بابكر سلك

نحنا شعب فنااااااااان


> كلنا بنتكلم عن الشعب السوداني من زوايا مختلفة
> الشعب الكريم
> ناس حرم نضبح ليك
> الشعب الشجاع
> محمد علي باشا لما دار الرجال مامشي تكساس ولا برلين
> جا السودان
> الشعب اللماح الفطن
> وليست قصص ود حبوبة الا تأكيد على فطنتنا وحكمتنا وحسن توقعنا وتنبؤنا
> واذكر أنهم قالوا لينا ود حبوبة قال
> آخر الزمان الكلام بالخيوط والسفر بالبيوت
> وكان يقصد التلفونات والقطر
> ولو قعدوا معاهو شوية
> كان تنبأ ليهم بالزمان البعد آخر الزمان
> وكان قال فيهو
> الكلام بدون خيوط
> موبايلات يا عمك ونت وكده
> والسفر بدون بيوت
> ياحليل القطر
> نحنا شعب أوصافهو كتيرة
> جدنا تهراقا العلم الناس الحرابة
> ما علمهم المحبة
> علمهم الحرابة
> وشعب ينادي بالاتحاد من زمنا بدري
> ويؤمن بأن قوتنا في وحدتنا
> مرفعينين ضبلان وهازل شقوا بطن الاسد المنازل
> نحنا ما هينين
> ونحنا شعب نفخر بأننا مأمونين على بت الحلة وبت القبيلة وحتى المرة الغريبة
> قال الشاعر في فخره بشجاعته وأمانته على المرأة
> أنا الدابي الرصد تحت الحجر والسارا
> أنا المابخاف الموت وكت الرجال تضارا
> أنا أخو البت المعاي شدت رحالها
> انأ المأمون على مرة الفريق والجارا
> وما نفاج أم درمان القديمة، إلا تعبيراً عن تلك الأمانة الشرفية وقدسية شرف الأسر
> برغم من إنو اليومين دي أمانة نهي بالكل نهي عند البعض
> ولكنهم قلة
> تفرط تلقى الأمانة لحقت مدارس بيت الأمانة
> أيها الناس
> نحنا ما ساهلين
> نحنا فنانين شديد ومميزين
> بلادنا برضك مميزة
> حتى الطير من أطراف تقيها شبع
> بلادي سلام برغم الأحداث التي قادتنا للخلف طويلاً
> بلادي أمان برغم تفلتات البعض واعتداءات العصابات التي تطلق على نفسها نيقا
> نحنا شعب فنان
> حتي في الاختلاس ده بنختلس بي فن متفرد
> صاحب المنصب البحب يختلس بتفنن في اختلاسو
> يحير ليك المال العام قبل ما يحير الدولة
> ويخلي الشعب ممحن
> الشعب كلو بقى خاتي يدو في خدو وخدو يبس لو دايرين نشلخو إلا بي مبرد
> نبرد بس
> موس مابتشيل من الخشب
> نحنا شعب فنان شديد
> في السوق ده تقول للزول بي كم
> يقول ليك بي مية وخمسين
> تقول ليهو خليتها
> يقول ليك تعال شيلها بي تلتين
> تقول ليهو بي سبعة
> يقول ليك شيلها بي تمنية
> ويضيف
> والله أنا استوسمت فيك خير وداير أبايعك
> ده دحين مافن !!!
> نحنا الشعب الوحيد الفي الدنيا بسأل عن الحاجة بي كم
> لأنو أي زول ببيع حسب هواهو
> في شعب لاقي هواء زي ده ؟؟؟
> وفي شعب بلقى هواء زي ده لو ما فنان ؟؟؟
> ياقوم
> فنون الشعب السوداني في مناحي كثيرة
> الليلة دايرين نمسك واحد من تلك الفنون
> الشعب المخرج
> ياخ بنخرج ليك الأحداث بصورة هوليود وبوليود ما فكرن فيها
> صورة بت لابسة دهب
> نتداولها في الفيس
> نقول دي بت فلان الفلاني
> والدهب ده جابو ليها هدية فلان الفلتكاني صاحب ابوها
> ونحدد اسم البت واسم أبوها واسم صاحب أبوها
> وتطلع الحقيقة انو البت دي ما بت فلان
> واللابساهو ده ما دهب
> ده دهب الجمل ساي
> دهب صيني
> وفي الإخراج نثبت إنو ده دهب الشعب
> ونتكلم عن مناجمنا في جبيت
> وعن تعديننا العشوائي المن الصحاري خلانا نحفر خشم البيت
> راجين الجهاز يصفر
> ولا يصفر إلا الاسعاف والتلاته تسعات والسارينات
> وراجين الجهاز يصفر
> دهب الشعب خليهو
> سمعتو قصة سرقة دهب سوق ام درمان ؟؟؟؟
> على بال ما الشرطة قبضت الحرامي
> شخصياً سمعت سبع روايات بسبع قراءات مختلفة عن السرقة وتفاصيلها
> نحن شعب مخرج فلتة
> وتعال شوف موهبة الاخراج عند المسؤولين
> ياخ بقولوا كلام كاتب السيناريو ما قالو
> وبخرجوا ليك المواقف والأحداث بطريقة
> نور الدمرداش ما فكر فيها
> تتذكروا بتاع اللحام الطارت منو شرارة حرقت اليرموك؟؟؟
> اخراج من أمو يا عمك
> لكن
> أكتر حاجة عجبتني في مواهب الشعب السوداني الفنان
> هي الشعب المونتير
> شعب بمنتج ليك القصص بي موسيقي تصويرية ومؤثرات صوتيه ما خطرت على بال زول
> شوفوا القصة دي
> احمد: شفت الحادث بتاع شارع الشنقيطي يا حسن؟؟
> حسن : كيييييييف .. وحضرتو كمان
> احمد: أحكي لي أحكي لي
> شفت جمب حديقة أم درمان الكبرى في التقاطع
> بتاع الدفار كان جاي من على المنطقة فاتح ليك تيكة فووووووووووووو
> الاستوب بنققققققققققققق ولع ليك احمر
> بتاع الهايص فيو جا داخل الشارع
> بتاع الدفار كرووووو كبسو ليك
> بتاع الهايس فقد توازنو وتووووش دخل ليك في بتاع الكليلك طااااخ
> بتاع الكليلك اوردولب اتقلب ليك
> بتاع الحركة صفر تووووووووت
> كان في كلب جاري
> طششششششششش دخل ليك في الموية
> في واحد خاف من الكلب
> جمبلوق وقع ليك في الموية
> كان في بتاع ركشة ماشي
> وررررررررررررر
> لف ليك من الحفر وقبض فرملة
> حيييييييييييييييييييييك
> نزل كبس ليك بتاع الدفار بونية
> تووووف
> كان في بتاع مباحث متلبد
> بس كحل ليك بتاع الركشة
> دنق دنق
> وجيييييييييغ خنق ليك بتاع الركشة
> جا الاسعاف ناني ناني ناني
> شالهم كلهم وروووو قفل ليك الباب
> وفوووووو فحط
> ايها الناس
> «إن تنصروا الله ينصركم»
> آها نجي لي شمارات والي الخرتوم
> كان شفت يا والينا
> واحد سألنا وقال لينا
> ماهي مخرجات الحوار الوطني الفينا
> قلنا ليهو هو انتهى يا اخينا؟؟؟؟
سلك كهربا
ننساك كيف والكلب قام على زول فيييو والزول جري فرررر والكلب عضاهو جك والزول صرخ جاااااااك
والي لقاء
سلك


تعليق واحد

  1. يا ابو جهل يا جهلول ما توزع جهلك علي الناس يالمجان القال السفر بالبيوت و الكلام بالخيوط مش ود حبوبة انه الولي العارف بالله الحكيم فرح ود تكتوك. ود حبوبة ده ثائر من المهدية من قبيلة الحلاوين وقيلت فيه مرثية شهيرة ” بتريد اللطام” انشاء الله الله يسلط ليك من يلطمك في رأسك الشين ده. يا كافي البلاء ساقط عربي وانجليزي ورياضيات وتاريخ ومعلومات عامة وثقافة . دي بلوة شنو الوقعنا فيها دي.