محمد عبد الماجد

لو دي كورتكم ركزوا في الجوهرة الزرقاء احسن


هذه الايام لا افضل الحديث في (الكورة).
اعمل رايح.
لو على الكورة احسن تركزوا في الجوهرة الزرقاء.
تحدثنا في مرة سابقة عن الدوش.
نشوف محجوب شريف تاني.
نرجع – نردد كلامه.
البعض مهموم بقفة الخضار .. وكيس العيش … وحق المواصلات .. ورسوم الدراسة … وحقن الملاريا .
وامشى وتعال بكرة.
الشعب السودانى كله يشكى من الملاريا … وتلفزيون السودان.
الشعب السودانى كله .. بعد يوم سبعة بيشتغل بالمسكول.
الشعب السودانى كله .. يفطر بالفول … ويتعشى بقصائد محجوب شريف.
كانوا يشبعون بقصائده ، ويكتبون على ابواب الملل :(حضرنا ولم نجدكم).
كانوا عندما يصرفون رواتبهم يأخذون (بدل وجبة) … قصيدة من قصائد محجوب شريف.
وكان حافز (الاوفر تايم) يتمثل فى مقطع من السنبلاية.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
نحن ما زلنا نكتشف بعض العبقريات التى لا تتاح للاخرين ، نغذى ارصدة الهاتف ، والكهرباء بكلمة قالها محجوب شريف.
ام درمان بيوتاتها مسكونة بشئ غريب ، ابوابها مفتوحة بغير حراس ، المدهش حتى (كلاب) الحراسة فى ام درمان تعلمت تقديم الدعوة والمجابدة للدخول والغداء للعبابرين.
تلك البيوتات فيها شئ من :
اشوفك جنبى .. وأتمّناك

وأكذّب عينى إنى أراك

اصدق كيف بتحكى الشوق

وليل الغربة .. لى مضناك

لى أنا .. اللى بحلم بيك

ولى أنا .. اللى بترجاك

يا حلمى البعيد .. وعزيز

زمان يا حلمى ما أقصاك

أعد أيامى .. وأحسب بيك

ثوانى العمر .. واستناك

مقاطع كتبها محجوب شريف ، تملك ان توزع كل (الالفة) لكل العيون ، وتقدر ان تشحن كل القلوب بالحب.
الانتظار .. موجع جداً لكنه مع هذا المقطع فيه (انتصار) ، هذه من قدرات محجوب شريف التى استطاعت ان تحول (الظاء) الى (صاد) فانتصر لصبر العاشقين.
تحس من ذلك ان افضل (مصل) يقضى على الملاريا وتبعاتها يُكون ويُنتج من هذا (المقطع).
المقطع .. يحفظ بعيداً عن ايدى الاطفال.
كانت عيونها العسلية ، تتسع للجميع ، مثل مظلة تكتشفها فجأة فى صحراء.
عيونها العسلية ، غيمة ، تبشر الكل بسحائب هارون الرشيد التى اين ما هطلت سوف يأتى اليك خراجها.
ليس هنالك اجمل من قصيدة كتبها محجوب شريف وتغنى بها صلاح مصطفى فتجاوز بها كل مقايس الرسم الجامدة.
ابحث معى فى هذه الكلمات:
سافر زمان..

قبال سنين

لا جاب جواب لا جاب خبر

أمّو تسأل كل طاير

وكل عائد من سفر

خيالو ما فارق عيونها..

ليهو أثر

الاثار فى القصايد داعى للحسرة والالم والوجع ، وإلا ما كانت (الاطلال) موقفاً للبكاء.
نحن الان نبكى سراً على اطلال موقف الحاج يوسف جوار المريديان وابو جنزير وجبرة.
نبكى وحقوق الدموع محفوظة للولاية.
السيد والى ولاية الخرطوم ، لم تعد هنالك (مواقف) ثابتة .. قف المواقف متحركة ، اخشى ان اجد يوماً موقف الحاج يوسف فى ولاية النيل الازرق.
مالنا نحن وهذا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عند محجوب شريف لفافات للصبر وجائزة للوقوف على المبدأ.
ابحث مع محجوب شريف عن ذلك الاثر .. البحث مازال مستمراً.
العيون هنا ارهقها السهر.
السهم يشير الى البناء للمجهول.
ومازال هناك..

فى الركن داك

صوتو وغناهو وضحكتو

وصورو المعلقُة فى الجدار

وجرايدو

والكتب الزمان

الليلة كاسيهم غبار

مصباحو فى الركن الحزين

ومكانو مازال فى انتظار

أصحابو أنداد الطريق

قّدام عيونها مشو اخضرار

عند (الاركان) هذه القدرة على الاحتفاظ بالاحزان ، ربما هى الاكثر تمسكاً بالذكرى ، والذكريات تُقلب الاوجاع ، وتعيد الماضى المسكوت عنه.
والجرايد ايضا تبقى على (تفاصيل) تسقطها كل الاشياء ، الصحف تملك ذلك الحس الذى يجعل (الصوت والصورة) على الهواء مباشرة.
والبحث مستمر… المدرسة تخرج هنا كشاهد فى محضر الذكريات ، ومحجوب شريف من الذين يحشد الاماكن فى حضور قصائده:
يا حليلو لّمن كان صغير

تلميذ بيمشى المدرسة

تشفق عليهو من الطرق

وتخاف عليهو من المسا

كيف ينسى عيديّة وحنان

وكفاح سنين كيفن نسا؟

السودانيون يغلبون كل المفرادات والجمل المفيدة ، عندما يعرضون كلمة (حليلو) وهى كلمة فيها من الحنان ما يكفى لتشيّد سد مروى دون الحاجة الى شركات الصين الهندسية وخبراء الدنمارك الاكترونية.
ويسبق كلمة (حليلو) دائما حرف النداء (يا) للدلالة على ابتعاد الطرف المخاطب ، وحروف النداء تأتى للغائب او للذى تمنع عنه السدود والحواجز.
حمد الريح من افضل الذين استشهد بكلمة (حليلو) فى نصوصه الغنائية ، ولعل اروع استعمال لها كان فى اغنية (الى مسافرة) التى كتبها عثمان خالد فعطل بها حركة القيام فى المحطات والموانى البحرية والجوية والبرية.
عثمان خالد هو الذى استبق شكية خوفه من السفر والفراق فغنى له وهو مازال فى طور (النية) .. (حليلو قال ناوى السفر).
موقع النية هنا اوقوى من وقوع الحدث فعلاً.
ما علينا.
للخصام ايضاً (حنين) ومحجوب شريف قادر على تجميل حتى (الخصام) وتزينه بمحسنات القول والموقف:
كم مرة فى لحظة خصام

بينا انقطع حبل الكلام

واتمد فى شاى الصباح

…………

لو مرة فى لحظة جنون

هان اللى ما ممكن يهون

انا ياما حيرجعنى ليك

إنك وكت بى الجراح

كادت تميل

جيتينى بالحب والحيا

ومرح الشباب

الشاى يأتى به محجوب شريف فى مواقف مختلفة ليكون مرافق له فى كثير من قصايده ، وتلك قدرة عند محجوب شريف وحده للخروج من اماسى الشاى بالفة فيها واقعية البيت السودانى.
شاى المغرب ، فى البيوتات القديمة ، عالم تانى.
كانت هى تقدم الشاى فى المساء بطريقة اساطير اليونان القديمة ، تملك ان تجعل (الشاى) يتحدث فى يدها بسبع لغات.
يضحك الشاى ، حتى يصدر ضجيجاً ، تجده فى مقاطع محجوب شريف تلكك
يا تلك الترامس

وين الصوتو هامس

كالمترار يساسق

ويمشى كما الحفيف

وكم فى الذهن عالق

ثرثرة المعالق والشاى اللطيف

وتصطف الكبابى

اجمل من صبايا بينات الروابى

والظل الوريف

أحمر زاهى باهى

ويلفت إنتباهى

هل سكر زيادة أم سكر خفيف

كل (السكر) يقدمه محجوب شريف فى هذه المقاطع التى صورت حتى ثرثرة المعالق ، وقدم لنا (شاى) يحكى تفاصيل لبكرة وبعد بكرة.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
وتاني نرجع نقول.
محجوب شريف.
يمكن…..
احتمال….
ربما…
اعتقد..
اتوقف هنا ، فليس اقدر على تعاطى كلمات محجوب شريف بأكثر من هذا الحد ، والعين بصيرة واليد قصيرة.
………
و
مباراة بورتسودان عليكم الله ما تجيبوا لي سيرتها.
رجعت لي محجوب شريف عشان ما نتكلم في الكورة.
مالكم انتوا.
غايتو في بورتسودان (الاستقبال) ما كان فيه كلام.
لكن لو دي كورتكم – احسن ركزوا لينا في الجوهرة الزرقاء.
معاكم لاخر طوبة.
بالمناسبة يجب الاهتمام بمباراة الهلال امام هلال كادوقلي في كادوقلي.
والحذر كل الحذر من مباراة الهلال امام هلال الابيض.
هلال الابيض مع اهلي شندي والخرطوم الوطني من افضل الاندية في الممتاز في الوقت الحالي – وهم الاكثر جاهزية.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………..
السيدة (ل) – ما عاوز اقول اي شيء ..برجع ليك.
وقرّط على كدا.


‫2 تعليقات

  1. بمناسبة النفس بينزل ويطلع واحد مشى يزور اخته وهو طالع في الرور الاول اولاد اختة لاقوه وقالول ليه :
    يا خال دور واحد ونفسك فايم ؟؟؟؟
    قال ليهم خلوووووه احسن من غيره ( وانت لسع نفسك قايم )