زواج سوداناس

حسين الصادق يحطم أسطورة (عداد) ترباس.. التفاصيل الكاملة لـ(أجور) الفنانين في رأس السنة



شارك الموضوع :

قبيل سنوات نسبت احدى الصحف للفنان كمال ترباس عبارة شهيرة وهي : (أنا عدادي الككو ما بنطو) تلك العبارة صنعت لترباس (أسطورة) جديدة فيما يتعلق بأجور الفنانين، تلك الاسطورة التي ظلت حاضرة لسنوات عندما يأتي الحديث عن أعلى الفنانين أجراً في السودان، قبل أن يباغت الفنان الشاب حسين الصادق الجميع خلال اليومين الماضيين وينفرد بصدارة الفنانين الاعلى اجراً في حفلات رأس السنة بعد أن وصل رقم التعاقد معه لحفل واحد أكثر من 90 ألف جنيه.

الفنان الكبير كمال ترباس حل في المرتبة الثانية خلف حسين الصادق حيث بلغت قيمة التعاقد معه لاحياء حفل رأس السنة (75) ألف جنيه، وهذا الرقم يعتبر كبيراً جداً بمقاييس اجور الحفلات الاخرى للفنانين الشباب، مما يعزز أن ترباس لا زال يحافظ على رونقه فيما يختص بالاجور الاعلى في السودان.

الفنان الشاب طه سليمان حل في المرتبة الثالثة وذلك بعد أن وصل أجره في حفل واحد لليلة رأس السنة الى (64) ألف جنيه هذا بخلاف الحفل الآخر الذي لم نتمكن من الحصول على قيمة تعاقده، بينما تؤكد مصادر مطلعة أن طه سليمان من أكثر الفنانين الذي طالب بهم الجمهور ليكونوا حضوراً في تلك الليالي.

مجموعة من الفنانين تراوحت أسعار التعاقدات معهم لاحياء حفلات رأس السنة داخل الصالات ما بين (20-30) ألف جنيه ومن بينهم جمال فرفور وعاصم البنا وانصاف مدني، بينما تؤكد مصادر عليمة أن انصاف مدني ستقوم باحياء عدد من الحفلات في صالات مختلفة الامر الذي يمكن أن يرفع سقف ايراداتها في تلك الليلة الى أكثر رقم كبير. بالمقابل اختار عدد من الفنانين الاعلان عن حفلاتهم في ليلة رأس السنة عبر اندية ومسارح العاصمة وحرص أولئك الفنانون على وضع قيمة أسعار تذاكر الدخول لتلك الحفلات، بينما ظلت أرقام التعاقدات معهم عبر الشكرات المنظمة محاطة بسياج من السرية الشديدة، فيما تراوحت أسعار الدخول لحفلاتهم عبر التذاكر ما بين (50-100) جنيه حيث سيكون حفل الفنان أحمد الصادق بالمسرح القومي هو الاغلى بواقع (100) جنيه لدخول الفرد، بينما وضعت فرقة عقد الجلاد سعر (40) جنيه لحفلها بودنوباوي، فيما بلغ سعر تذكر الدخول لحفل كورال الموسيقى بمعرض الخرطوم الدولي (50) جنيهاً.

صحيفة السوداني

شارك الموضوع :

تعليقات الفيسبوك

تعليقات


22 التعليقات

إنتقل إلى نموذج التعليقات

      1. 1
        Ema

        با حليلك يا الكابلى رد الله غربتك ورحمة الله عليك يا وردى

        الرد
      2. 2
        ود جعل

        انصاف مدني .. لو غنت بالدلوكة بس، ممكن تمشي أربعة حفلات بالراحة .. عشان الموضوع بيكون ساهل .. لا فرقة موسيقية لا أسلاك لا دوزنة .. بس تطبق دلوكتها تحت ايدها .. و تسوق معاها الكورس !

        شوف اسعار التذاكر دي .. دا غير تكلفة القشرات .. ونص الخرتوم تلقاها مساهرة .. و بعد شوية يجوا يشتكوا لينا من ارتفاع اسعار الفول و موية الفول !!

        الرد
      3. 3
        عمر

        هذا الاقبال (على انصاف الفنانين) يدل على انحطاط الذوق العام (ماعدا القامة ترباس طبعا) .

        ربنا يحفظ العمالقة , عبد الكريم الكابلي ومحمد الامين وصلاح بن البادية وحمد الريح وصلاح مصطفى ومحمد ميرغني وعثمان مصطفى

        رحم الله عثمان حسين , وردي , زيدان ابرهيم , مصطفي سيد أحمد,الامين عبدالغفار , عبدالمنعم الخالدي .

        الرد
      4. 4
        Naser

        والله ماخلينا للحبش حاجة..التقول بلدنا معمرنها…غنى ورقيص وضياع زمن وقروش في الفارغة والمقدودة..ان شاء الله يلم فيكم إلتهاب حلق مايخلي ليكم صوت تغنو بيهو..نشوفكم بعد داك تعملو شنو..عالم تافهه

        الرد
      5. 5
        أخو العازة ....مهلب

        على السودان السلام..
        هنالك صرف خيالي على الكورة والفن ورغم ذلك لم يخرج السودان فيهما إلى العالمية ولم يغادر المحلية ..فلذلك أرى على الدولة أن تتدخل لتوقف هذا البذخ ..!
        أنا لا أرى أن هنالك لاعبا سودانيا يستحق أكثر (500ألف جنيه) ولا لاعبا أجنبيا يستحق أكثر من (800ألف جنيه)..
        أما الفنانين فلا يوجد فنان صاعد في السودان يستحق هذه المبالغ الخرافية هؤلاء يبتزون الشعب .. لو أراد وردي أو غيره فعلهم لبنو اليوم القصور .. الفن رسالة قبل أن يكون مال.. ماذا قدم هؤلاء ؟
        فالنجومية والأضواء التى منحت لهم لا يستحقونها ! وجد هذا الجيل معينات كثيرة ولكنه لا يزال يردد ما قاله سابقيه ..وحتى إجتهاداته ليست تذكر !

        الرد
      6. 6
        محمد احمد

        يا اخوى دوله شنوا البتدخل ….؟؟؟؟دى سياسه الدوله زاتا كل الشباب لازم يكون مغبى وملخوم بتوافه الامور حتى لا يفكر فى الامور الجاده وينسى انو فى مرحله ممكن يعمل التغيير المطلوب جزء مخدرات وجزء تافه …مبارين الغناء والباقى مسطول او مبارى ليهوا واحد عامل فيها شيخ او فكى ما عارف…الامور حساباتها كتيره ودقيقه ……انتوا المخدرات البتدخل البلد بالحاويات دى ليه اصلا ما اعلن عن اصحابها منوا او عملوا ليها شنوا او بعد قبضوها مشت وين وليه ما اعدموها امام الناس زى ما عمل نميرى الله يرحموا للبيره والويسكى زمان …..تساؤلات كثيره وهموم كبيره المساطيل ديل ما بيقدروا عليها او يفهموها…

        الرد
        1. 6.1
          عباس احمد

          صدقت دائما ابحث عن المستفيد تلقاه وراء كل المصائب ولكن كل اول له آخر ولو دامت لغيرهم ما وصلت اليهم .

          الرد
      7. 7
        محمد احمد

        الله ينعل الكيزان …الله ينعل الكيزان …الله ينعل الكيزان ….والاحزاب الله ينعلهم فى اربعين والترابى فى الف والبشير الى ما لا نهايه

        الرد
      8. 8
        محمد احمد

        اسى الشباشب الجايه تسمع الجزم ديل لو قالوا ليهم صلاه قيام ليل او استثغاء او تهجد ما حا يجوا ….ولو جو ميه فى الميه حا يستنوا البنات بعد الصلاه او يبرموا ليهم سيجاره فى طريقهم للبيت…..عالم فارغه ومغبيه

        الرد
      9. 9
        الكترابة

        تستاهل ياسعادة السفير لانك الوحيد العندو جديد ومتجدد

        الرد
      10. 10
        السر فضل الله

        عالم عجيب يابلد ربنا يلطف

        الرد
      11. 11
        كايدهم

        والله الواحد مرات مايعرف يضحك ولا يبكي .. بالله عليكم احسبوا كمية الاموال التي ستعطى فقط للفنانين ناهيك من ايجار الصالات وعائد الوجبات وايجار مواصلات وصرف كهرباء .. من اجل ماذا هذا كله؟ لقضاء ساعتين او ثلاثة لاستمع لفنان يمكن ان اشهاهده في التلفزيون ..
        وثاني والله الشعب السوداني شعب ما يستحي يدفع كل هذه المبالغ في اللهو والترفيه ويقولوا مفلسين وجعانين ..

        الرد
      12. 12
        صلاح

        بدون تعليق ااااااااااخ 90 مليون جنية في ليله واحده وبرضوووو قولوووووو الشعب السوداني جعان ومفلس وووووووووو

        الرد
        1. 12.1
          ابزرد

          ياخ ديل ما الشعب السوداني الشعب السوداني جائع ومريض وراقد في المستشفيات الحكومية المعفنة جدا وبنوم بدري عشان يقوم يلقط رزقو ويساكك صفوف الغاز والمواصلات البقت معدومة بصات الوالي كلها بركت

          الرد
      13. 13
        مرتضى السر

        ياناس انتو بتتكامو كيف الناس البتمشى الحفلات دى فئة معينة عندها قروش وفاضية شغلة ابدا مابتمثل الشعب السودانى ولا حتى مواطنو العاصمة ناهيك عن اهلنا فى الريف .والسلام

        الرد
        1. 13.1
          الطريفي ... زول نصيحة

          منو القال ليك فئة معينة ..

          انت عارف السودان بصفة عامة ما فيهو طبقات أو فئات، خاصة لمن الحكاية تجيب ليها مناسبات اجتماعية أو غناء أو كورة .. يعنى تجي تلقى الصالة مليانة … ما تقدر تفرز اللي أبوها ملياردير من اللي أبوها رزق اليوم باليوم ….
          بعدين معقول (الفئات المعينة) دي تملأ الصالات دي كلها !! شوف في كم صالة وسعة الصالة كم ؟؟؟ … دا غير المسرح القومي، و استاد ود نوباوي، و مسارح أخرى سعتها بالآلاف برضو …

          الحقيقة نحن ناس فارغة ساكت !!!

          الرد
      14. 14
        خلوها مستوره

        مال السحت لم يبارك فيه فاقد تربوى

        الرد
      15. 15
        مرتضى السر

        عزيزى الطريفى انا معاك فعلاً نحن ناس فارغة مافى كلام

        الرد
      16. 16
        محمد عبدالدائم

        حاجة غريبة عايزين كمان تضيقوها على الشباب ؟ خلوهم يرفهو ويطربو وينسو الهم والغم النحنا فيهو دا . بالله عليك لمن يجيك واحد كضاب زي البشير العولاق دا في الفضائيات ويقول ليك عام 2016م فيهو مفاجأة للشعب السوداني ويطلع بيضحك علينا . شوف الاحباط والغيظ والغضب البيحصل من دا . خلو العيال تفرفش وتطرب وتضرب الهم بالفرح .

        الرد
      17. 17
        هريسه وهردبيسه

        90 مليون ………بعض الشباب محتاج للضرب بسوط العنج .. عشان يتعدلوا شويه

        الرد
      18. 18
        أزرق

        كتير من علمائنا الأجلاء تلقوهم ما إتعشوا ليلة راس السنة.

        الرد
      19. 19
        @0

        ربنا يهديهم هذه مسئوليه ولي الامر بس من حقنا الايشوهو البد بملصقاتهم السخيفه علي الابواب والجدران

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *