جرائم وحوادث

قصة اذكي سرقة في الخرطوم، سرقة محل ذهب تحت حماية الشرطة، وانباء أنه مملوك لوزير سابق


شهدت العاصمة السودانية الخرطوم صباح الثلاثاء أغرب عملية سرقة لمحل ذهب حيث قدرت المسروقات بحوالي 30 كيلو ذهب مشغول عيار 21 “حوالي 12 مليون جنيه سوداني، 12 مليار جنيه بالقديم” وتعود غرابة القصة للحيلة التي إستخدمها اللصوص لتنفيذ عملية السرقة.

وتقول زوجة أحد جيران محل مسك الختام الذي تعرض للسرقة “منى بشير” (محل الدهب الذي تمت سرقته فجر الثلاثاء في سوق امدرمان… وماقادرة اصدق انه الضابط المناوب يكون ساذج للدرجة دي وماعنده اي حس أمني..
طبعا مسك الختام من اكبر محلات المجوهرات في سوق امدرمان نوع بتكون بتعاين وفاتح خشمك من الدهب الفيه.. واضح انه المجرمين بقوا بحضروا هوليوود كتير.. غايتو اعملوا حسابكم علي اموالكم…

وأضافت “منى بشير” بحسب ما نقله محرر موقع النيلين عنها
اغرب عملية سرقة تمت يوم الثلاثاء في سوق امدرمان شارع الصياغ .
حضر شخص الي قسم شرطة السوق الساعة 5 صباح الثلاثاء بعربة بوكس موديل 2015 يحمل فيها حديد و زنك و ادوات حدادة كاملة و 3 عمال بابرولات شغل ..
قابل الضابط المناوب بالقسم زاعما بانه صاحب محل مجوهرات مسك الختام وانه ينوي اجراء صيانة و اصلاح المحل وطلب ان يمنحوه اذن لابرازه لدورية الشرطة التي تحرس الشارع هناك وان المغزي من العمل باكرا ( بعد صلاة الصبح مباشرة ) خوفا من احداث دربكة و زحمة بالشارع خصوصا انه ضيق .
منح صاحبنا ما يريد ( تصديق) و توجية لعربة الدورية حتي لا يعترضونه .. بل و اصتحبوه بشرطي ليحمل التوجيه .
حضر المذكور و بدا يركب في المظلة كما بدأ العامل المتخصص في فتح الطبل في كسر المحل و دخل الاخ وتمكن من المجوهرات و ثم غادر الجميع المحل بعد ان سرقوا 30 كيلو دهب مشغول .

وأضافت منى بشير (للأسف المحل ما من النوع البجمع ذهبه او بضاعته المعروضة داخل الخزنة.. بيخليها معروضة في البترينات الزجاجية..
وفي اثناء عملية اللحام وقطع الاقفال حوالي الساعة ستة صباحا.. مر واحد ببيع الجبنة ومتعود يضع لسيد المحل القهوة بتاعته.. وسألهم عن (ود العيش) سيد المحل ردوا عليه انه ماجاء لسه وهم ارتبكوا ومالموا كل البضاعة المعروضة بسبب الارتباك وطبعا الشارع بقت فيهو حركة ناس وخافوا وفجأة حضرت عربة اتوس رفعوا فيها الشوال اللي اتملأ ذهب وركبوا وهربوا).

وتداول نشطاء معلومات غير مؤكدة بأن الوزير السابق “مصطفى عثمان اسماعيل” شريك في محل الذهب الذي تمت سرقته.

وقال ناشط (ان ثبت ان متجر المجوهرات المسروق بسوق امدرمان مملوك لمصطفي عثمان وزير الخارجية الاسبق فان الحكومة تكون قد اصيبت بحرج بالغ،، الحرامية ديل اكيد معارضة !).

الخرطوم/معتصم السر/النيلين


‫20 تعليقات

  1. هههههه الكلام ده اكيد ؟؟؟ وافضيحتااااااه….الامس القريب اتكلمنا عن السذاجة التي يتم بها ادارة الصرافات الالية والبنوك ….واليوم محلات الذهب تثبت سذاجتنا واستهانة واضحة بالقواعد الامنية….والله البيسافر بي مطار الخرطوم يعرف قدر شنو البلد دي ماشة بي البركة..عمال داخلين وخارجين واي واحد ممكن يخش اي حتة وجوطة عجيبة واصغر عامل ممكن يخش ليك جوة الطيارة يخت ليك قنبلة ويمشي..ويسرقوا ليك حاجاتك من جوة الشنطة وما تقدر تفتح خشمك……..مهزلة

    1. مطار الخرطوم كل حاجة بالقروش عامل يوصلك حتى الميزان بقروش لوماعندك قلم تكتب بيهو استمارة المغادرة بقروش وكمان جابت ليها سرقة تحت سلم الطائرة ونحن واقفين فى الصف عشان نركب الطيارة يجيك موظف يقول ليك الشنطة دى ممنوع ويديك ملصق شحن وعند الوصول قسما بالله لم اجد فلوس وجوالات وهلمجرا ده مطار الخرطوم ما يعرفوا الايقولوا ليك زيت السمسم والكركار ده ممنوع اكثر من لتر

  2. صدقت يامغبون سذاجة في كل شئ في البيت في
    الشارع في المسرع وحقيقة زي ماقلت البلد ماشة
    بالبركة ساكت .. لو دخلت فتاة لابسة توب جميل
    ودهب تلقي القسم كلو ارجف من الضباط حتي العسكري
    العادي …
    الانقاذ عقول مليانة نفايات فاشلة في كل شئ ولسه دي
    المناظر .. وزي ماقالت الاخت لايوجد حس امني بالمره
    واحتمال الحرامية اكون جابوا للعساكر شاي ولقيمات

  3. شكلوا معتصم مؤلف خبر للاثارة ودخل فيه الوزير والشرطة يبدو الموضوع في حاجة لكن برضه فيها خيال واثارة وغرض.

  4. اهن ومني دي عرفت كل هذه التفاصيل من وين وشافت الشوال كيف كان ملياان بالدهب غايتو الان يكونو دخلو اريتريا ولا تشاد

  5. والله ماقلت إلا الحق يا مغبون قبل اسبوعين بس انا غادرت خارج السودان
    وكانت معاي واحدة ايرلندية في صف الوزن
    حيث ململة في الصفوف وحركة الصف بطيئة لدرجة جعلت كثير من الخواجات يجلسون ارضا
    لانو بتلقي 4 موظفين يقلبون في جواز واحد
    وكانت خلفنا سيدة تريد ان تتجاوزنا
    فجاة جاء موظف حمل شنطتها امامنا
    وقدمها علينا فوبخته علي صنيعه
    لان الايرلندية نططت عيونها
    قلت له كيف تجرؤ علي فعل ذلك
    قال لي انه مجرد عامل هذه السيدة قالت لي احمل لي شنطتي للميزان
    المهم منظر المطار جيعان
    واوعي تدقس ما تشيل معاك قلم لانو اوعي تدقس تشحد قلم لانو الكتابة بقروش والله
    غايتو جوطة الله المستعان
    الموظفين عبارة عن وليدات اولاد ذوات بس بيتعلموا في الخدمة جديد

  6. فعلا يا جماعة السبهللية واضحة فى كل مكانز هل هذا يعود الى طبيعة الشعب السودانى المتسامح ؟؟؟
    فى فيما يتعلق بالسرقات انا اكثر من مرة ارسلت طرود بريدية فيها اغراض شخصية من السعودية للسودان. عند الاستلام نكتشف ناس بريد السودان فتحو الطرود وسرقوا منها ما حلى لهم. هذه السرقات حصلت معى اكثر من مرة.
    دخلت الموقع اللكترونى على اساساتصل بهم لكن لا يمكنز

  7. فعلا يا جماعة السبهللية واضحة فى كل مكانز هل هذا يعود الى طبيعة الشعب السودانى المتسامح ؟؟؟
    فى فيما يتعلق بالسرقات انا اكثر من مرة ارسلت طرود بريدية فيها اغراض شخصية من السعودية للسودان. عند الاستلام نكتشف ناس بريد السودان فتحو الطرود وسرقوا منها ما حلى لهم. هذه السرقات حصلت معى اكثر من مرة.
    دخلت الموقع اللكترونى على اساساتصل بهم لكن لا يمكن.

  8. أشتم رائحة حبكة قوية
    ليه الشرطي بهذه السذاجة لا يطلب إثبات شخصية ولا يتأكد من رقم سيارة
    والتكنولوجيا الجديدة المتاحة لأبسط مواطن لماذا لم يصور الشخصيات التي حضرت إحتياطا
    يا لها من سذاجة أو تصنع سذاجة لو كان المحل شريك فيهو وزير أو غيره

  9. افراد الشرطة محتاجة للتدريب الذهني عشان ما يتم وصفهم بالغباء …والحرامي ذكي شديد عشان كده ح يكون تحدي للشرطة للقبض عليه .

  10. ههههه والله مهذله واهلنا في السودان فيهم الطيبه اما الكيزان بتغشهم المظاهر للاسف

    والله المستعان

  11. انا بعرف حاجة واحدة المال الحلال مابيروح ولو حلال بيجيه وانشاءالله يكون بيطلع زكاة
    لكن صراحة نحن بقينا اخطر من اولاد بمبا
    وانا بعذر قسم الشرطة لجراءة الحرامي المتمرس

  12. ربما تكون حبكه من شريك الوزير لكي يستحوز علي الذهب و يضرب الوزير و الوزير ما يقدر يتكلم او العكس صحيح هههههههه ارجو انو الشرطه تحقق معاهم الاتنين …..كل شي وارد

  13. عجايب ,مفترض التحقيق يكون مع الشرطة .كيف يعطو تصديق لعمل شئ بدون اثبات الملكية؟

  14. گٍيِفُ تٍمٌتٍ عمٌلّيِهً آلّقبض علّيِ آلّمٌجُرمٌيِن

  15. الغريب البوليس م عاوز يتطور الغريب مليون حق ضايع ومظلوم الغريب الناس تكره تفتح بلاغ عشان القانون لمن يصل للحق يكون كمل او مديون صاحب القضية تفتح بلاغ اول كلمة تؤجر تاكسي على حسابك عندك امر قبض بلو واشرب مويته

  16. الحمد لله تمكنت قوات المباحث المركزية الان من القبض علي 4 من منفزي سرقة دكان الدهب ام درمان بما فيهم المدبر والممول. وبحوزتهم الدهب المسروق في حالة تأهب لترحيله لمنطقة غير معلومة وحرزت المعروضات . وجاري الترتيب الان لقبض بقية المشتركين في التنفيز الحدادين ومتخصصي كسر الخزانة . وسط تهليل وتكبير وفرحة عارمة ضربت مكاتب قسم المباحث المركزية امدرمان

    هذا ارسل بواسطة واتساب اذا كان صحيح تحية واجلال واحترام للمباحث

  17. صحيح في مطار الخرطوم يوجد تجاوز في الصفوف لانه نحن ما بنحترم النظام بل وبنفتخر بان الواحد فينا ما بقف في الصف بس هناك ميزات لا توجد في اكبر مطارات العالم واهمها ان خدمه النت مجانا منذ تاريخ استفادتي منها قبل خمس سنوات وكذلك المطار الوحيد الذي يوفر جراج للعربات مجانا كما وتتوفر خدمه عربه نقل الحقائب للمسافرين مجانا