مقالات متنوعة

نضال حسن الحاج : “محمود” .. عساك بعد السفر مرتاح


رحل خلى الجرح نازف بتاوق للدبارة رفيق
رحل والكون مستف ضيق
نشف حلق الوتر آسف عشان صوتو الببل الريق
رجع فتح المواني فريق
وماخليت وراكا طريق
خبارك يعني يا إنسان
مشيت لا رجعة لا هجعة ورقد حلم الوطن ندمان
واتوكيتنا في دربك عصاية حرقه لي فنان
بكب في الضل على الشارع وينورق في ضرا النسيان
خبارو انحنا أمناك وما اديتنا راحة الليل
خبارك والزمن واقف على حس الفراغ والحيل
رقدت ولا خبر لاحس ولا اتقفيت هروب الخيل
سرحت معانا ياحاضر ممدد متل أبونا النيل
وما قلينا من نبضك متاع السكة للأطفال
وما دسينا من وشك قفاك لا شفنا سترة حال
وماصدح الوطن طربان ولافضل فرح لافال
ولازال الوجع راقد ممدد بالعرض في البال
خبارك هسي فايت ساي
سبعتاشر سبعتاشر وأعاين لي مروق الناي
سبعتاشر وأفوت بي جاي تتاوق في الفراغ أعضاي
ولا كان الحضور عندك ولا جيت مره تبقى معاي
خبارك يعني ماحسيت وكت صبح الشعور واجب
قرنت مع الوطن حاجب
وقف ضد الصراخ حاجب
حجب بيني ورؤاك ورؤاي
ومالوليت وراكا جناي
هديل شفع قصايدي هديل يكفتو في الوجع لسه
ورحيلك يعني كان ميلاد وجع تكوين حرف حس
محل ما لاتجاه غنيت غناك في البوصلة اندس
وضهب كل الوراك غناك كتل حيل الغنا وعس
وإشاراتك عشان ألقاك مقيل في ضرا الأفراح
ضريح لي آخر الصلاح
علاج أعمق وألذ جراح
ولا عشم الزمن يرتاح
ولا رقد الوجع وارتاح
هدا الضل الحلبناو من شمش أحزانا عد وراح
هدا الوطن الحلمتبو خير نزف لامن شبع أتراح
هدا الليل المليتو نحيب بكاك لحظة شروقو صباح
سلامات يارهيف الحس
عساك بعد السفر مرتاح.؟