا يا أبو جريشة وعبد التام …تعملوا العمائل دي – وأنتوا في السن دي.
العمر برضو ليه أحكام.
واللـه غير سيوترات (السقط) التى ظهر بها عادل أبو جريشة ومحي الدين عبد التام في مطار الخرطوم زي (المغامرون الخمسة)..ما شايف ليكم حاجة.
يمين أبو جريشة اتنفخ ليك (هواء) في البرد دا …هو ذاتو بقى ليك زي عثمان زكي.
أما محي الدين عبد التام – دا اسكتوا خلوه ساكت …تقول الزول البشيل (الإضاءة) في تصوير حفلات الأعراس.
أنتوا الزول دا جبتوه من وين؟.
من مصفاة الجيلي؟.
يتخيل لي كدا – الزول دا جابتو (الصورة).
موش في ناس كدا بحاولوا يظهروا أمام الكاميرا أو بتعمدوا الظهور في صورة العرس.
في ناس في صورة (السيلفي) بمدو رأسهم.
فضول مبالغ فيه.
نحن لو عارفين صورة أشرف الكاردينال مع (شيبوب) بترجع جمال الوالي ..كان خلينا ليكم الكاردينال يتصور مع شيبوب من أول يوم قدم فيه جمال الوالي الاستقالة.
أصلو ما كنا عارفين (الصورة) بتعمل كدا ..تخلي ليك مندوب المريخ يتحاوم بي (4) مطارات.
بطولات ..ومواسير ..وقفز من الطابق الثالث.
دا كلو عشان شنو ؟..عشان (الصورة)؟.
معقولة صورة تخليكم تدفعوا ليكم في لاعب (5) مليار جنيه ..وأنتوا قبل الصورة (200) مليون ما عاوزين تدفعوها لشيبوب.
صورة الكاردينال (شيك على البنك).
مدني الحارث.
وسوداكال.
وتحويل رصيد.
نحن ما عارفين صورة الكاردينال مع لاعبكم غالية كدا.
جماعتكم قرش ما عندهم ..الكاردينال خلاهم ليك يجمعوا أي قرش في الدار من أجل إعادة شيبوب.
لاعب فريق الرديف.
اللاعب الهاوي.
بعد استنزاف أمير كمال …الكاردينال ظهر ليهم بي صورتو مع شيبوب.
البلد قامت وقعدت.
الهلالاب ديل – اسمحوا لي أقول ليكم أنهم (حقارين).
في ولدكم بعملوا ليكم كدا.
طيب في الحاجات التانية بعملوا شنو؟.
المضحك أن مأمون أبو شيبة بي عضمة لسانو قال شيبوب عمرو (30) سنة.
هسع بكون رجعو 20 سنة.
وبابكر سلك قال عندو رباط صليبي.
ومزمل أبو القاسم اعترف أن هدفه في الاتحاد الجزائري فعلاً هدف ما صحيح.
ما كنا قايلين الصورة بتطلع كل هذه الحقائق.
عليه نحن عاوزين نعمل لينا حملة لرجعة بله جابر للمريخ مرة تانية.
بله جابر القاعد ساي دا.
وزعلان.
وما في زول شغال بيه.
ممكن يجيب ليه (5) مليار جنيه.
يا جماعة بله جابر عاوزين نرجعو المريخ.
لا بد من عودة جابر للمريخ.
صورة واحدة للكاردينال مع بله جابر ..بتقلب ليك الدنيا.
كلموا الكاردينال يتصور مع بله جابر.
اليوم التاني ..مزمل أبو القاسم بكتب ليك عمود يقول فيه تسجيل اللاعب في الهلال غير صحيح.
وأن اللاعب لا يمكن أن يوقع في كشوفات الهلال في التسجيلات القادمة عشان عندو (جوز) طاير.
وناس الهلال (الجوز) ما بنفع معاهم.
اليوم الثالث ..جمال الوالي يدخل ليك في الصورة.
والمريخاب يطلعوا يقولوا يا حليل جمال الوالي.
جمال يتكفل بـ (5) مليار جنيه.
عبد التام ما تشتغلوا بيه أصلاً هو ما فاهم أي حاجة.
يطلع يصرح بس.
ويتصور.
الزول دا فاكر الأمانة العامة (صور).
رابع يوم ..المريخاب يخطفوا ليك بله جابر من جوبا.
أقصد من لفة جوبا.
ما فارقها بتموها (جرايد).
ويألفوا ليهم روايات.
يقولوا ليك بله اتسلق الماسورة.
وبله ترك شاحن الموبايل.
وبله ح يطلعوا ليه جواز سفر.
وبله ضحى من أجل المريخ.
وبله ركل مليارات الهلال.
وبله عاد لبيته.
تتكون لجنة برئاسة سوداكال وهيثم كابو مقرر لمهرجان لعودة بله جابر.
يتم الاستقبال في مطار الخرطوم.
والبطولات.
والاحتفالات.
شفتوا بله جابر القاعد ساي دا – ممكن صورة مع الكاردينال تطلعو ليكم (بطل).
بله التاريخ.
بله التضحيات.
بله الجوز.
بله – بله ..بله.
صورة بس مع الكاردينال.
والعجب الصورة كمان لو كانت (سيلفي).
أنتوا عارفين (سيلفي) بله جابر مع الكاردينال مع إعلام المريخ الما عارف حاجة دا ممكن بله جابر دا بي كورتو دي يلعب في برشلونة.
واللـه لو لقينا لينا زول حريف كدا يعمل لينا (فتوشوب).
يمين ناس المريخ يقنعوا ليك أسامة عطا المنان بتسجيل بله جابر في الأيامات دي.
من غير سيستم.
ولا تسجيلات.
أصلو بله جابر قاعد ساكت.
لو عمل ليه (مطعم) ما خسرانة معاهو.
يا هلالاب ..بله جابر أصلو ما كان قاعد يقصر معاكم.
أنتوا ح تبخلوا عليه بي (صورة).
صورة مع الكاردينال بترفعو السما.
وبتخليه ليك بطل السلام.
يا بله أنت اتحرفن.
الأيامات دي اختفى.
وغير شريحة موبايلك.
ومشيتك في الشارع غيرها.
وما تتنازل أقل من (5) مليار جنيه.
قول ليهم الهلال عاوزني.
وخلى باقى (الجرسة) لي ناس مزمل أبو القاسم.
……….
ملحوظة : لكن ما صعبتها على المريخاب.
هوامش
الهلال يجب أن يحسم موضوع مكسيم بصورة عاجلة وسريعة.
كذلك لا بد من الوصول مع كاريكا لحل يرضي جميع الأطراف.
بداية الموسم وبداية الإعداد ما عاوزين مشاكل ..ولا إثارة ولا جوطة.
مدرب الهلال كافالي قال ما عاوز غير مباراة واحدة قوية.
دي فترة الإعداد المثلى.
كافالي ظاهر عليه خطير.
ورأسو كلو كورة.
ادعموه بالاستقرار.
وحلوا ليه كل الإشكاليات والعقبات.
تأخر كاريكا ومكسيم من فترة الإعداد يمكن أن تبعدهما من تشكيلة الهلال في الموسم الجديد.
لا بد من المشاركة في الإعداد من البداية.
المدير الفني للهلال يحتاج إلى رؤية جميع لاعبي الهلال.
مجلس الهلال مع التنسيق مع المدرب يجب التجهيز لمباريات أفريقية قوية في الخرطوم.
مواجهة فريق من مصر ..شيء لا بد منه طالما أن الهلال محتمل يواجه الأهلي الليبي.
الكورة المصرية قريبة من الكورة الليبية.
كذلك يفضل مواجهة أندية من غانا لتماثلها مع كورة جنوب أفريقيا.
الهلال يملك أكثر من 30 لاعباً ..يجب إتاحة الفرص لهم جميعاً.
الجميل أن الهلال غادر لتونس بـ (30) لاعباً.
أنتوا وين خالد النعسان؟.
الزول دا اختفى رسمي.
…………..
عاجل : بله جابر قال صورة مع محمد عبد اللطيف هارون ساكت ممكن يجهجه بيها الجماعة.

شارك الموضوع :

تعليقات الفيسبوك

تعليقات


1 التعليقات

      1. 1
        ايو جهاد

        يا محمد عبدالماجد ما عندك موضوع ولو كتنو صحيح رجال انت و الله الكار بتاعك دة سجلو شيبوب … و شيبوب إن شاء الله تانى فى المريخ ما حيلعب .

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *