رأي ومقالات

نصائح هامة للسفر والاغتراب في السعودية


1- اول حاجة تعملها تطلع رخصة
2- حاول تعيش في جده او الدمام او الخبر لانو الرياض صعبة جدا وغالية جدا
3- حاول تصاحب كل الناس وخليك اجتماعي
4- ما تقارن مرتبك بالسوداني يعني لو انت مرتبك 3000 مش معناها انك بتقبض 9000 جنيه سوداني
5- اي حد هنا ما بيعرفوه اسمه محمد لحد ما يعرفوا اسمك
6- السعودية مش فسح وطلعات السعودية من الشغل للبيت ومن البيت للشغل واخرك الحدائق العامة
7- السعوديين مش ملائكة فيهم السيئين زي مافيهم الناس الكويسين والطيبين والمحترمين
8- ماتغش نفسك وتقول سنتين ابني بيت واعرس الكلام دا تنساه خالص كان غيرك اشطر
9- حتقول لي انا حافضل متغرب كده حياتي كلها حقول ليك اشتغل وانت ساكت
10- السعودية مازي زمان يعني حنك ال 500 ريال مصاريف ده تنساه خالص
11- ما تسوق عربية ماعندها تأمين
12- لو عملت حادث بطل امور السودانيين دي ماتنزل تسب وتكورك عادي يا معلم حتنزل بكل ادب تسلم على ال عمل معاك حادث لحد ما نجم يجي
13- ماتقول لي نجم ده شنو حتعرف بعدين

14- حتلخبط معاك في الاول وحتلاقي نفسك مفلس وما بتوفر حاجة وبالعكس ممكن تستلف عااااادي جدااا
15-رأس مالك هنا الحقيقي اصحابك
16- لو حصلت اي مشكلة من اي نوع ماتحكي لي اهلك في السودان حاجة علشان ماتقلق بيهم
17- لو لقيت نفسك متضايق وبتبكي عااادي برضو يا معلم كلنا بكينا
18 – اخر حاجة خليك ديما متفائل مهما كنت في مشاكل
19_ لو حصلك مشكلة مع كفيلك وبلغ عنك هروب واكل تعبك وشقاك ومستحقاتك الموضوع دا عادي بيحصل يعني ده روتين ولازم تتعود عليه
20- لو مشيت مكتب العمل تشتكي علي كفيلك ماتفتكر الموضوع ساهل وحيخلص بسرعة لازم يكون بالك طويل لانه عادي الموضوع بيقعد سنين
21- حنك انك حتعيش احسن عيشة وشقة وسيارة وراتب وجوال بتاع حديث كلها اوهام مجرد ما توصل حتشوف وتجرب
22- اوعي تفكر نفسك فلانتينو وحريم السعوديه هتجري وراك وممكن تعرس منهم وتعيش ملك عشم ابليس في الجنة
23 – لو لقيت حد من اصحابك عامل نفسو مهم وبيتجدع ولابس احلى لبس وراكب سيارة موديل السنة وكل شوية يضرب تليفون للشغل قدامك ويكورك ويجوط ده مندوب ودي سيارة الشغل وبكورك في الهندي بتاع الشاي

وبي كدة تكون غربتنا انتهت واتمني ان تكون من الدروس المستفادة وعبرة وعظة واتاكد ان حتتعلم الرجولة وتحمل المواقف الصعبة وحتخليك بعد كدا ماتستغرب من اي حاجة وحتعرف صاحبك من عدوك وهتاخد خبرة كبيرة في مدرسة الحياة ( الغربه).

(متداول على الوسائط )


‫18 تعليقات

  1. الراجل بيتكلم صاح … الكلام دا فيهو الكتييييير من الحقيقة … شكرا .

  2. وأهم شيئ الشغل حظوظ ممكن تشتغل بعد شهر وممكن بعد سنه، ممكن تكون مؤهل وتشتغل ب 10 ألف وممكن ب 3 ألف ، وممكن غير مؤهل تشتغل ب5 ألف وممكن ب ألف ونص. وممكن تقع في كفيل هادي وراضي وممكن تقع في واحد يوريك النجوم عز الضهر.

  3. اضف نصيحة عدم الاقتراب من شرك البطاقات الائتمانية التي يحاول أن يغريك بها مناديب البنوك .

  4. كلام الزول دا مظبوط كنت في السعودية في العام 2000 الي العام 2005 الكفيل رفض يعطيني نقل كفاله وحقوقي كمان المهم بعد مشاكل تم تلفيق تهمة تحريض العمال وارسل لي ناس الجوازات وتم تسفيري تحت نظر السلطات وبدون حقوق .الله لا كسبو.وبعد ثلاثه اشهر رب هون لي قطر والحمد لله

  5. وكمان حقو تعرفوا الفرق بين عقد العمل والفيزا الحرة … عقد العمل يعني طالبنك طلب وح تجي رأسا على صاحب العمل وح تشغتغل معاهو حسب الاتفاق المسبق ومن أول يوم تجي المملكة … ودي الآن ما كتيرة لأنو حتى عقود العمل بقوا ناس مكاتب الاستقدام ببيعوها للناس
    أما الفيزا الحرة حت تشتري الاقامة من حر مالك والكفيل ما عندو ليك شغل واحتمال بعد ما تدفع دم قلبك تجي هنا ما تلقى شغل مش كده وبس ح تجي هنا تدفع تكاليف استخراج الاقامة ومكتب العمل والتأمين .. واحتمال كبير لمن تجي تنقل يقول ليك ادفع لي … واحتمال يفكك بدون مقابل وكلو شيء وارد
    وماتعيش أحلام زلوط وتقول للمدام أو الخطيبة أول ما أصل بعمل ليك الاقامة واللا الزيارة … معظم المهن الطالعة للسودان العمالية لا بتجيب مرة ولا بطيخ وح تلاقي مليون مشكلة عشان تعمل إستقدام لو كانت المهنة عمالية
    يا صاحب المقال مالك علينا ما تخلينا في حالنا …..

  6. أهم حاجة ما ذكرها أن نحن بنغترب بدون هدف الزواج هدف أداء فريضة العمرة هدف الحج هدف وبعدين رد جزء من الدين لمن قدموا لك خدمة هدف والهدف الأكبر مواظبة الصلوات فى المساجد وهى مهيأة فى أى مكان فى السعودية

    أما التوفير قيمكن لأى شخص أن يوفر 20% من راتبه بشرط الراتب يكون اكتر من 2000 ريال

  7. لو جاك ضغط وسكري وقلب عادي لأنو مافي زول بيمرق صحيح وكذاب القال أنا طلق حديد – لو أكرموك وجابو ليك فتة عدس أو فول أكل وأنت ساكت وقول الحمد لله ولو واحد مد ليك ساندوتش وهو ماسكو بأيدي العشرة وقال ليك أتفضل قول ليهو شكرا والله يريدك ريد لأنو عادي أخيرا لو جاك زميلك في السعودية زيارة في بيتك في السودان أكلو العدس وقلبك قوي لأنو عادي لأنو دي أكل الجماعة الطيبين هنا ولو حاسبوك علي داير المليم علي حق الحلة برضو عادي أدفع وأجرك علي الله لو جاك تلفون من البلد قال ليك عرس البنت أو الولد أو المدارس أو المستشفيات أو دفتر العزاء أو الكهراء أو الغاز أو الحواشة أو البهائم أدفع وأنت ساكت وما تنتظر شكرا

    1. هههههههههههههههههه أنا بقن علي ال 4 !!!
      الله يعين بس

    1. ما بتعرف النجوم في عز الظهر … والشمس فاقعه .. في السعوديه عادي بتشوف النجوم عز الظهر …بتتجمع كل النجوم في شكل نجم واحد هههههههه

  8. نجم شركة تباشر الحوداث للسيارت المؤمن عليها من الطرفين وترسم الحادث وترسل التقارير لشركات التامين
    وفي حالة عدم وجود تامين ساري المفعول لاي طرف واحد من طرفي الحادث في هذه الحالة الدوريات المرورية هي التي تباشر الحادث

  9. ن جيتو للجد جد الاغتراب عصرو إنتهي لااسباب عديده .بلدك الكبيره دي محتاجه لسواعد قويه . نعم مافي سوداني داخل الوطن او خارج السودان عاجبو الاوضاع الداخليه وحتما لكل بدايه نهايه..لاتفقدوا الامل في الله.هي دروس في الحياه .وثقتي في الله لاتحدها حدود بان معظم مغتربينا سيعودن الي الوطن بمجرد ان ندفن الكيزان والنظام وإني ارى مقابرهم تذغرد .السودان احد ٥دول مرشحه للنهضه الاقتصاديه علي مستوي شرق افريقيا والشرق الاوسط السودان…اليمن…الصومال…ليبيا..العراق..حسب التقارير السريه لدى مجموعه الG8بس لن يكون على يد الكيزان …اصبروا إن الله مع الصابرين