يا سلك لو عاوز تفك (الجبص) ألبس (الكسكتة)

موش مرات في زول بقول ليك والـله انا الموضوع دا اتعقدت منو عديل كدا..المريخاب اتعقدوا من الكاردينال
شايف بكري المدينة الايامات دي بتظارف..شايفو قاعد يتراشق..ويخفف في دمو..ويكتل في ضلو..ويتصور مع علم الهلال
اقول ليكم حاجة – محمد النني ذاتو نقلو للارسنال الكاردينال…كورة النني دي لا بتلعبوا في الارسنال ولا حاجة
سلك كتب : (لكن بصراحة ..اخوتي الاهلة الشرفاء ما قصروا ..في قروبات الهلال تمنوا لي الشفاء ..في رسائلهم كفروا لي ..في بيتنا زاروني)

المريخاب عندهم اعتقاد ثابت ان (الكاردينال) وراء صفقة (شيبوب) الذي انتقل الى فريق شبيبة القيروان.
بقولوا كدا.
عليكم الـله دا (برد) يمشوا فيه (تونس).
شيبوب ركب (التونسية).
وظهر ليك في التلفزيون زي اخصائي الجراحة.
بقوا يتوهموا ليك (الكاردينال) في اي حاجة.
بقى يطلع ليهم في المنام.
قالوا – الكاردينال بعد ما عمل (الجوهرة الزرقاء) ممكن يعمل اي حاجة.
ما في حاجة بعيدة عليه.
زول الجوهرة الزرقاء عملها تلات طوابق…يغلبو يحول شيبوب لشبيبة القيروان التونسي.
ما كتيرة عليه.
اقول ليكم حاجة – محمد النني ذاتو نقلو للارسنال الكاردينال.
كورة النني دي لا بتلعبو في الارسنال ولا حاجة.
الصفقة دي وراها الكاردينال.
بس ناس شوبير ومدحت شلبي وخالد الغندور ما يسمعوا بالكلام دا.
الناس ديل لسانهم خفيف.
والـله لو جينا للجد – الكاردينال ما في حاجة صعبة عليه.
الزول دا رجع ليك الامل للممتاز مع انسحابه.
الامل سنترليق ما لعبو – مع ذلك بقى في الممتاز.
ويا ريت لو وقفت على الامل.
الرابطة كوستي نزلت عديل.
وقنعت من الممتاز.
وقعدت في دوري الاولى (40) يوم.
ورجعت بعد كدا.
في فريق في الدنيا بنزل من الممتاز (40) يوم وبرجع بعد كدا.
في زول بقدر يعمل الحاجات دي غير الكاردينال.
ما كتيرة على الكاردينال يحول (شيبوب) لشبيبة القيروان.
الكاردينال جدو (تونسي).
وعندو علاقة قوية مع شبيبة القيروان.
عادي شيبوب يلعب في تونس.
وعشان الموضوع يبقى ليكم واضح.
عادي السنة القادمة تلقوا امير كمال بيلعب في (البن) الاثيوبي.
وضفر في الهند.
ابراهومة في الصومال.
مازن شمس الفلاح في كينيا.
وبكري المدينة في التعاون السعودي.
واقول ليكم الكلام الجد – عندنا فكرة نحول كرت مزمل ابوالقاسم (تشاد).
مزمل يمشي يعمل حركاتو دي في (انجمينا).
يطلّع الصدي هناك.
يصدر اليوم التالي.
بي طريقتو.
يقول ليهم الكرت ما وصل.
الايميل اتمسح.
اللاعب قفز من الطابق الثالث.
زول يسألو ما في.
واحتمال كبير (سلك) نوديه (الكويت).
سلك زولنا – بنوديه دولة كويسة.
سلك بالعقال ما بتفاهم تاني.
هسع وينو جمال الوالي؟.
جمال الوالي براهو كدا – قال ما بيرجع.
جمال الوالي برضو طفشو ليك الكاردينال.
الكاردينال صعب.
الكاردينال ممكن يعملها.
اذا كان شيبوب هو اول لاعب سوداني يلعب في الدوري التونسي ..غريبة يعني على بكري المدينة يمشي يلعب في السعودية.
شايف بكري المدينة.
شايف بكري.
شايف بكري المدينة الايامات دي بتظارف.
شايفو قاعد يتراشق.
ويخفف في دمو.
ويكتل في ضلو.
ويتصور مع علم الهلال.
صاحبكم عاوز يرجع.
عاوز يتراشق.
بقى يضحك في الصورة.
الفلس دا مع بكري المدينة ما بنفع.
يا بكري المدينة نحن في الهلال ما عندنا ليك خانة.
وفي الرديف عمرك ما بيسمح.
لكن لو عاوز تلعب في شبيبة القيروان ممكن.
لو عاوز تلعب في الدوري السعودي ممكن.
عشان كدا ما تقعد تتراشق لينا ساكت.
وتخفف في دمك.
بكري المدينة وقت يخفف دمو بيبقى زي يونس شلبي.
يا بكري المدينة رشاقتك دي احسن تعملها عديل كدا.
رشاقتك دي اعملها عديل كدا لي شبيبة القيروان.
اختصر المسافة.
احسن ليك بدل ما تقعد تتلب من الطابق الرابع.
وتسلق المواسير.
وتلف ليك بي 4 مطارات.
اختصر الطريق طوالي.
انت سنك ما بتسمح بالحاجات دي.
ولا عندك مروة لي شقاوة (شيبوب).
المريخاب اتوهموا في عمرهم.
اتعقدوا عديل كدا.
موش مرات في زول بقول ليك والـله انا الموضوع دا اتعقدت منو عديل كدا.
المريخاب اتعقدوا من الكاردينال.
شيبوب دا خطفوه من جوبا.
قفزوا بيه من الطابق الرابع.
اتسلقوا بيه في المواسير.
وحاموا بيه في (4) مطارات بدون اوراق ثبوتية.
واتصوروا معاه ناس ابوجريشة في (برد) يقطع النخرة.
تتخيلوا بعد الحاجات دي.
بعد (العلوم) دي كلها.
شيبوب تاني رجع الهلال.
تاني مشى للكاردينال.
براهو ..بي كامل ارادته.
عشان كدا المريخاب اتوهموا ليك.
دخلتهم خوفة.
موضوع سلك ..الناس مفتكرين وراهو الكاردينال.
الركشة دي معقولة بس ظهرت فجأة كدا قدام سلك.
قالوا ليك سلك لمن وصل السلاح الطبي ..ما عارف الحاصل شنو؟.
الوقت كلو غير (شيبوب – شيبوب) ما بقول في حاجة.
المسكين خبطو (شيبوب) ..لكن ساكت عملوها في بتاع (الركشة).
سلك امس عرف غلاوتو عند الهلالاب.
الهلالاب كلهم بيسألو عن (سلك).
سلك الراقي امس بي (جبصو) شكر الهلالاب.
سلك كتب : (لكن بصراحة ..اخوتي الاهلة الشرفاء ما قصروا ..في قروبات الهلال تمنوا لي الشفاء ..في رسائلهم كفروا لي ..في بيتنا زاروني ..هذا هو مجتمع الرياضة الذي نعرفه ونريده وننشده .شكرا لاخوتي الاهلة الشرفاء ..برغم انو الركشة الضربتني قالوا مكتوب فيها بي ورا كردنة).
يا سلك ..انت الركشة بي قدام ما شفتها.
ح تكون شفت الركشة بي ورا كيف؟.
قلت ليكم الناس ديل (الكاردينال) وهمهم ليك.
اها يا اخوي يا سلك ..لو عاوز تفك (الجبص) ما تشتغل بي كلام الدكاترة ديل.
الدكاترة ديل بتكلموا ساكت.
يا اخوي لو عاوز تفك الجبص ..ألبس (الكسكتة).
الكسكتة لبسها شيبوب طلع في شبيبة القيروان.
سادومبا لبسها قال ما برجع ليبيا.
علم والـله.
طبعا سلك ما عندو مشكلة في (الرباط الصليبي).
وما عندو مشكلة في (الانكل).
مشكلتو بس في (الركشة).
والركشة مكتوب فيها (كردنة).
عشان كدا يا مزمل احسن تعمل حسابك.
الايامات دي ما تقطع ليك شارع زلط.
وما تركب ليك طيارة.
الكاردينال دا في (الطيارات) ممكن يظهر.
اصلو ما في حاجة بعيدة عليه.
انتوا عارفين الدكتور بعد (الجبص) كتب لي سلك شنو؟.
الدكتور كتب ليه (حبوب شيبوب) الكتب عنها مزمل ابوالقاسم.
شفتو كيف؟.
نحن اصلو ما عندنا حاجة ساكت.
نحن اي حاجة عندنا بي نظام.
والـله سلك يلقى حبوب شيبوب يقوم زي الحصان.
امير كمال ما بثبتو.
لكن يا سلك – نحن لو جينا للجد.
عليك الـله انتوا البعملوا فيه المريخاب دا شوية.
والـله انت صبرت شديد.
واستحملت كتير.
الحاجات البتحصل في المريخ دي لو حصلت علينا – كان دخل فينا (قطر) عديل كدا.
على العموم كفارة ليك يا زول جميل.
وان شاءالـله سلامة.
……….
ملحوظة : الليلة ما جبت اي سيرة للمطرة.
هوامش
ما عارف ليه؟.
وما عارف الحاصل شنو؟.
المريخ قالوا ليك معسكرو في الدوحة تاميه (تحويل رصيد).
جمال الوالي قال ما برجع تاني.
يرجع وين ؟..والجوهرة الزرقاء وصلت الطابق الثالث.
طابق واحد – ممكن يجهجه ليك الجماعة.
عاوزين جمال الوالي يرجع ليكم بعد الطابق الثالث.
ح يقول شنو؟.
سورو بتاع الدقير ما في زول بقتنع بيه.
نجيلتو..
يعمل شنو تاني.
نحن وصلنا الطابق الثالث.
الرديف بتاع الهلال معسكر في بورتسودان.
انتوا بتتكلموا كيف؟.
الهلال ح ينور البلد.
وبورتسودان على موعد مع الابداع.
ناس موكورو ديل قالوا بعملوا في حاجات غريبة.
وناس ولاءالدين ..الحاجات البعملها محمد الامين في نادي الضباط – بعملها ولاءالدين في المستطيل الاخضر.
اصلا نحن ..اي حاجة عندنا بي نظام.
ونحن ما عندنا حاجة ساكت.
وبنتكلم فوق رأي.
المهم هو متابعة حالة المصابين.
التشخيص الخاطئ ممكن يقود الى كوارث.
والمتابعة الطبية الدقيقة مهمة.
مواهب الهلال تحتاج الى رعاية طبية كبيرة.
يا سلك لو الدكتور منعك من الكتابة يكون عملها ظاهرة.
يكون هلالابي.
عشان كدا ما تقيف.
ناس رمضان عجب وامير كمال ديل بي جبصهم بيلعبوا.
………..
عاجل : شيل ركشتك يا سلك وامشي على ناس سمير فضل ..بعيدوا ليكم (شيبوب).