منوعات

وزير الكهرباء للصحفيين: هل انتخبكم المواطن عشان تتكلموا باسمو


صوب وزير الكهرباء معتز موسى انتقادات عنيفة للصحافيين بسبب تناول مشكلة قطوعات التيار الكهربائي المبرمجة، وقال إن الوزارة تدفع “قروش للإعلان” بالصحف عن برمجة القطوعات بغرض الصيانة، بيد أن الصحفيين ينتقدون القطوعات في الصفحة الثانية التي تسبقها صفحة مدفوعة القيمة، منتقداً حديث الصحفيين عن أنهم يمثلون المواطن قائلاً: “هل انتخبكم المواطن عشان تتكلموا باسمو؟”.
ووجه موسى خلال حديث مع الصحفيين في خاتمة أعمال اجتماعات اللجنة السداسية المشتركة لسد النهضة الإثيوبي بالخرطوم، أمس، انتقادات حادة لمسلك الصحفيين في انتقاد القطوعات وقال: “أقروا المعلن في جرايدكم.. نحن معلنيين عن برمجة قطوعات ودافعين قروش للإعلانات وهي تذكر أن لدينا صيانة لكل الخطوط ومعروفة من سنة 1908 الناس بصينو الكهرباء في الشتاء ما عايزين نصين في الصيف يبقي قطع وزهج”، وأضاف: “القطوعات مبرمجة ومعلنة وأنا كاتب إعلان ونعتذر للحي الفلاني يجي صحفي مهمته في الدنيا أنو يقرأ ويكتب ما هو العجز ولماذا الصيانة؟، إن شاء الله نقطع الكهرباء السنة كلها مش مبررة القطوعات”، واعتبر الوزير أن الوزارة شجاعة بإعلانها برمجة القطوعات وكتابة البرمجة، وأبان أن عملية الصيانة ستنهتي في يناير المقبل، ودخل الوزير في جدال مع أحد الصحفيين حول أن الصحفي يمثل المواطن فيما ما يكتب، ورد قائلاً: “هل انتخبكم المواطن عشان تتكلموا باسمو؟”، وجزم الوزير بأنه لم يتلق شكوى من أي مواطن بشأن برمجة القطوعات، وتابع: “ما في أي مواطن اشتكى لي والمواطنين مساكين”

صحيفة الجريدة


‫12 تعليقات

  1. حتى الصحفيين ثقافتهم قليلة فى مثل هذا الموضوع
    بدر كان بيقولوا اى بيت فيه مغترب وحسع بنقول اى بيت فيه اعلامى عشان كده بيكتبوا اى شئ وخلاص

  2. ده عشان قريب الرئيس مركب ماكنة رئيس قال المواطن إنتخبكم هي وين الإنتخابات البتتكلم عنها دي، هو المواطن لو مامسكين زي نوعك ده يبقى وزير كهرباء وما عارف طز من سبحان الله

  3. يعني الاعلان المدفوع القيمة عشان تشتروا بيهو الجريده والصحفيين ما يتكلموا .وبعدين مافي مواطن اشتكى يعني الا الناس تعمل مظاهرات عشان تعرفوا المشاكل. اي مواطن متضرر من القطوعات .
    والله صحي المواطن مسكين

  4. لا مواخذة المواطن بقى عامل زي اسد الماسورة ..لو لقى طريقة بيخمشك يا القرد….
    المواطن يستحق كل البيحصل ليهو و كل من ال يسوى المبالبس الستراهو بيسب فيه…
    مرة في كل بيت في زاني او سكير…
    مرة المواطن كسلان….
    مرة ما ياكل ضفادع بدل لتعويض اللحم…
    و مرة هو المواطن اشتكى لابو اهلكم عشان تتكلموا باسمو…

  5. . مافي مواطن اشتكى ليكم ……………..الناس قاعدة تشتكي لرب العالمين
    . برمجة القطوعات بغرض الصيانة……….. المعنى صيانتكم دي طول السنه ( رحمة الله علي المهندس محمود شريف )
    . نحن معلنيين عن برمجة قطوعات ودافعين قروش للإعلانات…………….. المعنى تصموا خشمكم عشان تاني ما ح نعلن عندكم
    . هل انتخبكم المواطن عشان تتكلموا باسمو؟…………………..و وووو ههههههههههههه

  6. الغريبة قالو الزول كان دوبلوماسي قبل التحاقة بوزارة الكهرباء وها هو يوكد انه فاشل في الدلوماسية وفي ادارة الكهرباء ,,,, طيب الزول يكون ناجح في شنو ياجماعة؟

  7. اعلاناتكم بقت رشوة للصحفيين! ..وبعدين الصحفيين ديل مواطنيين زيك ومضررين .
    بعد كده الا نرفع علي الوزير (وشركته) قاضايا في محاكم
    يا تشوفو شغلكم او تمشو .. حواء والده

  8. يا غبى الصحفيين يمثلون المجتمع وهم جزء من المجتمع …. وأختشى أنت من يوم مسكت الوزارة بدأت الكهرباء تقطع ما عارفين أنت ثورة مضادة مدسوس والا هناك ثورة مضادة داخل الوزارة