زواج سوداناس

جواز شيبوب و(جواز) شقيقة تراوري وجواز خالد النعسان الحاصل فيهم شنو؟



شارك الموضوع :

الكورة يبلعبوها ناس اسامة عطا المنان وسمير فضل ..ما ناس كاريكا وامير كمال وعماري
ناس الهلال لقوا ليهم طريقة لي (شيبوب) ما يلقوا ليهم طريقة لي الميرغني كسلا
قرار لجنة الاستئنافات الذي ابقى الرابطة في الدوري الممتاز لم يتضرر منها مريخ كوستي مع ذلك مريخ كوستى طعن في القرار
المباراة ممكن تلعب في استاد الخرطوم اليوم ..ونتيجتها تحددها لجنة الاستئنافات بعد شهر ونص
النهضة ربك قدمت (شكوى) للاتحاد العام ..اكدت فيها احقيتها بالصعود للممتاز.
من حقها.
يعني بقت على (النهضة ربك).
من حق (الموردة) ذاتها تقدم طعن.
وترجع الممتاز الليلة قبل بكرة.
خلوا الموردة تشوف ليها زول في لجنة الاستئنافات ..برجعها ليكم الممتاز.
الموردة بكل تاريخها وعراقتها نزلت ليكم من (الممتاز).
وطبقت القانون.
ليه الاندية التانية ما بتلتزم بالقانون؟.
يمكن عشان ما في (قانون) في الاساس.
يلتزموا بي شنو؟.
يلتزموا ليهم بي حاجة غير موجودة.
الدوري الممتاز السنة دي زي (الكاميرا الخفية).
دوري (غريب) – اصلو ما مفهوم.
اغرب دوري في الدنيا.
البرمجة يضعها (البرلمان).
النتيجة يحددها (الاتحاد).
الفريق المفروض يهبط (بيصعد).
والفريق المفروض يصعد (بيهبط).
حاجة ما مفهومة.
ولا في زول عارف حاجة.
قروش بتدخل (يورو) وبتطلع (جنيهات).
ولا في زول براجع.
ولا في زول بيحاسب.
حكاية (الصاعد هابط) – اطبقت في النهضة ربك قبل ما تصعد.
و(الهابط صاعد) ..طبقها فريق الرابطة كوستي من غير ما يهبطوا.
صعدوا طوالي.
دي اول مرة تحصل في الدنيا.
دوري غريب.
اقترح على نادي الرابطة كوستي يعسكر لامتحانات المعادلة.
يعسكروا في نقابة المحامين.
الكورة بقت تتلعب في (المكاتب).
تتلعب في (القوانين).
في المواد.
لاعب يضرب ليه (حكم) بونية ..يشارك في المباراة التالية طوالي.
بكري المدينة لغاية الآن ما وقف.
ولا في زول سألو.
ولاعب ضرب ليه حكم قبل سنة ونص ..(بتقرير مزور) فريقه يفقد نتيجة المباراة.
دي قابلتكم.
سمعتوا بيها قبل كدا.
فريق يعمل (فوضى) يطلعوا ليه (الشرطة) بين الشوطين.
فريق يتعادل ..يعتبروه (فائز).
يخسر يعيدوا ليه المباراة.
وصيف يتقدم عليه الهلال بـ (9) نقاط يشيل (الممتاز).
فريق ينسحب من الممتاز …وينسحب من (السنترليق)..يخلوه في (الممتاز).
وفريق ما لعب (السنترليق) يصعد الممتاز.
تتخيلوا الفريق الذي لعب السنترليق وهو فريق (النهضة ربك) ما صعد.
والفريق الذي لم يلعب السنترليق وهو فريق (النيل شندي) صعد للممتاز.
تتخيلوا الفريق الذي انسحب من مباراة واحدة وهو فريق (الميرغني) كسلا هبط من الممتاز.
والفريق الذي انسحب من (4) مباريات وهو فريق الامل عطبرة بقى في الممتاز.
الدوري حقنا دا (كورة) وإلّا حمرة عين؟.
شكوى (7) شهور ما يحسموها.
وشكوى يحسموها في (72) ساعة.
ناس النهضة ربك قدموا شكوى.
وناس الميرغني كسلا قدموا شكوى.
ابيي الشكاوي الطلعت فيها في الكورة في السياسة ما طلعت.
ابيي بقت منطقة تحويل (رقم وطني).
اي لاعب من جنوب السودان يطلعوا ليه رقم وطني من (ابيي).
ناس النهضة ربك احسن يستفيدوا من وقتهم وشكوتهم يقدموها للهلال.
يقدموها للكاردينال.
لجنة الاستئنافات دي لا بتحل ولا بتربط.
ديل قاعدين ساكت.
ناس الميرغني كسلا ..احسن ليهم برضو بدل ما يتعبوا ساكت – يقدموا الشكوى للهلال.
ناس الهلال بشوفوا ليهم طريقة.
بلقوا ليهم حل.
ناس الهلال لقوا ليهم طريقة لي (شيبوب) ما يلقوا ليهم طريقة لي الميرغني كسلا.
الميرغني يستاهل كل خير.
الطريف ناس مريخ كوستي قدموا (طعن) في قرار لجنة الاستئنافات.
ولجنة الاستئنافات لا يطعن في قرارها.
لكن الشغال بالكلام دا منو؟.
الناس دي شغالة على كيفها.
مريخ كوستي زعلان وطاعن في بقاء فريق الرابطة كوستي في الممتاز.
والمريخ والرابطة الاتنين من (كوستي).
لكن ظاهر عليهم زي الهلال والمريخ في ام درمان – الشحمة والنار.
نحن كنا فاكرين الحساسية دي في الهلال والمريخ فقط.
ما كنا فاكرنها موجودة بين فريقين من الاقاليم ينتمان لمدينة واحدة.
قرار لجنة الاستئنافات الذي ابقى الرابطة في الدوري الممتاز لم يتضرر منها مريخ كوستي مع ذلك مريخ كوستى طعن في القرار.
انتوا فاهمين حاجة.
كورة ما في.
كورتنا بقت في (الجرايد).
كورتنا في (المكاتب).
في الطعون.
الكورة يلعبوها ناس اسامة عطا المنان وسمير فضل ..ما ناس كاريكا وامير كمال وعماري.
الكورة بشكلها (التقليدي) داك انتهت.
المباراة ممكن تلعب في استاد الخرطوم اليوم ..ونتيجتها تحددها لجنة الاستئنافات بعد شهر ونص.
عادي دا بيحصل في الكورة السودانية.
لكن الحمدلله بعد (الفوضى) دي كلها الهلال مازالت يده العليا.
بفضله بقى الامل في الممتاز.
اصلو قانون مافي.
وبفضل الهلال عادت الرابطة للممتاز.
نزلت شهر ونص بس ورجعت تاني.
ناس النهضة لو عندكم قضية تعالوا للهلال.
يا ناس الميرغني لو عندكم مشكلة امشوا للهلال.
الهلال لو ما حسم الامور دا مفروض ما يلعب في الدوري القادم.
ح نطلع بنفس النتائج.
لازم النقاط توضع فوق الحروف.
لو ما قدرتوا تحسموا (الفوضى) دي ما تلعبوا.
ما تتعبوا الناس ساكت.
ما تفوروا دمهم.
النهضة عندها قضية.
والميرغني عندو قضية.
والقانون بنصف النهضة وبنصف الميرغني.
واذا ما في قانون ..الهلال قادر على ينصفهم بطريقته.
مريخ كوستي هو ذاتو لو عندو قضية ..خلوه يمشي لي ناس الهلال.
لو عندو طعن ..يطعن للهلال.
الهلال بحل ليه مشكلته.
ناس اسامة عطا المنان – شغالين في عملهم الخاص.
وكالات سفرهم.
وحاجاتهم التانية.
ما فاضين للكلام دا.
بيشغلوا الناس في كل موسم بهذه القضايا.
كورة بقت ما في.
الكورة بقت (ازمات).
لو ما حسمتوا ازمات الموسم الماضي ..ما تدخلوا الموسم الجديد بي ازماتكم دي.
الناس فترت.
الناس اعصابها حرقت.
اللعب في شنو؟..والبطولة بتمنح لفريق متأخر بـ (9) نقاط.
والاندية التانية تصعد وتهبط على كيفها.
ولا في زول بقدر يسألها ولا في زول بقدر يقول حاجة.
يا ناس الوزارة.
يا ناس البرلمان ..لو عندكم (تدخل) – ادخلوا الآن.
احسموا المواضيع الآن.
ما تخلوا الحكاية بعد ما تولع ..وتظهروا.
الآن في عدد من القضايا.
في ملفات معلقة.
احسموها ..خلونا ندخل دوري (نضيف).
اطلعوا لينا من (الفوضى) دي.
لو الاوضاع استمرت على ما هو عليه ..ح تحصل كارثة.
حلوها.
……….
ملحوظة : ينتظروا الكارثة لمن تقع ..ثم يظهروا لك بعد ذلك.
هوامش
ممكن صحفي شاطر يوريني معسكر المريخ فيه كم لاعب في اديس ابابا.
وممكن نعرف موضوع جواز خالد النعسان وصل وين؟.
وزواج شقيقة تراوري حصل فيه شنو؟.
ناس مالي ديل قالوا ليك حفلتهم بتشتغل نص موسم كامل.
يعني يا ناس المريخ اقنعوا من تراوري.
واقنعوا بالمرة كدا من مازن شمس الفلاح.
وقت الموضوع جاب ليه قناعة.
الشركة الراعية للممتاز.
والشركة الناقلة له.
لو ما اتحسمت المواضيع والشكاوي ..مفروض ما يدخلوا ليهم في دوري (منسوف).
إلّا اذا كانت الدولة بترعى وتدعم (الازمات).
لازم اول حاجة يحلوا الحاجات المعلقة دي.
الوك مع المريخ وما قدر يضمه لكشفه الافريقي.
وشيبوب مع الهلال والمريخ ضمه لكشفه الافريقي.
انتوا الوك ما قدرتو تحلوا مشكلتو ..تحلوا مشكلة شيبوب.
اظن شيبوب عرف حقيقة المريخاب الآن.
مجلس المريخ اشتكى شيبوب.
وعاوز يفقده.
فاقد الشيء ..لا يمكن ان يعاقبه.
الهلال شال نصيبه من الدولة.
المعز محجوب عندو مليار ونص من قروش الدولة في المريخ.
حقنا نحن ما بنخليه.
الهلال دخل المرحلة الثالثة في معسكره.
والمريخ مازال بـ (14) لاعب في اديس ابابا.
ليهم حق ما يهتموا بالموضوع دا.
الجماعة ديل بيحسموا النتائج في المكاتب.
بيلعبوا ليهم ناس اسامة عطا المنان.
الجابرهم شنو يعسكروا ليك بي ناس خالد النعسان.
خالد النعسان دا من البداية قلنا ليكم (نعسان).
ما صدقتونا.
جواز ما طلع ليه.
جواز شيبوب ..شالو ناس الهلال.
جواز خالد النعسان مالو ما عاوز يطلع.
اما (جواز) شقيقة تراوري فحكايتو حكاية.
اللـه يحفظ الهلال من الاصابات.
ويكفينا شر العين.
وشر الكلام الكتير.
……….
عاجل : الكلام دا غير الجوهرة الزرقاء.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *