زاهر بخيت الفكي

ودالشول وحكاية رفع الدعم..!!


الدعم يعنى شنو يا يمة..؟
هكذا سأل المكاوى وكعادته دائماً والدته حاجة الشول..
يعنى يا ولدى الزول يدى أخوه قروش أو حاجة تانية يتساعد بيها زى يوسف (الضيعوك) ده من ما سافر وروق بقى يرسل لى أهلوا فى القروش (بالرُبط) وجاب لى أحمد أخوه البابور يشتغل بيهوا فى حواشته وحواشات الناس عشان يساعد بيهوا رقبتوا واولادوا ، فهمت يا ولدى ده يعنى دعم ، شوف أسى الأمينة المُسويها أبوك الله يرحمه للمرق ده كان خلاهوا ساى كان وقع زمااان يعنى دعم بيها البيت من الوقعان ، بعدين الكلام ده بتجيبوا من وين كل يوم تمرق جوة الحلة تلفح ليك كليمة وتجى جارى بيها ، اسأل الناس البتلفح منهم الكلام ده كان بوروك ليها..
سألتهم بس ما اشتغلوا بى قالوا لى ده موضوع كبير ما بتفهموا وأسى أنا فهمتوا وعشان هم كانوا بتغالطوا مع (أب زنقلة) هو قال ليهم لازم يرفعوهوا كلوا كلوا واصحابى قالوا ليهوا إنت عشان مستفيد وشبعان وما بهمك كان رفعوهوا لكن الناس المساكين ذنبهم شنو ..
برفعوهوا كيف يعنى والبرفعوا منو ..؟
اخير ليك يا ولدى تخلى السوالات دى انت مالك وعندك ليهوا شنو..
قالوا ليهوا انتوا قبال كده ساعة رفعتوهوا الله بس ستر وقعدتوا (تحنكوا) فى الناس الدعم ده بنفعكم وبريحكم وبوفر ليكم البنزين والغاز والعيش والحاجات دى ، لمن رفعوهوا شبعوا الشبعانين وروقوا زيادة والفقرانين بقوا تعبانين ، قام (أب زنقلة) قال ليهم لا بالعكس المرة دى حا يزيدوا المرتبات والعلاوات فى السنة الجديدة عشان الناس التعبانين ديل ما يتأثروا بالزيادة البتجى دى ونحن ان شاء الله ما بنقصر معاهم فى قفة الملاح حقتم وواقفين معاهم وكلام كُبار أنا ما فهمت منو حاجة بس أصحابى فهموه وقالوا ليه كلامك ده ما مقنع واعملوا حسابكم من الحصل المرة الفاتت المرة دى بكون أقوى ، وبعدين الغاز ده ما رفعتوا منو الدعم أسى وينو..
ولا اشتغل بيهم الشغلة مرق تلفونوا الجلكثى ودور عربيتوا وفااات..
شغال شنو يا أمى أب زنقلة ده..؟
أب زنقلة ده منو إنت الهاوسنى بيهوا من الصباح أنا ما بعرفوا..
والله كان شفتيهوا سمين سمنة ونضيف جنس نضافة يا أمى و طوالى بجى لى ناس الجندى وعربيتوا كبيرة وسمحة شديد زمان بجى بى بنطلون لمن كان ضعيف شوية أسى بلبس جلاليب بس ومرات بجى لابس معاها سديرى ..
أنا ما قاعدة أمرق يا ولدى ورينى اسموا ومن وين امكن اعرفوا..
بقولوا ليهوا أب زنقلة ما عارف اسموا منو ..
طيب كان رفعوهوا البجينا شنو..؟
كان تجعلنى ليك من الناصحين خلى البتسوى فيهو ده وما تلفح الكلام هم مخيرين يرفعوا ولا يخلوا الله ما بنسانا ولا بنساهم هم بعدين..
بلا أقنعة..
صحيفة الجريدة..